Nuk 6
6
1Ɛfo-Ɛsiayɔ ba Jus ɛbi, Jisɛs ka ɛkan ɛjɛ ara siŋ ka ɛgbɛ agu, anɛ ba ɛkan ɛjɛ abɛnnɛ abra agu. Afére afɛm ajam nɛnɨghɛ agu nya. 2Ba Farasi bantiŋi abɔmɔ abɔɔ, “Ɛgbɔnaŋ ka ɛbɛnnɛ agu ka ɛfo-Ɛsiayɔ ji ɛre ka ɛjighi? Na arɨma ne” 3Jisɛs afaŋa si “Ka ɛdidɨghɛ ɛkɨgha biŋ ji Dafid ka asɔgba ayɛ áne ka nden yi nján aya abɔɔ? 4Ɛsika anɨmɛ ka njo Ɛsɔwɔ ama ton brɛd yi ba ɛjɔɔ Ɛsɔwɔ kantiŋ ara nɨghɛ anɛ, atima akɛ anɛ ba jɛnɛ ka nɛ” 5Jisɛs atɔ abɔɔ si “Mɔannɛ akpe nɛyɔ ni atɔ ji ane ka ɛfo-Ɛsiayɔ.”
6Akpɛ mu ka Ɛfo-Ɛsiayɔ bintiŋi ama nam ka Ɛkɔnɔ ajam nɛkpine. Ɛsika akpɨnɛ na, atab amar ayɛ nnɛ yɔ akpɔ ɛbɔ bi nom. 7Ba Farasi ka ba kpɨne ajighia Jus áre fa ara kporɛ kasɔŋ abɔbɛ ka ɛjighi ana yi anena bɛji ɛkoro nnɛ ŋyɔ ka Ɛfo-Ɛsiayɔ. 8Ɛjɔn ga si Jisɛs agbɛrɛgbɛrɛ nkater abɔɔ, atɔ nnɛ ɛyám nyɔ si “Tam yimi ka nɛkaa kasɔŋ anɛ kpakpa ayɛa” Nnɛ nyɔ atam ayimi ka ɛsiamar abɔɔ.
9Ka Jisɛs atɔ abɔɔ, “mkpi war bɔmɔ, jiŋ ji ɛre ɛtiŋi ka Ɛfo-Ɛsiayɔ: nɛ ne nɔbɔ kasɛ nɛ ne ɛbibi, nɛ toŋo kasɛ nɛrɔbɔ nekpen?” 10Ákpéghe abri abɔɔ kprɔb ka atɔ mkpɔghɔ ɛbɔ, “tini ɛbɔ.” Ɛsika atini ɛbɔ bi, ɛbɔ ɛkoro nnɔbɔnɔbɔ. 11Ka ba Farasi ka ba kpɨne anɛ ajighi asak netem; agbɔ ɛju atub ji abɔɔ aneɛ. 12Ɛfobi, Jisɛs amu ka nkɔ ɛgon kantiŋ, ama kak njɔm akɛ Ɛsɔwɔ ka ɛnokon tɛtɛ ɛfrusu ɛkpara.
Jisɛs ayighi Asɔgba wobo ka abaa
13Nden yi mfom ajibi, Jisɛs abiŋ ɛkan ɛjɛ asaŋ anɛ wobo ka abaa anɨŋɔ Asɔgba ayɛ. 14Simɔn yɔ agorɛ mbiŋ si Pita, ka ɛkɨno ɛjɛ ji Andru, Jems ka Jɔn, Finip ka Batonomiu, 15Matiu ka Tɔmɔs, Jemsi ji moa Anfiɔs, ka Simɔn yɔ abɨŋi si Silɔts 16ka Judas ji ɛkɨno Jems, ka Judas Iskariot, yɔ agorɛ. 17Yɛ ka Asɔgba ayɛ asɨnɛ ka nkɔ ɛgon amu ka mfom ba áre mkpana mkpana. Ɛkan ɛjɛ ka ntakpa ɛbɔŋɔ ba aru ka mfom mfom biku ka Judiya, Jɛrusanɛm, ka nkɔ aya Tarɛ ka Sidon, abaa ama yɔghɛ afɨnɛ asɛb si ane abɔɔ atam ka ayam. 18Jisɛs akama ayám ya ajɛ akɨgha anɛ ka bɛji 19enem nɛnnɛ yɔku ya akpe ɛyam anɔk si akɔmɛ atubsi nɛyɔ ɛnɛ ɛfaŋa ɛga ɛyam biku biku.
Jisɛs akpɨne ekan ɛjɛ
20Ataba amar abri ɛkan ɛjɛ ka akpɨne abɔɔ si:
“Ɛminɔb ɛkɛ anɛ ba arɛ bɛn,
atubsi ɛyɔb ka nɛyɔ ka nɛkɔrɔ Ɛton Ɛsɔwɔ.
21Ɛminɔb ɛkɛ anɛ ba njan si ɛyuru yuru.
Ɛminɔb ɛkɛ anɛ ba ara bere maŋ,
si ayɔ́yɔn.
22Ɛminɔb ɛkɛɛ anɛ ba ɛkan ɛjɨŋa ba ara asɨgha ɛyiŋ,
ba anɛ atɛ́nɛ,
afɨna anyɛ́ɛ, agoro abɔɔ abɨŋ ɛjiŋ atubsi ɛrɛtɔɔŋɔm, Mɔanɛ.
23“Fɛb ka ɛyɛbɛ netem ka ɛfobi: si ntoro ya nɛtom ɛnɨrɛ afɨŋa faŋ ka ɛtighi Ɛsɔwɔ: si ɛjɔnɔ na ka nden yi ba nsɛ abɔɔ áné Asɔgba Ɛsɔwɔ.
24“Ka ɛbibib ɛkɛ afɨŋa anɛ,
atubsi ami bɛn ntoro abɔɔ.
25Ɛbibib ɛkɛ anɛ ba ara nɛghɛ,
ayuru maŋ atubsi njan aya war yám.
Ɛbibib ɛkɛ anɛ ba ara yɔnɔ maŋ!
Si ɛjɔnɔ ka akagha ka eren.
26Ɛbibib ɛkɛɛ, ana anɛ kpakpa ba ara rɨgha atiŋa nsɔn atuba!
Na yɔ ba nsɛ abɔɔ ané ka ba bɨb atɔrɔ Asɔgba Ɛsɔwɔ.
Nɨŋɔ anɛ ba ɛjiŋ akɔrɔa
27“Ka ntɔ war ba ɛrɛ yɔghɔm, ba nɨŋɔ anɛ ba ɛjiŋ akɔrɔ war, ba nem nɛnɔbɔ ka anɛ ba ɛrɛ sɨgha, 28fɛn ɛtiŋi nkater tub anɛ ba ara tere ɛbibi atuba, ra kak njɔm kɛɛ anɛ ba ara nea ɛbibi. 29Ka nnɛ atá na nsab ka ɛkpɔghɔ kpeghe biga kɛɛ; nnɛ ataba na ɛnɨmɛ kruɛ kɛɛ ji ɔyɔbɔ ka na. 30Kɛɛ nnɛ nɛ yɔ abɔa, ka nnɛ ayuu na ɛjom ɛja, krɛ kpɛ kɔ. 31Nem kɛɛ anɛ ɛsika ɔsɛbɛ si abɔɔ atɨma nem akɛa.
32“Ɔtɨŋɔ na anɛ ba ɔra kɔrɔ nɛkɔrɔ, jɛ ji ɛjɔnɔ nɛmaa ɛna? Aragasi abibi anɛ anyinyi ka atɨŋɔ atɛm nɛkɔrɔ. 33Ka ɔné na atiŋa nsɔn ɔkɛɛ anɛ ba ara ne ɛtiŋi akɛa, yɛnnɛ akpɛ gbɨgha abɔɔ akɛa? Atubsi abibi anɛ ara tɨma anem nɔbɔ akɛɛ atɛm. 34Ka ɔkpɨnɛ na nnɛ ɛjom ji ama afɛra, na ka akpugha; jɛ ji ɛre nɛnɔbɔ ɛna? Abibi anɛ ara tɨma akpɨnɛ anɛ ba ama afɛrɛ abɔɔ kprɔb. 35Ka ba nɨŋɔ anɛ ba ɛjiŋ akɔrɔ war, ba nem nnɔbɔ kɛɛ abɔɔ, ba kre bri si amama afɛrɛ ka ɛkpɨnɛ abɔɔ. Kasɔŋ ntoro ɛyɨrɛ atughu kɛtiŋi tiŋi, ɛfɨnɛ ɛnem anɛ agbɛrɛ si eré abɔɔ Agaga Nton yɔ ara né atiŋa nsɔn akɛɛ abibi anɛ ba nsɔn erɛjɔnɔ ɛto abɔɔ ka amar. 36Bri anɛ ɛkpɔghɔsi, na ka Nsɔjire ka bɛsɔ ara bri.
Ɛrɨgha afɛm anɛ
37“Krɛ rak afɛm anɛ kasɔŋ anɛ arɛ rak ya yá. Krɛ rak nɛgbɔghɔ nnɛ kasɔŋ wɔ ɔrɛ gbɔ. Tam sik anɛ kasɔŋ anɛ atɨma tam asigha. 38Kɛ anɛ kasɔŋ ɔtɨma ɔtaba; akɛa ɛbam ɛson kɛtiŋi tiŋi, anyɨghɛ tɛtɛ ɛson ɛwuru, na yɔ anɛ ara kɛa. Ɛsika ɔgara ɔkɛ ya atɨma agara akɛa.”
39Ka atub nɛgana akɛɛ abɔɔ si: “Nnɨgha amar amama agbɔ ntɛm nɨgha amar mbaa? Abɔɔ anɛ abaaba ágbɔghɨm anam ka nebe?” 40Nnɛ ɛkan árɛ ga Nkpikpɨne, ka nnɛ yɔku yɔ akpɨne ɛjom ka ɛtiŋi tiŋi ajɔnɔ na ka nkpikpɨnɛ.
41“Nnaŋ ka ɔfɛ ɛfifɛ ji ɛre ka amar ɛkɨno ɛja ɔtam ntakpa ɛkon ji ɛkón ka amar aya? 42Ɔma sijɛ ɔtɔ̀ ɛkɨno ɛja si, ‘Ɛkɨno ɛjɨŋa, nɨŋɔ mfɨna ɛfifɛ ka amar aya ka,’ nden yi ɔrɛ yɛɛ ɛkón ji ɛkona wɔ ka amar? Mbɨba atɔrɔ, tɨghɔ yighi ntakpa ɛkon ji ɛkóna ka amar, kasɔŋ wɔ yɛɛ nnɔbɔnɔbɔ ɔyighi ɛfifɛ ji ɛre ka amar ɛkɨno ja.
43“Si ɛtiŋi ɛte ɛrɨmɛ ɛkaba abibi akab; na ka ɛbibi ɛte ɛrɨmɛ ɛkaba anɔbɔ akab. 44Ɔgbɛrɛ ɛte jiku ka akab ayɛ. Ɔmam ɔsaŋ akpor si mbii ka ɛkonogbɛ ajijɔŋɔ. 45Ɛtiŋi nnɛ átere atiŋa nsɔn ka netem, na ka ɛbibi nnɛ akpe ɛbibi nkater. Ji nnɛ arɨgha ka nnyɔ ɛtɨŋɔ ji akɨgha ka netem, atubsi nnyɔ ɛrɨgha ji ɛsono nnɛ ka netem.
46“Nnaŋ ka ɛbiŋim si Ntaa, Ntaa, ɛfɨnɛ ɛtɛn nɛ ne ji ntɔ war? 47Nnɛ yɔku yɔ abaa ama yɔk ntɔrɔ ɛyɨŋa, afɨna nem ka ndɨgha, ntɨŋɔ war nɛgana nnɛ yɔ áre. 48Afɔ́ŋɔ nnɛ yɔ asi njo, yi asimɛ atana agɔŋɔ tɛtɛ akomo ka ataan: ka nden yi nyɛn animɛ, ɛbuk ɛnɔk si ɛtemɛ njo atub, ka ɛrɛ maa atubsi akon ka ataan. 49Ka nnɛ yɔ ayɨghɔ ntɔrɔ ɛyɨŋa ka árɛ nem ji ndɨgha, áre na ka nnɛ yɔ asi njo ka ɛkpasɛ árɛ sam atan ágɔŋɔ: nyɛn amɨna ba; atɛmɛ atana nya atub, njo nyi atanɛ.”
Currently Selected:
Nuk 6: NDD-011
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
©️2024 Luke Initiative for Scripture Translation
