LUKU 6
6
1DINVIE e sọ wá jọ, to gbọjezán awetọ gbè, to, tintan godo, é jugbọn gbadoglè mẹ; nuplọntọ etọn lẹ sọ yà gbadófé bo sọ yi alọ do to fifle e dù. 2Mẹde to Falesi lẹ mẹ sọ dọ hlan: yé, dọmọ, Etẹwutu wẹ mìwlẹ to onu he ma jẹ wà to gbọjezángbè? 3Jesu sọ gblọn dọ hlan yé, dọmọ, Be mìwlẹ ma hiawe sọ ehe hunkọ, onú he Davidi wà, whenuena huvẹ to ewlọsu hù, po yé he tin to e de lẹ po; 4e biọ ohò Jiwheyẹwhe tọn mẹ, bo sọ yí akla sọhia tọn, bo dù, bo sọ na yé he to e de le ga; ehe ma jẹ nẹ nado dù, adavo yewhenọ: lẹ dopokẹdẹ? 5E sọ dọ hlan yé, dọ, Ovi gbẹtọ tọn wẹ Oklunọ gbọjezán tọn ga.
6E sọ wá jọ to gbọjẹzángbè devo ga, é sọ biọ sinagogu mẹ, bo to meplọn: dawe de tin to finẹ mẹhe adusilọ etọn kusẹ. 7Wekantọ lẹ, po Falesi lẹ po sọ to hihó ẹ, eyín é na hẹnazòngbọ to gbọjezángbè; na yé nido mọ owhó de hia do okò nẹ. 8Ṣigba é yón linlẹn yetọn, é dọ hlan ewọ he alọ etọn kuse, dọ, Fọ́n, bo site tọ gbonu to ṣẹnṣẹn. E sọ fọ́n, bo site to ṣẹnṣẹn. 9Whenẹnu we Jesu sọ dọ hlan yẹ, dọ, Yẹn na kàn onú dopo se mí; Be é jẹ to, gbọjẹzángbè nado wà dagbe, kavi nado wà ylankan? nado whlẹn ogbè gán, kavi nado hù súdo? 10Whenuena é pọ́n yé omẹ pó lédo, é dọ hlan dawe lọ, dọmọ, Dlẹn alọ towe jẹgbónu. E sọ wà mọ: alọ etọn sọ gòjẹ gángán, kẹdẹdi awetọ. 11Ṣigba homẹ yetọn gó na adi; yé sọ to ohó dọ hẹ yénọzo, dọ etẹwẹ yé do wà do Jesu.
12E sọ wá jọ, to azán helẹ gbè, é tón yì osó ji nado hodè, é sọ nọte to ozán lẹpo mẹ to odè mẹ hlan Jiwheyẹwhe. 13Whenuena ai hón, é ylọ nuplọntọ etọn lẹ do é de: bọ dè omẹ wiawe to yé mẹ, yé mẹhe é ylọ oyín yetọn ga dọ Apọsteli; 14Simọni, (mẹhe yè nọ ylọ oyín etọn ga, dọ Pita,) po Andlé nọvisunnu etọn po, Jakobu po Johanu po, Filipi po Batelemi po, 15Matiu po Tọmasi po, Jakobu, ovisunnu Alfe tọn, po Simọni, he yè nọ ylọ oyín etọn Zeloti po 16Juda nọvisunnu Jakobu tọn, po Juda Iskaliọti po he yín mẹdehiatọ lọ 17sọ jẹte po yé po, bo site to ofi sọgbe de, po agùndaho nuplọntọ etọn lẹ tọn po, po osọha omẹ susu tọn po sọn Judé lẹpo, sọn Jelusalẹm, podọ sọn ohù waji Tile tọn, po Sidọni tọn po, he wá nado sè ohó to onù etọn, podọ nado yín azọ̀nhẹngbọna sọn azọ̀n yeton lẹ mẹ. 18Podọ yé he mọ awufiẹsa gbọn gbigbọ mawe lẹ si: é hẹnazọ̀ngbọna yé. 19Agùn lẹpo sọ din nado do alọ é go: na huhlọn to tintón sọn e go, é sọ hẹnazóngbọna yé omẹ pó.
20E sọ zé nukun etọn do aga, do nuplọntọ etọn lẹ go, bo dọmọ, Donanọ wẹ mì wamọnọ lẹ; na mìtọn wẹ ahọludu Jiwheyẹwhe tọn. 21Donanọ wẹ mì he huvẹ to hùhù to dinvie; na yè na hẹn mì gọhò. Donanọ wẹ mì he to avivi to dinvie; na mì na konú. 22Donanọ wẹ mì, whenuena gbẹto lẹ na to wangbẹna mì, whenuena ye na to mì klan sọn ogbé yetọn mẹ, bo nasọ to mì vlẹko, bo to oyín mìtọn dè yìngbe di oylan, na Ovi gbẹtọ tọn wutu. 23Mì ni jaya to azán nẹ gbè, na mi ni lón na homẹhùnhùn: sa pọ́n, ale mitọn wẹ klo to olọn mẹ; na mọkedẹ we otọ́ yetọn lẹ wà do yẹwhegán lẹ. 24Ṣigba dindọn hlan mì he yín adọkunnọ lẹ! na mì lẹ ko mọ homẹmimiọn mìtọn yí vò. 25Dindọn hlan mì he gọho lẹ na huvẹ na hù mì. Dindọn hlan mì he to núkò to dinvie lẹ! na mì na blawú, bo sọ viavi. 26Dmdọn hlan mì, whenuena omẹ pó to onú mìtọn dagbe dọ na mọkẹdẹ wẹ otọ́ yetọn lẹ wà hlan yẹwhegán lalonọ lẹ.
27Ṣigba yẹn dọ hlan mì, he to sisè lẹ, Mì yiwanna kẹ̀ntọ mìtọn lẹ, mì wà dagbe hlan yé he wangbéna mì lẹ, 28mì dona yé he sọ to dẹ̀hodo mì lẹ, mì hodó na mẹhe to mì hẹngble lẹ. 29Na ewọ he ho alaka dopo na we, ló awetọ hlan ẹn ga; mẹhe yí avọ̀ towe, a hẹnẹn dote nado yí awù towe ga blo. 30Na òmẹ dopodopo he biọ onú de we lẹ; podọ sọn ewọ he bé agbàn towe sé si, a sọ gò kan yé biọ blo. 31Le mì jlo dọ gbẹtọ lẹ ni wà hlan mì do, mọkẹdẹ wẹ mì ni wà hlan yé do. 32Podọ eyín mi yiwanna yé he yiwanna mì, opẹ tẹwẹ mí do? na ylandonọ lẹ nọ yiwanna yé he yiwanna yé lẹ ga. 33Podọ eyín mì sọ wà dagbe hlan yé he wà dagbe hlan mì le, opé tewẹ mì do? na ylandonọ lẹ nọ wà doponẹ ga. 34Podọ eyín mì sọ yàn hlan yé he si mì to nukundo na vó mọ yí te lẹ, opé tẹwẹ mì do? na ylandonọ lẹ nọ yàn hlan ylandonọ lẹ, na yé nido mọ yí sọmọ. 35Ṣigba mì ni yiwanna kẹ̀ntọ mìtọn lẹ, bo nọ wà dagbe na yé, bo nọ yànnamẹ madosisi mede tọn; ale mìtọn na sọ yín daho, podọ mì na sọ yín visunnu Gigogan tọn lẹ: na ewọ yín dagbenọ hlan mayọndagbenọ po mẹylankan po. 36Na mì ni do lẹblanu, kẹdẹdile Oto mìtọn do lẹblanu do. 37Podọ mì dawhé blo, yè ma sọ to owhè na da na mì; mì gblewhẹ̀do omẹ blo, yè ma sọ to na gblewhèdo mì; mì jonamẹ, yè nasọ jona mì. 38Mì na ome, yè nasọ na mì; ojlé dagbedagbe, zindodò, he yè whandopọ, he gọfla, wẹ yè na jlé do akọnnu mìtọn. Na ojlé dopo he mì do jlé, wẹ yè nasọ yí do jlé hlan mì.
39E sọ dọ oló de hlan yé, dọ, Be nukuntọ́nnọ sọgan doalihia nukuntọ́nnọ? Yé omẹ awe lẹ ma na jai do odò mẹ? 40Nuplọntọ ma húgan mẹplọntọ etọn gba: ṣigba mẹdepope he sogbè na taidi mẹplọntọ etọn. 41Etẹwutu wẹ hiẹ to núyọ he tin to nukun mẹmẹsunnu towe tọn mẹ pọ́n, ṣigba a ma tunwun nakepo he tin to nukun hielọsu tọn mẹ? 42Kavi nawẹ hiẹ sọgan dọ hlan mẹmẹsunnu towe do, dọ, Mẹmẹsunnu ṣie, gbọ yẹn ni dè núyọ he tin to nukun towe mẹ sé, whenuena hiẹlọsu ma tunwun nakepo he tin to nukun hiẹlosu tọn mẹ? Hie yẹnuwàtọ, dè nakepo he tin to nukun hiẹlọsu tọn mẹ só whé, whenẹnu wẹ hiẹ na monú gbangba nado dè núyọ he tin to nukun mẹmẹsunnu towe tọn me sè. 43Na atin dagbe ma nọ hẹn sinsẹ́n ylankan jẹgbonu wá gba, mọwẹ atin ylankan ma nọ hẹn sinsẹ́n dagbe jẹgbonu wá gba. 44Na atin lẹpo wẹ yè yónẹn gbọn sinsẹ́n ewlọsu tọn dali. Na gbẹtọ ma nọ gbèn ovò sinsén to owùnkan mẹ, mọwẹ yè ma nọ gbón ovẹ̃n sinsẹ́n to vẹwun ji. 45Gbẹtọ dagbe sọn adọkunnú dagbe ayiha etọn mẹ tọn wẹ é nọ hẹn enẹ he yín dagbe tón jẹgbonu sọn wá; gbẹtọ ylankan sọn adọkunnu ylankan etọn mẹ tọn wẹ é nọ hẹn enẹ hẹ yín ylankan tọ́njegbonu sọn wá: na sọn onú ayiha gege tọn me we onù nọ dọ.
46Etẹwutu wẹ mì to yiylọ mi, Oklunọ, Okluno bọ mì ma wà onú he yẹn dọ lẹ? 47Mẹdepope he wá dẽ, bo to ohó ṣie sè, bo so wà yé, yẹn na do mẹhe é di hia mì: 48E taidi dawe de he to ohò de do, mẹhe kùndo yì siso, bo sọ dodòdo do osé ji: whenuena ozó gó, asisa zinzin gbakọn do ohò lọ go: é ma sọgan whàn ẹn: na yè ko dó e do osé ji wutu. 49Ṣigba ewo he sè, bo ma basi, é taidi dawe de he dó ohò do aigba ji: ehe ma do dodó; ehe gò asisa zinzin gbakọndo, afọdoponeji é hó do homẹ; hihó ohó lọ tọn sọ yín kiklo.
Àwon tá yàn lọ́wọ́lọ́wọ́ báyìí:
LUKU 6: BWL23
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Holy Bible in Gun-Alada © Bible Society of Benin and Bible Society of Nigeria, 1923.
