Ukufuma 3
3
E Leza ayita Musa
1Musa wachemanga ing’onzi ni mbuzi zyakwe yisivyala e Jethro, e sikapemba wa ku Midiani. Asenda ivikwato avitwala ukuchila ulumpalang’ang’a, achilingania ayafika ku Herobu, umwamba wakwe Leza. 2Umungeli wa Mfumu Leza amulolechela mu mbiwi yamulilo yino yafumanga pakasi pachimpuza. Musa alolechesya alola ichimpuza chikwaka, ukuwa nanti kulungulila. 3Ayelangania ati, Kampalamile ndolechesye ichintunye choo ichamanzi. Ngamuno chani chino ichimpuzanye choo chisinakupya? 4Ala pano Imfumu Leza walola kuno akuya akupalamila, Leza amupunda mukasi muchimpuza ati, Musa, Musa! Nawe atolelela ati, Mulali? 5Leza ati, Utize uwapalamila. Zula indyatu zyako, amuno uyimilile pamusili wimichile. 6Ne Leza wakwe’so, anyoka ati, E Leza wakwe Abrahamu, e Leza wakwe Ayizeki, swinya e Leza wakwe Jekapu. Musa avwimba paminso muno watinanga ukulola Leza.
7Ngapano Imfumu Leza ati, Nalolechesya muno awantu walemelwa uwuwi mu Ijeputi; nivwa inkuta yawo iyakuti ngaweni atutule kuwuzya wuno wakapimpizya wakutupimpizya, namanya ukuyimba kwawo. 8Nika niza kukuwatula ku wantu wa mu Ijeputi, mbafumye munsinye yoyo mbatwale kunsi yamuvundo inkulu. Ansi nzima swinya ayamuvundo, yino wane wakwikala mwenemo kanonzi awa-Kenani, na wa-Hiti, na wa-Amori, na wa-Perizi, na wa-Hivi, na wa-Jebusi. 9Nivwa inkuta ya wa Israeli, nalola namuno awantu wa mu Ijeputi wakuwafyenenechezya ichikalazi. 10Achaleka kanonzi nandi nkutume kwe Fero ukafumye awantu wane awa Israeli mu Ijeputi.
11E Musa avwanga kwe Leza ati, Nga neweni ne muntu wino ngaya kwe Fero nkafumye awa Israeli mu Ijeputi? 12Leza atolelela ati, Nandi ndawa nawe, nachino chilileka wamanye kuno anene nkutumile achoo: ulila pano wafumya awantunye wawo mu Ijeputi, muliyiza mumfukamile pamwambanye woo.
13E Musa avwanga kwe Leza amuwuzya ati, Ale, nga ndi niza naya ku wa Israeli, naya nawanena nati, E Leza wakwe wasokulu antumile kwemwemwe, waliya wakambuzye wati, Ngizina lyakwe wino akutumilenye weweni? Nga ingati wuli? 14E Leza anena Musa ati, NE NDIPO, NE MUNTU NDIPO, anyoka ati, Avino uyize ukanene awa Israeli: wonye-woo uti, E NDIPO wantuma kwemwemwe! 15Leza anyoka avwanga swinya kwe Musa ati, Avino uyize ukanene awa Israeli awonyewoo uti, Imfumu Leza, e Leza wakwe wasokulu, e Leza wakwe Abrahamu, e Leza wakwe Ayizeki wino swinya we Leza wakwe Jekapu antumile kwemwemwe! Akuti, Lyonye-lyoo alili zina lyane amanda nuwinji: alino awankulo zyakunsizi waliwanjita. 16Ati, Yanga kawunganike wasongo wakwe Israeli apaliponga, uwanene uti, Imfumu Leza, e Leza wakwe wasokulu, e Leza wakwe Abrahamu, nu Ayizeki, nu Jekapu wandolechezile, wanena wati, Mbanene inti, Niza kwemwemwe nayilolela muno awantu wa mu Ijeputi wakuwachita. 17Nkulonda ukuti mbafumye mu Ijeputi muno mwalemwa uwuwi mbatwale kunsi ya wa-Kenani, na wa-Hiti, na wa-Amori, na wa-Perizi, na wa-Hivi, na wa-Jebusi. Ansi nzima swinya ayamuvundo. 18Waliya wakivwe chino nataka, ngapano uyize uye ku mfumu ya mu Ijeputi, uyize uye apaliponga na wasongo wakwe Israeli muye mukamunene muti, Imfumu Leza, e Leza wawa Heberi atusunkinie; ale twazina tuyange tupite umusinzo wa manda yatatu tukoche inzuwi ku Mfumu Leza, e Leza witu. 19Ukuwa naponye manyile kuno imfumu ya mu Ijeputi atandi akawataye aleke mupite, suka ndiwachichilizwa. 20Ndichitila kumaka, nsunde Ijeputi nivizunguko vino ndichita mwenemo. Pansizi, apano aliwataya aleke mupite.
21Ndileka awantu wa mu Ijeputi wachindika awantu wane: alyakuti pano mwiza mwakatuka mutize mwize mupite makasavye. 22Umwanachi wensi alilenga ivizwalo ni viyembo vyakwe silivara nivyakwe golide ku mwanachi wino wikala mu ng’anda yakwe na kwe wino wapalamine. Mwize muzwike awana winu awachonsi na wachanachi vyovyonye, mulitela mwapusula awantu wa mu Ijeputi.
Àwon tá yàn lọ́wọ́lọ́wọ́ báyìí:
Ukufuma 3: WWN82
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chinamwanga Bible © United Bible Societies, 1981.