लूका 12
12
पाखंडा रे बरखलाफ चेतावनी
(मत्ती 10:26,27)
1इतने मन्झ, हज़ारा रे स्हाबे लोक यीसू रे चारो तरफ कठे हुई गये, लोका री भीड़ इतनी ज्यादा थी कि स्यों एक दूजे जो जिक्दे हुए तिन्हा प्रयाल्हे पई जाया करहा ऐं थे, पर सभी ले पैहले यीसू आपणे चेले किन्हें बोल्दा लग्या, “तुस्से चतन्न रैहया ताकि तुस्से फरीसी लोका साहीं देख्या बणदे, जो लोका रे साम्हणें धर्मा रे काम करहा ऐं, पर कल्हे मन्झ बुरे काम करहा ऐं, जिहां स्जेड़ा आटे रे ढेरा जो स्जेड़ा करी देहां आं तिहां ईं तिन्हारा बुरा व्यवहार दूजे जो तिन्हा साहीं पाखंडी बणाई देहां। 2क्यूंकि हर एक चीज़ जेह्ड़ी ढख्ही री, से खोली दिती जाणी; होर जो कुछ लुख्ही रा, ता सब लोका से जाणी लेणा। 3इधी कठे जो कुछ तुस्से न्यहारे मन्झ बोलिरा, से प्रयासे मन्झ सुणेया जाणां: होर जो तुस्से कमरे रे अंदर चुप-चाप बोलिरा, से घरा री छता प्रयाह्ले ले प्रचार कितेया जाणा।”
केस ले डरना चहिए?
(मत्ती 10:28-31)
4“पर हे लाडले भाईयो होर बैहणो! हांऊँ तुस्सा किन्हें बोल्हा कि, जो सरीरा जो मारहा ऐं पर एता ले ज्यादा कुछ नी करी सकदे तिन्हा ले मत डरदे। 5हांऊँ तुस्सा जो खबरदार करहा कि तुस्सा जो केस ले डरणा चहिए, परमेसरा ले ई डरा जेस जो तुस्सा जो मारने ले बाद नरका मन्झ पाणे रा हक आ। 6क्या पांज छोटी चिड़िया इतनी सस्ती नी की दो पैसे मन्झ बिक्की जाई? फेरी भी परमेसर तिन्हा मन्झा ले एकी जो भी नी भूल्दा। 7पर तुस्सा रे मूंडा रे सारे बाल भी गिणीरे, इधी कठे डरा नी, तुस्से बौह्त चिड़िया ले भी बढ़ी किन्हें ऐं।”
यीसू जो मनणा या नी मनणा
(मत्ती 10:32,33; 12:32; 10:19,20)
8हांऊँ तुस्सा किन्हें बोल्हा जो कोई माह्णुं रे साम्हणें मुंजो मन्नी लैन्घा, से मां माह्णुं रे मह्ठे भी परमेसरा रे स्वर्गदूता रे साम्हणें मन्नी लैणा। 9पर जो माह्णुं रे साम्हणें मुंजो नी मनदे, ता परमेसरा रे स्वर्गदूता रे साम्हणें मां भी से मनणा। 10जो कोई माह्णुं रे मह्ठे रे बरखलाफा मन्झ कोई गल बोले, तेसरा से अपराध माफ कितेया जाणा। पर जो कोई पवित्र आत्मा री निंदा करहे ता तेसरा से अपराध माफ नी कितेया जाणा। 11“जेबे लोक तुस्सा जो यहूदी सभा, होर अधिकारी वाले होर साहबा रे साम्हणें लई जाए, ता फिकर नी करणा कि आस्से किहाँ या क्या जवाब दे, या क्या बोले। 12क्यूंकि पवित्र आत्मा तेस ई टैम तुस्सा जो स्खाई देणा कि, क्या बोलणा चहिए।”
एक अमीर नर्क्कले रा उदाहरण
13फेरी भीड़ा मन्झा ले एकिये यीसू किन्हें बोल्या, “हे गुरु, मेरे भाई किन्हें बोल कि, बापू री जायदाद मुंजो बांडी दे।” 14यीसूए तेस किन्हें बोल्या, “हे माह्णुंआं, कुणे मुंजो तुस्सा री जायदाद बांडणे वाल़ा बणाया?”#12:14 निर्ग. 2:14 15होर यीसूए तिन्हा किन्हें बोल्या, “चतन्न जे रैंहयां करहा, होर हर किस्मा रे लालचा ले आपणे आपा जो बचाई रखा: क्यूंकि केसी री जिन्दगी तेसरी बौह्त ज्यादा जायदाद हूंणे री वजहा ले नी हुन्दी।”
16यीसूए तिन्हा किन्हें एक उदाहरण बोल्या कि, “केसी अमीर आदमी री जमीना मन्झ बड़ी भारी फसल हुई।” 17“तेबे से आपणे मना मन्झ सोचदा लग्या कि, हांऊँ नी जाणदा कि हांऊँ क्या करूं? क्यूंकि मेरे वाले जगहा नी ई, जेथी जे हांऊँ आपणी फसल रखी सकूं। 18होर तिन्हें बोल्या, ‘हांऊँ जाणा कि मुंजो क्या करना चहिए, मां आपणे गोदाम तोड़ी किन्हें होर भी बडे बणाणे। होर तेथी मां आपणा सभ नाज होर चीज़ा रखणी। 19होर तेता ले बाद मां आपणे आपा किन्हें बोलणा, तेरे वाले बौह्त साला रे कठे बौह्त जायदाद रखिरी; अराम कर, खा-पी, सुख चैना किन्हें रैह।’ 20पर परमेसरे तेस किन्हें बोल्या, ‘हे नर्क्कलेयो! आज राती ई तुध मरी जाणा। तेबे जो कुछ तैं कठा कितिरा, से केसरा हूणां?’ 21एह्ड़ा ई तेस माह्णुं किन्हें भी हूंणा जो आपणे कठे सभ कुछ कठा करहा, पर परमेसरा री नजरा मन्झ अमीर नी आ।”
परमेसरा पर भरोसा रखा
(मत्ती 6:25-34)
22फेरी यीसूए आपणे चेले किन्हें बोल्या, “इधी कठे हांऊँ तुस्सा किन्हें बोल्हा, आपणे जीणे रे कठे खाणे री फिकर मत करा; होर आपणे सरीरा रे कठे कपड़े री फिकर छाडी देआ। 23क्यूंकि खाणा जिन्दगी ले बढ़ी किन्हें आ, होर कपड़े ले सरीर बढ़ी किन्हें आ। 24काऊआ पर ध्यान देआ; स्यों ना ता बाहें, ना काटहा ऐं; ना तिन्हारे भंडार हुंहाँ ऐं होर ना पेड़ु हुंहाँ ऐं; तेबे भी परमेसर तिन्हा जो खुआहाँ; तुस्सा री कीमत ता चिड़ु-पखेरू ले भी बौह्त ज्यादा ई। 25तुस्सा मन्झा ले एह्ड़ा कुणहां, जेह्ड़ा फिकर करी किन्हें आपणी जिन्दगी री उम्रा मन्झ एक घड़ी भी बढ़ाई सक्हा? 26इधी कठे अगर तुस्से छोटे ले छोटा काम भी नी करी सकदे, ता होर जिन्दगी री गल्ला रे कठे किधियो फिकर करहा ऐं? 27जंगली फूला पर ध्यान देआ कि स्यों किहाँ बढ़हा ऐं; स्यों ना ता मैहनत करहा ऐं, नां ईं आपणे कठे कपड़े बणाहें। तेबे भी हांऊँ तुस्सा किन्हें बोल्हा कि, सुलेमान राजा भी, आपणे सारी साना मन्झ तिन्हा मन्झा ले एक फूला साहीं भी नी सजी सकेया। 28इधी कठे अगर परमेसर मदाना रे घाह री परवाह करहा, जो आज हाया, होर जो काला आगी मन्झ फुकी देणा, हे! कम विस्वास रखणे वाल्यो, परमेसरा तुस्सा री परवाह एता ले भी बढ़ी किन्हें करणी। 29होर तुस्से एस गल्ला री तोपा मन्झ नी रैहया कि, क्या खाणा होर क्या पीणा, होर ना ता सक करा। 30क्यूंकि संसारा री जातिया इन्हा सभ चीजा जो तोप्दे रैंहयां ऐं: होर तुस्सा रा बापू जाणहां कि, तुस्सा जो इन्हा चीजा री ज्रूरत ई। 31पर परमेसरा रे राजा जो तोप्दे रैहया, ता तेस सारी चीजा तुस्सा जो देणी जेता री तुस्सा जो ज्रूरत ई।”
स्वर्गा मन्झ धन कठा करणा
(मत्ती 6:19-21)
32“हे छोटे झुंड, मत डर; क्यूंकि तुस्सा रे बापू परमेसरा जो ये खरा लग्या कि, तुस्सा जो परमेसरा रा राज दे। 33आपणी जायदाद बेची किन्हें दान करी देआ; होर आपणे कठे एह्ड़े बटुये बनाऊआ, जेह्ड़े पुराणे नी हूंदे, यानि आपणे खरे कामा किन्हें स्वर्गा मन्झ धन कठा करा जो घटदा नी आ होर जेसरे नेडे ना ता चोर जांदा, होर ना ता तेस जो कीड़ा लगदा। 34क्यूंकि जेथी तुस्सा रा धन आ, तेथी तुस्सा रा मन भी लगी रैहणां।”
जागदे रैहया
35“हमेसा सेऊआ करणे रे कठे त्यार रैहया, होर पूरी राती तक आपणे दिऊये भ्खाई किन्हें मेरे दबारा वापस आऊणें रे कठे त्यार रैहया। 36होर तुस्से तिन्हा माह्णुंआं साहीं बणां, जो आपणे माल्का जो न्यहाल्या करहा ऐं कि, तेस ब्याहा रे भोजा ले केभे वापस आऊंणा; ताकि जेबे से आई किन्हें दुराजा खटखटाए, ता स्यों झटपट तेसरे कठे दुराजा खोल्ही सके। 37धन्य ऐं स्यों सेऊआदार, जो माल्का रे आऊणें पर से तेजो न्हयाल्दे हुए होर त्यार पाहें, हांऊँ तुस्सा किन्हें सच्च बोल्हा कि, माल्का ही सेऊआदारा रे कपड़े पैहनी किन्हें तिन्हो खाणा खुआणे रे कठे बैठ्या होर आपु ही खाणा बांडा। 38अगर से आधी राती या भ्यागा तड़के ही आई किन्हें तिन्हा जो त्यार पाए, ता स्यों धन्य ऐं। 39पर तुस्से ये जाणी लऊआ कि, अगर घरा रा माल्क जाणदा कि, चोरा केस टैम आऊंणा, ता से त्यार रैहन्दा, होर आपणे घरा मन्झ चोरी नी हूंणे देंदा। 40तुस्से भी मेरे दबारा वापस आऊणें रे कठे त्यार रहा; क्यूंकि जेस टैमा रे बारे मन्झ तुस्से सोच्दे भी नी, तेस ई टैम मां माह्णुं रा मह्ठे आई जाणा।”
भरोसेमंद सेऊआदार कुणहां?
(मत्ती 24:45-51)
41तेबे पतरसे बोल्या, “हे प्रभु, क्या ये उदाहरण तू सिर्फ आस्सा किन्हें बोल्हा या सभी किन्हें?” 42प्रभुए बोल्या, “भरोसे रे लायक होर समझदार भंडारी से आ, जेसरा माल्क तेस जो नौकर चाकरा पर मुखिया बणा कि, से तिन्हा जो टैमा पर खाणा दे। 43धन्य आ, से सेऊआदार, जेस जो तेसरा माल्क आई किन्हें एह्ड़ा ई करदे पाये। 44हांऊँ तुस्सा किन्हें सच्च बोल्हा, तेस से आपणी सभ जायदादा पर मुखिया बनाणा। 45पर अगर से सेऊआदार सोच्दा लगे कि, आस्सा रे माल्क आऊणें मन्झ देर करेया करहा, होर आपणे साउगी सेऊआदार होर सेऊआदारणीयो जो मारदा पिट्दा लगे, होर दारु पीणे वाल़े लोका साउगी खाए पीए। 46ता तेस सेऊआदारा रे माल्का एह्ड़े ध्याड़े आऊंणा कि जेबे से तेस जो न्हयाल्या नी लगिरा हो, होर तेस एह्ड़े टैमा मन्झ वापस आऊंणा जेस जो से नी जाणदा हो। तेबे तेसरे माल्का तेस सेऊआदारा जो बड़ी सख्त सज़ा देणी, होर तेस से सेऊआदार एह्ड़ी जगहा रखणा जेथी दूजेया जो धोखा देणे वाले लोक रैंहयां ऐं। 47होर से सेऊआदार जो आपणे माल्का री इच्छा जाणहां था, पर त्यार नी रैहया होर ना तेसरी इच्छा रे मताबक चल्या तेस बौह्त मार खाणी। 48पर हर एक सेऊआदार जेस जो आपणे माल्का री इच्छा जो नी जाणदा आ, होर एह्ड़ा काम करी बैठे जो मार खाणे रे लायक हो ता तेस सेऊआदारा पर थोह्ड़ी मार पऊणी। इधी कठे जेस जो बौह्त दितिरा, तेस ले बौह्त मान्गेया जाणा; होर जेस जो बौह्त सौम्पेया गईरा, तेस ले बौह्त मान्गेया जाणा।”
मेल मलाप होर लग करणा
(मत्ती 10:34-36)
49“हांऊँ धरती पर आग लगान्दा आईरा; होर हांऊँ क्या चाहां सिर्फ ये कि ये आग ऐबे भड़की जाए! 50मा बड़े भारी दुखा रे बपतिस्मा हाल्ले लेणा, होर जेबे तक हांऊँ तेता जो नी लू तेबे तक मां बौह्त दुआस रैंह्णां। 51क्या तुस्से समझ्या करहा ऐं कि हांऊँ धरती रे लोका रे बीचा मन्झ मेल मलाप करान्दा आईरा? हांऊँ बोल्हा, नी! पर लग करान्दा आईरा। 52क्यूंकि ऐबे ले एक घरा मन्झ पांज जणे हुंगे ता तिन्हा एक दूजे किन्हें व्रोध रखणा, तीन जणे जो मेरे पर विस्वास नी रखदे, तिन्हा दोआ रा वरोध करणा जो मेरे पर विस्वास रखे। 53बापू मह्ठे किन्हें, होर मह्ठेया बापू किन्हें वरोध रखणा; माऊआ मह्ठी किन्हें, होर म्ह्ठीयां माऊआ किन्हें, सासा न्हूसा किन्हें, होर न्हूसा सासा किन्हें वरोध रखणा।”
टैमा रा भेद
(मत्ती 16:2,3)
54होर यीसूए भीड़ा किन्हें भी बोल्या, “जेबे तुस्से बादला जो पस्चिम दिसा ले उठदे देख्हा ऐं, ता तुस्से झटपट बोल्हा ऐं कि, बरखा आऊणें वाली ई; होर एह्ड़ा ई हुंहाँ भी। 55होर जेबे तुस्से दक्षिण दिसा ले हऊआ चलदी देख्हा ऐं, ता तुस्से बोल्हा ऐं कि, लू चलणे वाली ई, होर एह्ड़ा ई हुंहाँ भी। 56हे पाखंडियो, तुस्से धरती होर आसमाना जो देखी किन्हें ता भेद करी सक्हा ऐं, पर परमेसर जो एस जमाने मन्झ जो करहा तेता रा भेद करणा कि नी जाणदे?”
आपणे व्रोधी किन्हें समझौता
(मत्ती 5:25,26)
57“होर तुस्से आप्हुए फैसला कि नी करी लैन्दे कि, ठीक क्या आ? 58जेबे तू आपणे व्रोधी साउगी हाकमा वाले जाए ता पैंडे मन्झ ई तेस ले छुटणे री कोसिस कर एह्ड़ा नी हो कि, से तुजो हाकमा वाले खींजी किन्हें लई जाए, होर हाकम तुजो अधिकारी जो सौंपी दे होर अधिकारी तुजो जेल्हा मन्झ पाई दे। 59हांऊँ तुस्सा किन्हें बोल्हा कि, जेबे तक तू एक-एक पाई नी देई देह्न्गा तेबे तक तुध जेल्हा ले नी छुटणा।”
Àwon tá yàn lọ́wọ́lọ́wọ́ báyìí:
लूका 12: MJLNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
This work is licensed under Creative Commons Attribution-ShareAlike 4.0 License.
