APOSTOLMI 2
2
Aghungu Kimthe Ighi
1Kughou Pentikost#Hipauye Hechekulu ghulhu shiwo atsala lhopungu shi akelo pinyikeu pinye to keno, kupulumi kumtsu a-a lakhilo kuhokumqo ae. #Achine 23.15-21; Zaki 16.9-11 2Zuleno aghugha lakhi amlhu kuloghino mulhu akeshi atsutsu kudauno ighino tino panonguno ngo akeu ki kumtsu chhitoive. 3Panonguno ithulukeuno ami mili toi puzu amqo amqono panoqo milakhikhi shou ngove. 4Panongu kumtsu Aghungu Kimthe no chhitoive eno Aghungu no panoqo pelo pilupe kehu kutami tsauno pithuve.
5Tishiakelo ayeghiqhalo ashiayeh jeli kumtsu lono Judami achine yehlo amlo tsukemiqo ighieno Jerusalem lo akhae. 6Aghugha hu chilukelo timiqono ighi kumqo eno panonguye akumzave, kughengu kupulumiqono kutami tsauno pi aghikeu timiqono pututa tsauno chilue. 7Timiqoye thughuyi kelauno ishi pi, “Hi atsa piakeqo kumtsu Galilmi ke kumo kesha? 8Imaye kishi puzu panoqono nitsauno piakeu ningu kumtsuno chilu ani kya? 9Ninguye Parthiami, Mediami, Alammi, Mesopotamia kudaumi, Judia ngo Kapadokiami, Pontu ngo Asiami, 10Frugia eno Pamfuliami, Ijip ngo Kurene phivilo Libiya qhalomi, khamino Rom kudauno itsusu ighikemi, 11ninguye Judami eno Juda chineyeh luvekemi, Kretomi eno Arabmi— ikeghi panoqono nilikhi nitsauno Alhou no akumzapu kumla shikeu pikeu ninguno chilue.” 12Akumzaqhiyi eno thughuyi kelauno lakhino lakhi vilo ishi inijukile: “Hiye kiu shivetsu ani kya?” 13Ikemu khamiye thaigha kelauno ishi pi, “Timi hipaqoye aji shomzupu anie.”
Pitor no Pikeu
14Ikemu Pitor no apostolmi chighi qhaqhi sasu puthughono asutsa kuloghi lono timiqo vilo asheshu ghi pi, “Akusami Judamiqo eno nongu Jerusalem lo akemiqo, hi julo eno itsa inilo. 15Nongu kukumsukuju loye timi hipaqoye shomzupu ani ghashi kesha? Moe, itehiye inaqhe ayi toku kihe shiaphie; 16ikemu hiye Joyil tungkupuno pi puakeu huke:
17‘Ashekhalau tsalalo hitoi shi nanie pi Alhou no pie:
Ino timi kumtsu shou iGhungu lepukuni.
Nongu nu ngo nongu ngaqono tungkuptsa pi nani; nongu pumiqono kungu nhetsu ithulu nani,
eno nongu wu muchomiqono asamo pumo nani.
18Tipaqo tsalalo iqepumi eno iqelimi shou ghi ino iGhungu lepukuni eno panonguno tungkuptsa pi nani.
19Kunguu atsutsulo ino akichiqhipu shipiyeni, eno aqhou ayeghilo amchipu shipiyeni.
Ahji ngo ami eno amchhi phoboyi nani;
20Tsukinhe no zumoive nani,
aqhino ajhi toi huchuyive nani, ti Ampeu tsala shishe kije eno akimthe-jukuvu ighi nike zulo.
21Eno ishive nani, khunono Ampeu je kuluni keno tipaqoye xaluve nani’. #Joyil 2.28-32
22“Israilmiqo, atsa hi inijulo, Nazaret no ghami Jisu ye nongu lau Alhou no kophetsukemi lakhi nongu gholo Alhou no pa vechewo akumzapu ngo akichiqhipu eno amchipu shikeu nongu ghi tsaqui ithi ani. 23Alhou wu apulou eno azunatha kighithi lono hi Jisu ye nongu ulo phesuvetsu keu shi; eno nonguno ayehkumthami pelo kros lo pa yedavepe eno pa pithivepeke. #Mt 27.35; Mk 15.24; Lk 23.33; Jn 19.18 24Ikemu Alhou no akithi lono pa xuputhuve eno akithino ghimeqhikeu lono pa kuqhopheve, kughengu akithino pa kughape akughu shipe puamlave. #Mt 28.5-6; Mk 16.6; Lk 24.5 25Kughengu David no pa vehu ishi pi pua:
‘Pulhapuju izulo ino Ampeu ithulu ache, paye i-u ajeu ani, ike ipelo iqevepemo nani.
26Highenguno imlouno alokivishi eno itsapi lo alokiqishie.
Tinguno alau, niye thiveni kuau shianamu, lajupu xapu acheni.
27Kughengu noye ighungu pe kithighalo kughucho qhivemo nani;
Momu oqeu Akimtheu pelo tsu-mavekeu ghime sholupemo nani.
28Nono akuxupu la ipelo ithipe, eno nono sasu chekeu lono ilokivi shepichhi nani.’ #Leshe 16.8-11
29“Athikuzumiqo, niye nipuasu David ghili mutsumishei pi masavae. Paye thiveno qhova, pa kumoye ishi kutolo ningu gholo anie. 30Paye tungkupumi lakhi eno Alhou no pa lau tushoqhipe puakeu ithi ake: Alhou no ashoqhi shipuakeuno pano David polo kughuko pelo akukau shipenikeu shike. #Leshe 132.11; 2 Samu 7.12-13 31Alhou no kiu shini chenikeno David no ithulue ike pano Mesiya xuilethughikeu ghili piqhi puakeuno:
‘Kithighalo pa kughuchoqhivemoe: pa phi ashi tsumave pemoe.’
32“Alhou no Jisu hipau hu xuputhuve eno ninguno tipaulo thopi miqoe. 33Pa xuputhu pesu Alhou-u ajeu qhieno ajepipi tsue. Apu launo tushoqhi puakeu hutoi Aghungu Kimthe ithulu puzu khikhi nonguno ithulu eno chilu anikeno hiye pano ningu shou lepukutsukeu ke. 34Kughengu David ye kungughalo ikuke kumoe ikemu pa ampino ishi pipuani.
‘Ampeu no iMpeu vilo ishi pi: i-u ajeu kudau iqalo,
35Oghumiqo pesu ino opukhu kinepu shitsumoke kutolo.’ #Leshe 110.1
36“Tighenguno Israil lo timi kumtsuno hi mtsuqhei ithi pelo, Jisu khuu nonguno yedavekeno tihu Alhou no pa pesu Ampeu eno Khristo kinikujo shivetsuae!”
37Kughou timiqono ti chilu keno panongu mlo itapiniyive puzu Pitor ngo apostolmi kutamiqo vilo pi, “Athikuzumiqo, ninguye kiu shikepu kya?”
38Pitor no panoqo vilo pi, “Nongu lakhi khino nongu xine lono xaideghiluve puzu Jisu Khristo je lono baptiz shiluvelo, tishianguno nongu xineqo pevetsupe kepushi eno nonguno Alhou wu agho, Aghungu Kimthe ithulu nani. 39Kughengu Alhou shoqhiye nongu ngo nongu tianuli eno khunoqomi putou anikeno khukhumu Ampeu ningu Lhou no kulukemi ghenguno ke.” 40Pano atsa kutau kutomo pesu ashepe shi eno panoqo hakutho ghi pi, “Hi chighichilai keu tiqheli launo nongu xaluvepelo.” 41Ike khunoqono pa tsa ikhilu keno tipaqo baptiz shitsu eno tipani timi 3000 kutolo panongu gholo kihikusumi shiluve. 42Panonguno Apostolmino kutsukeu ngo kuposhukeulo eno kuposhukeu ghulhu ngo akighini lono ado peitha ae.
Kupulumiqono Xuachekeu
43Akumzapu eno akichiqhi kepu kutomo Apostolmi vechewono mlalua, eno kumtsuno msakhokhoshie. 44Puluvekemi kumtsu kumtsa kumqo ngo eno thime thwokha kumtsu aqu shie. #Aposto 4.32-35 45Panonguno aki alu eno tinhemgha je puzu milakhi khino kiu avehupu shi aghi keno tipau kiqi lono kumtsu lau kusaje ae. 46Tsalakipetsu achinekilo kumtsa wu, panongu kilo kumtsa kuchukusho shi, alokiqi eno alophaphaleyi keu lono pano chuqupu chu. 47Alhou sheqhe eno timi kumtsu lopu shilu ae. Tsalakipetsu khunoqo xakulu ithulukhakeno tipaqo Ampeu no pesu panoqo gholo sulupe ae.
Àwon tá yàn lọ́wọ́lọ́wọ́ báyìí:
APOSTOLMI 2: SUMIBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.