लुका 3
3
बाप्टिस्मा पिक्खुबा युहान्ना
(मट्टि ३:१-१२; मारकुस १:१-८; युहान्ना १:१९-२८)
1रोमि ढ्याहाङ् टिबेरियासऎ हाङ्डाम् लॆॽमिम्पा एपङ्ङा निङ् लिमिम्पा लॆटा। आक्रल पान्टियास पिलाटस याहुडिया ठुम्काबिऎ ढ्या टुङ्घङ्पा लॆटा। हेरोड गालिलबिऎ ढ्या टुङ्घङ्पा लॆटा हाङ् खोम् नुसा फिलिप इटुरियाबिऎ नुङ् टारखोनिटिस लोमॆ ठुम्काबिऎ ढ्या टुङ्घङ्पा लॆटा। हाङ् अबिलेने लोमॆ ठालबि लुसानियास लोमॆ याॽमि ढ्या टुङ्घङ्पा लॆटा। 2आक्रल हन्नास नुङ् काइयाफा लोमॆ याॽमिचि चोब्नबाङ् ढ्या याटाङ्पा लॆटाचि। आक्रलॽन आसासु पेम्मिनिहा ठालबि जाकारियामि पासा युहान्ना नुङ् निवाँहाङ् यामुसा।
3मसॆ युहान्ना यारडान हङ्माबिऎ गॆअङ्मॆअङ्हा ठालबि खारा हाङ् याॽमिचि गरहाङ् लोबकुचि, “हिङ्वाबाङ् ऎम्पकानॆ हाङ् बाप्टिस्मा लासानॆ हाङ् निवाँहाङ्ऎ आन्नामि हिङ्वा यङ्नि पिकानि।” 4यासाइया लोमॆ निवाँहाङ्मि खानावाँ लोखुबा याॽमिऎ निवाँहाङ्मि साब्चिराबि गरहाङ् साब्डु,
खेमाम्नॆ, आसासु पेम्मिनिहा ठालबि एक्क याॽमि ढ्या साम्लाऎ गर कामॆपाइ,
“पारभु टामॆ लाम्फु चेन्चेन् मुसाम्नॆ,
खोम् लाम्फु काम्नुःर टङाम्नॆ।
5चोब्न हङ्हा डॆॽमालॆ हाङ्
पङ्पङहा फाक्बक्मा लॆ, हॆॽहॆॽहा लाम्फु
टङ्पॽमा लॆ। हाङ् यिङ्हा नुङ् टङ्कुनिहा लाम्फु टङ्हा मुमा लॆ।
6हाङ् चोब्न याॽमिचिऎ निवाँहाङ्ऎ हिङ्पॽमिम्पा योम्पक् खाङ्टकुचि।”#यासाइया ४०:३-५
7ऎॽवाहा याॽमिचि बाप्टिस्मा लासि युहान्नाबि टाआमि, हाङ्सङ् युहान्नाऎ आक्खाचि लोसुचि, “ओ पुसॆःॽमामि पासाचि, आसॆ आन्ना टामा परक्मिम्पा निवाँहाङ्मि सिरिबाङ् हिङ्चाहिकानि कामानुङ् लोसानिहा? 8हिङ्वाबाङ् ऎम्पॽमिम्पान हाङ्ग आक्रहाङ्न पाइटानॆ। हाङ् ‘कानि आबाराहाममि पासा याङ्मिन्चि लिमिम्पासॆॽन हिङ्चाकिङ्का’ कामानुङ् आमिनानॆ। मान्ठाभनॆ कॆ आन्ना लोकानि, निवाँहाङ्ऎ इघा लुङ्कॽवाबाङ् आबाराहाममि पासा याङ्मिन्चि लाबक्मा हेकु। 9सिङ्मि लाङ्पि निवाँहाङ्मि न्यायॆमि बेन्ठि सिक्खॆडा। मसॆ काम्नुऎ उम्चा आसिखुबा चोब्न सिङ् डेस्से मिबि हिट्ठाङ्कु।”
10याॽमिचिऎ खो सिमुचि, “आक्र हाङ्ग काङ्कॆ माङ् लॆमा लॆऎ?” 11खोसॆ आक्खाचि लोसुचि, “हिच्चि लॽलिङ् चुखुबाऎ आचुखुबा याॽमि एक्क पिट्टुर। आक्रक्न चामा चुखुबाऎ चामा पिट्टुचिर।” 12यावॆङ्ग लाखुबाचि सङ्क युहान्नाबि बाप्टिस्मा लासि डाबामि हाङ् सिमुचि, “चिन्खुबो, काङ्कॆ चाइ माङ् लॆमा लॆऎ?” 13खोसॆ आक्खाचि लोसुचि, “आन्ना लोमिम्पाबाङ् डिरिक् यावॆङ्ग आलासाम्नॆ।” 14टिलिङ्गाचिऎ सङ्क सिमुचि, “काङ्कॆ चाइ माङ् लॆमा लॆऎ टा?” युहान्नाऎ आक्खाचि लोसुचि, “याॽमिचि किसिमा खाङमिसे, रःक्से हाङ् हुन्नहा खानावाँ टिसे खोचिबाङ् याङ् आलासानॆ। हाङ् टाङ्पॆ टक्चाऎ याङ्पिॽन चेन्चाआनॆ।”
15याॽमिचिऎ निवाँहाङ्ऎ सॆःक्मिम्पा खिरिस्ट हुङ्ढाङ्पा लॆटामि, मसॆ खोचिऎ उम्चि निवाँबि युहान्नान खिरिस्ट रु कामानुङ् मिॽढाङ्पा लॆटामि। 16मसॆ युहान्नाऎ आक्खा चोब्न याॽमिचि लोसुचि, “कॆग आन्ना योवाऎ बाप्टिस्मा पिकानि। टर काबाङ् एक्क टुङ्घङ्पा टामेपाइ। काङा ग खोम् ङारिङ्पि माङ्स हॆॽनॆ। खोसॆ आन्ना सॆङ्सॆङॆ लावा नुङ् मिऎ बाप्टिस्मा पिकानि। 17खोसॆ सिचाम् नुङ् चाप्अ फाक्माम् लागि ठाप्ठाम् हुक्पि याङ्सिडु। ठाप्सिकु हाङ् सिचाम् चाइ काम्नुऎ ठालबि युङुकु हाङ् चाप्अ चाइ हानाम्स सिखॆॽनियॆ मिःबि हिरुकु।”
18गरहान होइढा सङ्क डिरिक् खानावाँ इसे युहान्नाऎ याॽमिचि नुऎ खानावाँ खेम्मिटुचि। 19हाङ् हेरोडऎ उम् नुसा फिलिपमि खिम्टाङ्मा हेरोडियास लोमॆ खोम् नुसा नाम्मि युङ्मिम्पासॆ हाङ् होइढा काइसा योम्पक् लॆमिम्पासॆ युहान्नाऎ खो वोसिम्पा लॆटा। 20हेरोडऎ युहान्ना सॆक्ढाङ्सु हाङ् आक्खा काइसा योम्पक् सक्पि होइक काइसॆ योक्पक् यिगु।
येसुमि बाप्टिस्मा
(मट्टि ३:१३-१७; मारकुस १:९-११)
21चोब्न याॽमिचिऎ बाप्टिस्मा लामे पाइटामिर, येसुऎ सङ्क बाप्टिस्मा लासु हाङ् खो निवाँहाङ् नुङ् यामुसे लॆमार पारु हेम्बका। 22हाङ् सॆङ्सॆङॆ लावा उक्खिरिॽवामि रुपाबि खो सक्पि उक्सा हाङ् पारुबाङ् गरक्मा साम्ला टाआ, “आना काङामि नाम्नाम् पिसिमालुऎ पासाना, आनानुङ् काङा एट्टान चेन्चाडिङ।”
येसुमि सामॆक्
(मट्टि १:१-१७)
23येसुऎ होइढा याॽमिचिम् लागि योम्पक् मुबक्मार खो सुपङ् निङ्र याक्मिम्पा लॆटा। याॽमिचिऎ योसेफन खोमि आप्पा कामानुङ् मिॽयुक्सुचि। योसेफमि आप्पा एलि लॆटा। 24एलिमि आप्पा मट्टाट, मट्टाटमि आप्पा लेबि, लेबिमि आप्पा मल्कि, मल्किमि आप्पा यान्ना, यान्नामि आप्पा योसेफ, 25योसेफमि आप्पा मट्टाठियस, मट्टाठियसमि आप्पा आमोस, आमोसमि आप्पा नहुम्, नहुम्मि आप्पा इसलि, इसलिमि आप्पा नग्गइ, 26नग्गइमि आप्पा माठ, माठमि आप्पा मट्टाठियस, मट्टाठियसमि आप्पा सेमाइन, सेमाइनमि आप्पा योसेख, योसेखमि आप्पा योडा, 27योडामि आप्पा योआनन, योआननमि आप्पा रेसा, रेसामि आप्पा यरुबाबेल, यरुबाबेलमि आप्पा सालटिएल, सालटिएलमि आप्पा नेरि, 28नेरिमि आप्पा मल्कि, मल्किमि आप्पा अड्डि, अड्डिमि आप्पा कोसाम, कोसाममि आप्पा एलमाडम, एलमाडममि आप्पा ऐर, 29ऐरमि आप्पा यहोसु, यहसुमि आप्पा एलिएजर, एलिएजरमि आप्पा योरिम, योरिममि आप्पा मट्टाट, मट्टाटमि आप्पा लेबि, 30लेबिमि आप्पा सिमियोन, सिमियोनमि आप्पा याहुडा, याहुडामि आप्पा योसेफ, योसेफमि आप्पा योनान, योनानमि आप्पा एल्याकिम,
31एल्याकिममि आप्पा मलेआ, मलेआमि आप्पा मिन्ना, मिन्नामि आप्पा मट्टाठ, मट्टाठमि आप्पा नाटान, नाटानमि आप्पा डाउड, 32डाउडमि आप्पा यिसाइ, यिसाइमि आप्पा ओबेड, ओबेडमि आप्पा बोअज, बोअजमि आप्पा सल्मोन, सलमोनमि आप्पा नहसोन, 33नहसोनमि आप्पा अम्मिनाडाब, अम्मिनाडाबमि आप्पा आराम, आराममि आप्पा हेसोरोन, हेसोरोनमि आप्पा फारेस, फारेसमि आप्पा याहुडा,
34याहुडामि आप्पा याकुब, याकुबमि आप्पा इसाहक, इसाहकमि आप्पा आबाराहाम, आबाराहाममि आप्पा टेरह, टेरहमि आप्पा नाहोर, 35नाहोरमि आप्पा सरुग, सरुगमि आप्पा रउ, रउमि आप्पा पेलेग, पेलेगमि आप्पा एबेर, एबेरमि आप्पा सेलह, 36सेलहमि आप्पा केनान, केनानमि आप्पा अरपक्छड, अरपक्छडमि आप्पा सेम, सेममि आप्पा नोआ, नोआमि आप्पा लेमेक, 37लेमेकमि आप्पा मटुसेलह, मटुसेलहमि आप्पा हनोक, हनोकमि आप्पा येरेड, येरेडमि आप्पा महलालेल, महलालेलमि आप्पा केनान, 38केनानमि आप्पा एनोस, एनोसमि आप्पा सेट हाङ् सेटमि आप्पा आडम लॆटा हाङ् आडममि आप्पा निवाँहाङ्।
Currently Selected:
लुका 3: LBR
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2023, Wycliffe Bible Translators, Inc. and Nepal Bible Society