खास चेलों 1
1
पवित्र आत्मा देण को करार
1प्रिय थियुफिलुस, मिन अपणी पैलि किताब मा यीशु मसीह का ऊं सब कामों का बारा मा लिखी, जु कुछ भि वेन करण की अर सिखौण की शुरुवात कैरी, 2अर वेन अपणा चुण्यां खास चेलों तैं पवित्र आत्मा का द्वारा आज्ञा भि दिनी, अर येका बाद वेतैं स्वर्ग मा उठये गै। 3अर क्रूस को दुख झिलण का बाद भि यीशु न अपणा ज्यून्द होण का भौत सरा पक्का परमाण दिनी। अर उ चालीस दिनों तक अपणा खास चेलों तैं दिखै, अर वेन ऊं बटि परमेस्वर का राज का बारा मा बात भि कैरी।
4अर थियुफिलुस, एक दिन इन ह्वे जब यीशु अपणा चेलों का दगड़ा मा मिली के खाणुक खाणु छौ, त वेन ऊंतैं आज्ञा दिनी कि, #यूहन्ना 15:26 “यरूशलेम नगर तैं छोड़ि के नि जयां, मगर इखि रयां अर पिता का वे करार#1:4 इख मा पवित्र आत्मा देण का बारा मा बतये जाणु च। तैं पूरु होण को इंतजार कर्यां, जैका बारा मा मिन तुमुन पैलि बतै छौ। 5किलैकि यूहन्ना न त पाणिळ बपतिस्मा दिनी, मगर अब से कुछ दिनों का बाद तुम पवित्र आत्मा#1:5 इख मा पवित्र आत्मा की ताकत पौण का बारा मा लिख्यूं च। का द्वारा बपतिस्मा पैल्या।”
यीशु को स्वर्ग मा उठये जाण
6अर जब यीशु का खास चेला वेका दगड़ा मा छा, त ऊंन वे बटि पूछी कि, “प्रभु, क्या तुम इस्राएल राज्य तैं अभि छुड़ै के फिर से जनौ-तन कैरी दिल्या?” 7तब वेन ऊंकू बोलि, “वे बगत अर वे समौ का बारा मा जनण तुमरो काम नि च, किलैकि वु सब कुछ पिता न अपणा अधिकार मा रख्युं च। 8अर जब तुम पवित्र आत्मा तैं पैल्या, त तुमतै सामर्थ मिलेली तब तुम यरूशलेम नगर मा अर पूरा यहूदिया अर सामरिया का मुलकों मा, इख तक की पूरि दुनियां मा तुम मेरा गवा बणि जैल्या।”
9-10अर जब यीशु न या बात बोलि दिनी, त उ खास चेलों का दिखदी-दिखदी मथि स्वर्ग मा उठये गै, अर जब उ जाणु छौ, त एक बादळ न वेतैं ऊंका आंख्यों बटि लुके दिनी, वेका चेला वेतैं टक लगै के दिखणा छा। अर देखा, उबरि सफेद कपड़ा पैरयां दुई आदिम#1:9-10 यू दुई आदिम दुई स्वर्गदूत छिन। चेलों का समणि ऐके खड़ा ह्वेनि। 11अर यों न चेलों कू बोलि, #जकर्या 14:4-5“हे गलीली लोगु, तुम किलै खड़ु ह्वेके आसमान जनै टक लगै के दिखणा छाँ? यू ही यीशु जु तुमरा पास बटि स्वर्ग मा उठये गै, ठिक इन्नि वेन औण भि च जन तुम वेतैं स्वर्ग मा जान्द दिखणा छाँ।”
मत्तियाह तैं खास चेला को पद मिलण
12तब यीशु का खास चेला जैतून नौ का ढौंडा बटि यरूशलेम नगर कू वापिस ऐनी। अर यू ढौंडो यरूशलेम नगर बटि लगभग एक किलोमीटर की दूरी पर च। 13अर जब यू लोग यरूशलेम नगर मा ऐनी, त वे घौर का मंज्यूळ मा गैनी जख यू सब रुक्यां छा। अर यों लोगु का नौ इन छिन, पतरस, यूहन्ना, याकूब, अन्द्रियास, फिलिप्पुस, थोमा, बरतुल्मै, मत्ती, हलफई को नौनु याकूब, शमौन जेलोतेस,#1:13 शमौन जेलोतेस, जेलोतेस को मतलब एक देसभक्त अर उत्साही से च। अर याकूब को नौनु यहूदा। 14अर यू सभ्या का सभि हमेसा एक जगा मा मिलदा छा अर एक मन ह्वेके प्रार्थना करदा छा, अर ऊंका दगड़ा मा यीशु की माँ मरियम अर वेका भै अर कुछ और जनानियां भि छै।
15-17अर कुछ दिनों का बाद इन ह्वे कि, पतरस लगभग एक सौ बीस बिस्वासी लोगु का बीच मा खड़ु ह्वेके बोन्न लगि गै, “हे मेरा भै-बैंणो, या बात यहूदा इस्करियोती का बारा मा च, जु की यीशु तैं पकड़वौण वळो तैं बाटु दिखौण वळु बणि के ऐ छौ। हाँ, वेकी गिनती हमरा दगड़ा मा किये जान्दी छै, अर उ भि हमरि तरौं सेवा मा सामिल ह्वे गै छौ। मगर पवित्र आत्मा न येका बारा मा पैलि ही राजा दाऊद का द्वारा भविष्यबाणी करवै छै, अर यू जरुरी छौ कि पवित्रशास्त्र की या बात पूरि हो। 18#मत्ती 27:3-8अर वेकी नीच कमै का द्वारा एक पुंगड़ु खरीदे गै, अर उ कपाळ का बल पोड़ि, पुटगु फटी, अर वेका सब अन्दड़ा भैर निकळि गैनी। 19अर या बात यरूशलेम नगर का सब लोगु तैं पता चलि गै, इलै वीं जगा को नौ ऊंकी भाषा का मुताबिक ‘हकलदमा’ रखै गै जैको मतलब च ‘ल्वे को पुंगड़ु।’ 20अर जन की भजन संहिता की किताब मा भि लिख्यूं च कि,
#
भजन 69:25 “‘वेको घौर बांजा पोड़ि जौ,
अर वेमा मा कुई भि नि रै सैको’
अर
#
भजन 109:8
‘वेको पद कुई दुसरो ले ल्यो।’
21“इलै यूहन्ना बपतिस्मा देण वळा का दिन बटि लेके जबरि तक प्रभु यीशु स्वर्ग मा नि उठये गै, 22याने कि जब हमरु प्रभु यीशु हमरा दगड़ा मा छौ वे बगत बटि लेके अब तक जु लोग हमरा दगड़ा मा छिन, ऊंमा बटि एक मनखि तैं चुणै जौ। ताकि उ मनखि भि ईं बात को गवा ह्वे कि यीशु तैं मुरदो मा बटि ज्यून्द किये गै।”
23तब ऊंन दुई मनखियों तैं चुणी के खड़ु कैरी पैलु यूसुफ, अर यूसुफ कू बरसब्बा भि बुले जान्दु छौ, अर कुछ लोग येतैं यूसतुस नौ से भि जणदा छा, अर दुसरो मत्तियाह। 24अर लोगु न इन प्रार्थना कैरी, “हे प्रभु, तुम त सब लोगु का मन की बात तैं जणद्यां, इलै हमतै बता कि यों दुईयों मा बटि तुमुन कैतैं चुण्यूं च, 25ताकि वेतैं सेवा की जिमेदारी अर खास चेला होण को पद दिये जौ, किलैकि यहूदा न ये पद तैं नकारी दिनी, अर ज्वा जगा वे खुणि चुणै गै छै वु उख चलि गै।”
26अर ऊं लोगु न यों का नौ पर पांसा डलिनी, अर #नीति 16:33 पांसा मत्तियाह का नौ पर निकळिनी। तब मत्तियाह भि ऊं ग्यारा खास चेलों का दगड़ा मा गिणै गै।
Currently Selected:
खास चेलों 1: GBM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© (Active) Wycliffe Bible Translators, Inc. All rights reserved.