1Mos. 35
35
Si Jakob pasamba mungkuatnia mei ka Betel
1 #
1Mos. 28:11-17
Ka sara gogoi kuanangan Taikamanua kai Jakob, “Aku te Taikamanua amasipatoila tubu katubum kateteret anuputuitui ka kebbunu kai Esau. Kenan simaola ka Betel. Kuddu ekeu sedda samba rioake sara kudduat pasibuluat kaKu.”
2Lepa kuanangan si Jakob ka keluargania samba kasangamberi sirimanua pasambania, “Mei sita baratta sene samba mei ka Betel. Sedda kurioake geti maja pasibuluat ka Taikamanua sipasiroropmaku kateteret akumaongkip samba amasijago aku senen kaipa kuei. 3Oto ribbaiake le tularat sitoi sibabara katubum, galaiake punen pasilinat tubu samba pakei leppei simalina.” 4Lepa kaurangan kai Jakob sangamberi tularat sitoi sibabara katubudra samba leu subangdra. Sangamberinia nenda urupmakenangannia si Jakob katei loina sabeu kabebet laggai Sikhem.
5Kateteret aituitui si Jakob samba mungkuat keluargania, puloloto ka Taikamanua ilakup sipulalaggai ka bebet laggai, pat taikukrurangan si Jakob samba mungkuatnia. 6Lepa sia ka tobbou Kanaan ka laggai Betel siboiki oninia Lus. 7Sedda rioakenangan si Jakob kudduat pasibuluat samba oniakenangan kudduat nenda “El-Betel”, kalulut Taikamanua aipakoinongan tubunia sidda kateteret ai tuitui ka kabbunia. 8Sedda leu et si Debora, sinanalep sijago si Ribka, ai matei lepa rateiakenia ka tei loina sabeu ka isit kakaiaman laggai nenda. Iate lulunia loina nenda tuoniake “Loina Soibiet”.
9Kele ai toili si Jakob barania ka Mesopotamia, potoilanangan tubunia Taikamanua minca katubunia samba panukaninangannia. 10Kuanangan Taikamanua katubunia, “Barania kineiget ta'an tukukua ekeu si Jakob, tapoi Israel.” Kise te ai oniakenia Israel. 11Lepa kuanangan minca Taikamanua, “Aku te si Taikamanua Sipulugege. Kau le nupupunuteteu simaigi! Sapunuteteunu ibailiu geti sangamberi bangsa samba ekeu ibailiu taikabbukatra tai rimata. 12Laggai sikauKu kai Abraham samba kai Ishak Kuake geti katubum samba ka sapunuteteunu.” 13Lepa nenda kaddiuakenangan Taikamanua si Jakob. 14#1Mos. 28:18-19 Rioakenangan si Jakob bukku pasirepdeman ka kudduat aipanibo Taikamanua katubunia. Lepa geti bukku nenda panguruatnakenangannia ka Taikamanua pasamba uruakenangan anggur samba tulat zaitun ka uddutnia. 15Kudduat nenda ioniake “Betel”.
Matei si Rahel
16Lepa nenda si Jakob samba rombongannia masikaddiuake Betel. Kateteret mareunan pei le sia ka Efrata, sinulut pusulenangan si Rahel, tapoi mabesi le itutuake matat toga nenda. 17Kateteret aimakope besit pusulekatnia, kuanangan si bidan katubunia, “Ronnake patuatnu, Rahel, togam simanteu le minca.” 18Tapoi kalegret kamateiatnia, samba kateteret iengaake engania pasilepa, ioniake toga nenda Ben-Oni, tapoi ukkuinia masioniake togania Benjamin.
19Kele aimatei si Rahel, rateiakerangannia kabebet enungan siailiake Efrat, kineiget oninia Betlehem. 20Rioakenangan si Jakob sara bukku pasirepdeman ka uddutnia, samba teret kineiget ka ratei Rahel aipei leu bukku nenda. 21Lepa nenda riuriuakenangan puenunganannia si Jakob, lepa rioakenangan sapounia ka sara kudduat saliu menara Eder. 22aAi sia kakudduat nenda, perep si Ruben pasamba si Bilha, sinanalep silipput ukkuinia. Pagalaiat nenda arepnangannia si Jakob, samba bulat magolu le nia.
Tatogat Jakob
(1Taw. 2:1-2)
22bPulurua tatogat Jakob simanteu. 23#1Mos. 2:1-2 Togat Lea iate si Ruben (toga Jakob sikebbukat), Simeon, Lewi, Jehuda, Isakhar samba Zebulon. 24Togat Rahel iate si Josep samba Benjamin. 25Tatogat Bilha, pagugulet Rahel iate si Dan samba Naftali. 26Tatogat Zilpa, pagugulet Lea iate si Gad samba Asyer. Tatoga nene mututu mata ka Mesopotamia.
Metei si Ishak
27 #
1Mos. 13:18
Iageti sege si Jakob ka ukkuinia kai Ishak, ka kudduatnia ka Mamre kebebet Hebron. (Siboiki si Abraham taikebbukatnia, mukuddu sedda). 28Rurat Ishak sangotu balupulungarura. 29Lepa matei si Ishak, iageti rateiakenangania si Esau samba si Jakob, togania.
Àwon tá yàn lọ́wọ́lọ́wọ́ báyìí:
1Mos. 35: MWV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@LAI 2015