Luka 24
24
PA sabata ŵepumula mwa tetulo. 1Sembe pa siku lotatika la pa wiki mmatemwakucha echiza ku msitu, kuvileta vyonunkila vyechiwamya. 2Echifwanga chimwala chakunkuzyiwa chifutavuli pa chikwe. 3Naŵo eloŵamo, ntefwanga chitanda cha Asikuru Yesu. 4Lomba yenzepo penzokanganya pa ichi, ŵonani, analume aŵiri epanama paŵo na minjira yeziyezi: 5naŵo penzoyopa nokonkomala vinso vyaŵo enena naŵo, Ni chinji pamusaka wamoyo muli akufwa? 6Sali pano, lomba wazyuka: kumbukani mwechimnenelani peenze soti mGalilaya 7kuti Mwana wa muntu sati alekosuzuliwa mmanja a anyaluŵifya, nopachikiwa nozyuka soti siku la mazo. 8Nipo ekumbuka malizu ŵake, 9ewera ku msitu, echiyouzya ivi vyonse kuli ŵala kumi na umo na ku ŵonse esalapo. 10Lomba enze Mariya Magadalene, na Yowana, na Mariya anyina a Yakobo: naŵo anakazi ayaŵo pamo naŵo eŵauzya apostolo ivi. 11Naŵo malizu aŵa eŵoneka mmenso ŵaŵo nga ni viwewe; nteŵazomera. 12Sembe Petro eima noutukira ku chikwe; eŵerama nosonjolamo noŵaŵona manyula pa ŵeka; naye echiya kwaŵo kozizwa pa icho chapona.
13Lomba ŵonani, aŵiri a ŵala enzekuya zuŵa lamene lila ku munzi zina lake Emmau, wotalikana na Yerusalemi mastadiya makumi asano na limo. 14Enzopinga zya ivi vyonse vyachitika. 15Nipo yenzepo penzopinga nokonshana Yesu mwine epanamila echiya naŵo pamo. 16Lomba menso ŵaŵo efipilwa angamziŵe. 17Eŵanenera, Malizu aŵa ni ŵosyani amulondezyana poyenda? Naŵo ŵepanama noswema. 18Umo wa aŵo zina lake Kleopa eyasuka enena naye, Kansi mweo mweka munkala pa Yerusalemi ŵosamvwa ivyo vuchitika nsiku zino? 19Enena naŵo, Vintu vyanji? Enena naye, Vya Yesu wa ku Nazarete, enze muŵirizi wokosa mmachitilo na mmalizu pa menso pa Mlungu na pa ŵantu ŵonse: 20vyakuti akuru a ansembe na akuruakuru ŵasu empeleka kusuzuliwa ku imfwa nompachika pa msalaba. 21Sembe seo tenzogomezya kuti ni ula ati anunule Israeli. Inde, na mpuzyo zya ivi vyonse lero ni mazo chitatikile pevichitika ivi. 22Soti anakazi ŵambi a mchikunka chasu atikanganisya pacherera mmatemwakucha ku msitu; 23naŵo paliyofwana chitanda chake ŵaza kuti ŵaŵona soti malaika mmensompenya, amene ati ali moyo yeve. 24Nipo ŵambi a aŵo ŵenze nase pamo ŵaya ku msitu nofwanga nga ni umo mwanenera anakazi: lomba aliyomuŵona yeve. 25Enena naŵo, Mwe ŵopusa nosinilila mitima pamsamvwila vyonse vyechinena aŵirizi! 26Kansi ntekwiwamila Kristo kutamana na ivi noloŵa mu mchinzi wake? 27Naye eyambika pa Musa na pa aŵirizi ŵonse noŵalululila mmalembo ŵonse vintu vya mwine yeka. 28Naŵo epanamila ku munzi kwenzekuya, naye echita ngopitilila. 29Ŵeve emuyumilila kuti, Nkalani nase: pakuti ni chingulo, zuŵa laya. Naye eloŵa kunkala naŵo. 30Lomba yenzepo akankale pamo naŵo ŵalye euula mtanda noushukisya nosuna noŵapako. 31Nipo menso ŵaŵo ŵezuliwa, emziŵa; naye enyeremuka pali ŵeve. 32Naŵo ŵeuzyana, Kansi mitima yasu siyenzovukuma mkati mwasu penzolaŵira nase mnjira, penzotizulila malembo ŵala? 33Pamene apo eima kansita kamene kala, ewerera ku Yerusalemi noŵafwanga kumi na umo ŵala ŵolongana, na aŵo ŵenze naŵo pamo, 34akuti, Asikuru wazyuka chendi, wamuŵonekera Simoni. 35Naŵo ekundulula vya mnjira, na umo mwaziŵikwira kwaŵo mkusuna mtanda.
36Lomba penzolaŵira ivi yeve mwine epanama pakati paŵo noŵanenera, Mtendere kwanu. 37Lomba ŵeyopa ngako na kufwa tutu, elinga kuti eŵona mzimu. 38Enena naŵo, Muzingwiranji? zyaukiranji ntota mmitima yanu? 39Ŵonani manja ŵangu na mendo ŵangu, akuti ni neo namwine; nikumyeni muŵone; pakuti mzimu suna nkanda na vifupa vimuŵona vinili navyo. 40Naye akanene teti eŵalangizya manja ŵake na mendo ŵake. 41Apo penzevomvwila na lomba chikomo chosangalala nozizwa echiti kwaŵo, Muli nako pano kantu kakulya? 42Naŵo empa chimpindi cha saŵi loyocha. 43Naye echiula, echilya pa menso paŵo.
44Lomba enena naŵo, Aŵa ni malizu ŵangu enilaŵira namwe penenze namwe, akuti vyonse vize vyosilizika vilembewa mdango la Musa na mwa aŵirizi na mmasalmo vya neo. 45Pamene apo eŵazulila mitima kuti aŵaziŵe malembo; 46eŵauzya, Kwilembewa teti, kuti Kristo azatamanishiwe nozyuka soti kwa akufwa siku la mazo; 47na kuti kuyaruka mtima nolekelewa kwa viipa kukaŵirizyiwe mzina lake ku mitundu yonse, kutatikira pa Yerusalemi. 48Mwe nimwe ntoni zya ivi. 49Ŵonani, nichipezye chipango cha Ŵata pali mweo: lomba lindani pa mzinda apa, tangamvwalikiwe mpamvu zyofuma kumulu.
50Naye eŵatangulila efuma naŵo pamo mpaka pafupi na Betaniya: nipo etambulula manja noŵashukisya. 51Lomba yenzepo penzoŵashukisya elekana naŵo nouliwa kuya kumulu. 52Naŵo emlambila nowererako ku Yerusalemi notemwa kukuru: 53enze kankalilo mchipupilo kumlumba Mlungu.
Currently Selected:
Luka 24: MA23
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Mapangano Alomba © Bible Society of Zambia, 1923.