MATIUS 15
15
Parenta Allataala na kabiasaanna tau Yahudi
15:1-20
(Mark. 7:1-23)
1Maeng injo rie'mo lohe tau Farisi na guru Tora' battu ri Yerusalem mange ri Isa na appaui, 2”Ngura ana'-ana' gurumMu gele ngalleangang rikabiasaanna puwa-puwata? Gele labissai limanna ampa langanre.” 3Mingka appihali Isa mange ri iyai, ”Ngura manna kau gele ngalleangang ri Parentana Allataala rikanara kabiasaanna puwa-puwamu? 4#Kel. 20:12, 21:17; Im. 20:9; Ul. 5:16; Mark. 7:10Saba' Pauna Allataala: Pakala'biri ammammu surang idommu; na lakua pole: Inai latunrai ammanna iyareka idonna tantu larihukkung matena. 5Mingka mukua: Inai jua appau mange ri ammanna iyareka ri idonna: Sikonjo sokongang nuparallu injo mutarima battu ri nakke iamo injo passidakka mange ri Allataala, 6tau injo gelemu siratang lapakala'biri ammanna iyareka idonna. Ri appakonjona, Pauna Allataala murapangi tide' matu-matunna saba' rikabiasaammu to'jua. 7Oe tau munape'! Toje'i panjanjanna Nabbi Yesaya ripassala'mu:
8 #
Yes. 29:13; Mark. 7:6-7 Bangsa inni appakala'biri ri Nakke surangang babana,
mingka atina derei battu ri Nakke.
9Tide' jua matu-matunna iyai assambajang mae ri Nakke,
saba' ajarang nulapangajarangi injo iamo intu parenta rupatau.”
10Jari Isa lakeo'i tau lohe injo na appaui mange ri iyai, 11”Pilangngeri na pina'na'lalo: gele nuantama' injo ri baba appakaharang tau, passangadinna nuansulu' injo battu ri baba, iamo injo appakaharang ri tau.”
12Maeng injo riekimu ana'-ana' gurunNa na akkuta'nangi mange ri Ia, ”Muisse' juai ma'nassana pauMu injo appakapa'risimu nyaha ri tau Farisi?” 13Pappihalinna Isa, ”Sikonjo lamung-lamung nugele injo rilamung ri AmmangKu nurie' injo ri Suruga laribu'bu'i surangang aka'-aka'na. 14#Luk. 6:39Akomo jampangi iyai injo. Iyai injo tau buta anrenreng ri paranna tau buta. Ampa tau buta anrenreng riparanna tau buta, tantu a'dappekinna naung ri balo.”
15Jari akkuta'nangi Petrus mange ri Ia, ”Seseilalo pakkalebarang injo mae ri kambe.” 16Pappihalinna Isa, ”Apa manna kau, gelepai mupahang? 17Gelepai muisse' ma'nassana sikuanna nuantama' ri baba naungi ri pompong maeng injo ritaiangi? 18#Mat. 12:34; Luk. 6:45Mingka apa nuansulu' battu ri baba assala'na nubattu ri ati na iamo injo appakaharang ri tau. 19Saba' battu ri ati ammumba sikuanna pikkirang daa, pamunoang, passangkilang, kabalerang, pa'lukkakang, tunra bura na pattadea. 20Passala innimo appakaharang ri tau. Mingka nganre gele injo a'bissa lima gelei appakaharang ri tau.”
Bahine Kanaan tappa'
15:21-28
(Mark. 7:24-30)
21Maeng injo a'lampai Isa battu ri injo na mangei ri kampong Tirus na Sidon. 22Jari rie'mo se're tau bahine Kanaan battu ri kampong injo na a'nga'ngarai, ”Kamaseanga, oe Karaeng, Ana' Daud, saba' ana' bahineku lapantamai setang na sanna'i sissana.” 23Mingka Isa gele lapihalii. Jari mangemu suro-suroNa na laerai mange ri Ia, ”Surolaloi a'lampa, ia minahangi riditte na akkari'-kariu'i.” 24Appihali Isa, ”Nakke risuro sangga lamange jua risikonjo jimbala tappela' ri umma' Israele.” 25Mingka pela' seppa'i bahine injo na nyombai ri Ia ampai appau, ”Karaeng, tulunglaloa.” 26Mingka pappihalinna Isa, ”Gelei siratang langalle roti nuripakasadiaang injo mange ri ana'-ana' na ripabuangi mange ri asu.” 27Lakua bahine injo, ”Toje'i Karaeng, mingka asu injo nganre baru'bu' kanre nua'dappe' ri mejang panganreang opuna.” 28Jari appaui Isa mange ri ia, ”Oe idong, bakka' tappa'mu, a'jarimu ri kau assimpole numukaa'raki injo.” Rihattu injo jua sikali gassimmu ana'na.
Isa appakagassing lohe tau garring
15:29-31
29Sungka'i labokoi kampong injo, Isa attete biring bone ri tamparang la'ba Galilea na nai'i ri baho bonto ampai attolong ri injo. 30Maeng injo lohemo tau a'rurung-rurung mange ri Ia ngerang tau pesu', tau kempang, tau buta, tau pepe, na lohe pole tau garring maraeng, ampai lataro riampi' bangkenna Isa na Ia lapakagassing ngase'i. 31Jari takkajanna' ngase'i tau lohe injo rilajanjanna tau pepe akkulle appau, tau kempang baji' pa'lingkana, tau pesu' akkulle ammenteng, tau buta akkulle anjanjang, na iyai injo appakala'biri Allataalana Israele.
Isa appakanre patansa'bu tau.
15:32-39
(Mark. 8:1-10)
32Maenna injo Isa lakeo' ana'-ana' gurunNa na appaui, ”Tasseru nyahaKu ripangamaseang mange ri tau lohe intu. Tallungallomu minahangi ri Nakke na tide' kanrena. Gele Kupa'biangi lamuliang ampa pa'rei, barang sikali daa nyahanai ritangnga lalang.” 33Appaumu suro-suroNa mange ri Ia, ”Anteekamua ri tampa' tassa'la'-sa'la' inni languppa roti laripakanreangi tau sanna' intu lohena?” 34Appaui Isa mange ri iyai, ”Sikurambatu roti rie' ri kaui?” ”Tujumbatu,” pappihalinna, ”na rie' todo' sikurangkaju juku' ki'di'.” 35Jari Isa lasuroi tau lohe injo attolong ri tana. 36Maeng injo Ia laalle tujumbatuiya roti surang juku' ki'diki injo, masa barakka'i, latu'be-tu'bei na lapa'dahu-dahuangi mange ri suro-suroNa, na suro-suroNamo lapa'dahu-dahuangi mange ri tau lohe injo. 37Nganre ngase'i sa'genna bassoro. Maeng injo lapaparappummu tau sikonjo roti la'binna, tujumbaku' rassi lohena. 38Tuminahang nganre patansa'bu tubura'ne, gelepai antama' tubahine surang ana'-ana' injo. 39Maeng injo Isa lasuromu tau lohe injo muliang. Ia nai'i ri lopi ampai a'lampa mange ri tana Magadan.
Currently Selected:
MATIUS 15: LAI_SLY
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
@LAI 2012 Indonesian Bible Society (Lembaga Alkitab Indonesia)