Luki 20
20
Mɔ̃ Jeju hananɩ hʋɛ
(Mat 21:23–27; Mar 11:27–33)
1Dɩ wi bɩɛl mɔ̃kɛ Jeju n kɔɔ dɩɩrnɩ tɩbɩla Thãgba fʋɔr cɔ kɔ̃tɩɩna, da‐n mɩɩna wɩ tutugo bʋɔɔ thɩmɩɩ, bonɩ jidaar kɔ̃tɩna na jɔfʋ dɩɩrdara na kɔ̃tɩna pɔr 2a bulee: Sɔ sar ka hʋ caakɛra fɩ hananɩ dɩ fa‐n cʋʋna thɩ̃ɛɛkɛra thenɩ, dɩ amɛ dɔ ʋrɛɛkɛ hana fɩnɩ hʋɛɛkɛra? Dɩ birse wi: 3Ma bule ner mer dakha thɩ̃ bɩɛl. 4Nɩ sɔ mar: Jãa yɔ kpɛɛ Thãgbaa dʋɔ gɩ the yaa, tɩbɩlaa pa gɩ the? 5Dɩ wɩ mar dɩ wa‐n bana kha awɩ hasɔ ayɩ: Ado sɩ tu ayɩ: Thãgbaa dʋɔ gɩ the, a na bule ser dɩ anye dɔ kɩrʋ dɩ sa kɔɔ pɛ ɔɔ thɩmɩɩ haaraˈ. 6Dɩ ado sɩ tu wo ayɩ: Tɩbɩlaa pa gɩ the, tɩbɩla fɛʋ na dʋʋr sɛr na bokana, gɩdonɩ wɩ jɩɛ jɩ dɩ Thãgbaa bobon Jã kɔɔ do. 7Dɩ wɩ birse: Sa jɩ ka gɩ thenaˈ. 8Dɩ Jeju so war: Dɩ a thale gɩ, mɛrɛ dakha ma so nar ka mɩ yɩnɩ hʋɛ dɩ ma‐n cʋʋna ga thɩ̃sɔɔkaˈ.
Sokpaa nãkʋɔr hɩɩndarara
(Mat 21:33–46; Mar 12:1–12)
9Agɩpɩ Jeju gbaar thɩmɩɩr a mɩɩ tɩbɩla na sokpaa ayɩ: Kũu bɩɛl gɩ, a kɔɔ cʋʋ nãkʋɔr a gba nãkʋɔr hɩɩndara a pɛr wa‐n hɩnɛ ɓo, sa jal kpaar paar da‐n pʋɔr.#Eja 5:1 10Dɩ ɔbɔɔkɛ bi khʋ̃ bɔɔ danɩ, a thʋɔn ɔɔ thɔ̃daar bɩɛl a jala nãkʋɔr hɩɩndara wɩ hanaa dɩkhaa nãkʋɔr thɩr bi a pɔna. Sɩ nãkʋɔr hɩɩndara bɩɩrʋʋrɛ sa weguu dɩ kɔna nyɛ̃ biire. 11Dɩ bir thɔ̃ thɔ̃daar kpɩɩ wo, dɩ wɩ bɩɩrʋʋ a pɩɛraa yicuru dɩ kɔna nyɛ̃ biire. 12Dɩ bir thɔ̃ balãtherdaar wo, dɩ wɩ pɩɛraa kaar sa weguu. 13Dɩ nãkʋɔr kɔ̃tɩn so: Anye ma cʋʋ dɩphã ya fɛ? Ɩ̃ bikuunikɛ mɩ‐n nanɩ ma thɔ̃. Agakpaana ɔr wa cʋ. 14Sɩ ɔbɔɔkɛ nãkʋɔr hɩɩndara yɩɩnɩ, wɩ mɩɩrɛ kha awɩ ha ayɩ: Ʋrɛ dʋɔn thɩ̃ hɩn, nɩ dɔ sɩ kʋʋ sɩ thɩ̃ɛ n do asɩda. 15Dɩ wɩ gbaa a dʋna nãkʋɔr khuirə sa kʋʋ. Anye nãkʋɔr kɔ̃tɩn na cʋʋ wɩ dɩphã? 16A na pɔr na kʋʋr nãkʋɔr hɩɩndaraale sa a gba nãkʋɔr a ha tɩɩ kpɩɩsɔ.
Ɔbɔɔkɛ wɩ nɩɛnɩ gele wɩ sor: Ga‐n ha thala koe. 17Sɩ Jeju na‐n hɩɩn wɩ sa so war: Dɩ anye gɩrɛɛkɛ kherenenɩ Thãgbaa sɛbɛra ƴaal gɩ so:
“Bokaarɩkɛ cɔ mɛ kɔɔ bonɩ debire a do go tɩ bokaar?”#Khɩ 118:22
18Dɩ tibil wo tibilikɛ na jenɩ bokaarraakɛ a na khaarɛ, sɩ tibil wo tibilikɛ bokaarɩkɛ na jironi, ga cʋ̃banʋʋnɛ pɛrɛ pɛrɛ. 19Dɩ bonɩ jidaar kɔ̃tɩna na jɔfʋ dɩɩrdara n kɔɔ ƴaalɛ hʋɛ wɩ fʋ Jeju dabɔɔlera, sɩɩ do maar n fʋ wɛr tɩbɩlala. Gɩdonɩ wɩ kɔɔ jɩrɛ dɩ wɛrra Jeju so sokpaale.
Sejaarɩkɛ dɔnɩ Rɔmɛ̃ fãgadaarɩ lãpho thɩmɩɩ
(Mat 22:15–22; Mar 12:13–17)
20Dɩ wɩ mar dɩ wa‐n jʋʋr Jeju, a thʋɔnaa gɩgɩla dɩ wɩ pɛr fɩɩlɛ dɩɩ ho tɩɩ sara wɩ do, sɩ wɩ nʋɔ wɩ fʋ thɩmɩɩrra, wɩ liirnaa wɩ to fãga paar gobanɛr nyɔ̃kɔɔ. 21Dɩ wɩ buleele: Dɩɩrdaar, sɩ jɩrɛ fɩ‐n mɩɩrɛ dɩ fa‐n dɩɩrna tɩbɩla gɩrɛ dɔnɩ sobɔr, dɩ fa‐n hɩɩn dakha tɩbɩla dɩɩdɩaˈ sɩ dɩ fa‐n dɩɩr tɩbɩla Thãgbaa hʋ na sobɔr. 22Gɩ teere kha dɩ sa lɩmɩ Sejaar lãpho yaa, ga tee kha ga? 23Sɩ Jeju jɩrɛ awɩ fɩɩl, a birse wi: Nɩ nɛna mɩ war bire ɩ̃ hɩɩn. 24Amɛ ha ʋrɛ fotoraakɛ? Dɩ amɛɛ khere ha gɩrɛ? Dɩ wɩ birsee: Sejaar gɩ. 25Dɩ Jeju so war: Dɩ gɛr gɩ nɩ ˈlaanɛ Sejaarra gɩrɛ dɔnɩ Sejaarɩda, a ˈlaanɛ Thãgbara gɩrɛ dɔnɩ Thãgbaada. 26Dɩ wa kɔɔ puno a na fʋʋrakɛ ɔɔ thɩmɩɩ bɩɛlla tɩbɩlaa ƴɛ thɩ̃thɩɩnaˈ, sɩ nʋɔ ka kɔɔ kpaa wɛr mɔ̃ a birse wini dɩ wɩ pɩr dɩphã pɔbɩ.
Khi ɩɩr thɩmɩɩr
(Mat 22:23–33; Mar 12:18–27)
27Dɩ ɩkhaa Sadʋsɛ̃ɛsɔɔkɛ n yɛnɩ khi ɩɩrɛ na halaˈ pʋɔraarɛ, a bulee thakɛ aa:#Th t t 23:8 28Dɩɩrdaar, hɩnɛ gɩrɛ Mʋɩjɩ kɔɔ khere sarnɩ: “Ado tibil hana õkuun dɩ khi sa faa khɛr sɩ bɩsaan na halaˈ, ɔɔ õkuun n gba hɛ a kɔna bɩsana wɩ do ɔɔ õkuuni məl.”#Dət 25:5 29Dɩ õkona makonyɔ wɛ a kɔɔ hale, dɩ cacadaar kɔɔ her khɛr aa hana bɩsana ga, sa khi. 30Dɩ balanyɔdaar na balãtherdaar gbaar khikhɛrʋʋlera. 31Mɛna gɩ hana wɛr makonyɔɔle fɛʋ kɔɔ khireni, sɩ wa hana bɩsaanaˈ. 32Agɩpɩ khɛrɩlera dakha khire. 33Dɩ ado khe na ɩɩrɛ na the khirera, ʋmɔ̃ wɛrra na hɩna khɛrɩle? Gɩdonɩ wɛr makonyɔra fɛʋʋ khɛr a kɔɔ do. 34Dɩ Jeju birse wi: Nɛnɛ̃ bɔɔkɛɛ bɩsãsɔ n her khɛra, dɩ khɛra n her kona. 35Sɩ wɩrɛ wa yɩnɩ, wɛr teana a na ˈlɛ awɩda bɔɔraalera na ɩnanɩ a na ɩɩrna dakha na the khirera, wɛr wa he khɛra ga, dɩ khɛra na he kona ga. 36Dɩ wa puno a na khi dakha bã, gɩdonɩ wa hʋrɛ Thãgbaa thɔ̃thɔ̃daar thusɔ a na do Thãgbaa bɩsãsɔ, gɩdonɩ wɩ ɩɩrɛ a the khirera. 37Dɩ ado khee ɩɩr gɩ, gɛr dɔ gɩrɛ Mʋɩjɩ kɔɔ cʋʋnɩ dɩ sɩ jɩ thɩr bu thɩmɩɩrra, ɔbɔɔkɛ a wenɩ Kɔ̃tɩn, “Abɩrahamɩ Thãgba, na Ɩjakɩɩ Thãgba, na Jakɔbɩɩ Thãgba.”#Thɩɩ 3:6 38Sɩ Thãgba na do khee Thãgba ga, sɩ wɩrɛ hananɩ yiree Thãgba a do, gɩdonɩ ado ɔrra gɩ, tɩbɩla fɛʋ hananɛ yire. 39Dɩ ɩkhaa jɔfʋ dɩɩrdara birsee: Dɩɩrdaar, sobɔr fɩ mɩɩ. 40Dɩ wa ˈla na bulee thɩ̃ bɩɛllakɛ bã.
Mesɩ na Davɩdɩ
(Mat 22:41–46; Mar 12:35–37)
41Dɩ Jeju bule wi: Mɔ̃ gɩ fʋ sɩ tɩbɩla na‐n so aa: Davɩdɩɩ Bikuun Kirisiti do? 42Davɩdɩɩ thɛthɛ kɔɔ sor Khɩkhɩɩ nɩ sɛbɛra ayɩ:
“Thãgba sor ɩ̃ Kɔ̃tɩna ayɩ:
Tɔɔ ɩ̃ nyɔ̃bɔra,#Khɩ 110:1
43phaphapha ɩ̃ cʋʋ afɩ lãlaardara wɩ do afɩ nɛ jəəda.” 44Dɩ a Davɩdɩ n wɩɩrɛ Kɔ̃tɩn thale, mɔ̃ a na fʋ sɩ na do ɔɔ bikuun?
Jɔfʋ dɩɩrdarasɔɔkɛ Jeju kɔɔ mɩɩrɔnɩ thɩmɩɩr
(Mat 23:1–36; Mar 12:38–40)
45Mɔna tɩbɩla fɛʋ n kɔɔ pɩɛnɩ nũu, a sor ɔɔ kpãkpãadarara ayɩ: 46Na‐n jɩɛ dʋ bʋrɛ jɔfʋ dɩɩrdarasɔraakɛ n ƴaalɛnɩ ɩnɩ‐n tɔ kẽkẽ gbana a na kpaarna ƴatɔɔ, kɛ n naannɩ tɩbɩlasɔ na‐n fʋɔrɛnɩ kɔ̃tɩ̃ fʋɔrʋʋ, kɛ n phireni ƴɛ kʋʋl too paar Juifisɔɔ Thãgba fʋɔr cʋɔrɔ, na ƴɛ kʋʋl too paar dɩko kho paar, 47kɛ n phʋʋnɛnɩ khikhɛra, sɩɩ do fɩɩlɛ wɩ‐n bɩɛlna Thãgba dɩ wa‐n pʋɔrna wa‐n yɛ nɩ. Wele so kɔ̃tɩ̃ɩ na heen wer na khɩɩr na ka.
Currently Selected:
Luki 20: LOBIRI
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Bible Society of Burkino Faso 1985.