Luki 2
2
Jejuu kɔ̃
(Mat 1:18–25)
1Ɔbɔɔlera, Sejaar Ogusiti fãgadaar kɔ̃tɩ̃ɩ kɔɔ ˈlaa jɔfʋ ayɩ, wɩ thera tɩbɩla fɛʋ. 2Dɩ caca therreele kɔɔ har ɔbɔɔkɛ Kiriniyusi donɩ gobanɛr Siri dɩɩra. 3Dɩ tɩbɩla fɛʋ bɩɛlbɩɛl kɔɔ jaal wɩ ther wɩ awɩ dɩraakɛ wɩ thenɩ. 4Dɩ Jojɛfɩ dakha kɛ thɛnɩ Galile Najarɛtɩ dɩɩra, a jaal Jude Davɩdɩɩ dɩraakɛ wɩ‐n wenɩ Bɛtɩlɛhɛm, gɩdonɩ Davɩdɩɩ tibil gɩ a do ɔɔ ca. 5A jaal dakha na Marɩ, ɔɔ wɛdaarɩkɛ hananɩ pɛmɛr wɩ ther wɩ. 6Dɩ mɔna wɩ hanɩle, Marɩɩ bi kɔ̃ bɔ daan, 7dɩ kɔ̃ ɔɔ biir bi dɩ do kũubir, dɩ parʋʋ bibɔrɔ kɩ̃kɩɩn a pɛ bekolela, gɩdonɩ phɩ̃ paar na hale kãkɛ kpakpala n cɔnɩ dɩ wa ha waˈ.
Thãgbaa thɔ̃thɔ̃daar thuukɛ thɛnɩ bana khedarara
8Dɩ khuirəəle bana khedara hale hʋɔnɔ, dɩ wa‐n bɛr awɩ banasɔ dɩtɩnɔ. 9Dɩ le Kɔ̃tɩnɩ thɔ̃thɔ̃daar thu bɩɛl the war, dɩ Kɔ̃tɩnɩ carbara hɩrɛrɛ a dii war. Dɩ maar fʋlɛ wɩ jɔɔ ka. 10Dɩ Thãgbaa thɔ̃thɔ̃daar thuulera so warɛ ayɩ: Na‐n do maar n fʋ naˈ, gɩdonɩ tutugo bʋɔ mɩ‐n mɩɩ nɩ kɛ na dɔnɩ da kɔ̃tɩ̃ɩ Ɩjɩrayɛldarara fɛʋ. 11Nĩkɛ nɩ ˈlɛr Taadaar bɩɛlɩkɛ dʋɔnnɩ Kirisiti, Kɔ̃tɩn gɩ, kɛ wɩ kɔnɩ Davɩdɩɩ dɩra. 12Dɩ gɩrɛɛkɛ na dɔ narnɩ jɩɩn dʋɔn: Na yɩrɛ bibɔrɔ, dɩ wa parʋʋ bibɔrɔ kɩ̃kɩɩn na pɛ bekolela. 13Le dapaara ƴũ ko kena tə̃tə̃tə̃ the Thãgbaa dʋɔ a caan Thãgbaa thɔ̃thɔ̃daar thuule, dɩ wa‐n khɩɩ kha Thãgba awɩ ha, dɩ wa‐n sona aa:
14Thãgbaa i n dʋbarɔ le thãgbara ƴũ pər,
sɩ ha ɩɩ n dɛɛnɛ tɩbɩlala thɩɩra, kɛ n lonaanɩ haar.
15Dɩ ɔbɔɔkɛ Thãgbaa thɔ̃thɔ̃daar thusɔɔle faa wɩnɩ, sɩ wa‐n bir Thãgbaa dʋɔ, bana khedaraale mɩɩrɛ kha bɩɛlbɩɛl ayɩ: Dɩ a mɛ̃ gɩ, nɩ ɩna sɩ jal phaphapha sɩ dã Bɛtɩlɛhɛm sɩ hɩɩn gɩrɛ dananɩ le, kɛ dɔnɩ gɩrɛra Kɔ̃tɩn cʋʋ sɩnɩ dɩ sɩ jɩ. 16Dɩ wɩ jaal khə̃khə̃ a ƴaal Marɩ, na Jojɛfɩ, na bibɔrɔɔle wɩ pɛnɩ bekolela a yɩ wɩ. 17Ɔbɔɔkɛ wɩ yɩɩnɩ pɩ, wɩ gbaar thɩmɩa fɛʋʋkɛ wɩ nɩɛnɩ bɩsã buudaraale a mɩɩ. 18Dɩ wɩrɛ fɛʋʋkɛ kɔɔ nɩɛnɛnɩ, nʋɔ kpaa wɛr bana khedaraa thɩmɩɩraale. 19Sɩ Marɩ fʋrɛ ga thɩ̃sɔɔle fɛʋ ɔɔ bɩnɔ da‐n kpɩɛrna gɩ. 20Dɩ bana khedara kɛrrɛ a dʋbɩ Thãgbaa i dɩ wa‐n birnə, dɩ wa‐n khɩɩnaa dakha gɩrɛraakɛ fɛʋ wɩ nɩɛnɩ a torna yire, gɩdonɩ gɩ har mɔna Thãgbaa thɔ̃thɔ̃daar thuulera kɔɔ so warnɩ.
Mɔ̃ wɩ gbanɩ Jeju Thãgba fʋɔr cɔ kɔ̃tɩɩna a ha Thãgba
21A wire makõther dã, wɩ kurre biile khʋ̃ʋ sɩ wa‐n wɩɩ Jeju, ireekɛ Thãgbaa thɔ̃thɔ̃daar thu kɔɔ ˈlaanɩ sɩ ɔɔ nɩ na hana ɔɔ pɛmɛ paˈ.#Lev 12:3; Lu 1:31 22Dɩ ɔbɔɔkɛ Jojɛfɩ na Marɩɩ phʋɔl wi danɩ, mɔ̃kɛ Mʋɩjɩɩ jɔfʋ hanɩ, wɩ gbaar Jeju a jalna Jerujalɛm wɩ ha Kɔ̃tɩn . . #Lev 12:6–8 23Gɩdonɩ mɛ̃ gɩ khere Kɔ̃tɩnɩ jɔfʋra ayɩ: “Caca kuuminə fɛʋʋkɛ wa kɔnɩ, Kɔ̃tɩnɩda wa do.”#Thɩɩ 13:2, 12 24Dɩ Jojɛfɩ na Marɩ ˈlaarɛ bonɩ jirrə, mɔ̃kɛ gɩ kherenɩ Kɔ̃tɩnɩ jɔfʋra, “kʋlãpuo yenyɔ agɩbo puusɛ̃ ɓɔla yenyɔ.” 25Dɩ hɩnɛ, kũu bɩɛl gɩ, a hale Jerujalɛm dɩ wa‐n wɩɩ Sɩmɛ̃ʋ. Kuunile dor tibil sarʋ, da‐n cʋna Thãgba. A‐n pɩɛrɛ dakha ʋrɛɛkɛ Ɩjɩrayɛl na ˈlɛrɔnɩ taarɛ, dɩ Thu Phuu haaraa. 26Thu Phuu kɔɔ khɩɩraarɛ gɩrɛ thɛnɩ Thãgbara, dɩ a na yɩrɛ Kɔ̃tɩnɩ Kirisiti na yire sɩ na khi. 27Dɩ Thu Phuurə thɔɔrɛ Sɩmɛ̃ʋ a jalna Thãgba fʋɔr cɔ kɔ̃tɩɩna. Ɔbɔɔkɛ Jeju bɩsã buulee thɩ na ɔɔ nɩ pɔnaanɩ, wɩ cʋʋnaa mɔ̃kɛ jɔfʋ sonɩ, 28Sɩmɛ̃ʋ teguure a pɛ ɔɔ nyɔ̃kɔɔ sa khɩɩ Thãgba ayɩ:
29Nɛnɛ̃kɛ Kɔ̃tɩn, sɛ afɩ thɔ̃daarra
a kɔ̃ na ha ɩɩ mɔna fɩ kɔɔ sonɩ;
30gɩdonɩ mɩ torre afɩ taara yire,
31kɛ fɩ gbɛbɩnɩ tɩbɩla fɛʋʋ ƴɛra.
32Taarɛɛle na dor dahɩrɛ a na hɩrɛ tibil caar fɛʋ,
sɩ gɩ do i dʋbɩrɛ Ɩjɩrayɛl afɩ toora.#Eja 42:6; 49:6; 52:10
33Nʋɔ kɔɔ kpaarɛ Jojɛfɩ na Marɩ gɩrɛraakɛ n mɩanɩ Jejura. 34Dɩ Sɩmɛ̃ʋ bɩɛlɛ Thãgba a pɛ war, sa so Jejuu nɩ Marɩra ayɩ: Hɩnɛ, Thãgba cʋʋrɛ bɩsaanɩkɛ a dɔ ji paar na pal ɩɩr paar Ɩjɩrayɛldara jɔjʋɔra, na jɩɩnɩkɛ tɩbɩla na bananɩ; 35dɩ mɛ̃ tibil jɔjʋɔɔ kpɩɛr gbulsɔ na yɩr, sɩ fe wer, khalgbãa na gɔ fɛr haarra.
36Thãgbaa bobon khɛ bɩɛl gɩ, a kɔɔ hale dakha dɩ wa‐n wɩɩ An Panʋɛlɩ bikhɛr gɩ, a do Ajɛɛrɩ ca. A thʋnɛ tɩ̃ ka. A fʋna ɔɔ biir bɔɔ yɛna makonyɔ a kɔɔ cʋʋ na ɔɔ ko, 37dɩ ɔɔ ko khi, sɩ dɩ too do khikhɛrʋ. Yɛna kpalanã yenã a hana, dɩ aa‐n ˈlee Thãgba fʋɔr cɔ kɔ̃tɩɩna ga; Thãgbaa thɔ̃ a‐n do dɩtɩnɔ na dɩwɩlʋ, dɩ li nʋɔ da‐n bɩɛlna Thãgba. 38Dɩ bɔ bɩɛllaalera, ɔr dakha pɔr da‐n khɩɩ Thãgba a mɩɩna Jejuuda tɩbɩla fɛʋraakɛ n pɩɛrɛnɩ ʋrɛɛkɛ na birseneni Jerujalɛmdara.
Mɔ̃ Marɩ na Jojɛfɩ kɛrnɩ bir Najarɛtɩ
39Ɔbɔɔkɛ Jojɛfɩ na Marɩ cʋʋnɩ thɩ̃ɛsɔ fɛʋ dɩɩ pɩ, mɔ̃kɛ Kɔ̃tɩnɩ jɔfʋ sonɩ, wɩ kɛrrɛ bir kɔ̃ Galile Najarɛtɩ awɩ dɩra.#Mat 2:23 40Dɩ bɩsaan na‐n khɔ̃ da‐n ˈlɛ fãga, dɩ ɔɔ kpɛsɛ dakha na‐n jɔr da‐n ˈlɛna dakha Thãgbaa bɔna.
Mɔ̃ Jeju lonɩ Thãgba fʋɔr cɔ kɔ̃tɩɩna
41Bɔɔ fɛʋ ɔɔ thɩ na ɔɔ nɩ n jaal Jerujalɛm yɛna yɛna fɛtɩɩkɛ wɩ‐n wenɩ Pakɩ.#Thɩɩ 12:1–27; Dət 16:1–8 42Dɩ ɔbɔɔkɛ a hananɩ yɛna yʋɔr yenyɔ, wɩ jaal mɔ̃kɛ wɩ yɩnɩ wa‐n cʋɛ fɛtɩra. 43Dɩ ɔbɔɔkɛ fɛtɩ pɩnɩ dɩ wɩ bir dɩ wa‐n kɔ̃, Jeju bɩsaanɩlera toore le Jerujalɛm, sɩ ɔɔ thɩ na ɔɔ nɩ na kɔɔ jaˈ. 44Dɩ wɩ‐n kpɩɛrɛ Jeju hale na awɩ kpakpaarsɔ, a ɩɩr waa dɩɩ na tɩ̃ɩ, sɩ wa‐n yaalʋʋ awɩ too na awɩ jɩ jɩnaa pa. 45Mɔ̃kɛ wa‐n yɩɩnaˈ, wɩ kɛrrɛ bir Jerujalɛm dɩ wa‐n jɩɩ ƴaalʋʋ. 46A wire yẽther ka pɩ, wɩ yɩɩrɛ Thãgba fʋɔr cɔ kɔ̃tɩɩna dɩ too dɩɩrdaraa thɩ̃thɩɩn, da‐n pɛ wɩ nũu da‐n bulena wɩ thɩ̃ɛ. 47Dɩ wɩrɛ fɛʋʋkɛ n kɔɔ pɩɛnɩ nũu, nʋɔ kpaa wɛr ɔɔ kpɛsɛra na mɔ̃ a‐n birse wini. 48A ɔɔ thɩ na ɔɔ nɩ yɩɩ, gɩ kpaa wɛr nʋɔ, dɩ ɔɔ nɩ bulee: Ɩ̃ bi ya, mɔ̃gɩdo dɩ fɩ cʋʋ sɩ thakɛ? Hɩnɛ, afɩ thɩ na mɛrɛ, sɩ kɔɔ ƴaal fɛr waa na dɛr. 49Dɩ bule wi: Mɔ̃gɩdo dɩ na‐n kɔɔ ƴaal mɩ? Na jɩ dɩ gɩ teenanɛ dɩ ma cʋʋ ɩ̃ Thɩɩ thɔ̃aa? 50Sɩ wa jɩ thɩmɩɩrɩle a so warnɩ kɩrʋaˈ. 51Agɩpɩ Jeju bire kɔ̃ nakha wɛr Najarɛtɩ dɩɩra da‐n nɩ wɩ nũu. Dɩ ɔɔ nɩ fʋrɛ thɩmɩaale fɛʋ ɔɔ bɩnɔ. 52Sɩ Jeju n khʋɔn dɩ ɔɔ kpɛsɛ na‐n pɛr, da‐n da Thãgba haar na tɩbɩla.#1 Sam 2:26; Sokp 3:4
Currently Selected:
Luki 2: LOBIRI
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Bible Society of Burkino Faso 1985.