Jã 1
1
Jeju dʋɔn Thɩmɩɩrɩkɛ gɩ‐n mɩɩnɩ kɩɛr
1Caca fʋ paar ʋrɛ wɩ‐n wenɩ Thɩmɩɩr kɔɔ mãa hale, dɩ Thɩmɩɩrɩlera kɔɔ har kha na Thãgba, dɩ Thɩmɩɩrɩlera Thãgba a do. 2Caca fʋ paar Thãgbara a hana kha. 3Dɩ ɔr kɔɔ cʋɛ thɩ̃ɛ fɛʋ, thɩ̃ɛɛkɛ cʋɛnɩ thɩ̃ bɩɛllakɛ na hale a cʋʋ saagado ɔr gaaga. 4Ɔrra yire n the, dɩ yireelera dɔ dahɩrɛ tɩbɩlala. 5Dɩ dahɩrɛɛlera n caranɛ dabirəra sɩ dabirə na‐n teguaˈ.
6Tibil bɩɛl kɔɔ hale Thãgba thɔnɩ, ɔɔ i n dʋɔn Jã.#Mat 3:1; Mar 1:4; Lu 3:1–2 7A ɩnɛ a do sobɔ so jɩdaar da‐n mɩɩ sobɔ so jɩɩrɩkɛ dɔnɩ dahɩrɛɛda, gɩ do nɔɔ tɩbɩla fɛʋ n pɛr haar. 8Ga do ɔr kɔɔ dɔ dahɩraˈ, sɩ a ɩnɛ a mɩɩ sobɔ so jɩɩrɩkɛ dɔnɩ dahɩrɛɛda.
9Dahɩrɛɛle dɔ dahɩrɛ bɔɔkɛ kɔɔ ɩnanɩ kɛ thɩɩra da‐n hɩrɛ tɩbɩla fɛʋ. 10Dɩ a kɔɔ har kɛ thɩɩra dɩ ɔrra kɔɔ cʋɛ thɩɩ, sɩ tɩbɩla thɩɩra na kɔɔ jɩaˈ. 11Ɔɔ too pa a kɔɔ ɩ̃, sɩ ɔɔ toora na kɔɔ teguaˈ. 12Sɩ wɩrɛ fɛʋʋkɛ tuoneeni a pɛrna ɔɔ i haar, a‐n ha wɛr punone dɩ wɩ debina a do Thãgbaa bɩsãsɔɔkɛ a‐n kɔnɩ, 13dɩ ga‐n the thɩ kuunna ga, dɩ tibili ƴaalla ga, dɩ tibili kpɩɛr tirə ga, sɩɩ do Thãgba kɔna wɩ.
14Dɩ ʋrɛra wɩ‐n wenɩ Thɩmɩɩr kɔɔ debire a do tibil a toona sɩ. Dɩ sɩ kɔɔ yɩrɛ ɔɔ i dʋbɩ dɩɩ do i dʋbɩrɛ gɩɩkɛ Bikũu bɩɛl ˈlẽˈlẽˈlẽekɛ thɛnɩ Thɩrɛɛ pa ˈlini. Sobɔdaar bire a do, dɩ bɔ jɩɩr hii bɩnɔ.
Jã Batɩsɩtɩɩ caca sobɔ so jɩ thɩmɩɩ
15Jã kɔɔ mɩɩrɛ sobɔ so jɩɩr a pɩɛraa a hulena thakɛ ayɩ, ɔr dɔ ʋrɛɛkɛra mɩ kɔɔ sonɩ ayɩ, ʋrɛɛkɛ na kpaan marnɩ, ɔr dɔ ɩ̃ ƴɛ kʋʋldaar, gɩdonɩ ɔr kɔɔ haanle sɩ dɩ ɩ̃ pɩɩrɔ. 16Dɩ ɔɔ hirəra sɛrɛ fɛʋ kɔɔ ˈlɛ bɔ jɩɩrɩkɛ na dɔnɩ dapɩnanaˈ. 17Gɩdonɩ Mʋɩjɩ Thãgba ha jɔfʋ dɩ ˈlaa, sɩ sobɔr na bɔ jɩɩr Jeju Kirisitira gɩ‐n the. 18Tibil bɩɛllakɛ na kɔɔ yɩ Thãgba kpɩɩrakaˈ, sɩ Bikũu bɩɛl ˈlẽˈlẽˈlẽekɛ hanɩ Thɩrɛɛ pa, ɔr cʋɛ dɩ wɩ jɩɩ.
Jã Batɩsɩtɩɩ Thãgba thɩmɩɩ mɩɩ
(Mat 3:1–12; Mar 1:1–8; Lu 3:1–18)
19Nɩ yɛ Jãa sobɔ so jɩ thɩmɩɩ, ɔbɔɔkɛ Juifisɔɔkɛ bonɩ jidara na wɩrɛ dɔnɩ Levɩɩ caakɛ hanɩ Jerujalɛm thɔ̃ wɩnɩ ɔɔ pa, wɩ bulenee ayɛ: Fɛrɛ, amɛ fɩ dorakɛ tɔr? 20Dɩ a ture aa bana ga ayɩ: Ma do Kirisitaˈ. 21Dɩ wɩ buleele: Dɩ amɛ ha fɩ? Fɛr dɔ Elɩ Thãgbaa bobon ya? Dɩ so: Kpei ma do Elɩaˈ. Dɩ fɛr ba dɔ Thãgbaa bobonna yaa? Dɩ birse wi: Kpei.#Dət 18:15, 18; Mal 4:5 22Dɩ wɩ bulee: Dɩ amɛ ha fɩ? Gɩdonɩ dɔ sɩ bir sɩ so wɛkɛra thɔna sɩnɩ thɩ̃ɛ. Dɩ ado fɛrra gɩ, amɛ fer yɩ fɩ dor gɩrɛ? 23Dɩ so ayɩ:
“Mɛr dɔ ʋrɛ dɔnɩ nʋɔɔkɛ
n huleneni bəənnə ayɩ:
Na‐n wɛbɩrɛ Kɔ̃tɩnɩ hʋ gɩ pɔlɔ”,
mɔ̃kɛ Ejaɩ Thãgbaa bobon sonɩ.#Eja 40:3
24Wɩrɛɛkɛra wɩ kɔɔ thɔnɩ, jɔfʋ bʋ dʋdarasɔ wɩ do. 25Dɩ wɩ buleele: Dɩ mɔ̃gɩdo dɩ fa‐n kpɛɛ tɩbɩla nyʋɔnɔ sɩ ga do Kirisiti fɩ doaˈ, fa do Elɩ wo, dɩ Thãgbaa bobonɩlera ga? 26Dɩ Jã birse wi: Mɛrɛ, nyʋɔnɔ mɩ‐n kpɛɛ tɩbɩla, sɩ anɩ thɩ̃thɩɩn bɩɛl hale na jɩnaˈ, 27kɛ na kpaannɩ ɩ̃ khiro, dɩ ma hɩɩrʋʋrakɛ a na thʋbʋʋ nɛfaa pɛ̃aˈ. 28Thɩ̃ɛsɔɔkɛ Betanɩ gɩ kɔɔ cʋʋ Jʋrdɛ̃ mɩɩr iiro ka Jana n kpɛɛnɩ tɩbɩla nyʋɔnɔ.
29A dɩɩ wɩl, Jã yɩrɛ Jeju da‐n pʋɔraa dɩ so ayɩ: Nɩ yɩɛ, ɔr dɔ Thãgbaa Bana biikɛ n hɛlanɩ tɩbɩla fɛʋ thɩɩraa sopugo. 30Ɔr dɔ ʋrɛra mɩ kɔɔ sonɩ: Kũu bɩɛl hale a na kpa mar a do ɩ̃ ƴɛ kʋʋldaar, gɩdonɩ ɔr kɔɔ haanle sɩ dɩ ɩ̃ pɩɩrɔ. 31Ma kɔɔ jɩaˈ, sɩ mɔ̃ a na fʋnɩ sa a yɩr Ɩjɩrayɛldarara dɔ nɔɔ dɩ ɩ̃ ɩ̃ ma‐n kpɛɛ tɩbɩla nyʋɔnɔ. 32Dɩ Jã mɩɩrɛ sobɔ so jɩ thɩmɩɩrɩkɛ ayɩ: Mɩ yɩrɛ Thu Phuu dɩ the thãgbara ƴũ, a gbũ a ho puusɩ̃ɛ, a lʋʋnaa. 33Ma kɔɔ jɩaˈ, sɩ Thãgbaakɛ thɔna mɩnɩ ma‐n kpɛa tɩbɩla nyʋɔnɔ, ɔr sɔ mar ayɩ, ʋrɛɛkɛ ma yɩnɩ Thu Phuu dɩ na gbũ na lʋʋnaa, ɔr dɔ ʋrɛ na‐n kpɛanɩ tɩbɩla Thu Phuurə. 34Mɩ yɩ gɛr dɩ ma‐n mɩɩrɔ sobɔ so jɩɩr ayɩ: Ɔr dʋɔn Thãgbaa Bikuunna.
Jejuu caca kpãkpãadara
35A dɩɩ wɩl, Jã hale dapa wo nakha ɔɔ kpãkpãadara yenyɔ. 36Dɩ a hɩɩnɛ Jeju n kanɩ sa bir so: Nɩ yɩɛ, ɔr dɔ Thãgbaa Bana bi. 37Dɩ ɔɔ kpãkpãadara yenyɔɔle nɩɛrɛ gɩrɛ a sonɩ dɩ wa‐n kpa Jejura. 38Dɩ Jeju kɩɩl a yɩ wɩ dɩ wa‐n kpaaraa, dɩ bule wi ayɩ: Anye nɩ‐n ƴaal? Dɩ wɩ birsee: Kana fɩ‐n cɔ ya, Rabɩ? Rabɩ, i kɩrʋ dʋɔn Dɩɩrdaar. 39Dɩ so war: Nɩ ɩna na yɩɛrɛ; dɩ wɩ jaal a yɩ kãkɛ a‐n cɔnɩ. Dɩ wɩ toonaanɛ dawiile gɩdonɩ wire dʋɔrɛ.
40Ãdire, Sɩmɔ̃ Pɩɛrɩ õkuun kɔɔ dʋɔn bɩɛl wɩrɛ yenyɔraakɛ kɔɔ nɩɛnɛnɩ Jãa thɩmɩɩkɛ a mɩɩnɩ dɩ wa‐n kpaaraa. 41Sɩ Ãdire dɔ cacadaarɩkɛ kɔɔ yɛnɩ Sɩmɔ̃, ɔɔ õkũu bɩnɔ, a sʋʋraa ayɩ: Sɩ kɔɔ yɩrɛ Mesɩ. I kɩrʋ dʋɔn Kirisiti. 42Dɩ a kɔɔ kpaarɛ a jalna Jejura, dɩ Jeju hɩɩnʋʋnɛ kirkirkir sa so: Fɛr dʋɔn Sɩmɔ̃, Jãa bikuun ha fɩ, sɩ Sefasɩ wa‐n we fɩ. I kɩrʋ dʋɔn Pɩɛr.
43Dɩ ga dɩ wɩlla, Jeju kɔɔ ƴaalɛ a jal Galile dɩɩ do le a yɩ Filipi a sʋʋraa: Na kpa mar. 44Dɩ Filipira dɩ bɩɛl a the na Ãdire na Pɩɛr, Bɛcaɩda gɩ. 45Dɩ Filipi yɩrɛ Natanayɛl a sʋʋraa: Sɩ kɔɔ yɩrɛ ʋrɛɛkɛra Mʋɩjɩ kherenɩ ɔɔda jɔfʋ sɛbɛra, kɛ dakha Thãgbaa bobonasɔ kɔɔ mɩɩnɩ ɔɔda, kɛ dɔnɩ Najarɛtɩ Jeju, Jojɛfɩɩ bikuun. 46Dɩ Natanayɛl bulee: Thɩ̃ bʋɔ na punone na the Najarɛtɩ dɩɩra ya? Dɩ Filipi sʋʋraa ayɩ: Dɩ ɩna hɩnɛ. 47Dɩ Jeju yɩrɛ Natanayɛl da‐n pʋɔraa, dɩ ma da‐n mɩɩ ɔɔda: Nɩ yɛ kɛ Ɩjɩrayɛlda bɔɔkɛ fɩɩlɛ na harnaˈ. 48Dɩ Natanayɛl bulee: Kana fɩ jɩ mɩ? Dɩ Jeju birsee: Ɔbɔɔkɛ Filipi na kɔɔ we fɩnɩ paˈ, ɔbɔɔkɛ fɩ hanɩ thɩr kɩrɔ, mɩ kɔɔ mãa yɩ far. 49Dɩ Natanayɛl birsee: Dɩɩrdaar, jaa fɛrra dʋɔn Thãgbaa Bikuunna, jaa fɛrra dʋɔn Ɩjɩrayɛldaraa fãgadaar. 50Dɩ Jeju birsee: Gɩdonɩ mɩ kɔɔ so farɛ ayɩ, mɩ kɔɔ mãa yɩ far thɩr kɩrɔ, gɛr gɩ dɩ fɩ pɛr haar. Fa yɩrɛ thɩ̃ kɔ̃tɩna dɩ a jɔ gɩrɛ. 51Dɩ Jeju bir sʋʋraa: Sobɔr mɩ so far gel, na yɩrɛ thãgbara ƴũ dɩ ga khɛrna, dɩ Thãgbaa thɔ̃thɔ̃daar thusɔ na jʋʋnɛ sɩ wa‐n gbũ mɛr tibili Bikuunna.#Jən 28:12
Currently Selected:
Jã 1: LOBIRI
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Bible Society of Burkino Faso 1985.