मारकुस 16
16
येसु सिखॆम्पाबाङ् हिङ्पॽमिम्पा
(मट्टि २८:१-८; लुका २४:१-१२; युहान्ना २०:१-१०)
1नाचामॆ डिना लुक्खारा हाङ् मारियम माग्डालिनि नुङ् याकुबमि आमा मारियम हाङ् सलोमिऎ येसुमि सिच्चिबि सिःॽमाम् लागि डिरिक् याङ् सिक्खुबा नाम्नुऎ केवा इनुचि। 2हाप्टामि याॽलऎ डिना नाम् कॆट्टाआर खोचि येसुमि येःॽमाबि खारामि। 3हाङ् खॆॽमे सिसामिर खोचि लाम्फुबि कासामि, “कानिम् लागि येःॽमामि याबिऎ लुङ्कॽवा चाइ आसॆ लाराङ्पिकिहा?” 4टर खोचि येःॽमाबि टामानुङ् गर खाङ्ठाःक्मार आक्क ढ्या लुङ्कॽवा लाराङ्मिम्पा लॆटा। 5खोचि येःॽमा हङ्सि भॆन्मार बिइःमा चे चाङ्मिम्पा एक्क वॆन्चा याॽमि येःॽमामि चुप्ठिङ् पोट्टा येप्ढाङ्पा खाङुचि। आक्क खाङुचिहाङ् खोचि आक्खॆटुचि। 6टर खोसॆ आक्खा मेॽनुङ्माचि लोसुचि, “ऎआक्टि खारानॆ, आन्नॆ कुरुसाबि सेॽमिम्पा नासाराटमि येसु यक्मे पाइकाम्नि। टर खो गुबि माआ। खो ग हिङ्पखॆडा हाङ् गबाङ् खाइहाङ्डा। खो युङ्मिम्पा ठाल खाङाम्नॆ। 7टर ह खारानॆ हाङ् पाट्रुस हाङ् होइढा खोम् टिङ्खुबाचि गर लोसाम्नॆ, येसु आन्नाबाङ् याॽलन गालिल लोमॆ ठालबि खॆॽमेपाइ। खोसॆ लोसिन्टॽन आन्नॆ खो आक्कुबिॽन खाङ्टकाम्नि।” 8हाङ् खोचि किसिमावे यङ्मानुङ् हाङ् आक्खॆसे येःॽमाबाङ् आम्पकामि हाङ् खाइटामि। खोचिऎ ग खानावाँ आसा सङ्क मालोसुचि, मान्ठाभनॆ खोचि एट्टान किसिमिम्पा लॆटामि।
येसु टिङ्खुबाचि सेन्चि पिॽमिम्पा
(मट्टि २८:९-२०; लुका २४:१३-५३; युहान्ना २०:११-२३)
9येसु हाप्टामि याॽलऎ डिना सिखॆम्पाबाङ् हिङ्पकाहाङ् चोब्बाङ् याॽल मारियम माग्डालिनुङ् खाङ्मुसा। खोबाङ् येसुऎ वाङ्चि खारिॽमाङ् लाबक्मिम्पा लॆटा। 10खो येसुमि टिङ्खुबाचिबि खाराहाङ्ग खानावाँ खेम्मिटुचि। खोचि निवाँ टुक्मानुङ् हाःप्मे पाइटामि। 11टर येसु सिखॆम्पाबाङ् हिङ्पक्मिम्पा हाङ् खोनुङ् खाङ्मुम्पा खानावाँ खेम्मिटुचि। टर खोचिऎ म खानावाँ निवाँयुङ् मालॆटुचि।
12आक्क डॆङ्पि हिप्पा टिङ्खुबाचि गाँवाँ पोट्टा खॆॽमे पाइमिम्पा बेला येसु होइक रुपाबि खोचिनुङ् खाङ्मुसा। 13खोचि हिप्पाऎ सङ्क ग खानावाँ होइढा टिङ्खुबाचि खेम्मिटुचिमि। टर फेरि सङ्क खोचिऎ आक्क खानावाँ निवाँयुङ् मालॆटुचि।
14आक्क डॆङ्पि एपङए टिङ्खुबाचि चामा परक्मिम्पा बेला येसु खोचिम् लुम्पि खाङ्मुसा। हाङ् खोचिऎ निवाँयुङ् मालॆमिम्पा हाङ् उम्चि निवाँ लुङ्कॽवा रक्मा मुमिम्पाबि वोसुचि। मान्ठाभनॆ खोचिऎ खो सिखॆम्पाबाङ् हिङ्पम्पा खानावाँ खेम्मिखुबाचिम् खानावाँबि निवाँयुङ् मालॆमिम्पा लॆटुचि।
15हाङ् येसुऎ आक्खाचि लोसुचि, “खारानॆ हाङ् बाखाटेम्पिहा चोब्न याॽमिचि नुऎ खानावाँ खेम्मिटाम्चिनॆ। 16हाङ् निवाँयुङ् लॆःॽमानुङ् बाप्टिस्मा लाखुबाचि हिङ्पःक्मि टर निवाँयुङ् आलॆखुबाचि आब्डिक् नुङ्मा लिःक्मि। 17हाङ् निवाँयुङ् लॆखुबाचिऎ काम् निङ्पि गरहा योम्पक् यिगुकुचि, खोचिऎ खारिॽमाङ्चि लाबकुचि हाङ् उम्चङ् उम्चङ् खाप् यामुक्मि। 18हाङ् खोचिऎ पुसॆःॽमाचि लाबुकुचि हाङ्स, सिःक्चा चाकुचि हाङ्स माङ्स लिमिनि। हाङ् खोचिऎ टुक्खाचि सक्पि हुक् युङ्मार आक्खाचि नुबक्खारामि।”
19गरहाङ् टिङ्खुबाचि नुङ् यामुसिट्टा हाङ् पारभु येसु पारुबि ठेट्टि खारा हाङ् निवाँहाङ्मि चुप्ठिङ् पोट्टा पेना। 20हाङ् टिङ्खुबाचि चोब्न ठालबि खारामि हाङ् नुऎ खानावाँ खेम्मिटुचि। हाङ् पारभुऎ खोचिनुङ् योम्पक् मुसु हाङ् टिङ्खुबाचिऎ इमिम्पा खानावाँ चाइबानऎ कामानुङ् चुमॆक्सङ् पिॽमाम् लागि आक्खॆॽमाहा योम्पक् यिगु। आमेन्।
Currently Selected:
मारकुस 16: LBR
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2023, Wycliffe Bible Translators, Inc. and Nepal Bible Society