KaYohane 1 KaYohane 1 – 4
KaYohane 1 – 4
1Zintanda, musani ukukholwa ngoomoya bonke, bacikideni oomoya ukuba ngabakaThixo na; ngokuba baninzi abaprofeti ababuxoki, abaphume bangena ehlabathini. 2Mazini ngale nto uMoya kaThixo: umoya wonke omvumayo uYesu Kristu eze esenyameni, ungokaThixo; 3Nomoya wonke ongamvumiyo uYesu Kristu eze esenyameni, asingokaThixo; lo ngokamchasi-Kristu, enawuvayo ukuba uyeza; nangoku uselukho ehlabathini. 4Nina ningabakaThixo, bantwanana, nibeyisile bona, ngokuba lowo ukuni nguyena mkhulu kunalowo usehlabathini. 5Bona bangabehlabathi, ngenxa yoko bathetha okwehlabathi, ihlabathi liyabeva ke. 6Thina singabakaThixo, lowo umaziyo uThixo uyasiva thina; ongengokaThixo akasiva. Sazi ngale nto ke umoya wayo inyaniso, nomoya walo ulahlekiso. 7Zintanda, masithandane; ngokuba uthando lwaphuma kuThixo; Bonke abanothando bazelwe nguThixo, bayamazi uThixo. 8Lowo ungenaluthando akazanga amazi uThixo; ngokuba uThixo uluthando. 9Kwabonakaliswa ngale nto ukusithanda kukaThixo, ngokuthi uThixo amthume ehlabathini uNyana wakhe, ekuphela kwamzeleyo, ukuze sidle ubomi naye. 10Uthando lulapha, ingekukuba samthandayo uThixo thina, ikukuba wasithandayo yena, wamthuma uNyana wakhe ukuba abe sisicamagushelo sezono zethu. 11Zintanda, ukuba wenjenjalo uThixo ukusithanda, nathi sifanele ukuthandana. 12Akukho namnye wakha wambona uThixo; Ukuba sithi siyathandana, uThixo uhleli kuthi, nothando lwakhe lugqibelele ngaphakathi kwethu. 13Sazi ngale nto ukuba sihleli kuye, naye uhleli kuthi; ngokuba usinike okoMoya wakhe. 14Nathi sibonile, siyangqina, ukuba uYise wamthuma uNyana ukuba nguMsindisi wehlabathi. 15Othe wavuma ukuba uYesu unguye uNyana kaThixo, uThixo uhleli kuye, naye uhleli kuye uThixo. 16Thina siyalwazi, sakholwa nokusithanda kukaThixo. Uthixo Luthando; Lowo uhleli eluthandweni uhleli kuye uThixo, noThixo uhleli kuye. 17Lugqibelele ngale nto uthando olukuthi, ukuze sibe nokungafihlisi ngomhla womgwebo; ngokuba, njengoko anjalo yena, sinjalo nathi kweli hlabathi. 18Akukho loyiko eluthandweni; lusuka uthando olugqibeleleyo luluphose phandle uloyiko; ngokuba uloyiko lunexhala; Lowo ke woyikayo akagqibelele eluthandweni. 19Thina siyamthanda, ngokuba yena wasithanda kuqala. 20Ukuba umntu uthe, Ndiyamthanda uThixo, wamthiya umzalwana wakhe, ulixoki; kuba lowo ungamthandiyo umzalwana wakhe ambonileyo, angathini na ukumthanda uThixo angambonanga? 21Nguwo lo umthetho esinawo uvela kuye: ukuba athi lowo umthandayo uThixo, amthande nomzalwana wakhe.
Currently Selected:
KaYohane 1 KaYohane 1 – 4: CXB24
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Contemporary Xhosa Bible
Copyright © 2024, by City Bible Foundation ®
Used by permission of City Bible Foundation ® All rights reserved worldwide.