लूका 13
13
पाप करणा छाडी देणा या नास हूंणा
1तेस टैम कुछ लोक आई पूजे, होर तिन्हें यीसू किन्हें बोल्या, रोम देसा रे पिलातुस हाकमे गलील जिल्ले रे कुछ लोक मारी दिते जेबे स्यों मन्दरा मन्झ बलिया चढ़ान्दें लगिरे थे। 2ये सुणी किन्हें यीसूए तिन्हा किन्हें ये बोल्या, “क्या तुस्से ये समझ्या करहा ऐं कि, ये गलील जिल्ले रे लोक, बाकि होरी गलील जिल्ले रे लोका ले ज्यादा पापी थे कि स्यों मारी दिते?” 3हांऊँ तुस्सा किन्हें बोल्हा, नंई स्यों इधी कठे नी मारे। पर अगर तुस्से पाप करणा नी छाडेया ता तुस्सा सभिया भी इंहां नास हुई जाणा। 4तुस्से क्या समझ्या करहा ऐं कि, स्यों ठारा लोक जिन्हा पर जे सिलोहा रा गुम्मट पया था होर स्यों दभी किन्हें मरी गये, क्या स्यों यरुस्लेम सैहरा रे सब रैहणे वाल़े लोका ले ज्यादा पापी थे? 5हांऊँ तुस्सा किन्हें बोल्हा कि, बिल्कुल नंई; पर अगर तुस्से मन नी फेरघे ता तुस्सा सभिया भी इंहां ई नास हुई जाणा।
बगैर फला रे अंजीरा रे डाला रा उदाहरण
6फेरी यीसूए ये उदाहरण भी बोल्या कि, “केसिए आपणे बगीचे मन्झ एक अंजीरा रा डाल लगाईरा था। से तेस डाला मन्झ हर साल फल तोप्दा आहूँआं था, पर नी मिलदा था। 7तेबे तिन्हें बगीचे रे माली किन्हें बोल्या, ‘देखा, तीन साला ले हांऊँ एस अंजीरा रे डाला मन्झ फल तोप्दा आया करहा, पर नी मिलदा। एस जो काटी दे क्यूंकि इन्हें बगीचे री बांकी जमीना रोकिरी।’ 8तिन्हें मालिए तेस जो जवाब दितेया कि, हे माल्का, एस जो एस साल होर रैहणे दे; कि हांऊँ एसरे चारो तरफ खणी किन्हें खाद पाई देऊँ। 9होर अगली साला जो ये फल्गा ता खरा, नंई ता एस जो काटी देआ।”#13:9 एथी अंजीरा रा डाल इस्राएल रे लोका जो दसा
अरामा रे ध्याड़े कुबड़ी ज्नाने रा ठीक हूंणा
10केसी अरामा रे ध्याड़े यीसू एक यहूदी सभा मन्झ उपदेस देआ करहा था। 11एक ज्नाने थी, जेस्सा जो ठारा साला ले एक दुस्टात्मे से कुबड़ी करी दितीरी थी। होर केसी भी तरीके ले से सीधी नी हुई सक्दी थी। 12होर जेबे यीसूए से देखी, तिन्हें से सादी लई, होर बोल्या, “हे जन्नाने, तू आपणी ब्मारी ले छुटी गई।” 13तेबे तिन्हें तेस्सा पर हाथ रखे, होर से झटपट सीधी हुई गई, होर परमेसरा री बड़ाई करदी लगी।
14इधी कठे कि यीसूए तेस जन्नाने जो अरामा रे ध्याड़े से ठीक कितिरी थी, यहूदी सभा रा मुखिया गुस्सा हुई किन्हें लोका ले बोल्दा लग्या कि, “हफ्ते मन्झ छेह ध्याड़े ऐं, जिन्हा मन्झ आस्सा जो काम करणा चहिए। इधी कठे तिन्हा ध्याड़े मन्झ ई आई किन्हें ठीक हुई जाऊआ; पर अरामा रे ध्याड़े मत आऊआ।” 15ये सुणी किन्हें प्रभु यीसूए जवाब दितेया, “हे पाखंडियो, क्या अरामा रे ध्याड़े तुस्सा मन्झा ले हर एक आपणे बोल्ह्द या गधे जो गुआणिया ले खोल्ही किन्हें पाणी पियांदे नी लई जांदा? 16होर क्या ये ठीक नी था कि, ये ज्नाने जो एक यहूदी ई होर अब्राहमा री मह्ठी ई, जेस्सा जो सैताने ठारा साला ले बान्ही किन्हें रखिरा था, ये अरामा रे ध्याड़े एस बंधना ले छुड़ाई जांदी?” 17जेबे यीसूए ये गल्ला बोली, ता तेसरे सब व्रोधी बेज्जत हुई गये, होर सारी भीड़ तेसरे महान काम जो से करहा था देखी किन्हें खुस हुई।
राई रे दाणे रा उदाहरण
(मत्ती 13:31-32)
18फेरी यीसूए बोल्या, “परमेसरा रा राज केस साहीं आं? होर हांऊँ तेसरा बखान केस किन्हें करूं? 19से राई रे एक दाणे साहीं आं, जेस जो केसी माह्णुंऐ लई किन्हें आपणे बगीचे मन्झ बाह्या: होर से बढ़ी किन्हें बौह्त बड़ी डाल बणी गया; होर आसमाना रे चिड़ुऐ तेता री पांगे पर बसेरा कितेया।”#13:19 मत्ती 13:31-32, यहे. 31:6, दानि. 4:21
स्जेड़े रा उदाहरण
(मत्ती 13:33)
20यीसूए दबारा बोल्या, “हांऊँ परमेसरा रे राजा री तुलना केस किन्हें करूं? 21परमेसरा रा राज तेस स्जेड़े साहीं आं, जेस जो केसी जनानिये स्जेड़ा लई किन्हें बौह्त सारे आटे मन्झ म्लाई दितेया, होर हुंदे-हुंदे से सारा आटा सीजी गया।”
संगड़ा दुराजा
(मत्ती 7:13,14,21-23)
22यीसू आपणे चेल्या साउगी सैहर-सैहर, होर गांऊँ-गांऊँ हुई किन्हें उपदेस देंदा हुआ यरुस्लेम सैहरा वखा जो जाया करहा था। 23होर केसिए यीसूए ले पूछेया, “हे प्रभु, क्या परमेसरा ले उद्धार पाणे वाल़े थोह्ड़े ऐं?” तिन्हें तिन्हा किन्हें बोल्या, 24“संगड़े दुराजे ले अंदर जाणे री कोसिस करा, क्यूंकि हांऊँ तुस्सा किन्हें बोल्हा कि, बौह्त एह्ड़े हूंणे जिन्हां जे अंदर जाणा चाहणा, पर नी जाई पाणा। 25जेबे घरा रा माल्क परमेसरा उठी किन्हें दुराजा बंद करी चुके, होर तुस्से बाहर खड़ी किन्हें दुराजे जो खटखटान्दे लगो होर अर्ज करदे लगे, ‘हे प्रभु आस्सा रे कठे दुराजा खोल्ही दे,’ होर से जवाब दे कि हांऊँ तुस्सा जो नी जाणदा, तुस्से कुणहें होर केथी ले आईरे? 26तेबे तुस्सा बोल्दे लगणा, ‘कि आस्से तेरे साम्हणें खाध्या पितेया होर तुस्से आस्सा रे कठे बजारा मन्झ उपदेस दितेया।’ 27पर तेस बोलणा, हांऊँ तुस्सा किन्हें बोल्हा, ‘हांऊँ नी जाणदा तुस्से केथी ले आईरे? हे दुस्ट काम करणे वाल्यो! तुस्से सभ मेरे वाले ले दूर हुई जाओ।’ 28तेथी रोणा होर दांद किर्ड़णें हूंणां, जेबे तुस्से अब्राहम होर इसहाक होर याकूब होर सब नबी जो परमेसरा रे राजा मन्झ ब्ठयाले, होर आपणे आपा जो बाहर काढदे हुए देखणा। 29होर पूर्व होर पस्चिमा; उत्तर होर दक्सिण ले लोका आई किन्हें परमेसरा रे राजा रे धामा मन्झ साझी हूंणां। 30होर ये जाणी लो कितने एह्ड़े जो ऐबे खास हुन्घे तिन्हा बादा मन्झ खास नी हूंणां, होर कितने ऐबे एह्ड़े जो खास नी ऐं तिन्हा बादा मन्झ खास हूंणां।”
हेरोदेसा री दुस्मणी
31तेस ध्याड़े कुछ फरीसी लोके आई किन्हें यीसू किन्हें बोल्या, “एथी ले निकली किन्हें चली जा, क्यूंकि हेरोदेस राजा तुजो मारी देणा चाहां।” 32यीसूए तिन्हा किन्हें बोल्या, “जाई किन्हें तेस्सा लोमड़ी साहीं तेस च्लाक माह्णुं किन्हें बोली दे कि, देख हांऊँ आज होर काल्ला दुस्टात्मा जो काढा होर ब्मारा जो ठीक करहा होर त्रीजे ध्याड़े मां काम पूरा करणा। 33तेबे भी मुंजो ये जरूरी आ कि आज होर काल्ला होर परसी यरुस्लेम सैहरा वखा जो आपणा सफर करदा रहूँ, क्यूंकि एक नबी यरुस्लेम सैहरा मन्झ ही मारेया जाणा।”
यरुस्लेम सैहरा रे कठे रोणा
(मत्ती 23:37-39)
34“हे यरुस्लेम सैहर रे लोको! हे यरुस्लेम सैहर रे लोको! तुस्से पैहल्के नबी मारी दिते, होर जो तुस्सा वाले भेजे गये, तिन्हा जो पत्थरवाह कितेया। कितनी बारी मैं चाहेया कि जिहां कुकड़ी आपणे बच्चे जो आपणे फान्खा हेठ कट्ठा करहा ई, तिहां ईं हांऊँ भी तेरे लोका जो बचाऊं, पर तुस्से एह्ड़ा नी चाहेया। 35तुस्सा रा घर तुस्सा रे कठे पूरी तरहा ले उजड़ी जाणा। होर हांऊँ तुस्सा किन्हें बोल्हा कि, ऐबे ले जेबे तक तुस्सा नी बोलणा कि, धन्य आ से, जो प्रभु रे हका ले आहूँआं, तेबे तक तुस्सा हांऊँ दबारा नी देखणा।”#13:35 भज. 118:26, यिर्म. 12:7
Àwon tá yàn lọ́wọ́lọ́wọ́ báyìí:
लूका 13: MJLNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
This work is licensed under Creative Commons Attribution-ShareAlike 4.0 License.
