KUTIMOTI I 6:1-21
KUTIMOTI I 6:1-21 IZIBHALO EZINGCWELE (XHO75)
Onke ke amakhoboka àphantsi kwedyokhwe, ndinga ke angababalela abaniniwo ekuthini, bafanelwe yimbeko yonke, ukuze igama likaThixo nemfundiso inganyeliswa. Lawo ke ankosi zikholiweyo, makangazideli ngakuba zingabazalwana; makube kukhona azikhonzayo, ngokuba zingamakholwa, ziziintánda ezingamadlelana ngomsebenzi wokusiza. Bafundise ezi zinto, ubavuselele. Ukuba umntu ufundisa mfundiso yimbi, angavumani namazwi aphilileyo angaweNkosi yethu uYesu Kristu, nemfundiso engokokuhlonela uThixo: úthiwe lwale likratshi, engazi lutho kakuhle; ufa kukukhanuka iimbuzwano namaphike amazwi, ekuthi kwezo nto kuphume umona, iinkani, izinyeliso, izirhano ezingendawo, iimpikiswano zochuku lwabantu abonákele iingqiqo, abahluthwe inyaniso, beba ukuhlonela uThixo kukusekeleza inzuzo. Ke kona ukuhlonela uThixo, kúndawonye nokwanela, kusekelezé inzuzo enkulu. Kuba sibe singangénanga nanto ehlabathini; kuyabonakala kananjalo ukuba asinakuphuma nanto. Sinento ke edliwayo neyambathwayo, masanele zezo zinto. Ke abo banga bangaba zizityebi, beyela ekuhendweni, nasesibatheni, nasezinkanukweni ezininzi ezibubudenge ezenzakalisayo; zona zibatshonisayo abantu ekonakaleni, nasekutshabalaleni. Kuba ukuthanda imali yingcambu yeento zonke ezimbi: abathe abathile, ngokuzolulela kuko, balahlekana nokholo, bazibhodloza ngobuhlungu obuninzi. Ke wena, mntu kaThixo, zibaleke ezo zinto; phuthuma ke ubulungisa, ukuhlonela uThixo, ukholo, uthando, unyamezelo, ubulali. Wuzame umzamo omhle wokholo; bubambe ubomi obungunaphakade, owabizelwa nokubizelwa kubo, waza waluvuma uvumo oluhle emehlweni amangqina amaninzi. Ndiyakuthethela emehlweni kaThixo, ozidlisa ubomi zonke izinto, nasemehlweni kaKristu Yesu, owangqina wavuma uvumo oluhle phambi koPontiyo Pilato, ukuba uwugcine umthetho lo, ungabi nabala, ungabi nakukhalazelwa, kude kufike ukubonakala kweNkosi yethu uYesu Kristu, aya kukubonakalisa ngawakhe amaxesha; lowo usikelelekileyo, ukuphela konamandla, uKumkani kakumkani, uNkosi kankosi; okuphela konokungafi, ehleli ekukhanyeni okungenakusondelwa; ekungekho namnye kubantu owakha wambona, nonako ukumbona; kuye makubekho imbeko namandla angunaphakade. Amen. Abazizityebi kweli phakade langoku bathethele bangakratshi, bangathembeli butyebini bungagqalekiyo; mabathembele kuThixo ophilileyo, obeka phambi kwethu izinto zonke ngokobutyebi, ukuba zidliwe; benze okulungileyo, babe zizityebi zemisebenzi emihle, babe nokwaba kakuhle, babe nobudlelane; baziqwebele isiseko esihle, base exesheni eliza kuza, ukuze babubambe ubomi obungunaphakade. Wa, Timoti, loo nto uyiphathisiweyo yigcine, uphambuke ezintethweni ezingezizo, ezihlambelayo, nakwiinkcaso zokwazi, okubizwa njalo kuxokwa; ábasuke abathile, bethe banako oku kwazi, baluphosa ukholo. Ubabalo malube nawe. Amen.
KUTIMOTI I 6:1-21 IBHAYIBHILE (XHO96)
Bonke abantu abaphantsi kwedyokhwe yobucaka mababahloniphe ngokupheleleyo abaphathi babo, ukuze igama likaThixo kunye nemfundiso yobuKrestu zingajongelwa phantsi. Naxa abaphathi bengamakholwa, izicaka mazingabadeli kuba bekholwa kunye. Ndaweni yaloo nto mazithembeke ngakumbi, kuba kaloku abo zibasebenzelayo banye kunye nazo elukholweni naseluthandweni. Shumayela ufundise ngale mibandela. Nabani na ofundisa imfundiso enxamnye nale, okanye ongahambisaniyo neendaba zeNkosi yethu uYesu Krestu, nemfundiso yonqulo olwamkelekileyo, lowo uthiwe lwale likratshi nokungazi. Ungumntu osoloko enxanelwe ukuthetha amazwi alambathayo azala ingxabano nomona, ukungevisisani nokwenyelisa, ukukrokrelana neengxoxo ezingaphele ndawo. Zonke ezi zinto yimikhwa yabantu abangqondo zingasebenziyo, asebelahlekene nayo inyaniso. Benza ngathi unqulo yindlela yokuzuza ubutyebi. Ewe kambe, unqulo luyamtyebisa umntu ukuba uyaneliswa zezo zinto anazo. Kaloku zange size nanto ehlabathini; ngoko ke siya kumka singaphathanga nto. Kambe ke, ukuba sinako ukutya nempahla yokunxiba masaneliswe. Abo baxhinele ubutyebi beyela kwizilingo nemigibe, bathi bexinwe yiminqweno yobudenge eyingozi, batshone ebundlavinini nasekutshabalaleni. Ukuthanda imali yingcambu yazo zonke iintlobo zobubi. Abanye bathe ngokusukelana nayo bahola elukholweni, baza bayingxwelerha imiphefumlo yabo ngeenzingo. Kodwa ke, wena mntu uzinikele ngokupheleleyo kuThixo, zicezele zonke ezi zinto. Phuthuma ukulungisa, unqulo, ukuthemba, uthando, ukunyamezela, nobulali. Kolu gqatso lokholo yenza konke okusemandleni ukuze ubufumane ubomi obungonaphakade. Ewe, kaloku wabizelwa yona le njongo, ngokuya wawusenza isivumo sokholo phambi kwamangqina amaninzi. Ngoku ke ndiyakugunyazisa phambi koThixo umniki bomi kuzo zonke izinto, naphambi koYesu Krestu, owenza isivumo wangqina phambi koPontiyo Pilato. Wuthobele umyalelo, uwuphathe nyulu ungenabala, kude kube yiMini yokubonakala kweNkosi yethu uYesu Krestu. Le mbonakalo uThixo uya kuyizalisekisa ngexesha lakhe elifanelekileyo – ewe, uThixo ingangamsha yengangalala elawula konke, iKumkani yeekumkani, iNkosi yamakhosi! Nguye yedwa ongasoze afe; uhlala kubuqaqawuli obungafikelelwayo. Akukho mntu wakha wambona nonokuze ambone. Kuye makubekho isidima nobungangamsha ngoku kude kube ngunaphakade! *Amen. Bayale abantu abanobutyebi beli hlabathi bangaziphakamisi baqamele ngento engaqinisekanga njengemali, koko mabathembele kuThixo, kuba yena unezinwe, unako ukusenza sixhamle zonke izinto sonwabile. Bakhuthaze benze imisebenzi emihle, babe zizinhanha ngemisebenzi elungileyo, babe nezinwe, babaphe abasweleyo. Ukuba benjenje ke boba bazigcinela indyebo eya kuba sisiseko sekamva labo. Ngokwenjenjalo bobuzuza ubomi bokwenyani. Wa Timoti, loo nto uyiphathisiweyo yigcine! Ziphephe iincoko eziphuthileyo zeli hlabathi, ndawonye neengxoxo ezilambathayo “zolwazi,” kuba abaninzi bathe beqhayisa ngalo olu lwazi, suke baluphosa ukholo. Makube sisisa kuni nonke.
KUTIMOTI I 6:1-21 Contemporary Xhosa Bible 2024 (CXB24)
Onke ke amakhoboka aphantsi kwedyokhwe, ndinga ke angababalela abaniniwo ekuthini, bafanelwe yimbeko yonke, ukuze igama likaThixo nemfundiso inganyeliswa. Lawo ke ankosi zikholiweyo, makangazideli ngakuba zingabazalwana; kanye ke bakhonze, ngenxa yokuba bethembekile, beziintanda, babelana ngenzuzo. Bafundise ezi zinto, uvuselele. Ukuba nabani na ufundisa enye into, kwaye engavumelani namazwi aphilileyo angaweNkosi yethu uYesu Kristu, kunye nemfundiso engokobuthixo; unekratshi, engazi nto; Iimpikiswano ezigwenxa zabantu abonakele iingqiqo, abahluthwe inyaniso, beba ukuhlonela uThixo kukuzuzela inzuzo embi. Ke kona ukuhlonela uThixo, kundawonye nokwanela, kusekeleze inzuzo enkulu. Kuba sibe singangenanga nanto ehlabathini; kananjalo asinakuphuma nanto. Sinento ke edliwayo neyambathwayo, masaneliswe zezo zinto. Abo banga bangaba zizityebi, beyela ekuhendweni, nasesibatheni, nasezinkanukweni ezininzi ezibubudenge ezenzakalisayo; zona zibatshonisayo abantu ekonakaleni, nasekutshabalaleni. Kuba ukuthanda imali yingcambu yeento zonke ezimbi: abathe abathile, ngokuzolukileyo, balahlekana nokholo, bazibhodloza ngobuhlungu obuninzi. Ke wena, mntu kaThixo, zibaleke ezo zinto; phuthuma ubulungisa, ukuhlonela uThixo, ukholo, uthando, umonde, ubulali. Yilwa umlo omhle wokholo, bubambe ubomi obungunaphakade, owabizelwa kubo, waza wenza uvumo lwasesidlangalaleni oluhle phambi kwamangqina amaninzi. Ndiyakuthethela phambi koThixo lowo uzidlisa ubomi zonke izinto, naphambi koYesu Krestu, owangqina uvumo lwesivumo esihle phambi koPontiyo Pilato, ukuba uwugcine lo mthetho, ungabi nabala, ungabi nakusoleka, ide ifike iNkosi yethu uYesu Kristu; aya kubonakaliswa ngamaxesha akhe, lo ungowokuphela kwakhe onegunya, uKumkani kakumkani, uNkosi kankosi; okuphela konokungafi, ehleli ekukhanyeni, ekungekho namnye unako ukusondela kuye; ekungekho namnye wakha wambona, nonako ukumbona; kuye makubekho imbeko namandla angunaphakade. Amen. Bathethele abazizityebi kweli hlabathi ukuba bangaphakami, bangathembeli butyebini bungagqalekiyo, mabathembele kuThixo ophilileyo, obeka phambi kwethu zonke izinto ngokobutyebi, ukuba zidliwe; benze okulungileyo, babe zizityebi zemisebenzi emihle, babe nokwaba, babe nobudlelane; baziqwebele isiseko esihle, base exesheni eliza kuza, ukuze babubambe ubomi obungunaphakade. Timoti, loo nto uyiphathisiweyo yigcine, uphambuke ezintethweni ezingento, ezihlambelayo, nakwiinkcaso zemfundo leyo, kubizwa ngokuba kuxokwa; abasuke abathile bethe banako, baluphosa ukholo. Ubabalo malube nawe. Amen. (Eyokuqala eya kuTimoti yabhalwa eLawodike, eyona dolophu inkulu eFrigiya Pacatiana.)
KUTIMOTI I 6:1-21 Incwadi Yeziba̔lo Ezingcwele 1864, 1902 (Xhosa Appleyard) (XHO1902A)
MABATI abo basukuba bengamakonza ngapantsi kweyokwe babalele abazo inkosi ukuba zifanele imbeko yonke, ukuze kungagxekwa igama LIKATIXO nofundiso lwake. Kanjako abo banazo inkosi ezikolwayo, mabangazideli, kuba zingabazalwana; koko mabati ngakumbi bazikonze, kuba bengamakolwa nabatandwa abo balwamkelayo uncedo lwesenzelelo sabo. Uti ezizinto uzifundise uziyale. Ukuba kuko umntu ongumfundisi wofundiso olulumbi, oti kanjako angavumeli amazwi anobomi, a WENKOSI yetu u‐Yesu Kristu, nofundiso oluyelelana nobubedesho, ukukumele lir̔atshi, engazi luto kakulu noko, koko egeza ngemibuzo nezipikisano ngamazwi, okuvela kuzo umona, ipike, ingxeko, iziṙano ezikohlakeleyo, ingxolisano ezigwenxa zabantu abaluvo lwonakeleyo, abalahlekene nenyaniso kanjalo, beba ububedesho buyinzuzo. Gwegweda kubo abanjalo. Kodwa ububedesho ndawonye nokutomalala buyinzuzo enkulu. Ngokuba singangenanga nanto elizweni; kusekuhleni ukuba kanjako asingepume nanto. Kodwa sakuba sinezinto zokutya nezokwambata, masitomalale zizo ezi. Kodwa abo banga bangaba zizityebi bayeyela ekulingweni, nasemgibeni, nasezinkanukweni ezininzi ezibudenge ezenzakalisayo, eziti ke zona zibantywilise abantu embujisweni nasentshabalalweni. Ngokuba ukutanda imali kuyingcambo yabo bonke ububi; abate inxenye beyinqwenela balahleka kulo ukolo, bazibadluza ngentsizi ezininzi. Wena kodwa, ndoda KATIXO! baleka ezizinto; uze uputume ubulungisa, ububedesho, ukolo, utando, umonde, ululamo. Yilwa ukulwa okulungileyo kwokolo; bubambe ubomi obungunapakade, owabubizelwa kubo kanjalo, wayivuma imvumo elungileyo pambi kwamanqi̔na amaninzi. Ndiyakuyala ebusweni BUKATIXO ozipilisayo izinto zonke, nasebusweni buka‐Kristu Yesu, owayinqi̔nayo pambi kwo‐Pontiyusi Pilati imvumo elungileyo, ukuba uwugcine umyalelo ube ungenabala, ungenakukalazelwa, kude kubeko ukubonakala KWENKOSI yetu u‐Yesu Kristu; aya kubonakalisa kona kwawake amaxesha, lowo ungosikelelweyo nongokupela KWOSOMANDLA, onguye UKUMKANI kakumkani NENKOSI kankosi; ongokupela kwonokungafi, ehleli ekukanyeni okungenakusondelwa, ekungeko namnye umntu owambonayo, ekungeko ongambonayo kanjako: okuye makubeko udumo namandla angunapakade. Amene. Abazityebi kwelilizwe lakaloku nje bayalele ukuba bangaqanqalazi, bangatembi ebutyebini obungenakuqina kanjako, bati batembe KUTIXO ohleliyo, osinikayo ngobuninzi zonke izinto kudliwe ukuyola ngazo; ukuba benze ngobubele, batyebe emisebenzini elungileyo, banxamele ukwahlulahlula, batande ukwabela; beziqwebela umsekelo olungileyo bekangela ixesha elizayo, ukuze babambe ubomi obungunapakade. Wa Timote! gcina oko kubekelweyo kuwe, ukupepa nje ukubadaza okungengcwele nokuca̔sa kwokwazi okubizwa njalo ngobuxoki; abate inxenye bexela ukuba banako baposisa ngalo ukolo. Ufefe malube nawe. Amene.