MATIUS 14
14
Yahya Pario rihuno
14:1-12
(Mark. 6:14-29; Luk. 9:7-9)
1Rihattu injo ambattumu karebana Isa mange ri Herodes, karaeng ri tampa' injo. 2Jari ia appau mange risikonjo pagahena, ”Iamo inni Yahya Pario; ia attallasai muliang battu rikamateang na iamo injo saba'na kahasa injo a'geo'i lalang ri Ia.” 3#Mark. 6:17-18; Luk. 3:19-20Toje'i Herodes maeng lasuro lajakkalai Yahya, lasangkalai na latarungkui, ripassala kajariang Herodias, bahinenna Filipus uranna siana'. 4#Im. 18:16, 20:21Saba' Yahya akuling-kulingi lato'ro, pauna, ”Gele akkulle mualle Herodias!” 5Manna injo Herodes a'ra'i lahuno, ia malla'i ri tau lohe larapang injo Yahya se're nabbi. 6Mingka rihattu attamma taunna Herodes, attari-tariammu ana' bahinena Herodias ri a'rakanna tau lohe injo na lapakarannu nyahana Herodes, 7sa'genna Herodes assapatta lassare mange ri ia apajua laera. 8Sungka'i rioso' ri idonna, ana' bahine injo appau, ”Erangi mae ri nakke ulunna Yahya Pario lalang rise're dulang.” 9Jari simpummu nyahana karaeng injo saba' sapattana na kanara toananna jari lapassuroammu laripassareang mange ri ia. 10Lasuro pappa'mu ulunna Yahya ri pattarungkuang 11na ulunna laerangi tau lalang rise're dulang bakka', ampai ripassareang mange ri ana'rara injo na ia laerangi mange ri idonna. 12Maeng injo rie'mu ana'-ana' gurunna Yahya Pario laalle batangkalenna na laloangangi. Jari a'lampa ngasekimu lapappiissekangi mange ri Isa.
Isa assare kanre limansa'bu tau
14:13-21
(Mark. 6:30-44; Luk. 9:10-17; Yah. 6:1-13)
13Sungka'i Isa lalangngere kareba injo Ia a'lilimu battu ri injo, na a'ra'i akkale-kale ri lopi mange ri tampa' tassa'bu-sa'bu. Mingka tau lohe injo laisse'i na minahangi ri Ia a'lingka battu ri se're kota mange ri kota maraeng. 14Rihattunna rampe Isa, Ia anjanjangi tau lohe bakka' jumallana, jari rie'mo ri atiNa pangamaseang mange ri iyai na Ia lapakagassing ngase'i tau garring injo.
15Sungka'i labangngi, suro-suroNa rie'i mange ri Ia na appaui, ”Tampa' inni sino na a'birimmu bangngi. Surolalo tau lohe intu a'lampa solanna iyai akkulle ammalli kanre ri desa-desa.” 16Mingka appaui Isa mange ri iyai, ”Gele parallu iyai intu a'lampa, kau parallu assare kanre ri iyai.” 17Appaihali ngase'mu, ”Nurie' ri kambe ri inni limambatu jua roti na ruangkaju juku'.” 18Appaui Isa, ”Erangi mae ri Nakke.” 19Maeng injo Ia lasuro tau lohe injo attolong ri ruku'. Ri laalleNa roti limambatu na juku' ruangkaju injo, ammongai Isa nai' ri langi' na masa barakka'i. Ia latu'be-tu'be roti injo na lapassareangi ri suro-suroNa, jari suro-suroNamo lapa'dahu-dahuangi mange ri tau lohe injo. 20Iangase'na nganre sa'genna bassori. Maeng injo laparrapungi tau roti la'binna, lohena sampulorua baku' rassi. 21Tuminahang larie'i limansa'bu tau bura'ne, gelepai rirekeng tau bahine na ana' ki'di' injo.
Isa a'lingka ri baho ere
14:22-33
(Mark. 6:45-52; Yah. 6:16-21)
22Rimaenna injo Isa lasuro lassiri suro-suroNa nai' ri lopi na a'lampa riolo ri Ia anta'leang. Rihattu injo Ia lasuro ngase'i tau lohe injo muliang. 23Sungka'i lasuromo tau lohe injo muliang, Isa nai'i ri baho bonto langera dowaang kale-kalenna. Rilabangnginamo, Ia kale-kalenna ri injo. 24Lopinna suro-suroNa deremu battu ri biring bone na laembo-emboammu bombang, saba' anging battu ri a'rakang. 25Latette' tallu ribangngi injo rie'mu Isa a'lingka bangkeng ribaho ere mange ri iyai. 26Rihattunna suro-suroNa lajanjangi Isa a'lingka ribaho ere, ta'bangkaimu na a'gora, ”Setang intu!”, ampai akkari'-kariu' kanara malla'. 27Mingka lassiri appau Isa mange ri iyai, ”Sannangko! Nakke inni, ako malla'!” 28Jari appaui Petrus mange ri Ia, ”Karaeng, ampa Kau intu, surolaloa battu mange ri Kau a'lingka ri baho ere.” 29Appaui Isa, ”Maemoko!” Jari naummu Petrus ri lopi injo na a'lingkai ri baho ere laruppai Isa. 30Mingka rihattu lapisa'rinna anging ammarrisi injo, malla'mu na pakaramulamu tallang jari a'gorai, ”Karaeng, allea!” 31Lassirimu Isa lapatanjo limanNa, latetengi Petrus na appaui, ”Oe tau kurang tappa', ngura bata-batako?” 32Maeng injo naikimu ri lopi na a'jari luba'mu anging injo. 33Sikuanna tau rie' ri lopi nyomba ri Ia, lakua, ”Sitoje'na Kau Ana' Allataala.”
Isa appakagassing tau garring ri Genesaret
14:34-36
(Mark. 6:53-56)
34Sungka'i ambattumo anta'leang mangeimu ri Genesaret. 35Sungka'na Isa riisse' ri tau lohe ri tampa' injo, iyai injo lapappissekangi risikuanna tau rie' ri tampa' injo. Lohemo tau garring rierang mange ri Ia. 36Iyai injo laerai mange ri Ia solanna ripa'biang manna sangga laseruna jua rombe-rombe baju bakka'Na. Sikuanna tau laseru injo a'jari gassing ngase'i.
Currently Selected:
MATIUS 14: LAI_SLY
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
@LAI 2012 Indonesian Bible Society (Lembaga Alkitab Indonesia)