लूका 14
14
फरीसी लोका रे मुखिया रे घरा मन्झ यीसू
1फेरी यीसू अरामा रे ध्याड़े फरीसी लोका रे मुखिया मन्झा ले केसी रे घरा मन्झ रोटी खांदे गया, होर तिन्हा सभी री नज़र यीसू पर थी कि तेस मन्झ गलती तोपी सके। 2होर एक माह्णुं था, जेसरे हाथ होर पैर सूजिरे थे। 3एता पर यीसूए व्यवस्था स्खाणे वाल़े आ होर फरीसी लोका किन्हें बोल्या, “क्या अरामा रे ध्याड़े खरा करणा व्यवस्था रे मताबक ठीक आ कि, नंई?” पर स्यों चुपचाप रैहे। 4तेबे यीसूए से छुहेया होर से ठीक कितेया, होर जाणे दितेया। 5होर यीसूए तिन्हा किन्हें बोल्या कि, “अगर तुस्सा रा गधा या बोल्ह्द अरामा रे ध्याड़े गढे मन्झ पई जाए ता क्या तुस्सा से बाहर नी काढणा?” 6स्यों इन्हा गल्ला रा कुछ जवाब नी देई सके।
नम्रता होर आदर-खातर
7यीसूए देख्या कि, सादिरे मैहमान खास-खास जगहा छांटी किन्हें बैठ्हा ऐं ता ये उदाहरण देई किन्हें तिन्हा किन्हें बोल्या। 8“जेबे कोई तुजो ब्याहा मन्झ सादे, ता खास जगहा मन्झ नी बैठणा, एह्ड़ा भी हुई सकां कि, तिन्हें तुध ले भी कोई बडा सादिरा हो। 9होर जिन्हें तुजो होर तेस जो दुंहीं जो सादा दितिरा आई किन्हें तेरे किन्हें बोले कि, ‘एस जो जगहा दे,’ होर तेबे तुजो बेजत हुई किन्हें सभी ले पिछली वाली जगहा मन्झ बैठणा पऊणा। 10पर जेबे तू सादेया जाए, ता सभी ले पिछली जगहा मन्झ बैठ्या कि, जेबे, जिन्हें जे तुजो सादा दितिरा से आये, ता तेरे किन्हें बोले कि ‘हे दोस्त, आगे आई किन्हें बैठी जा,’ तेबे तेरे साउगी बैठणे वाल़े रे साम्हणें तेरी इज्जत हूणीं। 11होर जो कोई आपणे आपा जो बडा बणाहंगा, से छोटा कितेया जाणा। होर जो कोई आपणे आपा जो छोटा बणाहंगा, से बडा कितेया जाणा।”
12तेबे यीसूए आपणे सादणे वाल़े फरीसी किन्हें बोल्या, “जेबे तू ध्याड़ी रा या रात्की धाम त्यार करहे, ता आपणे दोस्ता या भाईया या टब्बरा या अमीर पड़ोसीया जो नी साद, केथी एह्ड़ा नी हो कि, स्यों भी तुजो सादा दे, होर तुजो तेरा इनाम मिली जाए। 13पर जेबे तू धाम दे, ता कंगाल, टुंडे, लंगड़े, होर काणेया जो साद। 14तेबे तुध धन्य हूंणां, क्यूंकि तिन्हा वाले बदले मन्झ तुजो देणे रे कठे कुछ नी आ, पर परमेसरा एता रा इनाम तुजो तेबे देणा जेबे धर्मी लोका मरिरे मन्झ ले जी उठणा।”
बड़ी धामा रा उदाहरण
(मत्ती 22:1-10)
15जेबे यीसू बोली बैठेया ता तेस साउगी खाणा खाणे वाल़े मन्झा ले एकिये यीसू किन्हें बोल्या, “धन्य आ से, जेस जे परमेसरा रे राजा मन्झ धाम खाणी।” 16यीसूए तेस किन्हें बोल्या, “केसी माह्णुंऐ बडी धाम दिती होर तिन्हें बौह्त सारे लोक सादे। 17जेबे खाणा त्यार हुई गया, ता तिन्हें आपणे सेऊआदार जो सादिरे लोका वाले ये बोली किन्हें भेज्या कि, ‘आऊआ, ऐबे खाणा त्यार आ।’ 18पर स्यों सब माफी मांगदे लगे, पैहले वाल़े तेस किन्हें बोल्या, ‘मैं एक खेत मुले लईरा, होर जरूरी आ कि तेस जो देखी आऊँ हांऊँ तेरे किन्हें अर्ज करहा, मुंजो माफ करी दे।’ 19दूजे बोल्या, ‘मैं बोल्ह्दा री पांज जोड़िया मुले लईरी, होर तिन्हा जो परखणे रे कठे जाया करहा, हांऊँ तेरे किन्हें अर्ज करहा, मुंजो माफ करी दे।’ 20एकी होरिये बोल्या, ‘मैं ब्याह करी लईरा, इधी कठे हांऊँ नी आई सक्दा।’ 21तिन्हें सेऊआदारा आई किन्हें आपणे माल्का जो ये गल्ला सुणाई दिती। तेबे घरा रे माल्के गुस्से मन्झ आई किन्हें आपणे सेऊआदारा किन्हें बोल्या, ‘गांऊँआं रे बजारा होर गल्लिया मन्झ झटपट जाई किन्हें गरीब लोक, टुंडे, लंगड़े होर काणे लोका जो एथी लई आऊआ।’ 22सेऊआदारे दबारा बोल्या, ‘हे माल्का, जेह्ड़ा तैं बोल्या था, तेह्ड़ा ई आस्से करी दितेया, पर हली भी जगहा बाकि ई।’ 23माल्के सेऊआदारा किन्हें बोल्या, ‘सड़का पर होर बाड़े वखा जाई किन्हें लोका जो जबरदस्ती लई आऊआ ताकि मेरा घर भर्ही जाए। 24क्यूंकि हांऊँ तुस्सा किन्हें बोल्हा कि, जेह्ड़े सभी ले पैल्हे सादीरे थे तिन्हा मन्झा ले एकिया भी मेरे किन्हें धाम नी खाणी।’”
चेले बणने री कीमत
(मत्ती 10:37,38)
25एक बडी भीड़ यीसू साउगी जाया करहा ई थी, ता तिन्हें पीछे मुड़ी किन्हें तिन्हा किन्हें बोल्या, 26“अगर तुस्से मेरा चेला बणना चाहें, होर तुस्से मेरे ले बढ़ी किन्हें आपणे माऊ-बापू, लाड़ी, बाल-बच्चे, होर भाई-बैहणा या आपणी जाना किन्हें ज्यादा प्यार करहे, ता तुस्से मेरा चेले नी बणी सकदे। 27होर जो कोई मेरा चेला बणना चाहे से आपणा क्रूस चके, होर मेरे पीछे आये। 28अगर तुस्सा मन्झा ले कोई एक बडा घर बणाणा चाहां, ता तेस पैहले बैठी किन्हें हिसाब कताब जोड़ना कि तेस जो बनाणे रे कठे तेस वाले पूरी रकम हाई की नी? 29होर अगर से एह्ड़ा नी करघा, ता जेबे तेस नींऊँआं ता खणनी पर तेता जो पूरा नी करी सकदा। ता सब देखणे वाल़ेया तेसरा मजाक डुआणा, 30कि इन्हें माह्णुंऐ बणाणा ता सुर्हू कितेया, पर घरा त्यार नी करी सकेया। 31या एक राजा दूजे राजे किन्हें लड़ाई करदे जाहाँ, ता से पैहले बैठी किन्हें सोच विचार करहा कि, आपणे दस हजार स्पाही साउगी क्या से बीह हज़ार स्पाही किन्हें आपणे व्रोधी रा साम्हणा करी सक्हा कि नी? 32अगर से तिन्हारा साम्हणा नी करी सकदा, ता जेबे तेसरा व्रोधी हली दूर ई आ, तेबे तेस आपणा दूत भेजी किन्हें मेल मलाप करणा चाहणा। 33एस तरीके ले तुस्सा मन्झा ले जो कोई आपणा सभ कुछ छाडी नी दे, ता से मेरा चेला नी हुई सक्दा।”
बे सुआद लूण
(मत्ती 5:13; मरकु. 9:50)
34“लूण ता बांका आ, पर अगर लूणा रा सुआद बिगड़ी जाए, ता से फेरी केस चीजा किन्हें लूणका बणाया जाणा? 35से ना ता जमीना रे होर ना ता खादा रे काम आहूँआं, तेता जो लोक बाहर सट्टी देहां ऐं। होर यीसूए बोल्या, जो मेरी गल्ला सुणदा लगीरा, से बड़े ध्याना किन्हें सुणी ले।”
Àwon tá yàn lọ́wọ́lọ́wọ́ báyìí:
लूका 14: MJLNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
This work is licensed under Creative Commons Attribution-ShareAlike 4.0 License.
