APOSTOLMI 3
3
Apukhu Kinitavekemi Shipivi
1Ghulo lakhi Pitor ngo Johan pamaye avelau ayi kuthu kihe kighini dolo achinekilo iqhoche. 2Timi lakhi aza polono apukhu kinitavekeu Jukivi Khagho ipichekeulo tsalakipetsu xapuwo qhino achinekilo ilochekemi vilo pisa khuchu chepe. 3Pitor ngo Johan pamano achinekilo ilocheghi keu ithulu kelo pama vilo pisa khu. 4Pamano anhethi sukuqumono pa juno Pitor no ishi pi, “Nikujo julo!” 5Ikehu pama launo kiuala ithulu nani kepi huqheghi tilau jupuwoe. 6Tile Pitor no pi, “Nikujoye shuna mu tsandi mu kuhae, ikemu nino kiu ani keno ti otsuni, Nazaret noghami Jisu Khristo je lono noye alachelulo!” 7Tishino pa-u ajeu tsuqupe puzu pa sunheputhu. Paikhavino timi pukhu ngo alaunhe mtotoive. 8Pano ilhethughi puzu puthugholuve eno cheqho-cheqi, ilheku-ilheqi puzu Ampeu sheqhe ghi pama sasu achinekilo ilove. 9Timi kumtsuno pano cheqho-cheqi eno Alhou sheqhe akeu ithulu; 10eno timiqono paye achinekilo Jukivi khagho philo khuchu achekeu kena ipi mtsuqhei michiluve kethiu pa lau kiu shivetsu keapi panongu kumtsu akichiqhi eno akumzaqhiyive.
Achinekilo Pitor Tsapi
11Timi huno Pitor ngo Johan pama sunhepe akelo timi kumtsuno akichiqhi kelauno panoqo lau posu Solomon kisheqho ipichekeulo ighi. 12Kughou Pitor no ti ithulukeno, pano timiqo vilo pi, “Israilmiqo, nonguye hi jupesu kushiye akichiqhi eno kutuxoxo niju ani kya? Nonguno kumsukeuye nilikhi nikuka momu nikuxu kimthe pesu timi hipau pelo alachelupe ani kughashi kesha? 13Abraham, Isak eno Jakob Lhou, nipu-asu Lhou huno pa qeu Jisu akimthe jekipipu shive tsuae. Nonguno ayehkipemi ulo pa phesuvetsue, Pilat no pa phepuwuveniye kughathave kemu nonguno Pilat zulono pa miliveke. 14Paye akimthe eno akivi, ikemu nonguye pa milive eno heqhi buqhikemi lakhiu kuqhophetsu lopi nonguno Pilat vilo khu, #Mt 27.15-23; Mk 15.6-14; Lk 23.13-23; Jn 19.12-15 15eno nonguno akuxupu Mpeu pithiveke. Ikemu Alhou no akithi lono pa xaputhuve eno ninguye tipau thopimike. 16Pa je kuka huno apukhukinitavekemi hipau akumto tsue. Nonguno ithulu eno ithiveake hi shiluakeu huye pa jelo pulubekeu lonoke, eno Jisu vechewo akupulu akeuno nongu kumtsu zulo timi hipau thai shipivivae.”
17Ike ithikuzumiqo, ino ithi anike nongu eno nongu wu sakiphemino Jisu shou kiu shikeno tiye mbomzu lonoke. 18Alhou no paw tungkupmi kumtsu pelo azunathaghi pipuakeuno pawu Khristo ye aghime sholu nikeu shiakeu hu Alhou no ti shikupuvetsuae. 19Axine lono xaideghilo eno Alhou lau tsughu ighilo, tishianguno pano nongu xineqo pevetsu nani, 20tishianguno Ampeu no sachekeu lono azupuvu kepu do ighipeni eno pa pelo nongu wu Mesiya kishepuatsu keu Jisu hu puwu peni. 21Alhou no puzuuno pawu tungkupmi pelo azunathaghi pipuakeu toi, thwokha shikithe chilemoke kuto paye kungughalo aghimasae. 22Kughengu Muse no pivae, “Ampeu nongu Lhou no nongu lau tungkupu lakhi nongu thikuzumi gholono itoike ipeghipe nani. Pano kiu pinikeno nonguno pa tsa inimasae. #Zaki 18.15 23Khunono tungkupu tipauno pikeu inimoni keno Alhou wu timiqo launo kututa shipesu pughave nani.” #Zaki 18.19 24Samuel lono huthu susu pa thiu tungkupu khijeno tungkuptsa pichekeno kumtsuno ishi thoghi vehu pipuakhanie. 25Alhou shoqhi pawu tungkupumi vechewo akeu huye nongu salake, eno Alhou no nongu pu-asu sasu puloshoqhi shikeulo nongu ghi kusajekemie. Pano Abraham vilo pikeu toi,”Otikughukoqo vechewo ayeghilo timi kumtsu ino kumghatsunie.” #Bothu 22.18 26Ikehu Alhou no pa qeu kishepe atughushi nongu lau puwuke, eno nongu lhoksa kugha lono saide sawo kumghatsuniyeke.
Àwon tá yàn lọ́wọ́lọ́wọ́ báyìí:
APOSTOLMI 3: SUMIBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.