IMIZEKELISO 8:1-36
IMIZEKELISO 8:1-36 IZIBHALO EZINGCWELE (XHO75)
Abumemezi na ubulumko? Nengqondo ayilikhuphi na ilizwi layo? Emantloko eendawo eziphezulu ngasendleleni, Ekuhlanganeni kweendlela, buzimisile. Ngasemasangweni, ekuphumeni kuso isixeko, Ekungeneni eminyango, buyamemelela, buthi: Ndimemeza kuni, madoda; Izwi lam ndilisingisa koonyana babantu. Buqondeni ubuqili, ziyatha; Yiqondeni intliziyo, zinyabi. Yivani, kuba ndithetha izinto zobuhlalu, Nokuvula imilebe yomlomo wam kuthe tye. Ngokuba umlomo wam uxela inyaniso; Okungendawo kulisikizi emilebeni yomlomo wam. Yonke intetho yomlomo wam isebulungiseni; Kuyo akukho kubhijeneyo nokujibilizayo. Yonke iphela ithe gca konengqondo, Ithe tye kwabafumene ukwazi. Yamkelani uqeqesho lwam, ningamkeli silivere; Yamkelani ukwazi ngaphezu kwegolide embiweyo, enyuliweyo. Kuba ubulumko bulungile ngaphezu kwekorale,• Neento zonke ezinqwenelwayo azilingani nabo. Mna, bulumko, ndakhele ebuqilini; Ndinokukufumana ukuyazi iminkqangiyelo. Ukoyika uYehova kukuthiya into embi: Ikratshi nokukratsha, nendlela embi, Nomlomo onempenduka, ndiwuthiyile. Likum icebo nozimaso; Ndiyingqondo, bobam ubugorha. Ookumkani banobukumkani ngam; Nezidwangube zimisa ubulungisa ngam. Bathethela ngam abathetheli, Namanene, nabagwebi bonke behlabathi. Abandithandayo ndiyabathanda nam; Nabandifunayo kwakusasa bayandifumana. Bunam ubutyebi nozuko, Ubuncwane obusisimakade nobulungisa. Silungile isiqhamo sam ngaphezu kwegolide embiweyo, nakwengcwengekileyo; Lulungile ungeniselo lwam ngaphezu kwesilivere enyuliweyo. Ndihamba ngomendo wobulungisa, Phakathi kweendlela ezisesikweni; Ukuze abandithandayo ndibadlise ilifa elililo, Ndizizalise izindlu zabo zobuncwane. UYehova wandivelisa ndaba yintlahlela yendlela yakhe, Ndaba ngowamandulo emisebenzini yakhe yakudala. Ndamiswa kwasephakadeni, kwasentloko, Kwasemandulweni ehlabathi. Ndazalwa kungekabikho manzi anzongonzongo, Kungekabikho mithombo inzima ngamanzi. Ndazalwa kungekafakwa ntaba, Naphambi kweenduli; Engekawenzi umhlaba namaphandle, Nothuli lonke lwelimiweyo. Ekulilungiseni kwakhe izulu, ndandikho apho; Ekubuzungulezeni kwakhe ngomda ubuso bamanzi anzongonzongo; Ekusiqiniseni kwakhe isibhakabhaka phezulu; Ekugalelekeni kwemithombo yamanzi anzongonzongo; Ekulumiseleni kwakhe ulwandle umda walo, Ukuba amanzi angawugqithi umthetho wakhe; Ekuzimiseni kwakhe iziseko zehlabathi: Ndaye ndinaye, ndiyingcibi yomsebenzi, Ndiziyolisa ngokwam iimini ngeemini; Ndidlala phambi kwakhe ixesha lonke, Ndidlala kwelimiweyo ihlabathi lakhe; Nokuziyolisa kwam kukoonyana babantu. Ke ngoko, bonyana, ndiveni; Hayi, uyolo lwabazigcinayo iindlela zam! Yivani uqeqesho, nibe nobulumko, Ningaluyeki. Hayi, utolo lomntu ondivayo, Elinde ezingcangweni zam iimini ngeemini, Egcine emigubasini yeminyango yam! Kuba ofumana mna, ufumene ubomi; Uzuzé okukholekileyo kuYehova. Ophosana nam wona owakhe umphefumlo; Bonke abandithiyayo bathanda ukufa.
IMIZEKELISO 8:1-36 IBHAYIBHILE (XHO96)
Yivani, nâbo ubulumko bumemeza! Nayo ingqiqo nantso izazisa. Kaloku bumi ngasezindleleni phezu kweentaba; ewe, nabu buthe bhunxe eziphambukeni zeendlela. Nabo bungxang' emasangweni edolophu; ewe, buyamemelela ekungeneni esixekweni: “Hoyina, ndibhenela kuni, nina nonke luntu; ndiyanibiza nani, nzala yakwantu. Kambe nani, ziyatha, fundan' ingqiqo, nani, nina zidenge, qalisan' ukuqonda. Phulaphulani, kuba ndiza kutheth' izintw' ezibalaseleyo; yivani, kuba ndiza kuyixel' imfanelo. Kaloku ngomlomo wam ndiza kutheth' inyaniso, kuba ke mna ndiyithiyil' inkohlakalo emilebeni yam. Onke amazwi omlomo wam anyanisekile; ubuqhophololo nobuxoki abukho kuwo. Kumntu oqondayo onke acacile; kwâbo baziyo onke alungile. Nawe ke, yamkela ingqeqesho kunesiliva; ndithi thatha ulwazi kuneyona golide. Mna bulumko ndiyawagqitha namatye exabiso; nakwiindidi zobutyebi mna andidlulwa nto. “Mna bulumko ndihlala ndithe qwa; ndixakath' ulwazi kunye nokulungelelanisa. Ukumthobela *uNdikhoyo kukubuthiya ububi. Yiloo nto ndikuchasileyo ukuzigwagwisa, ikratshi, ukungabi nasimilo, kunye nentetho egwenxa. Ndingusomacebo, ndingumthombo weembono ezichubekileyo; ndinako ukuqonda, kanti nokomelela kokwam. Ewe, oozikumkani balawula ngam, neziphathamandla zilawula ngobulungisa nje ndim. Bonke abasemagunyeni bancedwa ndim lo: oomatshawe, noozikhulu, nabagwebi ngokwabo. Kaloku ndiyabathanda abo bandithandayo, futhi ndiyafumaneka kwabo bandifunayo. Ndibathi jize ngesihomo nendyebo, batsho babe nobutyebi obuzinzileyo nenkqubela. Inzala engenxa yam ingaphezu kwayo negolide; imveliso yam iyayibetha neyona siliva. Ihambo yam bubulungisa bodwa; iindlela zam zifanelekile. Ubutyebi lilifa endibanikayo abo bandithandayo; ndibathi jize ngoovimba abaphuphumayo. “Ekuqalekeni kwendalo kaNdikhoyo mna ndandikho ndingowakhe; ewe, ndandikho ingekabikho imisebenzi yakhe yamandulo. Mna wandiqingqa kwasephakadeni, kuqala ngqa, nehlabathi lingekabikho. Ndavela engekabikho namanzi anzongo-nzongo, tanci ingekaveli nemithombo ephuphuma amanzi. Ndingowokuqala phambi kwazo neentaba; neenduli zilibone emva kwam ilanga. Ndabakho ungekabikho umhlaba neentili zawo; ewe, kwakungekabikho nothuli olu ehlabathini! Ndandikho ekumiselweni kwamazulu nguThixo, xa wayetwabulula isibhakabhaka kumanzi anzongo-nzongo. Xa wayesambathisa isibhakabhaka ngamafu ndandilapho, nangokuya wayeseka imithombo yeelwandle ndandikho. Ndandilapho xa wayemisa imida yolwandle, xa wayesithi: ‘Latyuza, kodwa ungagqithi apha.’ Ekuzimiseni kwakhe iziseko zehlabathi ndandikho. Ewe, ndayingcali yomsebenzi, ndiyintonga yakhe yasekhosi; ndandizele yimincili iimini ngeemini, ndivuya apho ecaleni kwakhe. Ngenene ndandichulumacha kulo elimiweyo; ndandiziva ndinemihlali phakathi koluntu. “Ngoko ke, bonyana, ndiphulaphuleni, kuba banoyolo abo bahamba ngeendlela zam. Yamkeleni ingqeqesho, ukuze nibe zizilumko; sanukuyityeshela, koko bambelelani kuyo. Unenyhweba kambe umntu ondiphulaphulayo; nditsho lowo uhlala enkundleni yam yonke imihla, osoloko elindile emasangweni am phaya. Ozuze mna ke ubufumene ubomi; uxhamla ukwaneliseka kukaNdikhoyo. Kambe ke yena ondiphosileyo uzenzakalisile; kanti ke lowo undithiyileyo uthand' ukufa.”
IMIZEKELISO 8:1-36 Contemporary Xhosa Bible 2024 (CXB24)
Abumemezi na ubulumko? Kwakutheni ukuze ilizwi lakhe livakale? Emantloko eendawo eziphezulu, ngasendleleni, emendweni. Ubiza emasangweni, emasangweni omzi, emasangweni amasango; Ndibiza kuni, madoda; Ilizwi lam lisiya koonyana babantu. Buqondeni ubulumko, zinyabi, zinyabi, yibani nentliziyo elumkileyo. Yivani; kuba ndiya kuthetha izinto ezimangalisayo; nokuvula umlomo wam kuya kuba yinyaniso. Ngokuba umlomo wam uxela inyaniso; Okungendawo kulisikizi emlonyeni wam. Yonke intetho yomlomo wam isebulungiseni; akukho nto igwenxa okanye itenxileyo kuzo. Zonke izinto zisingise kwizilumko, zilungile kwabazuze ukwazi. Yamkelani uqeqesho lwam, ningamkeli silivere; nolwazi ngaphezu kwegolide embiweyo. Kuba ubulumko bulungile ngaphezu kweeperile; nazo zonke izinto ezinqwenelekayo azinakulinganiswa nabo. Mna, bulumko, ndihleli ngengqondo, Ndazuza ukwazi inzululwazi. Ukoyika uYehova kukuthiya into embi; Ndikuthiyile ukuzidla, ukukratsha, indlela egwenxa, nomlomo ongendawo; Inkumbulo yeyam, nobulumko bugqibelele; Yingqondo; Ndinamandla. Ookumkani balawula ngam, Nezidwangube ziceba ubulungisa. Balawula ngam abathetheli, nabagwebi bonke belimiweyo. Abandithandayo ndiyabathanda nam; nabo bandifunayo baya kundifumana. Bunam ubutyebi nozuko; ewe, ubutyebi banaphakade nobulungisa. Zilungile iziqhamo zam ngaphezu kwegolide embiweyo, nakwengcwengekileyo; umvuzo wam yisilivere esulungekileyo. Ndihamba ngomendo wobulungisa, phakathi kweendlela ezisesikweni; Ukuze ndibenzele okulungileyo abandithandayo; ndibuzalise ubuncwane babo. uYehova wandenza ndaba yintlahlela yendlela yakhe, Ndaba ngowamandulo emisebenzini yakhe yakudala. Mna ndasekwa kususela kumaxesha amandulo, kwasephakadeni, Kwasemaphakadeni elimiweyo. Ndazalwa kungekabikho bunzulu; kungekho maqula azele ngamanzi. Iintaba azikasekwa, neenduli zingekaveli; Akenzanga hlabathi, namasimi, Nothuli lomhlaba. Ekulilungiseni kwakhe izulu, ndandikho apho; Ekuwatywineni kwakhe amafu phezulu, Ekutywineni kwakhe amaqula oonogumbe behlabathi. uEnere waluwisela umthetho ulwandle, ukuba amanzi angawexuki umthetho wakhe, Ekuzimiseni kwakhe iziseko zehlabathi. Ke kaloku ndandinaye, njengokungathi omnye esondlwe naye; Vuyani ngenxa yesahlulo sehlabathi; noyolo lwam lwalukoonyana babantu. Bantwana bam, ndiveni kaloku, ngokuba hayi, uyolo lwabazigcinayo iindlela zam! Yivani uqeqesho, nibe nobulumko, ningalushiyi. Hayi, uyolo lomntu ondivayo, Ozigcinayo iingcango zam imihla yonke, Elondoloza iingcango zeminyango yam; Ngokuba ondifumeneyo mna ufumene ubomi, nenceba evela kuYehova. Ke yena ondingcatshayo utshabalalisa umphefumlo wakhe; bonke abandithiyileyo bathanda ukufa.
IMIZEKELISO 8:1-36 Incwadi Yeziba̔lo Ezingcwele 1864, 1902 (Xhosa Appleyard) (XHO1902A)
UBULUMKO abubizi na? nengqondo ayipakamisi na ilizwi layo? Engcopo yendawo ezipakamileyo ngasemendweni, pakati kwazo indlela buyazimisa. Ngecala lamasango, ekungenweni kwesixeko, ngasemnyango wengcango, buyadanduluka. Kwa kuni, madoda! ndiyabiza; ilizwi lam likubo onyana babantu. Nina zidenge! qondani ubuciko; nani mahilihili! qondani ingqiqo. Yivani; ngokuba ndiya kuteta izinto ezinobomi; nokuvula kwomlomo wam kwoba ngolungelelwano. Ngokuba ikuhlangubo lam liya kupimisela inyaniso; kanjalo ubumenemene buyintshontsho emlonyeni wam. Zonke iziteto zomlomo wam zisebulungiseni; akuko kuzo okujikayo nokugwenxa. Zisekuhleni zonke kuye oqondayo; zilungile kubo abafumanayo ukwazi. Yamkelani imfundiso yam, ningamkeli isilivere; kwa nokwazi ngapezu kwegolide edlulisileyo. Ngokuba ubulumko bulungile pezu kwerubi; nazo zonke izinto ezinqwenelekayo azingelingane nabo. Mna bulumko ndihleli nentelekeleliso; nokwaziwa kwamaqinga alumkileyo ndiyakufumana. Ukwoyika UYEHOVA kukutiya inkohlakalo; ir̔atshi, nokuzidla, nendlela ekohlakeleyo, nomlomo wobumenemene, ndiyazitiya. Ubucebo bobam, nobuqiqo; ndiyingqondo; amandla angawam. Okumkani bapata ngam, nenkosi zimisa ubulungisa. Inkosana zipata ngam, nemiduna, kwa bonke abagwebi bomhlaba. Ndiyabatanda abo batanda mna; nabo bandifuna msinya, baya kundifumana. Ubutyebi bunam, nodumo; imfuyo engagugiyo, nobulungisa. Isixakato sam silungile pezu kwegolide, pezu kwegolide ecokisiweyo; nenzuzo yam pezu kwesilivere edlulisileyo. Ndiyahamba emendweni wobulungisa, pakati kwendlela zobugwebo; ukuze ndizuzise abanditandayo indyebo; ewe, indawo zabo zokubekela ndiya kuzizalisa. UYEHOVA wandifuya ndikukuqala kwendlela yake, ingekabiko imisebenzi yake, kwa kudala. Kwa kunapakade ndatanjiswa, kwa sekuqaleni, ungekabiko umhlaba. Zakuba zingeko inzulu, bendizelwe; yakuba ingeko imitombo emanzi maninzi. Zingekaqinanga intaba, zingekabiko induli, ndandizelwe; nxa ebengekawenzanga umhlaba, nezindle, nolwokuqala utuli lwelizwe. Oko abelungisa amazulu, bendikona mna; oko abeba̔la isazinge pezu kwobuso benzulu; oko abeqinisa amafu ngapezulu; oko womelezayo imitombo yenzulu; oko wabekela ulwandle umda walo, ukuba amanzi angagqiti ilizwi lake; oko abemisa imisekelo yomhlaba; ndasendiko kufupi naye njengowondliweyo; ndandiluyolo lwake imihla ngemihla, ndigcoba pambi kwake ngamaxesha onke; ndigcoba kwezimiweyo indawo zomhlaba wake; lwaye uyolo lwam lwanonyana babantu. Ngako kaloku ndiveni, bonyanandini! ngokuba benetamsanqa abazigcinayo indlela zam. Yivani imfundiso, nilumke, ningayali. Unetamsanqa umntu ondivayo, elinda emasangweni am imihla ngemihla, egcina imigubasi yengcango zam. Ngokuba ondifumanayo efumana ubomi; uya kuzuza imbuko KUYEHOVA. Kodwa owonayo kum, uyabandezela owake umpefumlo: bonke abanditiyayo bayatanda ukufa.