Ke kaloku, kwaye kusifa umntu othile, uLazaro waseBhetani, umzi wakulooMariya, noMarta udade wabo. Yaye ke inguloo Mariya, wayithambisayo iNkosi ngamafutha aqholiweyo, wazisulayo iinyawo zayo ngeenwele zakhe, omnakwabo uLazaro wayesifa. Bathumela ngoko oodade babo kuye, besithi, Nkosi, uyabona, lowo umthandayo uyafa. Evile ke uYesu wathi, Esi sifo asiyelele kufeni; singenxa yozuko lukaThixo, ukuze uNyana kaThixo azukiswe ngaso. Ke uYesu wayebathanda ooMarta nomsakwabo, noLazaro. Uthe ngoko akuva ukuba uyafa, wakha okunene wahlala kuloo ndawo abekuyo iintsuku ezimbini. Waza emveni koko wathi kubafundi bakhe, Masibuye siye kwelakwaYuda. Bathi abafundi bakhe kuye, Rabhi, amaYuda ebefuna ngoku ukukuxuluba ngamatye nje; Ùya kubuya uye khona na? Waphendula uYesu wathi, Akalishumi elinamabini na amaxa emini? Ukuba umntu uthi ahambe emini, akakhubeki; ngokuba elubona ukhanyiselo lweli hlabathi. Kodwa ukuba umntu uthi ahambe ebusuku, uyakhubeka; ngokuba ukukhanya kungekho kuye. Wazithetha ezi zinto; aze emveni koko athi kubo, uLazaro, umhlobo wethu, ulele; ndiyaya ukuba ndimvuse ebuthongweni. Bathi ngoko abafundi bakhe, Nkosi, ukuba ulele, wosinda. Ke yena uYesu ubethetha ukufa kwakhe. Bona ke bebeba uthetha ngokulala ubuthongo. Wandula ngoku uYesu wathi kubo ngokungafihilisiyo, uLazaro ufile. Ndiyavuya ke ngenxa yenu, ukuba ndibe ndingekho khona, ukuze nikholwe, masiye kuye noko. Uthe ngoko uTomas, okuthiwa nguDidimo, kubafundi kunye naye, Masiye nathi, ukuze sife naye.
I-App yeBhayibhile
I-App yeBhayibhile Yabantwana
