Éxodo 10
10
Sisiincho mululune letoha Egipto choae Cana Coaunerane
1Nii jana jetaote, “Faraaon coaanihura. Canuhacha jerenohin neeinte, nechu aasaineein neeure rai cachaauru letohaurera aina jiniiquiin Faraaon. Cojoaelanaacojoai tabai caseteco ichacaaunne coaraain, 2ii calaohi curu, ii ichoalacuru, naaonjoaihunri rai beein, nereretaaine coinane, catohaneein Egipto cocoaichacuru que quiicha jerei ichaain acaauru que cojoelanaacojoai caseteco tabai coaarateeunra. Nii bana te, esinaaen rauhijiriin, Cana Coaunera neein niha nune coitucuriquicheeincha”, naain jetao Moisesa letoha Cana Coaunerane jaun jetao, 3ninana Aaroon aina Egipto curuaanaa Faraaon coaraa cuure Moisesacuru. Coaraain jetao:
“Ebereeo nichaanune curuaanaa, Cana Coaunerate, caletoae. Chatoanai banate, Cana Coaunera neein nihanune esenetaain, cacoitucuhin quere tonoraain canu cachaauru Isaraele cocoaichacuru jianereein caaelai caje cuhin, canu corohajeein canu belaiha cuuruhane nichaaeta. 4Nirijijieeincha, acaauru chunajeein, jianenaana naineneeine, eresi ii nese choae caseteconeein sisiincho mululune letoareeunni, 5chacoaanajane lanaala, atane nichoajai fuha uha sisiincho mululunene coinara. Acate, nii elo ucuhe baiha coroatajajeein nedanacaauru jitariin quicheeincha. Chaaen techu, nii ocoanacuru jana nenacaauru enuha inaacuru jitariin quiin, 6-7ii loreri asaae, ii cachaauru letohaurera loreri asaae, chaaen satiin nii Egipto cocoaichacuru naaonjoaihunri loreri cuhanai satiin memoreein nii sisiincho mululunera. Chaabana inoaenlu caje coaauneein nitohanai coaraain neeuruhilu inara rinajaauru, inara inacaauru, enanetojoeeinta, naainte caletoae Cana Coaunera”, naa Faraaon raine baiha, Faraaon loreri asajai caje mituhin amuha Moisesane jana jetaote:
“Chutiaainte jana cana reroecajeein sacuhane jianere caa cachata. Chajaain nere tonoraain, caa cachaauru jianeeute, Cana Coaunera coroajeein, belaiha curuhine. Jaitinachu catohaneein caoachanainejeein chacolane Egipto cocoaichacuru cairichaa natiin nainaenihate”, naaure jetao nii Faraaon cachaauru letohaurera.
8Niritocuruhane jaun jetao, enacoaauneein, coaiteen Aaroon aina Moisesacuru cotiharateein jetao:
“Chajaain caalai caje amuhin, inara Coaunera corohajeein, inara irihuru sohin mocohin que inara Coaunera belainihuchera. Nena laen, cuhichene ajiniha ii aina uheneeuri beeuchene jereeunra”, naain Moisesa rai bajaa Faraaonne jana jetaote:
9“Satiin canacaanurai canaanaihuru, ichauhenaauru, canacaanu calaohi curu, canacaanu cacunucuru, chaaen canacaanurai bacaauru, carenerocuru, naaonjoaihuri aina, satiin jiniiquiin cuhacaanunetenera. Caa canacaanu Coaunera coroajeein, canacaanu iriuru sohin mocohin que canacaanu Coaunera belaihacaanune jaante, rachoojoenaa tabai beseta caoachane Cana Coaunera raicha”, naain Faraaon tonorae Moisesane jana jetao:
10Esinaaen rauhijiriine baaso ichana jeriquichene coitucuanura. “Inara coroatajanerichaain Cana Coaunerane esenetaaichene jaun noote, inara bereecuru aina, jiniiquiin cuunaa jeriquicheta. 11Nitohanein cuurieichein, ichauhenaauru nejesinajein cuhin, Cana Coaunera coroajeein belainiuche. Nitohanein jeriquichene jaun inara bereeheecuru, ratiriin cunichuche”, naain jetao, Moisesacuru sitae Faraaon. 12Nii jana jetaote, “Egipto batane choae cuaain, ichoii raujiariin sijisijiicaute, nii Egipto batane que, nenacaauru temulecuru, elo ucuhe baiha nedanacaauru, jitaa uuhine sisiincho mululunera”, naain Moisesa letoha Cana Coaunerane jana jetaote, 13nii Egipto batane choae cuaain biji raujiariin sijisijiichaa Moisesane jana jetao, enoto mitunajanichajai caje uhain cujuana letohae Cana Coaunera. Aca jetaote, lejiichoo lejanotiineein jetao, nii Egipto batane choae cuaain jetao, jiatuhe nii cujuana. Nii cojoanoo jetaote, nii cujuana aina, uhe nii sisiincho mululune. 14Aca jetaote, itolereneein jitariin, Egipto batane lomoritiin tiinunoe. Chabana inoaelu caje coaauneein, niheilu catohaneein sisiincho mululune. Chaaen chu, nii baiha inae neriaain, ena caa ainanetocohaneein sisiincho mululune. 15Nitohaneein jetaote, chacoaanajane lanaala, Egipto batane lomohin jetao fuhe nii sisiincho mululune. Aca jetaote, nii elo ucuhe baiha, cauteein nedanacaauru, itolere temulecuru, enuha inaacuru, jitariin jetao quii, nii sisiincho mululune. Nihein jetao, chunijiun leinjiinejei cauteein nedaai, nii enuha inaa nujuari nalonemaanjeein. Nii Egipto batane que nenacaauru ocoanacuru jana nenacaauru temulecuru, enuha inaacuru nalonemaanjeein. 16Nii jaun jetaote, luhecotariin Aaroon aina Moisesacuru cotiharateein jetao:
“Baaso ichacaaun Cana Coaunera ere tonorae lanaala, inara ere tonorae lanaala, naojoainne baaso ichaaunra”, naain jetao, 17“Atiin enacuhaneeicha, caa baaso ichacaaunne que canu que inara suujua acateein, atiin carai Cana Coaunera bajaauchete, canu caje coriae amuhine caa caseteco mululunera”, nae jetao, Egipto curuaanaa Faraaon, Moisesa rai.
18Nii jaun jetaote, Faraaon loreri asajai caje mituhin cuhane rijijiein jetao, Cana Coaunera bajae Moisesa. 19Nii jana jetaote, enoto soo nichae cuaain jetao cujuana cuunaja coriha Cana Coaunerane jana jetao, cucuana lanajai cuhanai cuaain nii sisiincho mululune joae jetao nii cujuana. Nii jana jetao, satiin itolereneein Egipto batane que, niheei leinjiinejei cautihei nii sisiincho mululune. 20Nii jaun jetaote, inae nitohanein tiha Cana Coaunera najaun jetao, nechu aansaineein ne Isaraele cocoaichacuru, jianena jerene jetao Faraaon.
Nocoena tabaineen nedaa Egipto batanene
21Nii jana jetaote:
“Dede nichaae ecuun cuaain, ichoii michuute itolereneein Egipto batane lomohin nocohena tabaineen nedaaine Egipto batanera”, nae jetao, Moisesa rai Cana Coaunera.
22-23Nii jaun jetaote, nii rai aitoha Cana Coaunerane rijijieein, ecuun dede nichae cuaain biji michuin, sijii sijiichaa Moisesane jana jetao, itolereneein nocohena tabaineen nedae jetao, Egipto batane. Nii jaun jetaote, nii nenaja caje naururunaa nainelanaala, nii laurijira aina nihanatiin ita coaana nainecurene nichata janohane reeintiaaojoaain. Nii jana jetao, nihein nocohena Isaraele cocoaichacuru nenajaun. Itolereneein jetaote, jiichooneein ne Isaraele cocoaichacuru, loreri asajai.
24Nii jana jetaote, Moisesa cotihara teein:
“Chajaain inara bereecuru aina, jiniiquiin cuhin, Cana Coaunera coroajeein belainihuchera. Cau lae, caa inara rai carenerocuru, bacaauru, naaojoaihunri ratiriin cuhin Cana Coaunera coroajeein belainihuchera”, naain Moisesa letoa Faraaonne jana jetao:
25“Aihei jirihane. Ii tejian canacaanu rai, ii rai carenerocuru, bacaauru, naaojoaihunri tereein, sohin, mocohin que, Cana Coaunera coroajeein, belaihacaanune coinara. 26Chaaen nechu, canacaanu rai carenerocuru, bacaauru, naaojoaihunri aina jiniiquiin cuhacaanunetenera. Nainihein leinjiinejein nedaa canacaanu rai carenerocuru, bacaauru, naaonjoaihunrine. Caohachaauru janiichaanu netene, caohachaauru sohin, mocohin que Cana Coaunera coroajeein belaihacaanune coina. Jaiti cuu turuenihacaanune jaun, Cana Coaunera belaihacaanune jaanu que, canacaanuhacha lateneni coitucuhacaanu”, nae jetao Faraaon rai Moisesa.
27Nii jana jetaote, inae nitohanein tiha Cana Coaunerane jaun jetao, nechuasainein neein jetao, Isaraele cocoaichacuru jianena jerene Faraaon. 28Chaaen jetaote chu:
“Chajaain caalai caje amuu, necoalaiqui caoachaine. Nijiaoriha coaiteen canu rene turuhine. Nacoauneein canu rene ecooquine banate oriquiincha”, naa Moisesa rai Faraaonne jana jetao:
29“Caohacha quete aitohicha. Chaeeloonihein nacoauneein cau turuhin ichoharaanune”, naain jetao, Egipto curuaanaa Faraaon tonorae Moisesa.
Currently Selected:
Éxodo 10: URA
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2005, 2024, Wycliffe Bible Translators, Inc.