Éxodo 16
16
Quinacai manaa tiha cana cuaunerane
1Satiin isaraelitaauru jetaote, Elim caje mituhin cuhin jetao, Sinaai, Elim, naaonjoainuri cataaun, cacha areroo nenaa Siin jetao turuha cuure. Lechoonca saoqui janoa Egipto caje mituuruhane cojoanonaa coroata batene bana jetaote nii aihure. 2Nii cacha areroo neeurunajaun jetaote, Moisesa, Aaroon, naaonjoainuri que jetao, satiin ereeure:
3“Bana chunijiun cuhacaanune nainatejelanaala, Egiptooacha nihacaanune coina, ecuhacha canacaanu coarajelanaalate ai Cana Coaunera, ecuhacha neein ohacaanune richae. Ecu jerichaachene tocohaneein, nainaain lenoneein, naaonjoaain nerejetocoaanulu natiin. Nii jana inarate, caa cacha areroo canacaanu uhaain, mijitena caaun, satiin canacaanu ateinana jeriquiche”, naauruhane jana jetaote:
4“Tane elo naluniji amuneein, dede caje lenone nalaete, que lenonecurumiin. Aihate, bananeein, niicha quiine que nelateeicha raaurumiin cachaauru, cojoanoo netojoeein. Chaaurucha, caa caitoonjoan tonoraain neeuruhane jana, chaaurucha tonoraenereein, nii coitucuhanune coinane, nirijieein ichareeuni. 5Saota janonihane cuhane, inara loreri asae, inaraacha amaaeni raaichene, cojoanoo netojoeein ranajaaoquichene jeeo amuritoheriin, inara lenonenu raauche”, naa Moisesa rai Cana Coaunerane jaun jetaote:
6“Sonainate, Cana Coaunera, Egipto caje inara rocohane coaraain coitucuha curiquicheein. 7Jana, janonete, jataain banejelanaala, inara rai caohacha ichaa Cana Coaunerane coaraa curiquicheein, jataain banejelanaala que ereeiche aonaane jaun. Inasiina chaneein nihacaanu canacaanune coaalanaala, canacaanu nocoeje chanuriquiche inara”, naain jetaote:
8“Cana Coaunera te, inara coroatajaniha cureein, sonaina niha inara lenonenuque inihone, que lenonequichene coina. Jataain banejelanaala, que erehieiche aonaane jaun te, janone arajiin niha inara lenonene coina, inara coroatajaniha cureein. Inasiina chaneein nihacaanu canacaanune coaalanaala, canacaanu que ereriquiche, coatiha canacaanuque, nii ereheiche, Cana Coaunera quete aitocoiche”, naaure jetao, isaraelitaauru rai, Aaroon aina Moisesacuru.
9Niritocuruhane acaauru raine baiha jetaote, Aaroon rai jetao:
“Chajaain isaraelitaauru rai aitoote, satiin ita taojiaain Cana Coaunera bajaauruhine, que ereeuruhane aonaane jaune aitoon”, naa Moisesane jaun, 10isaraelitaauru aina ereereeca Aaroonne jana, caohacha curuaeconaa nichaji, cacha areroo coaracuruha satiin isaraelitaaurune jana jetaote, dede sacari jana inanacae, Cana Coaunera ichanohi, caohachaain nenaa. 11Nitohaneein coaracuruhane jana jetaote, Moisesa rai jetao:
12“Jataain ereeuruha isaraelitaaurune aonacaaun. Aihana jaun, acaauru aina ereein, acaauru rai: ‘Sonainate iniho que lenoneein, cojoanoo janone faancha que lenone riquicheein, jeriquichene tocohaneein. Nii banate, itolere ichana naineraneein, itolere Curuaanaaneein Cana Coaunera nichaaune esenetaa curiquicheeincha’, naaun acaauru raicha”, nae jetao, ecocohin Cana Coaunera.
13Niritohane cosonaina que jetaote, nii acaauru lohanari memoaa jetao, uure tajaaecuru, bajari tocorijianeein nenacaauru codornisecuru. Nii cojoanoo janone jetaote, nii acaauru lohanari tinunoritiin jetao, ne arasane jiane tocohaneein acau. 14Inaen jacoroha, nii arasane jiane tocohaneein nenaa acaune baiha jetaote, nii cacha areroo nenaa atane ichoae jetao, acau nejerocoina tocohaneein jetao, nihacoae. 15Nii coaraain jetaote, nii coitucuurenihane jaun. “Chaana jana, catohane”, naacoaauruha, ita rai isaraelitaaurune jana jetaote:
“Caa lenonete, inara rai te Cana Coaunera, que lenoneein ichaohichene coina. 16Caate, jeriha Cana Coaunerane jaun ainaane, le loreri asae neinequichene, jeriquichene jeeoneein quinaa nainequichene nainejeein, coroata litoroneein coujunacateein raain, que lenoneein ichaaoche, le cacha nequichene”, nae jetao, acaauru rai Moisesa.
17Niritoha acaauru raine jaun jetaote, nii aitohane rijiinanaain jetao, raaure nii isaraelitaauru. Jana tabaauru jetaote, araainanaain raauruhane jana, leeochaauru coroatajaenanaain raaure, 18nii acaauru rai aitohane jeeonijianaain. Nii inatiin jetao, coatiha cautihei, nii araainanaain raaurera rai, nii coroatajaenanaain raaurera rainiha natiin jetao, coatiha lanaain. Quinaa nainecuruhane jeeonijianaain, raauruha le cacha cachaaurune jaun.
19Nii baiha jetaote, acaauru rai jetao:
“Jioanriha cojoanoo inaraacha quiinuque, cha cautijiaaichenera”, naa acaauru rai Moisesa natiin jetaote, 20nii Moisesa ere tonoraelanaala, cojoanoo niicha quiine cautijiaauruha tabaaurune jaun jetao, sainaain corihanohin setuhacoae, nii acaauruacha cautijiai. Nii jaun jetaote, jataain acaauru aina obaje Moisesa.
21Nitohaneein jetaote, ajaatosiha enotone ajiniha janohetoanaain coineteein jetao, que lenonecuruhane coina jetao, raaure le cachaauru, ajajaa enotone netuhacaane jaun. 22Nejetaote laen, saota janonihane cuhane, ranajaaoncuruhane jeeo amuritoheriin jetao, jenai litoro nihein jetao, nii rai lenone raaure le cachaauru. Nii jaun jetaote, Moisesa rai, acaauru biha cuuruha, nii acaauru bichauhenaaurune jana jetao:
23“Nitohaneein jeriha Cana Coaunerane jaunte, aihure, eresi niicha ichanenu jianeein, Cana Coaunera coacuhin, coroajeein, niicha jerei ichaain rachoojoeeuruhane jaa cojoanonaa nihane jaun. Niha inaraacha asichoneni erenene, asichohin enohalaauche, niha inaraacha jareenenine, jarejeein niha cautene, eresiraine que, jitariin rucuhecuche”, nae jetao, acaauru rai Moisesa.
24Nii jaun jetaote, nii acaauru rai aitoha Moisesane rijijieein, nii rai lenone caute rucuhecuruha, cojoanoo que lenonecuruhane jaanu quene jana jetao, inaen laen setuhin, corihanohin, inaen sainaene. 25Nii jaun jetaote, acaauru rai jetao:
“Chajaain laen, inaraacha ichanenu jianeein, Cana Coaunera coacuhin, coroajeein rachoojoeichene jaa cojoanonaa nihane jaun, que lenonecuche, coatiha nii cha eruriheeicheein, enene jiichoo cuhane, raa cuhichene nihanatiin. 26Saota janonihane cuhanete, nainequiche inara lenone raaichene, jana caaunsi janonihane cuhane, nebetacanaa cojoanonaa bana, coatiha cha eruriheeicheein”, nae jetao, acaauru rai Moisesa.
27Niritoha acaauru rai natiin, caaunsi janonihane cuhane, cuhin raa cuuruha tabaaurune jaun jetaote, nii cha eruurene. 28Nii jaun jetaote:
“Chaabanana, inara rai aitocohaune jaa esenetaelanaala, inara rai caitoonjoancha tonoraain neriquiche. 29Nii jelai teein nebetacaaichene jaanu cojoanonaa teein nihanu, canu inara Coaunera nichaaune jaa coitucuhin neeuche. Nitohanihane jaunne, saota janonihane cuhane, coroata janohi raineein, inara rai lenone teein neeun. Aihane jaun, caaunsi janonihane cuhane, le cacha cachaniquichene, inara loreri asae neeuche, nii chunijiun cunaa coacuelanaala”, nae jetao, Moisesa rai Cana Coaunera.
30Niritoha acaauru raine jaun jetaote, caaunsi janonihane cuhane jetao, loreri asaaecha neeure cachaauru.
31Nii niicha raauri lenone jetaote, curuaateeure isaraelitaauru manaaneein, somaaca jetao, aiha silaatro ucuhene tocohaneein, irichaje que jasiitenohi rijitoco joaain ichoatiin.
32Nii baiha jetaote:
“Caate, jeriha Cana Coaunerane jaun nenaane: ‘Chajaain, coroata litoro tabaainijineein coujunacateein, nii manaa curujuaain, rucuhecuchete, coaracurumiin inara nefoerateeuru, Egipto caje inara rocohin, cacha areroo que lenonequichene coina, inararai quiicha tenihane coaracurumiin’ ”, nae jetao, acaauru rai Moisesa. 33Niritiin jetaote:
“Chajaain, nii leinjiin omari cuhane, inata litoro tabaainijineein coujunacateein, nii manaa raain, Cana Coaunera notaracae teein rucuhecuruinete, coaracurumiin inara nefoerateeuru”, nae jetao, Aaroon rai.
34Nii Moisesa rai aitohane rijijieein jetaote, Egipto caje mitanajaane coujunacaneein jetao, acaauru rai camela tiha Cana Coaunerane jaun jetao, nii omari aina curuaecaain jetao, rucuje Aaroon.
35Nitohaneein jetaote, jenachoonca jaanacaneein jetao, manaa que lenonejeein jetao, neeurelu isaraelitaauru, niha cachane jaun, Canaa batane nunuhe que turuuruhane reen tiaaojoaain jetao, que lenonejeein neeurelu.
36Coroata litoro tabaainijineein coujunacateein jetaote, nii omari cuhane rucuhecure.
Currently Selected:
Éxodo 16: URA
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2005, 2024, Wycliffe Bible Translators, Inc.