လုကာ 23
23
ပိလတ်ရှေ့ဟှို ခေါ်ဆောန်တော်ဟှူမူကြောန်း
(မဿဲ ၂၇.၁,၂,၁၁–၁၄; မာကု ၁၅.၁–၅; ယောဟန် ၁၈.၂၈–၃၈)
1တရားလွှတ်တော် တဖွဲ့လောင်းဟှာ ထဘီးန ယေရှုဟှို ပိလတ်မန်းရှေ့ဟှို ခေါ်ဆောန်ဟှားဘီး၊ 2အယ်နေရာမာ သူးနို့လေဟှာ ကိုယ်တော့်ဟှို “ကဲသာမန်းဂီးဟှို ခွန်ဆောန်ဇာလိုဟှ ဆိုဘီး သူးနို့ဟှို ပြောဘီး သူ့ကိုယ်သူလည်း မေရှိယဖြစ်ဟှူ မန်းဂီး ဖြစ်ဟှယ် ဆိုဘီး လူလေဟှို လမ်းမှားအောန် လောက်နေကြောန့် ကျွန်တော့်ဟှားလေဟှာ အယ်လူဟှို ဖမ်းလာဟှယ်” ဆိုဘီး စွပ်စွဲဂေ့ဟှယ်။
3ပိလတ်ဟှာ “နန်ဟှာ ယုဒမန်းဂီးလော။” ဆိုဘီး ကိုယ်တော့်ဟှို မေးလေဟှယ်။
ယေရှုဟှ “မန်းဂီးမေးဟှူတိုင်းဘဲ့ ဖြစ်ဟှယ်” ဆိုဘီး မိန့်တော်မူဟှယ်။
4အယ်ဘီးန ပိလတ်မန်းဟှာ ယဇ်ပုရောဟိတ်ဂီးလေန လူအောက်ဂီးဟှို “ငါဟှာ အယ်လူမာ ပြစ်တခုလည်း ငါတွိဟှ” ဆိုဘီး ပြောလေဟှယ်။
5အယ်ဘေမဲ့ သူးနို့လေဟှာ “သူဟှာ ဂါလိလဲနယ်ဟှနေ အယ်နေရာထိတိုင်အောန် ယုဒနယ် တနယ်လောင်းမာ သွန်သန်ဘီး လူလေဟှို နှိုးဆော်နေဟှူသူ ဖြစ်ဟှယ်” ဆိုဘီး ပြင်းပြင်းထန်ထန်ဟှား ပြောဂေ့ဟှယ်။
ဟေရုဒ်မန်းရှေ့ဟှို ခေါ်ဆောန်ဟှားဟှူကြောန်း
6ပိလတ်ဟှာ အယ်စကားလေဟှို ကြားဟှူ ခီမာ “အယ်လူဟှာ ဂါလိလဲနယ်သားလော။” ဆိုဘီး မေးလေဟှယ်။ 7ဟေရုဒ်မန်း အောက်စိုးဟှူ နယ်ဟှ ဖြစ်ဟှယ် ဆိုဇာဟှို သိဟှားဟှူ ခီမာ ကိုယ်တော့်ဟှို ဟေရုဒ်မန်းနားဟှို ပို့စေလိုက်ဟှယ်။ အယ်ခီမာ ဟေရုဒ်မန်းဟှာလည်း ယေရုရှလင်ဗြို့မာ ရှိနေလေဟှယ်။ 8ဟေရုဒ်မန်းဟှာ ယေရှုဟှို ဗြင်ဟှူ ခီမာ ရရာတိုင်း ဝန်းသာဟှားဟှယ်။ ဖြားဖြစ်ကြောန့်နူးဆိုဟှာ ကိုယ်တော့်ကြောန်းဟှို ကြားဟှားဘီး ကိုယ်တော့်ဟှို တွိရှင်နေဇာဟှာ ကြာဘီ။ ယေရှုလောက်ပြမယ့် နိမိတ်လတ်ခဏာ တချို့ဟှို တွိရဟှို့ မျှော်လင့်နေလေဟှယ်။ 9အယ်ကြောန့် ဟေရုဒ်မန်းဟှ ယေရှုဟှို မေးခွန်းလေ ဘောင်ဂီးမေးလေဟှယ်။ အယ်ဘေမဲ့ ကိုယ်တော်ဟှာ ဖြေဘဲ့န နေတော်မူဟှယ်။ 10ယဇ်ပုရောဟိတ်ဂီးလေန ကျမ်းတတ်ဆရာလေဟှာ ရှေ့ဟှို တိုးလာဘီး ယေရှုဟှို ပြင်းပြင်းထန်ထန်ဟှား စွပ်စွဲဂေ့ဟှယ်။ 11ဟေရုဒ်မန်းန သူ့ရဲ့စစ်သားလေဟှာ ယေရှုဟှို ထီလေးဇာလောက်ဘီး လှောန်ပြောန်ဂေ့ဟှယ်။ အယ်ဘီးန သူးနို့လေဟှာ ကောန်းဇားဝတ်လောင်ဟှို ဝတ်ပေးဘီးဟှာ ကိုယ်တော့်ဟှို ပိလတ်မန်းနားဟှို ပ္လန်ပို့လေဟှယ်။ 12ရင်ဒူးဟှ ရန်သူဖြစ်ဂေ့ဟှူ ဟေရုဒ်မန်းန ပိလတ်မန်းဟှာ အယ်နေ့မာ မိဆွေလေ ဖြစ်လာဂေ့ဟှယ်။
ယေရှုဟှို သေဒန်ခ္လဟှူကြောန်း
(မဿဲ ၂၇.၁၅–၂၆; မာကု ၁၅.၆–၁၅; ယောဟန် ၁၈.၃၉—၁၉.၁၆)
13ပိလတ်မန်းဟှာ ယဇ်ပုရောဟိတ်ဂီးလေ၊ ခေါန်းဆောန်လေန လူလေဟှို ခေါ်လိုက်ဘီး 14“နန်းနို့လေဟှာ လူလေဟှို လမ်းမှားအောန် နှိုးဆော်ဟှူသူ ဖြစ်ဟှယ် ဆိုဘီး အယ်လူဟှို ငါနားဟှို ခေါ်လာဂေ့ဟှယ်။ ခု နန်းနို့လေရဲ့ ရှေ့မာ ငါစစ်ဆေးဘေမဲ့ အယ်လူမာ နန်းနို့လေ စွပ်စွဲဟှားဟှူ ပြစ်တခုလည်း တွိဟှ။ 15ဟေရုဒ်မန်းလည်းဘဲ့ ပြစ်ရှာတွိဘဲဟှူကြောန့် သူ့ဟှို နို့လေနားဟှို ပ္လန်ပို့လိုက်ဟှယ်။ အယ်လူဟှာ သေဒန်န ထိုက်တန်ဟှူ ပြစ်တခုလည်း ကျူးလွန်ဟှ။ 16အယ်ကြောန့် အယ်လူဟှို ကီဒန်ပေးဘီးဟှာ လွှတ်လိုက်မယ်” ဆိုဘီး သူးနို့လေဟှို ပြောလေဟှယ်။ 17#၂၃.၁၇ တချို့ မူရင်းလတ်ရေးမူလေမာ ခန်းငယ် ၁၇ ဟှို၊ ပသခါပွဲတိုင်းမာ ပိလတ်မန်းဟှာ လူလေတွပ် ထောန်သားတယော့‑က်ဟှို လွှတ်ငြီးခွမ့်ပေးလေ့ရှိဟှယ်၊ ဆိုဘီး ထပ်ပေါန်းထဲ့ဟှားဟှယ် (ရှု မာ ၁၅.၆)။
18အယ်ဘေမဲ့ လူအောက်ဂီး တခုလောင်းဟှ “အယ်သူဟှို သတ်ပါ! ကျွန်တော့်ဟှားလေတွပ် ဗာရဗ္ဗဟှို လွှတ်ပေးပါ!” ဆိုဘီး အော်ဟစ်ဂေ့ဟှယ်။ 19(ဗာရဗ္ဗဟှာ ဗြို့ထဲမာ ဆူပူမှုန လူသတ်မှုလေတွပ် ထောန်က္လနေလေဟှယ်။)
20ပိလတ်မန်းဟှာ ယေရှုဟှို လွှတ်ပေးရှင်ဟှူကြောန့် လူအောက်ဂီးဟှို နော့‑က်တခါ ပြောလေဟှယ်။ 21အယ်ဘေမဲ့ လူလေဟှ “သူ့ဟှို ကားစင်တန်ပါ! ကားစင်တန်ပါ!” ဆိုဘီး အော်ဟစ်ဂေ့ဟှယ်။
22ပိလတ်မန်းဟှ “အယ်သူဟှာ ဖြားပြစ်ဟှို လောက်ဟှားနူး။ အယ်သူဟှာ သေဒန်န ထိုက်တန်ဟှူ ပြစ်လောက်ဟှားဟှယ် ဆိုဇာဟှို ငါ တွိဟှ! အယ်ကြောန့် အယ်သူဟှို ကီဒန်ပေးဘီးဟှာ လွှတ်လိုက်မယ်” ဆိုဘီး သူးနို့ဟှို တတိယခါ ပြောလေဟှယ်။
23အယ်ဘေမဲ့ လူလေဟှာ ယေရှုဟှို ကားစင်တန်ရမယ် ဆိုဘီး သံက္လယ်ဂီးအော်ဘီး တောန်းဆိုဂေ့ဟှယ်။ နော့‑က်ဆောင်းမာ သူးနို့လေရဲ့ တောန်းဆိုရှင်းဟှာ အောန်မြင်ဟှားဟှယ်။ 24အယ်ကြောန့် သူးနို့လေ တောန်းဆိုဟှားဟှူတိုင်း ပိလတ်ဟှာ ယေရှုဟှို သေဒန်ပေးဟှို့ ဆောင်းဖြတ်ပေးလိုက်ဟှယ်။ 25ဆူပူမှုန လူသတ်မှုလေတွပ် ထောန်က္လနေဟှူသူဟှို သူးနို့လေ တောန်းဆိုဟှားဟှူတိုင်း လွှတ်ပေးလိုက်ဘီး ယေရှုဟှို သူးနို့ ဆန္ဒတိုင်း လောက်စေဟှို့တွပ် အပ်ပေးလိုက်ဟှယ်။
ယေရှုဟှို ကားစင်တန်ဟှူကြောန်း
(မဿဲ ၂၇.၃၂–၄၄; မာကု ၁၅.၂၁–၃၂; ယောဟန် ၁၉.၁၇–၂၇)
26စစ်သားလေဟှာ ယေရှုဟှို ခေါ်ဆောန်ဟှားဟှူ ခီမာ တောဝါဟှနေ လာနေဟှူ ကုရေနေဗြို့သား ရှိမုန်ဟှို ဖမ်းဘီး သူ့ထတ်မာ လတ်ဝါးကပ်တိုင်ဟှို တန်ပေးလေဟှယ်။ အယ်ဘီးဟှာ လတ်ဝါးကပ်တိုင်ဟှို ထမ်းခိုင်းဘီး ယေရှုနော့‑က်ဟှနေ လိုက်စေလေဟှယ်။
27ကိုယ်တော်နော့‑က်ဟှနေ လိုက်နေဟှူ လူအောက်ဂီးထဲဟှ မီးမတချို့ဟှာ ငိုကြွေးဘီး မြည်တမ်းနေဂေ့ဟှယ်။ 28ယေရှုဟှာ အယ်မီးမလေဟှို လှည့်ကေ့ဘီးဟှာ “ယေရုရှလင်ဗြို့သူလေ! ငါ့တွပ်ငိုဂေ့န။ နန်းနို့န နန်းနို့ရဲ့ သားမီးလေတွပ်ဘဲ့ ငိုဂေ့။ 29ဖြားဖြစ်ကြောန့်နူးဆိုဟှာ ‘မြုံနေဟှူ မီးမလေ၊ သားမွီးဖူးဘဲဟှူ မီးမလေ၊ နို့တိုက်ဖူးဘဲဟှူ မီးမလေဟှာ မင်္ဂလာရှိလေဟှယ်!’ ဆိုဘီး လူလေဟှ ပြောဟှို့ နေ့ရစ်လေဟှာ ရော့‑က်လာလေ့မယ်။ 30#ဗျာ ၆.၁၆အယ်ခီမာ လူလေဟှာ တောန်လေဟှို ‘နို့လေထတ်ဟှို က္လဂေ့ပါ!’ တောန်ဂူးလေဟှို ‘နို့လေဟှို ဖောင်းအောက်ဂေ့ပါ!’ ဆိုဘီး ပြောဂေ့လေ့မယ်။ 31ဖြားဖြစ်ကြောန့်နူးဆိုဟှာ စီးစိုနေဟှူပန်ဟှို အယ်မျိုးလောက်ဟှယ် ဆိုဟှာ ခြော့‑က်နေဟှူပန် ဆိုဟှာ ဖြားမျိုးဖြစ်လေ့မယ်နူး။” ဆိုဘီး မိန့်တော်မူလေဟှယ်။
32ရာဇဝတ်သား နှေ့ယော့‑က်ဟှိုလည်း ယေရှုနတူးဒူ သတ်ဟှို့တွပ် ခေါ်ဆောန်ဟှားဂေ့ဟှယ်။ 33“ဦးခေါန်းခွံနေရာ” ဟှို ရော့‑က်ဟှူ ခီမာ သူးနို့ဟှာ ယေရှုဟှို ကားစင်တန်လေဟှယ်။ အယ်ဘီးဟှာ ရာဇဝတ်သား နှေ့ယော့‑က်ဟှိုလည်း ကိုယ်တော်ရဲ့ ညာဖတ်မာ တယော့‑က်၊ ဘယ်ဖတ်မာ တယော့‑က် ထားဘီးဟှာ ကားစင်တန်ဂေ့ဟှယ်။ 34ယေရှုဟှ “ဖ! သူးနို့လေဟှာ သူးနို့ ဖြားလောက်ဟှယ် ဆိုဇာဟှို သိဂေ့ဘဲဟှူကြောန့် သူးနို့လေဟှို ခွမ့်လွှတ်တော်မူပါ”#၂၃.၃၄ တချို့ မူရင်းလတ်ရေးမူလေမာ ယေရှုဟှ “ဖ! သူးနို့လေဟှာ သူးနို့ ဖြားလောက်ဟှယ် ဆိုဇာဟှို သိဂေ့ဘဲဟှူကြောန့် သူးနို့လေဟှို ခွမ့်လွှတ်တော်မူပါ” ဆိုဘီး ပြောလေဟှယ်၊ ဆိုဇာဟှာ မှေ့ဟှ။ ဆိုဘီး ပြောလေဟှယ်။
သူးနို့လေဟှာ ကိုယ်တော်ရဲ့ ဝတ်စားလေဟှို မဲနှိုက်ဘီး ခွဲဝီယူဂေ့ဟှယ်။ 35လူလေဟှာ ရပ်ဘီး ကေ့နေဂေ့ဟှယ်။ ယုဒခေါန်းဆောန်လေဟှ ကိုယ်တော့်ဟှို “အယ်လူဟှာ ဘုရားသခင် ဝီးချယ်ဟှားဟှူ မေရှိယဖြစ်ဟှယ် ဆိုဟှာ တခြားလူလေဟှို ကယ်တန်မျိုး သူ့ကိုယ်သူ ကယ်တန်ပါစေ!” ဆိုဘီး လှောန်ပြောန်ဂေ့ဟှယ်။
36စစ်သားလေဟှလည်း ကိုယ်တော်နားဟှို တိုးဝမ်လာဘီး ဝိုင်ရှင်ဟှို တိုက်ဘီး 37“နန်ဟှာ ယုဒမန်းဂီးဖြစ်ဟှယ် ဆိုဟှာ နန့်ကိုယ်နန် ကယ်တန်ပါ!” ဆိုဘီး လှောန်ပြောန်ဂေ့ဟှယ်။
38ကိုယ်တော့်ရဲ့ ထတ်ဖတ်မာလည်း “အယ်သူဟှာ ယုဒမန်းဂီး ဖြစ်ဟှယ်” ဆိုဘီး ရေးဟှားဟှယ်။
39လတ်ဝါးကပ်တိုင်မာ ခိဆွဲဟှားဟှူ ရာဇဝတ်သား နှေ့ယော့‑က်ထဲဟှ တယော့‑က်ဟှာ “နန်ဟှာ မေရှိယ မှုဟှလော။ နန့်ကိုယ်နန် ကယ်တန်ဘီး နို့လေဟှိုလည်း ကယ်တန်ပါ!” ဆိုဘီး ကိုယ်တော့်ဟှို ကဲ့ရဲ့ဟှယ်။
40အယ်ဘေမဲ့ တခြား ရာဇဝတ်သားဟှ အယ်သူဟှို ပြစ်တန်ဘီး “နန်ဟှာ အယ်သူမျိုးဘဲ့ ဒန်စီရင်ရှင်းဟှို ခံနေရတောန်မှ ဘုရားသခင်ဟှို ကြော့‑က်ဟှလော။ 41နို့လေဟှ နို့လေလောက်ဟှားဟှူ ပြစ်လေန ထိုက်တန်ဟှူ ဒန်ဟှို ခံရဇာဟှာ တရားပါဟှယ်။ အယ်ဘေမဲ့ အယ်သူဟှာ ဖြားပြစ်ဟှိုမျှ လောက်ဟှားဇာ မှုဟှ” ဆိုဘီး ပြောလေဟှယ်။ 42အယ်ဘီးန သူဟှ “ယေရှု၊ ကိုယ်တော်ရဲ့ နိုင်ငံတော်ဟှို ကြွလာဟှူ ခီမာ ကျွန်တော့်ဟှို အော့‑က်မေ့တော်မူပါ!” ဆိုဘီး ယေရှုဟှို လျှော့‑က်လေဟှယ်။
43ယေရှုဟှာ “နန့်ဟှို ငါ မှန်တိုင်းပြောမယ်၊ အယ်နေ့ဘဲ့ နန်ဟှာ ငါ့နတူးဒူ ပရဒိသုဘောင်မာ ရှိမယ်” ဆိုဘီး မိန့်တော်မူလေဟှယ်။
ယေရှု သေဆုံးဟှားဟှူကြောန်း
(မဿဲ ၂၇.၄၅–၅၆; မာကု ၁၅.၃၃–၄၁; ယောဟန် ၁၉.၂၈–၃၀)
44အယ်ခီဟှာ မွန်းဒဲ့ခီလော့‑က်ဖြစ်ဟှယ်။ နေဒန်ဇာသောင်းနာရီထိ ဒေသတခုလောင်း မှောန်မိုက် ဖြစ်ဟှားဘီး၊ 45နေရောန်ဟှာ ကွယ်ပျော့‑က်ဟှားလေဟှယ်။ အယ်ဘီးဟှာ ဗိမာန်တော်ထဲမာ ခိဆွဲဟှားဟှူ လိုက်ကာဟှာ နှေ့ခြမ်းကွဲဟှားလေဟှယ်။ 46ယေရှုဟှာ “ဖ! ကျွန်တော့်ရဲ့ ဝိညာဉ်ဟှို ဖရဲ့လတ်ထဲမာ အပ်ပါဟှယ်!” ဆိုဘီး သံက္လယ်ဂီးန အော်တော်မူဘီးန သတ်ချောက်တော်မူလေဟှယ်။
47အယ်မျိုးဖြစ်ဇာဟှို ဗြင်လိုက်ဟှူတပ်မှူးဟှ ဘုရားသခင်ဟှို ချီးမွမ်းလိုက်ဘီး “အယ်သူဟှာ မှန်ဘဲ့ ဖြောန့်မတ်ဟှူသူ ဖြစ်လေဟှယ်!” ဆိုဘီး ပြောနေဟှယ်။
48အယ်မူဇာဟှို ကေ့ဇားဟှို့ စုလာဂေ့ဟှူ လူလေဟှာ အယ်မျိုးဖြစ်ဇာဟှို ဗြင်လိုက်ဟှူ ခီမာ ရင်ဖတ်ထုအိုက်ဘီး ပ္လန်ဟှားဂေ့ဟှယ်။ 49#လု ၈.၂,၃ဂါလိလဲနယ်ဟှနေ ကိုယ်တော်နော့‑က်ဟှို လိုက်လာဟှူ မီးမလေရော၊ ယေရှုန ရရာတိုင်း ရင်းနှီးဟှူ လူလေရော ဝီးဟှနေ ရပ်ကေ့ဇားနေဂေ့ဟှယ်။
ယေရှုဟှို သင်္ဂြိုဟ်ဟှူကြောန်း
(မဿဲ ၂၇.၅၇–၆၁; မာကု ၁၅.၄၂–၄၇; ယောဟန် ၁၉.၃၈–၄၂)
50အယ်ခီမာ ဖြောန့်မတ်ဘီ သူတော်ကောန်း ဖြစ်ဟှူ ယောသပ် နာမယ်ရှိဟှူ လွှတ်တော်ဖွဲ့ဝမ် တယော့‑က် ရှိဟှယ်။ 51သူဟှာ တရားလွှတ်တော်ရဲ့ ဆောင်းဖြတ်ချစ်န လောက်ဆောင်ချစ်ဟှို ဘောတူဟှ။ ယောသပ်ဟှာ ယုဒပြည်၊ အရိမသဲဗြို့သား ဖြစ်ဘီး ဘုရားသခင်ရဲ့ နိုင်ငံတော်ဟှို စောန့်မျှော်နေဟှူ သူလည်း ဖြစ်ဟှယ်။ 52သူဟှာ ပိလတ်ရှေ့ဟှို သွားဘီးန ယေရှုရဲ့ လောန်းတော်ဟှို တောန်းလေဟှယ်။ 53အယ်ဘီးန လောန်းတော်ဟှို လတ်ဝါးကပ်တိုင်ဟှနေ ခ္လဘီး ပိဖ္လူန ပတ်လေဟှယ်။ က္လော့‑က်ဆောန်ဟှို ထွမ်းဟှားဘီး တခါလည်း သောင်းသေးဘဲဟှူ သန်းခ္လိုင်းဂူထဲမာ ထားလေဟှယ်။ 54အယ်နေ့ဟှာ ဖိနေ့ ဖြစ်ဘီး ဒန်းနေ့လည်း ရော့‑က်ခါနီးလေဘီ။
55ဂါလိလဲနယ်ဟှနေ ယေရှုနော့‑က်ဟှို လိုက်လာဟှူ မီးမလေဟှာ ယောသပ်နတူးဒူ သွားဘီး သန်းခ္လန်းဂူဟှိုရော၊ ယေရှုရဲ့ လောန်းတော်ဟှိုရော ဖယ်မျိုးထားဟှားဟှယ် ဆိုဇာဟှို ဗြင်ဂေ့ဟှယ်။ 56အယ်ဘီန သူးနို့လေဟှာ အီဟှို ပ္လန်ဟှားဘီး လောန်းတော်တွပ် ဆီမွှီးန နံ့သာပေါန်းလေဟှို ပြင်ဆင်ဂေ့ဟှယ်။
ဒန်းနေ့မာ သူးနို့လေဟှာ ပညတ်တော်တိုင်း နားယူဂေ့ဟှယ်။
Currently Selected:
လုကာ 23: NTDWB24
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
The New Testament in Dawei Language © The Word for the World International and The Dawei Bible Translation Committee, 2024.