APOSTOLMI 1
1
1O Thiofilos, iwu kaku atughiu loye Jisu no mla keu eno kutsukeu kumtsu ino yehtsu ke, tiye pano akumla huthuke lono wo #Lk 1.1-4 2kungughalo saikuveke tsala kutolo mlakeuke. Pa saikuve mphilo Jisu no Aghungu Kimthe vechewo apostolmi khunoqo pano kishelukeno tipaqo vilo ahza kutsu shike. 3Pano akithi sholuve kethiu atsala lhobidi kutolo paye xuaphi kepi thwokha lono pa likhi pano panoqo nhepithe eno panonguno pa ju ithulu eno pano Alhou yehkipe vehu pesu panoqo putsae. 4Panongu kumtsa kumqo akelo pano panoqo vilo pi. “Jerusalem qhikevilo ikemu ino nongu vilo pivekeu toi iPuh no piqhipuakeu khe aghilo. #Lk 24.49 5Johan no azu pesu baptiz shitsue, ikemu atsala kutomo womono Aghungu Kimthe pesu nongu baptiz shivetsu nani.” #Mt 3.11; Mk 1.8; Lk 3.16; Jn 1.33
Jisu Kungughalo Saikuve
6Kughou apostolmino Jisu sasu kumtsa kumqo akeno panonguno pa iniju, “Ampeu, noye hipa ghuloki lono Israilmi lau akukaqha tsuchileni akema?” 7Jisu no panoqo vilo pi, “Aghuloki khikhi Apu no pa gho apulou lono kutope puani keno nonguye ti ithi mayesake kumoe. 8ikemu kughou Aghungu Kimthe nongu shou ighi nikeno nonguno akumto ithulu nani, nonguye Jerusalem lo ngo Judia qha kumtsulo. Samaria lo eno ayeghi shekha kutolo ishepemi shimasa nani.” #Mt 28.19; Mk 16.15; Lk 24.24-48 9Pano hi pive puzu panonguno pa ju apulaghi kungughalo pa sasu ikuve eno panoqo nhekithe lono khungkusu amqo lakhino pa kuzupholuve. #Mk 16.19; Lk 24.50-51 10Pano wuveche kelo apostolmino atsutsulo jukuto akelauye timi kini aphi kimiye pepuno panoqo phivilo puthugho aghive. 11Pamano ishi pi; “O Galilmiqo, nonguye kushiye puthughono atsutsu kudau jupuku ania? Hi Jisu khuu nongu launo kungughalo saiku keno, pano kungughalo wukeu nonguno ithuluvekeu toi paye tipaphi shighi ide ighi nani.”
Judas Thelilo Kishesulu
12Tithiu apostolmiqoye Oliv to lono Jerusalem lo idewove, tiye Jerusalem kupunulo kilomiter lakhilo ke. 13Panonguye aphughilo ilo puzu panonguno ngochekeu ki kunguu chebolo ikue: Pitor, Johan, Jems, Andrew, Filip, Thoma, Bartholomew, Mathi, Alfius nu Jems, aza yeghi kimiyekicheu Simon, Jems nu Judas ngo ishi. #Mt 10.2-4; Mk 3.16-19; Lk 6.14-16 14Hipaqo kumtsu kumtsa puzu kumvu akighini shiche, eno panongu gholo totimi Jisu pa za Maria ngo pa thikuzumi ishi kumqono inikhu che.
15Tishiwo kushuwa kumolo, kupulumiqo kuho kelauye kumtsu kuqhakelo 120 kumqolue, tile Pitor no puthughono pi, 16“Athikuzumi achelimiqo, Jisu kughakulumi la kichekipiyeu Judas huye Aghungu Kimthe no azuuno David vechewo pipuakeu kuchoyesu hu shikupu kepu shiveke.” 17Kughengu Judas ye ningu gholo kihikusumi lakhike, eno ningu kumla hipaulo pa saje mlachepeke. 18(Judas ye pawu kusakugha lono ithulukeu jume pesu alu lakhi qhue, eno tsulukubashi veqhieno pa po vepho eno pawu kighinoli kumtsu veleveke. 19Jerusalem lo kughuna kuami kumtsuno tipau chiluvae, ikehu panoqo tsauno alu tipau Akaldama kuvetsu, tipau kiqiye ,”Ahjilu.”) #Mt 27.3-8
20“Kughengu Leshele kakulo ishi yepe puani:
‘Pa ghuna-a pelo kughukughaive peniu, tile kughuna kepu khumu kuhapeniu.’
Itaghi ishi yepuani,
‘Kutami pelo pawu hiyam peithaluve peniu.’ #Leshe 69.25; 109.8
21-22“Ikehu Johan no Jisu baptiz shitsukeu lono huthu susu ningu launo kungughalo pa saikuveke tsala kutolo Ampeu Jisu no ningu sasu iqho-iqike kumtsulo nigholo kumtsa chechekemi gholono lakhiye nigholo kishesu puzu Ampeu Jisu xuilethughivekeu shepemi shimasae.” #Mt 3.16; Mk 1.9; 16.19; Lk 3.21; 24.51
23Ike panonguno Josef Barsaba ipi chekeu (Pa je kutau ghi Justa ipi che), eno Mathia pama kichephetsu. 24Tile panonguno inikhughi pi, “O Ampeu, nono timi kumtsu mulo ithi ani. Ike hi pama gholo nono khuu kishe pesu 25Judas no qhive puzu pa-alo chevekeu thelilo apostolmi lakhi shieno hipau kumlapu saje pelupe nikeno nipiyelo.” 26Tishieno panonguno pama dolo asaqhiju ike Mathia shou asaqhibeluve eno paye apostolmi chighi qhaqhi gholo kihikuqha luve.
Àwon tá yàn lọ́wọ́lọ́wọ́ báyìí:
APOSTOLMI 1: SUMIBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.