ယောဟန် နိဒါန်း
နိဒါန်း
စာရွီးဆရာ အကြောင်း
စာရွီးဆရာ နာမည် ယောဟန် ဖြစ်ပါရေ။ သူစာ အသျှင်ယေရှု၏ တပည့်တစ်ဆယ့်နှစ်ယောက်အထဲက တစ်ယောက် ဖြစ်ပါရေ။ သူ့မာ အစ်ကိုသေ ယာကုပ်လည်း အသျှင်ယေရှု၏ တပည့် ဖြစ်ပါရေ။ သူရို့ နှစ်ယောက်ကို အသျှင်ယေရှု မခေါ်ခင်အယင်က သူရို့စာ ပိုက်သမား ဟိလီကတ်ပါရေ။ အသျှင်ယေရှု ဂေါင်းခင်ဘုံတို့ ကြွလားခပြီးရေနောက် သူစာ ဓမ္မသစ်ကျမ်းမာ ဒေ သတင်းကောင်းကို ပယ်ရို့ ပထမ၊ ဒုတိယ၊ တတိယ ယောဟန် ဩဝါဒ စာစောင် အရာ ဗျာဒိတ်ကျမ်းကို ရွီးခလီပါရေ။ သမ္မာကျမ်းကို ကျွမ်းကျင်သူရို့အထဲက တစ်ယောက်တစ်ရီ သူ့ကို အသျှင်ယေရှုမာ ရင်းနီးဆုံး မဟုတ်ကေ အချစ်ဆုံး တပည့် ဟို့ ထင်ကတ်ပါရေ (ယောဟန် ၁၃:၂၃၊ ၁၉:၂၆)။ အရာ တစ်ယောက်တစ်ရီ အသျှင်ယေရှု မထွီးမမာ သား ဟို့ ထင်ကတ်ပါရေ၊ ယေကေလည်း အတိကျ မသိရရေအတွက်န မပြောနိုင်ပါ။
စာရွီးစာ အချိန်န နေရာ
ခရစ်သက္ကရာဇ် ၈၅ နှစ်လှောက်မာ ဒေ သတင်းကောင်းကို ဧဖက်မြို့ အပါးနီးဝန်းကျင်ကနီရို့ ရွီးလီစာ ဖြစ်နိုင်ပါရေ။
စာရွီးဆရာ၏ ရွယ်မှတ်ချက်
အသျှင်ယေရှုစာ ထာဝရဘုရား၏ သားတော် ဖြစ်တေ အရာ သူကိုယ်တိုင် ထာဝရဘုရား ဖြစ်တေဆိုစာကို လောကမာ ဟိသမျ လူရို့ ကျုံရို့ ကယ်တင်ခြင်းကို ရကတ်ပတ်စီအတွက် ယောဟန် ဒေ သတင်းကောင်းကို ရွီးလီစာ ဖြစ်ပါရေ (ယောဟန် ၂၀:၃၁)။
စာအုပ် ခွဲခြားမှု
ဒေ သတင်းကောင်းကို စရေချက်ချင်း ကမ္ဘာဦးကျမ်း အခန့်ကြီး ၁-မာပိုင် အသျှင်ယေရှုကို ဖန်ဆင်းသျှင်အဖြစ် ဖေါ်ပြလီပါရေ။ ဒေ သျှင်ယောဟန်၏ သတင်းကောင်း အခြားသတင်းကောင်း သုံးခုထက် ကောင်းကောင်း ခွဲခြားပါရေ။ အခြားသတင်းကောင်းမာ မဟိစာ အကြောင်း အများကြီး ဒေ သတင်းကောင်းမာ ဟိပါရေ။ ဒေ သတင်းကောင်းမာ အသျှင်ယေရှုစာ ကိုယ့်မာ နာမည်ခုနစ်ခု အသိပီးလီပါရေ၊ ထိုနာမည်တိ ဖြစ်တေကား၊ အသက်ပီးစာ ပေါင်မုန့်၊ လောက၏ အလင်း၊ သိုးဆိတ် ခြံလမ်းခွ၊ အကောင်းမြတ်ဆုံး သိုးဆိတ် ကျောင်းသား၊ ပြန်ရှင်ထမြောင့်ခြင်းန အသက်၊ လမ်း၊ မှန်ကန်ခြင်း အရာ စပျစ်နွယ်အစစ် ဖြစ်ပါရေ။ ထိုနာမည်တိကနီရို့ သူစာ အမှန် ထာဝရဘုရား၏ သားတော် ဖြစ်တေ အရာ သူကိုယ်တိုင် ထာဝရဘုရား ဖြစ်တေဆိုစာကို ဖေါ်ပြလီပါရေ။
အဓိက စကားလုံး
ထာဝရဘုရား၏ သားသမီး ယေရှုကို ကျုံရို့ ဘဝအသစ်ကို ရသူရို့ကို ထာဝရဘုရား၏ သားသမီး ဟို့ ခေါ်ပါရေ။ သူရို့စာ လူအသွီးသားနစပ်ရို့ မွီးဖွားသူရို့ မဟုတ်ပါ အရာ လူအလိုဆန္ဒအတိုင်း မွီးဖွားသူရို့လည်း မဟုတ်ပါ၊ ယေကေလည်း ထာဝရဘုရား၏ တန်ခိုးန မွီးဖွားသူရို့ ဖြစ်ပါရေ (ယောဟန် ၁:၁၃)။
ကားတိုင် ရာဇဝတ်သင့်သူရို့ကို ကားတပ်ရို့ သီဒါဏ်ပီးစာ တိုင်ကို ခေါ်ပါရေ။ အယင်ကခါ ရာဇဝတ်သင့်သူရို့ကို ကားတိုင်မာ တင်ရို့ သံမှိုခပ်ပြီးကေ သီဒါဏ်ပီးလီပါရေ။ အသျှင်ယေရှုကိုလည်း ရာဇဝတ်သင့်သူရို့ကိုပိုင် ကားတိုင်မာ တင်ရို့ သီဒါဏ်ပီးလီပါရေ (မဿဲ ၂၇:၃၄၊ မာကု ၁၅:၂၇၊ လုကာ ၂၃:၃၂-၃၃၊ ၃၉)။
ထာဝရအသက် အသျှင်ယေရှုကို ကျုံရို့ ကယ်တင်ခြင်းကို ရခြင်းစာ ထာဝရအသက် ဖြစ်ပါရေ။ အသျှင်ယေရှု ကိုယ့်ကို ကျုံသူရို့ကို ဒေ ထာဝရအသက်ကို ပီးဖို့ ဂတိခံလီပါရေ (ယောဟန် ၅:၂၄၊ ၆:၄၀၊ ၄၇၊ ၁၀:၂၈)။
ဘာသာရေး တရားဇရပ် ယုဒလူမျိုးရို့မာ သတင်းနိတိုင်ကေ သတင်းဝင်စာ နေရာတစ်ခုကို ခေါ်ပါရေ။ တရားဇရပ်မာ အမျိုးမျိုး အကြောင်းအရာတိကို ယူရို့ တိုင်ဘင်ကတ်ပါရေ အရာ လက်ထပ်မင်္ဂလာပွဲလည်း ချကတ်ပါရေ။ ဒေ တရားဇရပ်စာ ယုဒလူမျိုးရို့ နီထိုင်စာ ရွာတိုင်းမာ ဟိပါရေ။
မန္န တစ်ဇတ်သား စားစရာ နာမည် ဖြစ်ပါရေ။ ဣသရေလလူမျိုးရို့ အီဂျစ်ပြည်က ထွက်ရို့ ခါနန်ပြည်တို့ လားကတ်တေခါ သဲကန္တာရတောပြင်ကနီရို့ လားဖို့ ကျကတ်လီပါရေ။ သဲကန္တာရတောပြင်မာ သူရို့ အစား ငတ်လီကတ်တေခါ ထာဝရဘုရားစာ သူရို့ကို ဂေါင်းခင်ဘုံက မန္နဆိုစာ တစ်ဇတ်သား စားစရာ ချပီးလီပါရေ (ယောဟန် ၆:၃၁)။ မန္နဆိုစာ အဓိပ္ပါယ်ကား “ထိုသျှင့်တိ ဇာလည်း” ဟို့ ပြောပါရေ (ထွက်မြောင့်ရာကျမ်း ၁၆:၁၈-၃၅၊ တောလည်ရာကျမ်း ၁၁:၇-၉၊ ဆာလံကျမ်း ၇၈:၂၄)။
အကြောင်းအရာ အကျဉ်းချုပ်
(က) နိဒါန်း ၁:၁-၁၈
(ခ) ရီနှစ်မင်္ဂလာပီးသူ ယောဟန်န ယေရှုမာ ပထမ တပည့်ရို့ ၁:၁၉-၅၁
(ဂ) ကာနမြို့သျှေမာ ယေရှု ပထမ အံ့ဩဖွယ်အလုပ်န အခြား ဟိသမျ အလုပ် ၂:၁-၁၂:၅၀
(ဃ) ကိုယ့်တပည့်ရို့ကို ယေရှု သွန်သင်ပီးခြင်း ၁၃:၁-၁၇:၂၆
(စ) ယေရှု ဝေဒနာ ခံရို့ သီခြင်း ၁၈:၁-၁၉:၄၂
(ဆ) ယေရှု ပြန်ရှင်ထမြောင့်ပြီးရေနောက် လူရို့ဘားမာ အမြင်ခံခြင်း၂၀:၁-၂၁:၂၅
Ekhethiweyo ngoku:
ယောဟန် နိဒါန်း: RMZ
Qaqambisa
Yabelana
Kopa
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
©2023 Wycliffe Bible Translators, Inc.