ಯೊಹಾನ 12
12
ಬೆಥಾನಿಮಾ ಯೆಸುನಿ ಅಭಿಶೆಕ
1ಪಸ್ಕ ಸನ್ನೆ ಹಜು಼ನ ಛೆ ದಿನ್ನ ರ‍್ಹತಾಮಾಜ ಯೆಸು ಬೆಥಾನಿಯೆ ಗಯೊ. ಲಾಜರ ರ‍್ಹಯಲ ಗಾಮಜ ಬೆಥಾನ್ಯ ವ್ಹೈ. ಯೆಸು ಮರಲವಾಲಾವೊಮಾತೊ ಉಟಾಡಲ ಮನಕ್ಹಜ ಲಾಜರ ವ್ಹೈ. 2ತ್ಯುನೆ ಯೆಸುನೆ ರಾತನು ಅನ್ನ ತಯ್ಯಾರ ಕರ‍್ಯಾ. ಮಾರ್ಥಳ ಅನ್ನ ಘಾಲಿನ ದಿವಾಡಿತಿ. ಯೆಸುನಾ ಕ್ಹಾತೆ ಅನ್ನ ಖಾವಾಲಾವೊಮಾ ಲಾಜರಬಿ ವ್ಹತ್ತೊ. 3ತೆಳಾಮಾ ಮರಿಯಳ ಜಟ ಮಾಂಸಕ್ಹು ಕರಲ ಘನ್ನು ಮೊಗು ರ‍್ಹವಾನು ಬಾಸನು ತೆಲನಿ ಭರಣಿ ಲಿನ ಯೆಸುನಾ ಪಗೊಪರ ರಿಚೈ. ವರಿ ತಿನಾ ಮಾತಾನಾ ಬಾಲೊಕ್ಹು ತಿನಾ ಪಗೊ ನುಚ್ಚಿ. ತೆ ಬಾಸನು ತೆಲನಿ ಚೊ಼ಕಿ ಬಾಸ ಕ್ಹಾರಾ ಘರಮಾ ಫೈಲಿ ಗೈತಿ.
4ಇಸ್ಕರಿಯೊತ ಯುದ ತ್ಯಾ ವ್ಹತ್ತೊ. ತೆ ಯೆಸುನಾ ಶಿಷ್ಯಾವೊಮಾನೊ ಯಕ್ಲೊ ವ್ಹತ್ತೊ. ಅಗೊ, ಯೆಸುನೆ ಮೊಸ ಕರ‍ಲವಾಲೊ ಎಜ಼ ವ್ಹೈ. 5ತೆ"ತೆ ಬಾಸನು ತೆಲನಾ ಕಿಮ್ಮತ ತನ್ನ ಕ್ಹೊ ರುಪ್ಪಾನಾ ಬಿಲ್ಲಾ ಕ್ಹು ಇಕ್ಕಿನ ತೆ ದೊಕ್ಡಾ ಗರಿಬೊನೆ ಕಾ ದಿದಿ ನೈ. ಕೈನ ಪುಚ್ಚೊ. 6ತೆನೈಸೊ ಯುದನೆ ಗರಿಬೊನಾ ಹುತಿ ಕ್ಹರಿಬಿ ಚಿಂತಾ ನ್ಹೊತಿ. ತೆ ಚವಟ್ಟೊ ರ‍್ಹಯಲಕ್ಹು ತಿಮ್ಮ ಕದ್ಯೊ. ಶಿಷ್ಯಾವೊನಿ ಗುಂಪನಾ ಹುತಿ ರ‍್ಹಯಲ ದೊಕಡಾವೊನಿ ಗಲ್ಲೊ ತಿಕನ ವ್ಹತ್ತಿ. ತೆ ತೆಳಾಮಾ-ತೆಳಾಮಾ ತೆ ಪೆಟಗಿಮಾನಾ ದೊಕ್ಡಾ ಕಾಳೆತೊತೊ. 7ಯೆಸು ತಿನೆ"ತಿನೆ ತರಬು ನಕೊ. ಮನೆ ಶವಸಂಸ್ಕಾರಮಾ ಕರಾನಿ ಪದ್ದತ ತೆ ಹಮ್ನಾ ಕರಾಡಿಸ. 8ಗರಿಬೊ ಕೆಳಾಮಾಬಿ ತುಮಾರಾ ಕ್ಹಾತೆ ರ‍್ಹವಸ ತೆನೈಸೊ ಮಿ ತುಮಾರಾ ಕ್ಹಾತೆ ಹರ ಹಮೆಶಾ ನೈ ರ‍್ಹತೊ" ಕೈನ ಉತ್ತರ ದಿದ್ಯೊ.
ಲಾಜರನಾ ವಿರುದ್ದ
9ಯೆಸು ಬೆಥಾನಿಮಾ ಛೆ ಕವಾನಿ ಸುದ್ದಿ ಘನ್ನಾ ಯಹುದ್ಯೊ ಐಕಿನ ತಿನೆ ವರಿ ಮರಿನ ಜಿವ್ತೊ ಥಯಲ ಲಾಜರನೆ ದೆಕು ಕೈನ ತ್ಯಾ ಗಯಾ. 10ತೆನೈಸೊ ಖಾಸ ಯಾಜಕೊ ಲಾಜರನೆಬಿ ಖಲಾಸ ಕರಾನೆ ವಿಚಾರೊ ಕರ‍್ಯಾ. 11ಲಾಜರಕ್ಹು ಘನ್ನಾ ಯಹುದ್ಯೊ ತ್ಯುನಾ ನಾಯಕೊಕ್ಹು ದುರ ಥೈನ ಯೆಸುನಾ ಉಪ್ಪರ ಬರೊಕ್ಹೊ ಮ್ಹೆಲಾಡತಾ. ತಿನಾ ಹುತಿಜ ಯೆಹುದಿಯೊನಾ ನಾಯಕೊ ಲಾಜರನೆಬಿ ಖಲಾಸ ಕರು ಕೈನ ವ್ಹತ್ತಾ.
ಜೆರುಸೆಲಿಮ್ಮಾ ಯೆಸು ಆಯಲ
12ಮರ್ನಾ ದಿನ್ನೆ ಯೆಸು ಯೆರುಸಲೆಮೆ ಆವಾಡ್ಯೊಸ ಕವಾನಿ ಸುದ್ದಿ ತ್ಯಾನಾ ಮನಕ್ಹೊನಾ ಮ್ಹೊಟಾ ಗುಂಪನೆ ಗ್ವತ್ತ ಥಯು. ಪಸ್ಕ ಸನ್ನನಾ ಹುತಿ ಆಯಲ ಘನ್ನಾ ಜ಼ನಾ ತ್ಯಾ ವ್ಹತ್ತಾ. 13ಮನಕ್ಹೊ ಖಜುರನಾ ಗರಿಯೊ ಲಿನ ಯೆಸುನೆ ಮಳಾನೆ ಗಯಾ ವರಿ ಹೊಸನ್ನಾ ಕೈನ ಜೊ಼ರ ವದ್ರಾಡ್ಯಾ. ಧನ್ಯ ವ್ಹೈ ತೆ ಪ್ರಭುನಾ ನಾಮಪರ ಆವಾಡ್ಯೊಸ. ಧನ್ಯ ವ್ಹೈ ಇಸ್ರಾಯಲನೊ ರಾಜಾ಼ನೆ ಕ್ಹುದಾ ಆಶಿರ್ವಾದ ದಿವಾದೆ. 14ಯೆಸುನೆ ತ್ಯಾ ಯಕ್ಕ ಗದಡು ಮಳ್ಯು, ತಿನಾ ಉಪ್ಪರ ಬೈಟಿನ ಚಾಲ್ಯೊ. ಪವಿತ್ರ ಗ್ರಂಥ ಕದಲ ಲಿಂಗತ ಎ ಥಯು; 15"ಸಿಯೊನಾನಾ ಮನಕ್ಹೊ, ಭುಚಕು ನಕೊ! ತುಮಾರೊ ರಾಜೊ಼ ಗದಡಾನಾ ಬಚ್ಚಾನಾಪರ ಬೈಟಿನ ಆವಾಡ್ಯೊಸ. 16ಯೆಸುನಾ ಶಿಷ್ಯಾ ತೆ ಟೈಮಮಾ ಎ ತಿಳ್ದಿಲಿದ್ಯಾ ನೈ. ತೆನೈಸೊ ಯೆಸು ಮಹಿಮಾತೊ ಉಟಿನ ಆತಾಮಾ, ಎ ಸಂಗತಿಯೊ ತಿನಾ ಹುತಿ ಧರ್ಮ ಶಾಸ್ತ್ರಮಾ ಬರ್ದಲ ಛೆ ಕವಾನು ಶಿಷ್ಯಾವೊನೆ ಶೆ ಆಯಿ; ವರಿ ಮನಕ್ಹೊ ತಿನಾ ಕ್ಹಾತೆ ಅಮ್ಮ ಕರ‍್ಯಾತಾ. 17ಯೆಸು ಲಾಜರನೆ ಮರಣಮಾತೊ ತಿನೆ ಜಿವ್ತೊ ಕರಿನ ಉಟಾಡಲ ಪರ ಘನ್ನಾ ಮನಕ್ಹೊ ಯೆಸುನಾ ಕ್ಹಾತೆ ವ್ಹತ್ತಾ. ತ್ಯುನೆ ತಿನಿ ಸಾಕ್ಷಿ ವ್ಹತ್ತಾ.. 18ಯೆಸು ಕರಲ ಎ ಅದ್ಭುತ ಕಾಮ ಐಕಿನ, ಘನ್ನಾ ಮನಕ್ಹೊ ಯೆಸುನೆ ಮಳಾನೆ ಚಾ಼ಲ್ಯಾತಾ. 19ತಿನಾಹುತಿ ಫರಿಸಾಯರೊ ಕದ್ಯಾ "ದೆಕೊ! ಅಪ್ನಿ ವಿಚಾರ ಉಪಯೊಗ ನೈಸೊ ಥೈ. ಮನಕ್ಹೊ ತಿನೆಜ ಹಿಂಬಾಲಕೊ ಥಾವಾಡ್ಯಾಸ" ಕೈನ ಯಕ್ಕನೆ ಯಕ್ಲಾ ಬೊಲಿಲಿದ್ಯಾ.
ಜ಼ಲಮ ವರಿ ಮೌತನಾ ಹುತಿ ಯೆಸುನು ಉಪದೆಶ
20ಫಸ್ಕ ಸನ್ನನೆ ಹುತಿ ಆರಾಧನಾ ಕರಾನೆ ಆಯಲವಾಲಾವೊಮಾ ದಕ್ಹಾ ತ್ಯಾ ಗ್ರಿಕನಾ ಮನಕ್ಹೊಬಿ ವ್ಹತ್ತಾ. 21ತೆ ಗ್ರಿಕ ಮನಕ್ಹೊ ಫಿಲಿಪ್ಪ ಕನ ಗಯಾ. (ಫಿಲಿಪ್ಪ ಗಲಿಲಾಯನೊ ಬೆತ್ಸಾಯಿ ಕವಾನಾ ಗಾಮ ವ್ಹತ್ತೊ) ತ್ಯುನೆ"ಸಾಬ, ಹಮೆ ಯೆಸುನೆ ದೆಕು" ಕೈನ ತಿಕನ ಮಾಂಗಿಲಿದ್ಯಾ. 22ತೆ ಥಯಲ್ಪರ ಫಿಲಿಪ್ಪ ಅಂದ್ರೆಯ ಕನ ಗೈನ ಎ ವಿಚಾರ ಕದ್ಯೊ. ಪಾಚಲ್ತೊ ಅಂದ್ರೆಯ ವರಿ ಫಿಲಿಪ್ಪ ಮಳಿನಜ ಯೆಸು ಕನ ಗೈನ ಎ ವಿಷಯ ಕದ್ಯಾ. 23ಯೆಸು ತ್ಯುನೊನೆ"ಮನಕ್ಹನಾ ದಿಕ್ರಾನೆ ತಿನಿ ಮಹಿಮಾ ವ್ಹಂದಿಲಿವಾನೊ ಟೈಮ ಹಮ್ನಾ ಆಯೊಸ ಕೈನ ಜವಾಬ ದಿದ್ಯೊ. 24ಮಿ ತುಮೊನೆ ಕ್ಹರಿಬಿ ಕೌಸ. ಕಿದಾ ಲಕ್ಕಾ ಘೌನೊ ಬಿಯ್ಯೊ ಜಿಮಿನ ಪರ ಪಡಿನ ಮರತೊ ನೈ ತೆ ಲಕ್ಕಾ ತೆ ಯಕ್ಕಜ಼ ರ‍್ಹವಸ. ವರಿ ತೆ ಕೆಳಾಮಾ ಮರಸ ತೆಳಾಮಾ ತೆ ಮೊಜಾನೆ ಥಾಯೆ ನೈಸೊ ಯಕ್ಲು ಘೌನಾ ಕಾಳೊಥಾವಸ. 25ಕುನ್ನ ತಿನಾ ಸ್ವಂತ ಜ಼ಲಮನೆ ಮಯಾ ಕರಸ ತೆ ತಿನೆ ಜವೈಲಿವಸ. ಕುನ್ನ ತಿನಾ ಜ಼ಲಮನೆ ದ್ವೆಶ ಕರಸ ತೆ ತಿನೆ ಹಮೆಶಾನೊ ಜ಼ಲಮನಾ ಹುತಿ ಕೈದಸ.
26ಕುನ್ನ ಮಾರಿ ಸೆವೆ ಕರು ಕೈನ ಛೆ ತೆ ಮಾರಾ ಪಾಚೊ಼ ಔ. ವರಿ ಮಿ ಕಿಜಾ಼ ರ‍್ಹೌಸ ತ್ಯಾ ಮಾರಾ ಸೆವಕೊಬಿ ರ‍್ಹವಸ ವರಿ ಮಾರೊ ಬಾ ಮಾರಿ ಸೆವಾ ಕುನ್ನ ಕರಸ ತ್ಯುನೊನೆ ಮರ್ಯಾದಿ ದಿವಸ ಕದ್ಯೊ.
ಖುದ್ದನಿ ಮೌತನಾ ಹುತಿ ಯೆಸು ಕದಲ
27ಯೆಸು ವಾತ ಅಗಿ ಬಡೈನ"ಹಮ್ನಾ ಮಾರು ಜ಼ಲಮ ಬುಚ್ಕಾಡ್ಯುಸ. ಮಿ ಸು ಕೌ? ಸು ಅಮ್ಮ ಕೌಸು"ಬಾ, ಎ ಟೈಮ ಮಪರ ಆವಾನೆ ನಕೊ ದ್ಯು? ನ್ಹವೈ! ತೆನೈಸೊ ಇನಾಹುತಿಜ ಮಿ ಆಯೊಸ. ಕಾಕದ್ಯಾಮ ತ್ರಾಸನಾ ಟೈಮ್ಮಾತೊಜ ಜೌ. 28ಬಾ, ತಿನಾ ನಾಮನೆ ಮಹಿಮಾ ಕರ್ಲಿವಾದೆ ತೆಳಾಮಾ ಹಬಾಳಮಾತಿ ಆಕಾಶವಾಣಿ ಥೈ ಮಿ ಇನಿ ಮಹಿಮಾ ಕರ‍್ಯೊಸ ವರಿಬಿ ಮಿ ಇನಿ ಮಹಿಮಾ ಕರುಸ. 29ತ್ಯಾ ಹುಬ್ರಯಲ ಮನಕ್ಹೊನು ಗುಂಪ ಎ ಆವಾಜ ಐಕಿನ "ತೆ ಗುಡುಗ ವ್ಹೈ" ಕದ್ಯಾ. ತೆನೈಸೊ ಬಿಜಾ಼ ಮನಕ್ಹೊ"ಕ್ಹುದಾನೊ ದುತ ಯಕ್ಲೊ ಯೆಸುನಾ ಕ್ಹಾತೆ ಬೊಲ್ಯೊ" ಕದ್ಯಾ. 30ಯೆಸು ಮನಕ್ಹೊನೆ"ತೆ ಆವಾಜ ಆಯಲ ಮಾರಾ ಚೊ಼ಕಾನಾ ಹುತಿ ನ್ಹವೈ ತುಮಾರಾ ಚೊ಼ಕಾನಾ ಹುತಿ ವ್ಹೈ. 31ಎ ದುನಿಯಾನೆ ಫೈಸಲೊ ಥಾವಾನೊ ಟೈಮ ಹಮ್ನಾ ಆಯೊಸ.. ಹಮ್ನಾ ಎ ದುನಿಯಾನೊ ಅದಿಪತಿನೆ ಭಾರಾ ಕಾಡಸ. 32ಮಿ ಜಿಮಿನ ಪರತೊ ಕೆಳಾಮಾ ಉಪ್ಪರ ಜೌ಼ಸ. ತೆಳಾಮಾ ಮಿ ಕ್ಹಾರಾ ಮನಕ್ಹೊನೆ ಮಕನ ಯಳ್ದಿ ಲ್ಯುಸ" ಕೈನ ಕದ್ಯೊ. 33ತೆ ಮರಾನಾ ತರಿಕಾನೆ ಯೆಸು ಎ ವಾತನಾ ಮುಲಕ ದೆಕಾಡ್ಯೊ. 34ಮನಕ್ಹೊ"ಕ್ರಿಸ್ತ ಹರ ಹಮೆಶಾ ಜಿವ್ತೊ ರ‍್ಹವಸ ಕೈನ ಹಮಾರು ಧರಮಶಾಸ್ತ್ರ ಕವಸ. ಇಮ್ಮ ರ‍್ಹತಾಮಾ"ಮನಕ್ಹನೊ ದಿಕ್ರೊ ಉಪ್ಪರ ಜಾ಼ವಸ "ಕೈನ ತು ಕವಾನು ಶಾನೆ? ಎ ಮನಕ್ಹನೊ ದಿಕ್ರೊ ಕುನ್ನ ವ್ಹೈ? ಕೈನ ಪುಚ್ಯಾ. 35ತಿನೆ ಯೆಸು"ಹಜು಼ನ ದಕ್ಹಿಯೆಳ ಉಜಾಲು ತುಮಾರಾ ಕ್ಹಾತೆ ರ‍್ಹವಸ. ತಿನಾಹುತಿ ಉಜಾಲು ತುಮಾರಾ ಕ್ಹಾತೆ ರ‍್ಹತಾಮಾಜ ಚಾ಼ಲೊ. ತೆಳಾಮಾ ಅಂದಾರು ತುಮೊನೆ ಸುತ್ತಿ ಲೆತು ನೈ. ಕಾಕದ್ಯಾಮ ಅಂದಾರಾಮಾ ಚಾಲಾಲಾನೆ ತೆ ಕಿಜಾ಼ ಚಾಲ್ಯೊಸ ಕವಾನು ಗ್ವತ್ತ ನೈ ಥಾತು. 36ತಿನಾಹುತಿ ತುಮೊಕನ ಉಜಾಲು ಹಜು಼ನ ರ‍್ಹತಾಮಾಜ ತಿಪರ ಬರೊಕ್ಹೊ ಮ್ಹೆಲೊ. ತೆಳಾಮಾ ತುಮೆ ಉಜಾಲಾನಾ ಬಚ್ಚಾ ಥಾವೊಶಿ" ಕೈನ ಕದ್ಯೊ. ಎ ಸಂಗತಿಯೊ ಕದಲ ಪರ ಯೆಸು ತ್ಯಾಂತೊ ಗೈನ, ತಿನೆ ಮನಕ್ಹೊ ನೈಸೊ ಹುಡಕಾನಿ ಜ಼ಗಾಯೆ ಗಯೊ.
ಮನಕ್ಹೊನು ಅವಿಶ್ವಾಸ
37ಯೆಸು ಘನ್ನಾ ಮ್ಹೊಟಾ ಕಾಮೊ ಕರ‍್ಯೊ. ಮನಕ್ಹೊ ತೆ ಕಾಮೊ ಕ್ಹಾರಾ ದೆಕ್ಯಾತಬಿ ತಿಪರ ಬರೊಕ್ಹೊ ಮ್ಹೆಲ್ಯಾ ನೈ. 38ಇನಾಹುತಿ, ಪ್ರವಾದಿ ಥಯಲ ಯೆಶಾಯ ಕದಲ ವಾತೊ ಪುರಾ ಥಾವಾನು. ತೆ ಸು ವ್ಹೈ ಕದ್ಯಾಮ "ಪ್ರಭು, ಅಪೆ ಕದಲ ಸಂದೆಶಪರ ಕುನ್ನ ಬರೊಕ್ಹೊ ಕರ‍್ಯುಸ? ಪ್ರಭುನಿ ತಾಕತ ಕಿನೆ ಗ್ವತ್ತ ಥಯು? ಯೆಶಾಯ 53:1 39ತಿನಾಹುತಿಜ ಮನಕ್ಹೊ ಬರೊಕ್ಹೊ ಕರ‍್ಯಾ ನೈ. ಕಾಕದ್ಯಾಮ ಯೆಶಾಯ ವರಿ ಯಕ್ಕ ಜ಼ಗಾ ಅಮ್ಮ ಕದ್ಯೊಸ; 40"ತ್ಯುನಾ ಡೊಳಾವೊಕ್ಹು ನೈ ದಿಕ್ಹೆ ಲಿಂಗತ ತ್ಯುನಾ ಮನಸೊಕ್ಹು ನೈ ತಿಳ್ದಿಲಿದಲ ಲಿಂಗತ ಬದ್ಲಿ ಥೈನ ಅರಾಮ ನೈ ಥಾಯೆ ಲಿಂಗತ ತೆ ತ್ಯುನೊನೆ ಕುಡ್ಡಾ ಕರ‍್ಯೊಸ, ತ್ಯುನಾ ಮನಸೊನೆ ದಗ್ಡಾ ಕರ‍್ಯೊಸ" ಯೆಶಾಯ 6:10 41ಯೆಶಾಯ ಎ ಕದಲ ತೆ ತಿನಿ ಮಹಿಮಾ ದೆಕ್ಯೊತೊ ವರಿ ತಿನಾಹುತಿ ಬೊಲ್ಯೊತೊ. 42ತೆನೈಸೊ ಘನ್ನಾ ಮನಕ್ಹೊ ಯೆಸು ಪರ ಬರೊಕ್ಹೊ ಮ್ಹೆಲ್ಯಾ. ಘನ್ನಾ ಯೆಹುದಿಯೊನಾ ನಾಯಕೊಬಿ ಯೆಸು ಪರ ಬರೊಕ್ಹೊ ಮ್ಹೆಲ್ಯಾ. ತೆನೈಸೊ ತ್ಯುನೆ ಫರಿಸಾಯರೊನೆ ಭುಚಿ಼ಕಿನ ತ್ಯುನೊ ಬರೊಕ್ಹೊ ದೆಕಾಡಿನ ದಿದ್ಯಾ ನೈ. ತ್ಯುನೊನೆ ಫರಿಸಾಯರೊ ಸಭಾಮಂದಿರತಾ ಭಾರಾ ಘಾಲಸ ಕೈನ ಭುಚುಕ ತ್ಯುನೊನೆ ವ್ಹತ್ತು. 43ಎ ಮನಕ್ಹೊ ಕ್ಹುದಾನಿ ಮಹಿಮಾತಿಬಿ ಮನಕ್ಹೊನಿ ಹೊಗಳಿಕೆನಾ ಹುತಿಜ ಘನ್ನಿ ಮಯಾ ವ್ಹತ್ತಿ.
ಯೆಸುನಾ ವಾತಕ್ಹುಜ಼ ಫೈಸಲೊ
44ಪಾಚಲ್ತೊ ಯೆಸು ಜೊ಼ರ ಅಮ್ಮ ಕದ್ಯೊ; "ಕುನ್ನ ಮಪರ ಬರೊಕ್ಹೊ ಕರಸ ತೆ ಕ್ಹಾಲಿ ಮಪರ ಯಕ್ಕಜ಼ ಬರೊಕ್ಹೊ ನೈ ಕರ್ತೊ ಮನೆ ವಳಾಯಲವಾಲಾಪರಬಿ ಬರೊಕ್ಹೊ ಕರಸ. 45ಕುನ್ನ ಮನೆ ದೆಕಸ ತೆ ಮನೆ ವಳಾಯಲವಾಲಾನೆಬಿ ದೆಕಸ. 46ಮಿ ದುನಿಯಾಮಾ ಉಜಾಲು ಥೈನ ಆಯೊ. ಕಾಕದ್ಯಾಮ ಕುನ್ನ ಮಪರ ಬರೊಕ್ಹೊ ಮ್ಹೆಲಸ ತೆ ಅಂದಾರಾಮಾ ರ‍್ಹೌ ನೈ. 47"ಮಿ ಎ ದುನಿಯಾಮಾ ಆಯಲ ಮನಕ್ಹೊನೆ ಫೈಸಲೊ ಕರಾನೆ ನ್ಹವೈ. ಎ ದುನಿಯಾಮಾ ರ‍್ಹವಾನಾ ಮನಕ್ಹೊನೆ ಉದ್ದಾರ ಕರಾನೆ ಆಯೊಸ. ತಿನಾ ಹುತಿ ಮಾರಿ ವಾತೊ ಐಕಿನಬಿ ನೈ ಬರೊಕ್ಹೊ ಕರಾಲಾ ಮನಕ್ಹೊನೆ ಫೈಸಲೊ ಕರಾಲೊ ಮಿ ನ್ಹವೈ. 48ಮಾರಾ ಉಪ್ಪರ ಬರೊಕ್ಹೊ ನೈ ಕರಾಲಾನೆ ವರಿ ಮಿ ಕವಾನು ಇನ್ಕಾರಾಲಾವೊನೆ ಫೈಸಲೊ ಕರಾನು ಮಿ ಕದಲ ವಾತೊಜ ವ್ಹೈ. ಲಾಸ್ಟನಾ ದಿನ್ನೆ ತೆಜ಼ ತಿನೆ ಫೈಸಲೊ ಕರಸ. 49ಎ ಕ್ಹರಿ ವ್ಹೈ ಮಿ ಕದಲ ಕಾಕದ್ಯಾಮ, ಮಾರಾ ಅದಿಕಾರಕ್ಹು ಸುಜ಼ ಕದ್ಯೊ ನತ್ತಿ ಮನೆ ಕುನ್ನ ಮೊಕಲ್ಯುಸ. 50ಬಾನಿ ಆಗನ್ಯಾ ಹಮೆಶಾನಾ ಜ಼ಲಮ ಕನ ಚ಼ಲಾವಸ ಕೈನ ಮನೆ ಗ್ವತ್ತ ಛೆ. ತಿನಾಹುತಿ ಬಾ ಮನೆ ಕದಲ ಸಂಗತಿಯೊಜ ಮಿ ಕೌಸ"
Ekhethiweyo ngoku:
ಯೊಹಾನ 12: NTSrr23
Qaqambisa
Yabelana
Kopa
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
The New Testament in Sikkiligar Language © The Word for the World International and Sikkiligar Bhasha Samiti, Madhya Pradesh, 2023