Ukufuma 2
2
Inkwatwa nu kupusuka kwakwe Musa
1Umuntu wumwi uwamwiko wakwe Levi watwite umwanachi wamwiko uwuliwonga. 2Umwanachinye weyo awa napanji apapa umwanamonsi. Ala walola kuno umwana wazipisya, amufisa imyezi yitatu. 3Ala walola kuno atanga alange akamufisa, asenda ichise chamatete achitakasizya ni namba amuno awika umwana, ngapano aya amuwika mwe kasanza mumbali yaluzi. 4Umunyina inkazi yakwe alanga ayimilile akatalamuchila alanga akulolela chino chingaponela umwananye weyo.
5Enakamba umwanamwene wakwe Fero atantamuchila kuluzi kukuyasamba, ye awakazyana wakwe wakupita wakonsile mumbali yaluzi. Umwanamwenenye weyo alola ichise mumasote atuma umuzya wakwe uwachikazyana kukuyachileta. 6Umwanamwene wakwe Fero akupula alola umwanachonsi mwenemo akulila. Amufwila inkumbu ati, Umwana wee, amwana wawa Heberi. 7Inkazi yamwananye weyo imuwuzya iti, Wuzye ngaya nkite umwanachi wumwi umu Heberi uwakukulelela umwananye wee? 8Nawe umwanamwene atolelela ati, Ale yanga. Umukazyananye weyo aya ayita nyina wamwananye weyo. 9Umwanamwene wakwe Fero amunena ati, Ale senda umwananye wee ukamundelelange, ndikulambula. Achaleka umwanachinye weyo asenda umwana aya awamulela. 10Ala pano umwana wakula umwanachinye weyo amusenda amutwala ku mwanamwene wakwe Fero, awa mwanakwe. Ati, Namuzuwuzile muluzi, achaleka amwita izina lyakwe Musa.
Musa asamalila ku Midiani
11Apala pazimba, ye Musa wafuma mwizika, afuma aya kukusyungula awantu wakwe, alola muno wakuwakuwizizya pakuwomba imilimo mikalambane. Alola umu-Ijeputi wakoma umu-Heberi, wenga uwawantu wakwe. 12Atalangania konsinye, ala walola kuno pasi wumwi, akoma umu-Ijeputi amuzichila muluselesenga. 13Awucha anyochela kweneko, alola awa-Heberi wawili wakulwa. Anena wino wawifizye ati, Ngachani chino ukuma uwaluko Iwako? 14Atolelela ati, Ngawino wakuwika uwusongo nu wukapanzya pakwe sweswe weweni? Si ukasi unkome ndivino wakomile umu-Ijeputi? Musa intete azimulema, ayelengania ati, Awantu wamvumula kwechino nachisile. 15Ala pano Fero wivwa kwechonyechoo awalonda ukukoma Musa, ukuwa Musa asamala afuma, aya ayikala munsi ya Midiani. Ala pano wafika kweneko, afika ayikala lwa pachifula.
16Esikapemba wa mu Midiani walinji nawana-wanachi munenulambali, wane wafisile kweneko awizuzya aminzi mumisuwa alyakuti ing’onzi ni mbuzi zyakwe yisi zing’we. 17Ukuwa awachemi awaya awawawinga. Musa aya awatula, apa nivikwato vyawo aminzi aving’wa. 18Awala pano wawela kwe yisi e Rueli, awawuzya ati, Ngachani chino ilelo mwandana ukuwela? 19Awamutolelela awati, Amu-Ijeputi watutula kuwachemi, watusembela naminzinye wapa ivikwato vyang’wa. 20Awuzya awanakwe ati, Nga alikwi? Ngachani chino musizile umuntunye weyo kulonde koko? Yanji kamwitani ayize alye ichakulya naswe. 21Musa akunda ukwikala kulyanye, Rueli amupa umwanakwe e Zipora atwala. 22Akwata umwanamonsi. Musa ayelengania ati, Nelikandi munsi yakwe wanji, achaleka amwita izina lyakwe Gershomu.
23Apala pazimba nkani imfumu ya mu-Ijeputi ifwa. Awa-Israeli awalweta ku wuzya wawo awakuta inkuta awati, Ngaweni atutule. Inkuta yawo ikwela iya kwakwe Leza. 24Leza ayivwa ukulweta kwawo, ayizuka ilayano lyakwe line walayine nu Abrahamu, nu Ayizeki, nu Jekapu. 25Alola uwuzya wawa Israeli ayiwumbula kwewoliwo.
Àwon tá yàn lọ́wọ́lọ́wọ́ báyìí:
Ukufuma 2: WWN82
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chinamwanga Bible © United Bible Societies, 1981.