1Mos. 33
33
Paaili si Jakob pasamba si Esau
1Itconangan si Jakob ioi si Esau pasamba epatngotu sirimanuania. Kalulut nenda iparubei tatogania kai Lea, kai Rahel samba karua pakoinietnia. 2Iuddetnake karua pakoinietnia pasamba tatogadra ka mata, lepa geti si Lea pasamba tatogania, lepa si Rahel samba si Josep bulat kateitei. 3Si Jakob muenung kamatatra sangamberidra, samba masilegeri kakebbunia, purekkuknangan teret pitungaminca. 4Tapoi si Esau pabalau masiailiake si Jakob, iageti lakkaiakenangannia samba sigguknangannia. Samba pusuorangan ruadra. 5Kele ai itso si Esau sangamberi tainanalep samba tatoga nenda, panonounangan, “Kasei sia pasamba ekeu nene?”
Alegeinangan si Jakob, “Sia nenda tatoga sipanguruatnakenen Taikamanua kaku.” 6Lepat nenda ei karua pakoinietnia pasamba tatogadra, lepa murekkuk. 7Lepa geti oi si Lea pasamba tatogania, samba kalepakatnia oi si Josep samba si Rahel, lepa purekkukrangan sangamberidra.
8Panounounangan si Esau, “Apa pinatum kapasamba mungkuat sirimanua siailiku simaruei?”
Aleginangan si Jakob, “Masiangkaake bagam.”
9Tapoi kuanangan si Esau, “Pukayoatku simemetnia. Ta'anai lulunia nuake panguruat kaku.”
10Kuanangan si Jakob, “Ke'akupasanangan paatuatnu, silo le panguruatku nene. Kaku, masitso pumataatnu makere ke masiitco pumataat Taikamanua, kalulut ukunu katubuku. 11Kutiddou, silo le panguruat siambitku nene. Taikamanua simanuntu baga le katubuku samba masiake sangamberi obaketku.” Lepa pusuminangan si Esau, pat silonangannia.
12Lepa kuanangan si Esau, “Kauan tapatarek tubu taei, muboiki le aku muenung kekeu.”
13Aleginangan si Jakob, “Nuagai le, tatoga nene masaggo, samba kupagaba le sangamberi tarimeu si putotottot. Ke' tugirit simaola, kananen bai sangagogoi le, sangamberi mungkuat tarimeu nenda matei le geti. 14Puenunggan le boiki, ailei kumoileake kuoi. Muenung le geti aku simaola pasamba terimeu samba tatogakku nene teret ailimaian ekeu ka Edom.”
15Kuanangan si Esau, “Kaseddabainia, maeruan kulegeiake katubut piga pa' sipasitutnaku.”
Tapoi aleginangan si Jakob, “Buian imabesi tubum, kuoba le masipasanang paatuatnu.” 16Kise te ka gogoi nenda aitoili minca si Esau ka Edom. 17Tapoi si Jakob einia ka Sukot, lepa rioakenangan lalepnia samba kudduat pukuneman tarimeunia. Iate lulunia kudduat nenda tuoniake Sukot.
18Kabagat puenunganan barania ka Mesopotamia, sega le si Jakob ka laggai Sikhem ka kupkumen Kanaan kabagat arau baga. Lepa rioakenangan sapounia ka sara su'su' kalegret laggai. 19#Jos. 24:32; Joh. 4:5 Su'su' kudduat pusapougat nenda aisaki ka sapunuteteu Hemor, ukkui Sikhem, sakinia sangotu bulagat perak. 20Lepa geti rioakenangan meja sedda pasibuluat samba oniakenangannia “Taikamanuan Israel iate Taikamanua.”
Àwon tá yàn lọ́wọ́lọ́wọ́ báyìí:
1Mos. 33: MWV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@LAI 2015