ULUKA 20:27-47
ULUKA 20:27-47 IZIBHALO EZINGCWELE (XHO75)
Kwafika ke kuye abathile bakubaSadusi, bona abo bakuphikayo ukuba kukho uvuko; bambuza, besithi, Mfundisi, uMoses wasibhalela wathi, Ukuba ozalana nothile uthe wafa enomfazi, wafa ke lowo engenabantwana, maze ozalana naye amzeke umfazi lowo, amvelisele imbewu ozalana naye. Ke bekukho abantu abasixhenxe bezalana; waza owokuqala wazeka umfazi, wafa engenabantwana. Nowesibini wamzeka umfazi lowo, wafa naye engenabantwana. Nowesithathu wamzeka; benjenjalo ke bosixhenxe, bafa bengashiyanga bantwana. Emveni ke kwabo bonke, wafa naye umfazi lowo. Eluvukweni ngoko, ungumfazi wawuphi na kubo? Kuba bosixhenxe bebenaye engumfazi. Waphendula ke wathi kubo uYesu, Abeli phakade bayazeka, bayendiswa; ke bona abo kuthiwe bafanele ukufika kwelo phakade, nakukuvuka kwabafileyo, abazeki, abendiswa; kuba abasenakubuya bafe; kuba bengangezithunywa zezulu; kanjalo bangoonyana bakaThixo, bengabovuko njalo. Ke kaloku, le ndawo yokuba abafileyo bayavuka, noMoses wayithi thupha kwindawo ethetha ngetyholo, xenikweni athi, INkosi inguThixo ka-Abraham, inguThixo kaIsake, inguThixo kaYakobi. AkaThixo ke wabafileyo, ungowabaphilileyo; kuba bonke baphile ngaye. Baphendula ke abathile bakubabhali, bathi, Mfundisi, utyaphile ukutsho. Baye ke bengasenabuganga bakumbuza nento le. Wathi ke kubo, Batsho ngani na ukuthi, uKristu• ungunyana kaDavide? Kanti noDavide yena ngokwakhe uthi encwadini yeeNdumiso, Yathi iNkosi eNkosini yam, Hlala ngasekunene kwam, Ndide iintshaba zakho ndizenze isihlalo seenyawo zakho. (INdum. 110:1) UDavide ngoko umbiza ngokuthi, Nkosi; aze abe ke ngunyana wakhe ngani na? Ke kaloku, bakubon' ukuba bayeva bonke abantu, wathi kubafundi bakhe, Balumkeleni ababhali, abathandayo ukuhamba ngeengubo ezinde, bathande imibuliso ezindaweni zembutho, nezihlalo zobukhulu ezindlwini zesikhungu, nezilili zobukhulu ezidlweni; abadla izindlu zabahlolokazi, baze ngokunyhwalaza bathandaze uzungu. Abo baya kwamkela ugwebo olugqithiseleyo.
ULUKA 20:27-47 IBHAYIBHILE (XHO96)
Kweza abathile *bakubaSadusi kuYesu (bona abo bathi akukho luvuko lwabafileyo), bambuza ke besithi: “Mfundisi, uMosis wasibhalela umthetho esithi: ‘Ukuba ubani uthe wafa, eshiya umfazi engekabi nabantwana, makathi umntakwabo amngene umfazi lowo, baze bamzalele abantwana umfi.’ Ke kaloku kwakukho oonyana bomntu omnye abasixhenxe, yaza inkulu yazeka umfazi, yasweleka ingekabi nabantwana. Wathi ke owesibini wamngena, naye wasweleka engekabi nabantwana. Wenjenjalo nowesithathu. Bada baba naye bosixhenxe, kodwa abashiya mntwana. Emva kwabo bonke wasweleka naye umfazi. Ke ngoko eluvukweni lwabafileyo uya kuba ngumfazi wawuphi na kubo? Kuba kaloku bosixhenxe babemthathile.” Waphendula uYesu, wathi kubo: “Abantu beli phakade bayazeka, besendiswa; kodwa bona abo bafanelwe kukuvuka ekufeni, baphile kwiphakade elizayo, àbazeki, àbendiswa. Bona abasenakufa, kuba bafana nezithunywa zezulu. Bona bangoonyana bakaThixo, kuba kaloku bavukile kwabafileyo. Ke yona into yokuba abafileyo bayavuka, noMosis uyayikhankanya kwisiqendu esithetha ngetyholo elivuthayo encwadini yakhe, apho abiza iNkosi ngokuthi inguThixo ka-Abraham, uThixo kaIsake, uThixo kaYakobi. AkaThixo wabafileyo ke; unguThixo wabaphilayo, kuba kuye bonke bayaphila.” Baphendula ke abathile bakubachazi-mthetho, bathi: “Ngxatsho ke, Mfundisi; uthethe kakuhle!” Babengasenabuganga ke bakumbuza nento le. Ke uYesu wathi kubo: “Batsho ngani ke ukuthi: ‘*UKrestu ngunyana kaDavide’? Kanti noDavide ngokwakhe kwiNcwadi yeeNdumiso uthi: “ ‘Yathi iNkosi eNkosini yam: Hlala ngakum kweli wonga, lo gama ndikoyisela iintshaba zakho.’ “Ukuba uDavide ngokwakhe uthi uKrestu yiNkosi, angathini ke ukuba ngunyana wakhe?” Ke kaloku, besiva bonke abantu, uYesu wathi kubafundi bakhe: “Balumkeleni abachazi-mthetho, abathanda ukuhamba ngezambatho ezide, bethanda ukuba kukhahlelwe kubo emabaleni embutho, befuna izihlalo eziphambili *ezindlwini zesikhungo, neendawo zamawonga ezidlweni. Abo bayiphangayo imizi yabahlolokazi, baze bazenzise batsho ngemilembelele yemithandazo, ngabo abaya kufumana esona sohlwayo sikhulu.”
ULUKA 20:27-47 Contemporary Xhosa Bible 2024 (CXB24)
Kwafika ke kuye abathile bakubaSadusi, bona abo bakuphikayo ukuba kukho uvuko; bambuza, besithi, Mfundisi, uMoses wasibhalela wathi, Ukuba ozalana nothile uthe wafa enomfazi, wafa ke lowo engenabantwana, maze ozalana naye amzeke umfazi lowo, amvelisele imbewu umzalwana wakhe. Ke bekukho abantu abasixhenxe bezalana; waza owokuqala wazeka umfazi, wafa engenabantwana. Nowesibini wamzeka umfazi lowo, wafa naye engenabantwana. Nowesithathu wamzeka; Benjenjalo ke bosixhenxe, bafa bengashiyanga bantwana. Emveni ke kwabo bonke, wafa naye umfazi. Eluvukweni ngoko, ungumfazi wawuphi na kubo? kuba abasixhenxe bebenaye engumfazi. Waphendula ke uYesu wathi kubo, Abeli phakade bayazeka, bayendiswa; ke bona abo kuthiwe bafanele ukufika kwelo phakade, nakukuvuka kwabafileyo, abazeki, abendiswa; abasenakubuya bafe; kuba bengangezithunywa zezulu; bangoonyana bakaThixo, bengabovuko njalo. Ke kaloku, le ndawo yokuba abafileyo bayavuka, noMoses wayithi thupha kwindawo ethetha ngetyholo, xenikweni athi, iNkosi inguThixo ka-Abraham, inguThixo kaIsake, inguThixo kaYakobi. AkaThixo ke wabafileyo, ungowabaphilileyo; kuba bonke baphile ngaye. Baphendula ke abathile bakubabhali, bathi, Mfundisi, utyaphile ukutsho. Baye ke bengasenabuganga bakumbuza nento le. Wayesithi kubo, Batsho ngani na ukuthi, uKristu ngunyana kaDavide? Uthi noDavide encwadini yeeNdumiso, Yathi iNkosi eNkosini yam, Hlala ngasekunene kwam; Ndide iintshaba zakho ndizenze isihlalo seenyawo zakho. uDavide ngoko umbiza ngokuthi, Nkosi, ungunyana wakhe ngani na? Ke kaloku, bakubon’ ukuba bayava abantu bonke, wathi kubafundi bakhe. Balumkeleni ababhali, abathanda ukuhamba ngezambatho ezinde, nemibuliso ezindaweni zembutho, nezihlalo eziphambili ezindlwini zesikhungu, neendawo eziphambili ezidlweni; abadla izindlu zabahlolokazi, baze ngokunyhwalaza bathandaze uzungu; abo baya kwamkela ugwebo olugqithiseleyo.
ULUKA 20:27-47 Incwadi Yeziba̔lo Ezingcwele 1864, 1902 (Xhosa Appleyard) (XHO1902A)
Kwaye kusiza kuye abatile bakubasadusi, abakanyelayo ukuba kuko uvuko, bambuza, besiti: Mfundisi! u‐Mosesi wasiba̔lela ukuti: Xeshekweni kufayo umkuluwe womntu, enomfazi, afe lowo engenabantwana, makati umninawe wake azeke umfazi wake, amvusele umkuluwe wake inzalo. Kekaloku bekuko abazalwana abasixe̔nxe: waza owokuqala wazeka umfazi, wafa engenabantwana. Waza owesibini wazeka umfazi wake, wati naló wafa engenabantwana. Waza owesitatu wamzeka; benje njalo kwa nabasixe̔nxe; abashiya bantwana ke, bafa nokufa. Wati emveni kwabo bonke wafa nomfazi. Ngako eluvukweni, uba ngumfazi wawupina kubo? ngokuba abasixe̔nxe bebenaye engumfazi. Waza wapendula wati kubo u‐Yesu: Usapo lwelilizwe likoyo luyazeka, luyendiswa kanjako; kodwa abo babalwa ngokuba befanele ukuzuza elolizwe lizayo, nokuvuka ekufeni, abazeki, abendiswa kanjako: ngokuba bengenako nokuba babuye bafe: ngokuba befana nengelosi; kanjalo balusapo LUKATIXO, belusapo lwaseluvukweni. Kodwa ukuba bayavuswa abafileyo, kuxelwe nangu‐Mosesi endaweni yetyolo, akuti UYEHOVA u NGUTIXO ka‐Abrahame, NOTIXO ka‐Yisake, NOTIXO ka‐Yakobi. Kekaloku aka NGUTIXO wabafileyo, ungowabahleliyo; ngokuba bonke behleli kuye. Baza bapendula abatile bakubaba̔li, bati: Mfundisi! ulungisile ukutsho. Baye bengabi senakukalipa kwokumbuza nto. Wayesiti kubo: Bati nina ukuti u‐Kristu ungunyana ka‐Davide? Kanti u‐Davide ngokwake uti encwadini yamaculo: Wati UYEHOVA KWINKOSI yam: Hlala ngasekunene kum, ndide ndenze intshaba zako zibe sisitulo senyawo zako. U‐Davide ngoko uyambiza NGENKOSI; aze ati nina ke ukuba ngunyana wake? Kekaloku nxa bebesiva bonke abantu, wati kubadisipile bake: Lumkelani ababa̔li, abafuna ukuhamba ngengubo ezinde, abatanda izibuliso ezindaweni zentengo, nezihlalo zapambili ezindlwini zentlanganiso, nendawo zobukulu ezidlweni; abadlayo izindlu zabahlolokazi, besenza nemitandazo emide ngokuzenzisa: aba baya kwamkela ukugwetywa okukulu ngakumbi.