Š. Matéu 18
18
Krie XVIII.
1Nd’ at χêr u‐kjásetin δišípuljit Džesúit, tue θẽn: Kuš prana ê mê i maθ te rregjería e kjíelvet?
2E θerritur Džesúi nje diáljθe, e vû nde mest atire,
3E θa: Per vertét ju θom, nde mos u‐nderrofšit, e u‐befšit si te vígjeljit, se mund χini te rregjería e kjíelvet.
4Prandái kušdô te vogeljônje vetχên si kî diáljθe, kî ešt mê i maδi te rregjería e kjíelvet.
5E aí tše mbiéθte nje diáljθe kesíš nd’ émerit tim, mbiéθ mua.
6Kuš pra skandalidzarte nje nder kta te vígjelje, tše kân bes tek ú, i vién mê mîr atîje, ti viret nje gûr gaiδureš te gerljatsi, e te mbitet te avsi déitit.
7Mierezî jetes per skándalet. Pse skándalet kân te vĩnjen: po mierezî atîje njeríu, per ke skándali vién.
8E nde dora jote, o kẽmba jote te skandalidzaren: prit até, e štire ka ti: ešt mê mîr per tîj te χĩnješ te gjela tšung, e šankát, se pasur dî dúar, o dî kẽmbe te jêš i štẽn te ziárri i pa‐fernúam.
9E nde siu it te skandalidzaren, škulje, e štire ka ti: ešt mê mîr per tîj te χĩnješ me nje sî te gjela, se me di te jêš i štẽn te avsi ziárrit.
10Rúani te mos šani nje nde kta te vígjelje: pse ju θom, se ẽ́ngjeljit e tire nder kjíelet gjiθmôn šoχen fákjien e Tates tim, tše ešt te kjíelet.
11Pse erθ i Biri njeríut te salvônje te biérrin.
12Tše ju duket? ne ndonjerî pafte nje kjint delje, e ju‐sparrangjiste nje nder to: ljeríer aí nendeδietenendat, tue etsur máljevet, nẽng kerkón te sparrangjísten?
13E nde i árθete te gjẽnje: per vertét ju θom se kâ mê šûm χarê per té se per nendeδietenendat, tše nẽng u‐sparrangjistin.
14Keštú nẽng ê veljêm perpara Tates têje, tše ešt te kjíelet, te biret nje nder kta te vígjelje.
15E nde fteste kunter tîj vlau it, ets’ e nemeréi nder ti, e aí vetem: e nde aí te gjékjete, gavenjeve vláun tẽnte.
16E nde mos te gjékjete, mirr me tîj eδé nje, o di vet, sâ te buza di martrîše, o tre te kjintrônje gjiθ te foljet.
17Nde prana ẽng dafte te gjegjet atá, θúaja kjíšese. E nde eδé kjišen se gjékjete, kjofte per tîj si džentili, o gabeljoti.
18Per vertét ju θom, se sâ ljíδešit mbi δéun, jân te ljíδura nder kjíel: e sâ sgjíδešit mbi δéun, jân te sgjíδura nder kjíel.
19Papâ ju θom, se nde di nder ju e ndíešin bašk mbi δéun, per nga šurbés, tše kân te ljípenjen, i vién atire ka Tata im, tše ešt te kjíelet.
20Pse tek jân di, o tre vet te mbiéδur nd’ émerit tim, ú jam atié nde mest atíreve.
21Aχíera tue kjasur atîje Piétri, θa: Zot, sâ χêr kâ te me ftésenje vlau im, e ú te ndeljênje? per štat χêr?
22Θot atîje Džesúi: Nẽng te θom, njera štat χêr: po njera štateδiét e štat χêr.
23Per kte u‐gja rregjería e kjíelvet njeríut rregje, tše diš te bẽ́neje kundet me šerbetoret e tîje.
24E si zû ti bẽ́neje, i erθ perpara nje, tše kiš ti jip δiét mîlje talente.
25E si aí nẽng kiš te ja jip, i kumandói i zoti tîje te šitej aí, e šokja e tîje, e te biljte, e gjiθséi tše kiš, e te paguχej detira.
26Râr per kte mbe trúal šerbetúari, e parkaljésneje tue θẽn: Zot, ki patšêndze per mua, e ú te jap gjiθséi.
27E i zoti pasur ljipisî per at šerbetúar, e lja te vêje, e i ndeljéu detiren.
28E dâlje aí šerbetúar gjet nje nder šókete šerbetrije, tše i kiš detire nje kjint δinâr: e rrembíer iš e e fukárneje, tue θẽn: Ẽm até tše kê te me japše.
29Râr mbe trúal pre kte šoku tîje šerbetrije, e parkaljésneje, tue θen: Ki patšêndze per mua, e te jap gjiθséi.
30E aí nẽng diš: po vatur, e štû nde filjakjî, njera ti pagúaneje detiren.
31Pâr prana šokte e tîje šerbetrije kto te bẽna, u‐χeljmúan šûm: e vatur rrefíejetin zotit tire gjiθséi, tše kiš kjẽn.
32Aχíera θerritur até i zoti tîje, i θot: Šerbetôr i ljik, gjiθ até detire te ljê, se me parkaljese:
33Se te ngit eδé tîj te ljipíseje šokun tẽnte, si eδé ú ljipisa tîj?
34E po tše u‐ngroχ i zoti tîje, e δa nde dúar atire tše vrísejen χûnje, njera kûr ti pagúaneje gjiθ detiren.
35Kestú eδé Tata im i kjíeles ju bẽn juve, nde mos ndeljefšit nganjé vláut tîje te zémerat túaje ftesmat e tire.
Currently Selected:
Š. Matéu 18: AAE1869
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Përktheu nga greqishtja 1869.