Jone 14
14
I Jisu Sa Na Soana, Na Sosoto Beto Na Toa
1Pira sau si Jisu, Muke vatakulangaria na bulomiu agou. Mu vasosotoa na Tamasa beto mu vasosotosiu sara. 2Pa ruma tana Tamaqu sa soku jola sira na ia susuverena. Vei bike sosoto sa bake pojanigou na veveina ara sapi, goto ara sa kopira sa ma lao vatana vanigou kai ia sagou. 3Ko pa liguna tu mana lao vatana vanigou sa kai ia isa, sa beto mana mule lame ko mana toni laonigou ketakoi qa suvere, ko ketakoi qa suvere ara sa agou ba muna suvere tugu. 4Ko ketakoi qa korapa lao vei ara sa qu gigilaimiu na soana laona, sau si Jisu.
5Poni sa paranga lao tana si Tomasi, Bangara, qeke gigilai agei sa na ia ketakoi qu korapa lao ao. Ko ai mene vei mene gigilai agei sa na soana laona ketakoi? sau.
6Poni sa oea i Jisu sisa, Ara sa na soana beto na sosoto beto na toa. Kepore sa kai tinoni mina lao tana Tamaqu vei minake lame vei taqu. 7Vei muna gigilasiu sara, sa kode muna gigilai sa na Tamaqu. Ko podalai kopira sa qu gigilai sisa beto qu batia sisa, sau.
8Sa paranga lao tana si Pilipi, Bangara, mu vabatinigei na Tamamu, beto sa mina kamua gu sa na padamei agei, sau.
9Poni sa oea i Jisu sisa, <<Na beko tei totoso kakasana tu qa suvere tavitigou ara sagou, ba qu oqoro tu gigilasiu ara sao, uve Pilipi? Isa sa batisiu ara, sa sa tei batia tugu sa na Tamaqu. Ko ai sa vei sa qu paranga tu sao, <Mu vabatinigei na Tamamu,> qugu? 10Quke gigilai tu ao Pilipi sa ara sa qa somana tana Tamaqu beto na Tamaqu sa somana taqu? Na paranga qa pojanigou ara sa nake koko veidi taqu mekaqu gu, goto na Tamasa tu sa togasa taqu sa roitinia nona roiti. 11Mu vasosotoa gu agou sa ara qa somana tana Tamaqu beto na Tamaqu sa somana taqu. Ba vei munake vasosotoa na qua paranga, poni sa mu vasosotoa tonai qu batiria ira na roiti aipira. 12Sosoto pa sosoto ma pojanigou ara sagou: isa sa vasosotosiu ara sa ira na roiti qa roitiniria ara sa mina roitiniria, beto ko mina lavata jolaniria na roiti aipira sa mina roitiniria isa, ura ara sa qa korapa lao tana Tamaqu. 13Beto ko isa muna tepai pa isongoqu ara sa isa tugu sa mana roitinia, ko na Tamaqu mi tavalavata tana Tuna. 14Doru kai sa muna tepai taqu, sa ara mana roiti vanigou,>> sau si Jisu.
Mu Vairoqu Beto Mu Vatabe
15Beto pira sau si Jisu, <<Vei muna roroqusiu ara sagou, poni sa muna kopuniria na qua garunu. 16Beto ko mana tepai ara sa na Tamaqu ko mina vanigou kai vaitokai, ko isa sa mina suvere tavitigou kamua na kamua. 17Ko isa sa na Gagala sa kolea na sosoto. Na kasia gusu sake boka isongia sisa, ura sake batia beto sake gigilai sisa. Goto agou sa qu gigilaimiu sisa, ura isa sa suvere tavitigou beto kode mina somana tamugou.
18Kode maneke loa vanyanyata veinigou ira kepore tinadi na tamadi ara sagou, goto kode mana mule lame kamugou tu. 19Kai iqo totoso mule beto na kasia gusu sa minake bati ligusiu sara, goto agou kode muna batisiu sara, beto ko ara na toaqu ko agou ba muna toa tugu vei. 20Na ranena isa sa agou muna gigilai sa ara qa kole somana tana Tamaqu beto agou qu kole somana taqu, beto ara qa kole somana tamugou.
21Isa sa isongoria na qua garunu beto sa tutiria, sa isa sa roroqusiu ara sisa. Ko na Tamaqu mina roroqua sisa sa roroqusiu ara, beto ko ara ba mana roroqua sisa beto mana vatadogoronisiu mekaqu tana,>> sau si Jisu.
22Sa paranga si Jiudasi (nake i Jiudasi Isikarioti sa), <<Bangara, ko ai sa vei sa tamigei gu muna vatadogoronigo mekamu sao, goto nake tana kasia gusu?>> sau.
23Poni sa oea i Jisu aza, pira saunia, <<Isa na tinoni sa roroqusiu ara, sa sa kopuniria na qua paranga, beto ko na Tamaqu mina roroqua sisa beto agei karu mene lame tana ko mene roitinia na mei ia susuverena tana. 24Isa sake roroqusiu ara, sa sake kopuniria na qua paranga. Beto na paranga qu nongororia qa pojaria ara sa nake taqu, goto na ona tu na Tamaqu isa sa garunusiu ara.
25Ira na sakasava aipira sa qa tei pojanigou tu ara totonai qa korapa suvere tavitigou. 26Ba na vaitokai tu, na Gagala Tabuna, isa na Tamaqu mina garunu lagerenia pa isongoqu ara, sa mina vagigalainigou doru sakasava beto mina varoroqu kamunigou sira doru sakasava qa ule vanigou ara.
27Na bule sa qa loa vanigou agou ara; na qua bule sa qa vanigou agou ara. Nake pa soana sa vatekunigou na bule na kasia gusu api sa qa vanigou ara sa na bule api. Muke vatakulangaria na bulomiu beto muke matagutu. 28Qu tei nongoriamiu tu agou sa pira qa paranga veinigou ara, <Mana taloa riu sara, ba kode mana lame gu tamugou,> qau. Ko vei bu roroqusiu ara sa bu qerania tu agou sa ara sa kode mana lao tana Tamaqu, ura na Tamaqu tu sa sa poreveveina jolanisiu sara. 29Ko kopira tu totonai sa oqoro gore votu qa pojanigou ara sapi, ko tonai mina gore votu sa mu vasosoto. 30Manake parangagou lalaoqua ara sagou, ura na bangarana na kasia gusu alepi sa sa korapa lalamegana. Kepore mina aru veinisiu ara sisa, 31ba vei ko na kasia gusu mi gigilai sa ara qa roroqua na Tamaqu. Ko sa vei sa isa tugu vei sa pojanisiu na Tamaqu sa qa roitinia sara.
Aria, turu ko ta loai na ia api,>> sau si Jisu.
Ekhethiweyo ngoku:
Jone 14: LGA
Qaqambisa
Yabelana
Kopa
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2024, Islands Bible Ministries. All rights reserved.