Genesis 2
2
Sabbatemik, perorsêvingmiglo Edeneme, nuliarêngnerublo pingortitauninganik.
1Innerput tagva ᴋilaglo nunalo kattigmajoᴋsoaᴋotingillo tamaitaᴋsuit.
2Uvlullo sepangane Gûdib sorairpait sullinine pijane. Uvlullo sepangane merngoerserpoᴋ sullinerminit tamainit pijaminit.
3Gûdiblo uvlut sepangat saimanartipâ ivsornaitilâlo, tamattomane merngoerserame sullinerminit tamainit pijaminit pingortitsivlune.
4Tamadja ᴋilaublo nunablo pingortitauningak, pingortitaungmannik taipsomane, Gûdib Nâlekab nunalo ᴋilaglo sanangmagik.
5Naternablo ukpigangit sunatuinait nunamêlungilat sulle, naternablo perortungit sunatuinait perorsimangilat sulle. Gûde Nâlegaᴋ sillaluktitsingimat sulle nuname, inuᴋangimallo sulle perorsêvilerijuksamik.
6Kissiane pujoraᴋ ᴋangattarpoᴋ nunamit, ᴋausertilugo nunab ᴋânga ilûnât.
7Gûdelo Nâlegaᴋ ivjomit, nunab ilanganit, inuliorpoᴋ, supporlugolo anernermik ômanartomik ᴋingâkikkut. Taimaglo inuk tarnelingorpoᴋ ômajomik.
8Gudelo Nâlegaᴋ perorsêviliorpoᴋ Edeneme kangilerme, tagvungalo illivâ inuk sanajane.
9Gûdiblo Nâlekab nuitipait nunamit napârtut sunatuinait takorannertut nerᴋiksarsivigijominartut, amma napârtoᴋ ômanartoᴋ perorsêviub ᴋerᴋane, napârtorlo illisimanartoᴋ ajungitomik ajortomiglo.
10Kôksoarlo kôkpoᴋ Edenemit, perorsêvik ᴋausertilugo, tagvangallo avigame, avalerᴋoᴋarpoᴋ sittamanik.
11Kôb sivorliub attinga Pison: tâmna Havilab nunangata ilûnane avatâgut kôkpok. Tagvane goldeᴋarpoᴋ.
12Nunablo tâpsoma goldinga pivianartôvoᴋ; amma kutsoᴋ tippitsiariktoᴋ tagvane nagvartaugivoᴋ alligorlo tungujuangajoᴋ.
13Kôb aipangata attinga Gihon; tâmna Kussib nunangata ilûnane avatâgut kôkpoᴋ.
14Kôt pingajuata attinga Hidêkele; tâmna Assiriab kiglingagut kôkpoᴋ. Kôllo sittamangat tagva Farat.
15Gûdiblo Nâlekab inuk tiguvâ, perorsêvingmut Edenemêtomut illivlugo, sanarᴋovlugo udjertorᴋovlugolo tâpsominga.
16Gûdiblo Nâlekab inuk perᴋovâ oᴋautivlugo: Napârtunit perorsêvingmêtunit tamainit nerᴋiksarsiniarpotit,
17Kissiane napârtomit ajungitomiglo ajortomiglo illisimanartomit nerᴋiksarsitailigit; uvlut nalliane ômangat nerriguvit, toᴋodlarniarpotit.
18Gudelo Nâlegaᴋ oᴋarpoᴋ: Nâmangilaᴋ, inuk kissimetôngmat, ikajortiksalioromavara aipaksanganik.
19Gûdib Nâlekab ivjomit saᴋᴋertinamigit ômajut tamaita naternamêtut, tingmitjallo tamaita ᴋilaub atânêtut, pitipait inungmut, nautsertoromavlune, ᴋanoᴋ tainiarmangâgit; ᴋanorlo inub ômajut tarnelît tamaita tainiarmagit, tagva attiksangit.
20Inublo atteᴋartipait nergjutit tamaita tingmitjallo tamaita ᴋilaub attânêtut, ômajullo tamaita naternamêtut, kissianele inuk ikajortiksarsingilaᴋ aipaksaminik.
21Tagva Gûdib Nâlekab inuk sinidlartipâ, siniktilugolo tullimângita ilangat tiguvâ, inninga illijivigivlugo uviningmik.
22Gûdiblo Nâlekab tullimâᴋ inungmit tigujane arnaliorpâ, âlâlo tâpsomunga.
23Tagva inuk oᴋarpoᴋ: Atso illâ, sauneᴋ saunima illanga, uviniglo uviningma illanga. Angutib aipanganik taijaksauvoᴋ una, angumit tigujaugame.
24Tamanna pivlugo angutib atâtane anânanelo ᴋemangniarpak, nuliane ungagivlugo, tâpkoalo magguk uvinioniarpuk atautsemik.
25Tamarmiglo ussingavuk, Adamelo nuliangalo, kangusugatiglo.
Currently Selected:
Genesis 2: LIHB08
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Labrador Inuttitut Heritage Bible © Canadian Bible Society, 2008.