APOEM AYANG: 3
3
Xangsu: Byu da" Atam" Gyo: Khyoo:
1 #
Psh 12:9; 20:2. Akhid" lhangmyu gi Aseing Mangsoo phain" so: jang" mo mhau fain" thang da" gougnyhoug nghoid. Lhangmyu gi myiyi: ri «Mangsoo gi khyam: khoug: shigam joem mo ashi" re" tang: ri azoo: wa shid re" gyeing" gyeing" tid to" la"» ga: myid:.
2«Ngoonu" gi khyam: khoug: mo gam khang" moo" mo ashi" ri ge zoo:» ga: myiyi: myhi' gi phug tid. 3«Khyam: gung shigam mo za: age zoo:. Mangsoo gi hau: agam mo ashi" ri azoo: goo"- zang" lhang" azang" thung" goo"- yhe: zei: yhe: zo: nghoid rigi ngoonu" shid: wa zi nghoid» ga: tid.
4Lhangmyu phug tid zigi: «Hau: dang: adeing- nanu" shid: wa zi anghoid. 5Mangsoo hougsu" nanu" hau: ziri zoo: lang" Mangsoo ti" bue" lo wigi ge ziyo' age zi se' loo wa ziri nyang: si' too" yoomo tid zi nghoid».
6Myiyi: myhi' gi shigam ri gye" yung" nhung:- nya: ashi" we' gye" zoo: ngham" wa myang ga: yu" thu lho: nyang: gi phajhi" boo su: to' bue" lo nghoid rigi khayhi' gyeing" gi wa lha" ga: myid. Houg: yoomo myiyi: myhi' gi shi" ri phyo' zoo: bye:. Hau: thang: nya: yhoem: seing: phoo ri byid: wigi yhoem: seing: phoo we' hau: shi" ri zoo: bye:. 7Nya: tang: gi hau: ziri zoo: yo' dage" nheigloem: soozoo: lheing: lo wigi nya: tang: gung cen: byimi adab ziri boin: loo bye:. Houg: yoomo nyang: tang: gi lafoem' fu' joem ri coeb yu lho: nyang: nya: gung du: ri nghoeb boem bye:.
8Myen" thang: ayo, moo: Aseing Mangsoo gi khyam: khoug: moo khyoo: so" nyid zi shoug" gyoo: lang" nya: tang: gi seiggam joem agyoo: moo gau" ago". 9Nghoid loug Aseing Mangsoo gi yuggi ri «Nang khamo: nyid lha"» ga: yoid khe:.
10Nyang: gi «He: khyam: khoug: moo re" thui: ri shau" gyo:. Ngoo gi shoocen: doem: nghoid nyid yoomo gyoug ziyo' phang: gau" nyid» ga: phug tid.
11«Re" tang: ri shoocen: doem: nghoid ga: hang" re" tid la". Re" tang: ri azoo: goo" ein: ngoo toung: to" da" shi" ri zo: boem bye: anghoid goo" la"» ga: Mangsoo doem myid:.
12Yuggi phoo gi «Nang ngoo yo' dage" nyhid: to" da" myiyi: myhi' gi ngoo ri shi" lo byid: wigi ngoo hau: ziri zo: pyam bye:».
13 #
2 Ko 11:3; 1 Ti 2:14. Aseing Mangsoo gi myiyi: myhi' ri «Nang ce: gang mo hid: su" koid lha"» ga: myid: lang" myiyi: myhi' gi «Lhangmyu gi hau: shi" ri zoo: wa shid re" ngoo ri jhu" phyo'» ga: doem phug tid.
Mangsoo Yooboo Dang: Phyed Khyoo:
14Houg: lang" Aseing Mangsoo gi lhangmyu ri - «Nang gi he: moo" zei: yoomo yooboo dam shoug" wa nghoid bye:- gougnyhoug gougdoo: dangain" moo nang kyeing" za: he: da" nheing" khoin" zang" baja". Akhid" mo nang gi nanya: voem: doug: yo' yu yen" wa nghoid wigi nang dadei nyid nyid gi myidzhoo" phei" ri zoo: ca" wa bye:. 15#Psh 12:17. Ngoo gi nang yo' myiyi: myhi' ri dayug yo' dayug ri ngheing" goo" nhang: too" wa. Nya: amyed ashen yo' re" amyed ashen gi khanham we' gyivoo jha" bue" nyid wa bye:. Myiyi: myhi' nya: amyed ashen gi re" vhuloem ri nang mhoin' wigi nang we' nya: amyed ashen yi da" khanheig thung" thang: ri thei" wa nghoid» ga: tid.
16Xo' lho: myiyi: myhi' ri we' «Zoonu" gung moo re" da" yau: khi" je" myoo: nhang: lho: zookhu: uri noo nhang: wa. Nghoid loug we' nang gi re" yhoem: seing: phoo moo nheig nhei: nyid ca" wigi nang gi nya: da" vhu" she: akhoug: moo nyid wa zi nghoid» ga: tid.
17 #
Heb 6:8. Houg: lho: yuggi ri «Nang gi re" yhoem: seing: myhi' dang: ri tam" gyo: lho: ngoo nang ri azoo: ein: toung: to" da" shi" ri zo: abye:. Nang zei: shoid moo" yoomo myidjang we' nheing" khoin" zang" bye:. Nang gi re" da" shoug" zoo: shoug" shug wa shid re" re" da" pyaid goin" moo" zei yoem: kaid ca" wa nghoid. 18Mougmyid gi myo, gam joem yo' zu: gam joem ri yug loo nhang: lho: houg: myidjang shivoo: shiloem nghang" pho ri zoo: ca" wa zi nghoid. 19Nang gi bid kyu" thu sho' moo" zei: yoem: kaid lho: nang ri phain" so: to" da" myidzhoo" khyoo: doem tau" lo" da" ayo, ju" sho' myidzhoo" moo moo" zei: lho: dashoug" zoo: wa. Nang gi myidzhoo" mo phain" so: to" yoomo nang gi myidzhoo" doem bui" wa nghoid» ga: tid.
20Adam gi nya: yhoem: seing: myhi' ri Eva ein: myeing myheing- khasu" wim ga: ri nyang: gi xangsu: byu dangain" da" nya: myhi' nghoid yoomo nghoid. 21Houg: lho: Aseing Mangsoo gi Adam yo' nya: yhoem: seing: myhi' shid re" shooyid byimi coeb lho: nya: tang: ri foid kaid.
Adam yo' Eva ri Khyam: mo Khaid Thu' Khyoo:
22 #
Psh 22:14. Hau: thang: Aseing Mangsoo gi: «Akhid" xangsu: byu gi ngoonu" mo dayug su: ti" bue" lo wigi ge ziyo' age ziri se' da" lasi laleug boo bye:. Nyang: gi kangso' shigam mo shi" zo: lho: apyaid atoo: dei nyid wa khyoo: boo yoomo hau: shigam mo shi" phyo' yu wa amyeing" akhang" abyid: loo:» ga: tid. 23Houg: yoomo Aseing Mangsoo gi nya: tang: ri Eden khyam: khoug: mo khaid thu pyam lho: nyang: ri phain" so: kaid da" myidjang moo nyang: ri zei: zoo: nhang: pyam bye:. 24Hau: thang: khyam: da" bidthu shoid moo nyang: gi moug: lagyoo: yiri nyhid: to" lho: yo" fe: jhed nyid da" lhab' sham: ri to" too" bye:. He: zigi kangso' shigam khyoo: hang" ayo" ri" wa shid re" nghoid.
Currently Selected:
APOEM AYANG: 3: LCL
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Lacid Bible © Bible Society of Myanmar, 2009.