Likezo 26
26
Paulusi u ikalabela fapil'a Agripa
1Agripa, a li ku Paulusi, “U lumelezwi ku ikalabela.” Paulusi a otolola lizoho la hae, mi a ikalabela cwana.
2“Mulena Agripa, ni ikutwa ni na ni litohonolo ha ni fiwa kacenu sibaka sa ku ikalabela fapil'a hao mwa litaba kamukana ze ba ni tameleza zona Majuda. 3Sihulu ni ikutwa cwalo kakuli wena u ziba hande mikwa kaufela ya Majuda ni litaba za bona. Cwale ni kupa kuli u ni teeleze ka pilu-telele.
4“Majuda kaufela ba ziba bupilo bwa ka, ku zwa kwa bwanana bwa ka. Ba ziba kuli ku zwa kwa bwanana, ni hulezi mwa naha ya hesu ni mwa Jerusalema. 5#Lik 23.6; Bafil 3.5 Ki nto ye ba zibile kale, haiba ba tabela ku paka niti, kuli ku zwa kwa makalelo a bupilo bwa ka, ne ni li yo muñwi wa ba ba ne ba sweli ka tata bulumeli bwa sihabo luna. Ne ni li Mufalisi. 6Mi cwale ni yemi fa, ku zekiswa kakuli ni kozwi sepiso y'a n'a ezize Mulimu ni bo kukw'a luna. 7Masika a luna a lishumi ka a mabeli a na ni sepo ya kuli, ka ku sebeleza Mulimu busihu ni musihali, a ta bona sepiso yeo ha i ezahala. Mi ki kabakala sepo yeo, Mulena' ka, ha ni zekiswa ki Majuda! 8#2 Mak 7.9Kikabakalañi mina Majuda ha mu fumana butata ka ku lumela kuli Mulimu u zusa ba ba shwile?
9 #
Lik 8.3; 22.4-5 “Na kasibili ne ni hupuzi ku eza mo ne ni konela kaufela ku lwanisa libizo la Jesu wa Nazareta. 10Ki sona se ni ezize mwa Jerusalema. Ni filwe maata ki baprisita ba bahulu, mi ni kenyize balumeli ba bañata mwa tolongo. Niha ne ba atulelwa lifu, ni na, ne ni lumela cwalo. 11Hañata ne ni ba tisanga mwa masinagoge ba t'o fiwa mulatu. Ni likile ku ba tuhelisa tumelo ya bona, mi ne ni ba halifela hahulu, mane ne ni ba yelanga mwa minzi ya linaha li sili ku y'o ba nyandisa.
Paulusi u talusa mw'a lumelezi
(Lik 9.1-19; 22.6-16)
12“Ki sona se ne si ni isize kwa Damaseka, ka taelo ya baprisita ba bahulu ni ka maata a ne ba ni file. 13Ha ne ni li mwa nzila, Mulen'a ka, lizazi ha li li fahal'a toho, na bona lumonyi lo lu fita liseli la lizazi kwa ku benya, lu zwa kwa lihalimu mi lwa t'o lu beya mwahali, na, ni ba ba ne ba zamaya ni na. 14Lwa wela fafasi kaufel'a luna, mi na utwa linzwi le li li ku na ka Siheberu, ‘Saule! Saule! U ni nyandisezañi? Wa ikolofaza ka ku laha kwa ngo ya mushengela, sina pulu ha i laha kota ya muñ'a yona h'a i ciña.’ 15Na li, ‘Ki wena mañi, Mulena?’ Mi Mulena a li, ‘Ki na Jesu y'o nyandisa. 16Kono zuha, u yeme. Ni iponahalize ku wena, ku ku keta ku ba mutang'a ka. U ta ba paki ya ka, u bulelele ba bañwi ka m'o ni bonezi kacenu, ni ze ni ta ku bonisa mwa mazazi a taha. 17Ni ta ku pilisa kwa batu ba Isilaele ni kwa balicaba ko ni ka ku luma. 18Ni ku luma kuli u y'o ba kwalula meeto, kuli u y'o ba zwisa mwa lififi ni ku ba isa mwa liseli, ku ba zwisa mwa maata a Satani ni ku ba tisa ku Mulimu, ili kuli ka ku lumela ku na, ba swalelwe libi za bona, mi ba fumane sibaka sa bona mwahal'a bao ili ba Mulimu!’
Paulusi u bulela ka musebezi wa hae
19“Cwalehe, Mulena Agripa, luli ni mamezi pono ye n'e zwa kwa lihalimu. 20#Lik 9.20, 28-29 Ku kalela kwa Damaseka ni mwa Jerusalema, ku zwa fo ni mwa naha ya Judea kaufela ni mwahal'a balicaba, ni lutile kuli batu ba tuhele bumaswe bwa bona, ba sikuluhele ku Mulimu mi ba eze likezo ze bonisa kuli luli ba bakile. 21Ki ka lona libaka leo Majuda ha ba til'o ni swala mwa malapa a Tempele, mi ba batile ku ni bulaya. 22Kono Mulimu u ni tusize ku fitela la kacenu le, mi cwale ni sa yemi fa ku fitisa bupaki bwa ka kwa batu kaufela, ba banyinyani ni ba bahulu, kamukwaoswana. Se ni bulela, i sa li sona se ne si bulezwi ki bapolofita ni Mushe kuli si ta ezahala. 23#Isa 42.6; 49.6; 1 Bakor 15.20 I n'e li kuli Mesia n'a swanezi ku nyanda, mi hape i be yena wa pili ya ta zuha kwa bafu, ku bonisa liseli la bupilo kwa Majuda ni balicaba.”
24Cwalehe, Paulusi ha n'a ikalabela ka mukwa wo, Festusi a kalumuka, a li, “Paulusi wa pulumuka! Ku ituta hahulu kwa hao se ku ku pulumukisa!” 25Paulusi a alaba, a li, “Mutompehi Festusi, ha ni pulumuki! Manzwi a ni bulela ki a niti, mi hape a butali. 26Mulena Agripa u bulelezwi litaba zeo, mi ni kona ku bulela ka zona ka bundume fapil'a hae. Ni kolwa kuli u zibile ye ñwi ni ye ñwi ku zona, kakuli lika ze ha li si ka patiwa mwa sikutwana. 27Mulena Agripa, kana u lumela se si ñozwi ki bapolofita? Ni ziba kuli wa si lumela!”
28Agripa a li ku Paulusi, “Kikuli wena u hupula ku ni sikulula kuli ni be mukreste ka nakonyana ye kuswani cwana, nji?”
29Paulusi a alaba, a li, “I ka ba nako ye kuswani kapa ye telele, tapelo ya ka ku Mulimu kikuli wena ni mina kaufela ba ba ni teelelize kacenu, mu be ba ba swana sina na, kwand'a ona mawenge a feela!”
30Cwale mulena, mubusisi, Berenisi ni ba bañwi cwalo ba nanuha. 31Ha ba se ba zwile, ba bulelisana, ba li, “Mutu yo h'a na mulatu w'a ka bulaelwa kapa ku bulukiwa mwa tolongo.” 32Agripa kih'a li ku Festusi, “Mutu yo n'a swanezi ku lukululwa kabesi kuli u ezize buipilezo ku Mulena yo Muhulu Sesare.”
Currently Selected:
Likezo 26: Lozi09
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Lozi Interconfessional Bible, Catholic Edition © Bible Society of Zambia, 2009.