लुका 1
1
लुकाऎ येसुमि खानावाँ साॽमिम्पा
1डिरिक् याॽमिचिऎ कानिम् लुम्पि लिमिम्पा खानावाँमि बारेबि साब्डुचि। 2हाङ् आक्खा लिमिम्पा खानावाँ याॽलऎबाङ् टाङ्पाम् मिगॆॽन खाङ्खुबा नुङ् आक्कमि बारेबि नुऎ खानावाँ लोखुबाचिऎ काङ्का लोमिम्पा रेम। 3-4टुङ्घङ्पा ठियोफिलस, काङॆ सङ्क याॽलऎ बाङ्न चोब्न खानावाँ काम्नुःर यक्डुङ्, मसॆ आनॆ खेम्डुनाहा चोब्न खानावाँ चाइबानऎ कामानुङ् आक्खा खानावाँ आनॆ वाॽमाम् लागि काम्नुःर साप्हाङ्मा काम्निटुङ।
बाप्टिस्मा पिक्खुबा युहान्नामि जान्म
5याहुडियाबिऎ हाङ् हेरोडमि लःबि, आबिया लोमॆ याटाङ्पा याॽमिचिबि एक्क हारुन#१:५ हारुन लोमॆ याॽमि मोसामि बुबु लॆटा हाङ् खो इस्राएलिचिमि चोब्बाङ् याॽलऎ याटाङ्पा लॆटा। सामॆक्बिऎ जाकारिया लोमॆ याटाङ्पा चुआ। हाङ् खोम् खिम्टाङ्मा सङ्क हारुन सामॆक्बिऎन लॆटा। हाङ् खोम् निङ् एलिसिबा लॆटा। 6आक्खाचि हिप्पान निवाँहाङ्मि ङारिङ्पि निवाँनेन्चि लॆटाचि, हाङ् निवाँहाङ्ऎ लोमिम्पा चोब्न खानावाँ मुयुङ्साचि हाङ् काम्नुःर पाइयुक्साचि। 7हाङ् खोचिम् चाचा मान्चु मान्ठाभनॆ एलिसिबा चाचा ऎटक्खुबा लॆटा हाङ् हिप्पान पासिङ् मासिङ्मा सङ्क पिक्खॆम्पा लॆटाचि।
8इॽया जाकारिया नुङ् खोम् लाङ्काम्चिम् टाङ्पाम् पाल टाआहाङ् जाकारिया निवाँहाङ्मि ङारिङ्पि याटाङ्पामि योम्पक् मुमॆ पाइटा। 9हाङ् याटाङ्पाचिम् चालाना रक्न युङ्ठङ् हङ्सि भॆम्माहाङ् ढुपा#पारास्ठान ३०:२,८ हिॽमाम् लागि निङ् सॆःक्मार जाकारियामि निङ् सिट्टा। 10ढुपा हिॽमॆ बेला पालुम्पि डिरिक् याॽमिचि निवाँहाङ् नुङ् यामुमॆ पाइटामि। 11आक्रलॽन ढुपा हिट्ठाम् युङ्ठङ् कॆक्पि निवाँहाङ्मि एक्क निवाँखाटॆखुबा जाकारिया नुङ् खाङ्ङुसा। 12जाकारियाऎ निवाँखाटॆखुबा खाङ्टकु हाङ् एट्टान किसिआ। 13टर निवाँखाटॆखुबाऎ खो लोसु, “ओ जाकारिया, आकिसिऎ, मान्ठाभनॆ आनॆ निवाँहाङ् नुङ् यामुमिम्पा खानावाँ निवाँहाङ्ऎ खेम्डु। ह आनाम् खिम्टाङ्माऎ आनाम् लागि एक्क वाठाङ्पा चाचा टगुकु। हाङ् आनॆ खोम् निङ् युहान्ना युङॆ। 14आक्रल आना एट्टान चेन्चाक्ना, हाङ् डिरिक् याॽमिचि खोम् जन्मबि चेन्चाक्मि। 15मान्ठाभनॆ खो निवाँहाङ्मि ङारिङ्पि ढ्या याॽमि लि। खोसॆ आङ्गुरमि डिबु हाङ् होइढा डिबुचावा हानाम्स डुङुनि, हाङ् उम् जन्मबाङ्न खो सॆङ्सॆङॆ लावाऎ चेप्खॆकु। 16खोसॆ डिरिक् इस्राएलि याॽमिचि उम्चि पारभु निवाँहाङ् पोट्टि हिङ्पॽमिकुचि। 17आपाचिम् निवाँ पासाचि पोट्टि हाङ् निवाँहाङ्ऎ लोमिम्पा खानावाँ एखेम्खुबाचि लोमिम्पा खानावाँ खेम्मॆ लाम्फु पोट्टि हिङ्पॽमिस्से निवाँहाङ्मि लागि काम्नुहा याॽमिचि मुमाम् लागि खो पारभुबाङ् याॽलन एलिया रक्न निवाँहाङ्मि लावा नुङ् चॆक्मावाबि खॆ।”
18जाकारियाऎ निवाँखाटॆखुबा लोसु, “ग खानावाँ चाइबान लि कामानुङ् मान्टॽल कॆ निवाँयुङ् लॆःॽमॆ? काङा पासिङ् पिक्खॆडिङ् हाङ् काम् खिम्टाङ्मा सङ्क मासिङ्मा पिक्खॆडा।” 19निवाँखाटॆखुबाऎ खो लोसु, “काङा निवाँहाङ्मि ङारिङ्पि यॆप्ढाङ्खुबा गाबिरियल लोमॆ निवाँखाटॆखुबाङा। आनानुङ् ग काम्नुऎ खानावाँ खेम्मिॽमाम् लागि निवाँहाङ्ऎ काङा पाङ्हाङ्डिङ। 20खाङॆ, इग खानावाँ टाऎ लःबि मान्ट हाङ्स लि।” हानाम्ढारि काङॆ लोमिम्पा खानावाँ लिनि, आक्रलढारि आनाम् याटानि हाङ् यामुहिनानि, मान्ठाभनॆ आनॆ कॆ लोमिम्पा खानावाँबि निवाँयुङ् मालॆटुना।
21निवाँहाङ्मि खिम् हङ्सि जाकारिया ऎॽवार पेने कामानुङ् आक्खॆसे याॽमिचिऎ खो पालुम्पि हुङ्मे सिसुचि। 22जाकारिया निवाँहाङ्मि खिम्बाङ् आम्पक्मार याॽमिचि नुङ् मॆन्यामुबॽहि। हाङ् खोसॆ याॽमिचि हुगॆ यामुमिट्टुचि। मसॆ याॽमिचिऎ खोसॆ निवाँहाङ्मि खिम् हङ्सि सेन्चि खाङ्टडु कामानुङ् वाबुचि।
23जाकारियाऎ निवाँहाङ्मि खिम्पि खोसॆ मुमाहा योम्पक् लुक्पिटु हाङ् उम् खिम्पि खारा। 24आक्क डॆङ्पि खोम् खिम्टाङ्मा एलिसिबा बःक्खुरुॽमा लिसा, हाङ् ङाचि माइनाढारि खिम् हङ्सि टेःॽन पेना हाङ् खोसॆ लोसु, 25“ग योम्पक् निवाँहाङ्ऎ काम् लागिॽन लॆपिडिङ। खोसॆ काङा नाम्नाम् पिसिडिङ् हाङ् याॽमिचिऎ चाचा ऎटक्खुबा मेॽनुङ्मा कामानुङ् इचोमिम्पा खानावाँ चेम्पिडिङ।”
येसुमि जन्म
26एलिसिबा बःक्खुरुॽमा लिमिम्पा ठुक्चि माइना लिमार निवाँहाङ्ऎ एक्क गाबिरिएल लोमॆ निवाँखाटॆखुबा गालिल आन्चालमि नासारट लोमॆ हाटाबि पाङ्हाङ्सु। 27निवाँहाङ्ऎ खो भ्या मालॆमिम्पा एक्क मारियम लोमॆ मेॽनुङ्माबि पाङ्हाङ्सु। खोमि भ्यामि खानावाँ डाउड हाङ्मि सामॆक्बिऎ योसेफ लोमॆ याॽमि नुङ् लिमिम्पा लॆटा।
28निवाँखाटॆखुबा खोबि टाआहाङ् लोसु, “स्यामिना, निवाँहाङ्ऎ आना एट्टान नेन्चाडा! खो आनानुङ् चु।” 29मारियाम्ऎ निवाँखाटॆखुबामि खानावाँ खेमुहाङ् किसिखारा हाङ् आक्खॆसे ग मान्टॽमा खानावाँर कामानुङ् उम् निवाँबि मिम्पकु। 30हाङ् निवाँखाटॆखुबाऎ खो लोसु, “मारियाम्, आकिसिऎ, मान्ठाभनॆ निवाँहाङ्ऎ आना एट्टान नाम्नाम्पिसिडा। 31ह खाङॆ, आना बःक्खुरुॽमा लिॽना हाङ् एक्क ठुक्पा चाचा टगुकुना। हाङ् आनॆ आक्क ठुक्पा चाचामि निङ् येसु युङॆ। 32खो ढ्या टुङ्घङ्पा लि हाङ् खो याॽमिचिऎ चोब्बाङ् सङ्पिऎ निवाँहाङ्मि पासा लोकुचि। पारभु निवाँहाङ्ऎ खो खोम् टुबालाबा डाउड रक्न हाङ् मुकु। 33हाङ् खोसॆ इस्राएलि याॽमिचि सक्पि हानाम्स हाङ्डाम् फॆरुकु, हाङ् खोम् हाङ्डाम् हानाम्स लुक्खॆॽनि।” 34ग खेमुहाङ् मारियाम्ऎ निवाँखाटॆखुबा लोसु, “काङा भ्या मालॆॽमिम्पा मेॽनुङ्माङा, मान्टॽल ग लिऎ?” 35निवाँखाटॆखुबाऎ लोसु, “निवाँहाङ्मि सॆङ्सॆङॆ लावा आना सक्पि टाः। चोप्बाङ सङ्पिऎ निवाँहाङ्मि चॆक्मावमि लावा आना सक्पि सि। मसॆ जान्म लिखुबा चाचा सॆङ्सॆङॆ लि हाङ् निवाँहाङ्मि पासा लोक। 36खाङॆ, आनाम् टाङ्पाम् याॽमि एलिसिबा मासिङ्मा पिक्खॆॽमार बःक्खुरुॽमा लिडा। याॽमिचिऎ खो चाचा आटक्खुबा मेॽनुङ्मा कामानुङ् इचोयुक्सुचि। टर गरक्ल उम् बक्पि ठुक्चि माहिनाऎ चाचा चु। 37मान्ठाभनॆ निवाँहाङ्ऎ आहेमॆ योम्पक् माङ्स माआ।” 38हाङ् मरियाम्ऎ लोसु, “काग निवाँहाङ्मि योम्पक् मुखुबाङा, आनॆ लोसिन्टॽन काबि लिर।” हाङ् निवाँखाटॆखुबा खाइटा।
मारियाम् एलिसिबा चुब्सि खॆॽमिम्पा
39हाङ् हेर सॆॽलन मारियाम् याहुडिया आन्चालबिऎ पङ्पङ्मा पोट्टिऎ एक्क गाँवॆँटु खारा। 40खो जाकारियामि खिम् हङ्सि भॆनाहाङ् एलिसिबा स्यामिटु। 41एलिसिबा मारियाम्ऎ आना स्यामिखाना लोमिम्पा खानावाँ खेम्मा अक्सि एलिसिबामि बक्पिऎ चाचा चेपका। आक्रलॽन एलिसिबा सॆङ्सॆङॆ लावाऎ चेप्खॆटुहाङ् 42ढ्या साम्लाऎ गर कासा,
“आना चोब्न मेॽनुङ्माचिबाङ् आसिका टक्चामिम्पा मेॽनुङ्माना, हाङ् आनॆ टक्कुनॆ चाचा आसिका टक्चामिम्पा चाचा यो। 43ऎॽवा ढ्या नाम्नावाँबाङ् काङा रक्मा याॽमिमि खिम्पि पारभुमि आमा टाआ? 44खाङॆ, आनाम् स्यामिॽमॆ साम्ला खेम्मा अक्सि काम् बक्पिऎ चाचा चेन्चासे चेरा। 45निवाँहाङ्ऎ आना लोमिम्पा खानावाँ मान्ट हाङ्स लि कामानुङ् निवाँयुङ् लॆखुबा आना एट्टान आसिका टक्चामिम्पा मेॽनुङ्मान यो!”
मारियाम्मि साम्
46हाङ् मरियाम्ऎ गरहाङ् साम् इसु, “काम् निवाँऎ निवाँहाङ्मि निङ् ठेरुकु,
47हाङ् काम् निवाँ कामि फाक्खुबा निवाँहाङ्बि चेन्चाक्।
48मान्ठाभनॆ खोसॆ काङा रक्मा मिछुॽमा याॽमि सङ्क मिॽलाइङ। हयॆबाङ् चोप्पासॆ काङा निवाँहाङ्बाङ् आसिका टक्चामिम्पा याॽमिङा लोॽङामि।
49मान्ठाभनॆ चॆकुवॆ निवाँहाङ्ऎ काम् लागि एक्क ढ्या योम्पक् मुपिडिङ। खोम् निङ् सॆङ्सॆङॆ लॆ। 50खोमि किसिमाबि पेन्खुबाचि सक्पि खोमि नाम्नावाँ डॆङ्पि डॆङ्पिढारि लि।
51खोसॆ खोम् चॆक्मावा नुङ्मा हुक् फॆडु हाङ् कायङ्पा मिङ्खुबाचि चोब्न टोम्पहाङ्सुचि।
52खोसॆ कायङ्पा मिङ्खुबा हाङ्चि उम्चि ढुप्पाट्टबाङ् लाबहाङ्डुचि, हाङ् टाङ्पा मिछुॽवा मिङ्खुबाचि टुङ्घङ्पा मुडुचि।
53खोसॆ सागॆसिमिम्पाचि काम्नुहा चामा ठका बखार पिडुचि, टर चासुम्टाङ्पाचि हप्पॆरॆक् हुक् पाङ्हाङ्डुचि।
54निवाँहाङ्ऎ खोम् योम्पक् मुखुबाचि नुङ् लॆःॽमिम्पा खानावाँ मिॽलाडु हाङ् खोम् योम्पक् मुखुबा इस्राएलिचि काम्नुःर लॆडुचि,
55खोसॆ आबाराहाम नुङ् खोम् पिसानासाचि नाम्नाम् पिसिॽमा हानाम्स मामिखॆटु।”
56मारियाम सुम्चि माहिनार टाङ्पाम् याॽमि एलिसिबानुङ् पेना हाङ् उम् खिम्पि ऎम्पका।
बाप्टिस्मा पिक्खुबा युहान्नामि जन्म
57एलिसिबामि चाचा टक्मॆ बेला साप्पु हाङ् खोसॆ एक्क वाठाङ्पा पासा टगु। 58हाङ् पारभु निवाँहाङ्ऎ एलिसिबा सक्पि लॆॽमिम्पा नाम्नावाँ खोम् टाङ्पाम् याॽमिचि नुङ् गॆअङ्मॆअङ्हा याॽमिचिऎ सङ्क खेमुचि हाङ् चेन्चाआमि। 59चाचा टक्मिम्पा बाङ्चि डिनाबि खोचि खाट्ना#१:५९ ग खाटाना लोमॆ चालाना चोब्न याहुडि वाठाङ्पाचि जन्म लिमिम्पा बाङ्चि डिनाबि खोचिऎ लॆःॽमान लॆऎ एक्क चालाना लॆःॽयुक्सा। ग खाटाना लॆःॽमार खोचिऎ वाठाङ्पा चाचामि सिठाम् ठालमि मिःक्म साखक् हॆॽयुक्सुचि। लेबि १२:३; उट्पाटि १७:१-१४ लॆॽमाम् लागि टाआमि। आक्रल खोचिऎ चाचामि निङ् उम्पाम् रक्मान जाकारिया युङ्मा ठाबाक्मिम्पा लॆटा। 60टर उम्मा एलिसिबाऎ लोसु, “हॆॽनॆ, गमि निङ् युहान्ना युङ्मा लॆ।” 61आक्खाचिऎ लोसुचि, “आनाम् टाङ्पाम् याॽमिचिबि गरक्मा निङ् लॆखुबा आसास माआमि।” 62मसॆ आक्खाचिऎ चाचामि उम्पा हुगॆ यामुमिट्टुचि, “आनॆ गमि निङ् माङ् युङ्मा मिन्नॆ?” 63खोसॆ एक्क साप्ठाम् पाटि ङागुहाङ् “गम् निङ् युहान्ना” कामानुङ् साबु। ग खाङुचिहाङ् चोब्न याॽमिचि आक्टिखारामि। 64आक्रलॽन जाकारियामि साम्ला पक्बका हाङ् खोसॆ निवाँहाङ्मि निङ् ठेप्पकु। 65इघा चोब्न खानावाँ खाङुचि हाङ् गॆअङ्मॆअङ्हा याॽमिचि आक्खॆसे किसिआमि। हाङ् ग खानावाँ याहुडिया आन्चालमि चोब्न पङ्पङ्मा ठालबि फुबका। 66इग खानावाँ खेम्खुबा चोप्पासॆ डॆङ्पि ग चाचा मान्टॽमा लिएर कामानुङ् उम्चि निवाँबि मिनामि। मान्ठाभनॆ खो सक्पि निवाँहाङ्मि चॆक्मावा सिॽमिम्पा लॆटा।
जाकारियाऎ निवाँहाङ्मि निङ् ठेॽमिम्पा
67युहान्नामि उम्पा जाकारिया सॆङ्सॆङॆ लावाऎ चेप्खॆटु हाङ् निवाँहाङ्ऎ लोमिम्पा खानावाँ इबकु।
68“इस्राएलिचिम् पारभु निवाँहाङ्मि निङ् मॆट्टङ् लिर। मान्ठाभनॆ खो टाङ्पाम् याॽमिचिबि टाआहाङ् फाक्बडुचि।
69खोसॆ कानिम् लागि खोम् योम्पक् मुखुबा डाउडमि सामॆक्बाङ् एक्क ढ्या फाक्खुबा चॆक्मावाऎ हाङ् मुडु।
70-71काङ्का काइर लॆखुबाचि हाङ् सिच्चोखुबाचिम् चॆक्मावाबाङ् खोसॆ कोब्कानि डोब्कानि कामानुङ् याॽलन निवाँहाङ्मि खानावाँ लोखुबा सॆङ्सॆङॆ याॽमिचिबाङ् लोमिम्पा लॆटा।
72खोसॆ काङ्कामि टुबालाबाचि खोम् नाम्नावाँ खाङ्मुमाम् लागि हाङ् आक्खाचिनुङ् लॆःॽमिम्पा सॆङ्सॆङॆ चुप्लाङ् यॆॽमाम् लागि खोसॆ ग योम्पक् कानिम् लुम्पि लॆटु।
73आक्क चुप्लाङ् खोसॆ कानिम् टुबालाबा आबाराहामनुङ् लॆःॽमिम्पा लॆटु।
74मान्ठाभनॆ काङ्का काइसॆ लॆखुबाचिम् हुक्बाङ् आम्पहिसिर हाङ् मॆङ्किसिरे निवाँहाङ्मि योम्पक् मुहिसिर,
75हाङ् कानिम् चोब्न हिङ्खामाबि सॆङ्सॆङॆ नुङ् निवाँनेन् लिसे खोम् ङारिङ्पि योम्पक् मुटकिर।
76ह काम् पासा, आना चोब्बाङ् सङ्पिऎ निवाँहाङ्मि खानावाँ लोखुबा याॽमि लिःक्ना, मान्ठाभनॆ आना पारभुमि लाम्फु मुमाम् लागि खोबाङ् याॽल खॆःॽना।
77आनॆ खोम् याॽमिचि मान्टहाङ् आक्खाचिम् हिङ्वाबाङ् यङ्निमा टङ्चाकाम्नि हाङ् फागुकानि लोमॆ खानावाँ लोकुचिना। 78मान्ठाभनॆ कानिम् निवाँहाङ् नाम्नावाँ नुङ्मा हाङ् नाम्नाम् पिसिखुबा लॆ। मसॆ खोसॆ पारुबाङ् खिरिस्ट नाम्स ङिबक्ऎ नाम् रक्न पाङ्हाङ्कु,
79हाङ् माॽयाक्टबि पेङ्खुबा नुङ् सिखॆॽमा ठाबाक्मिम्पाचिबि खोसॆ नाम् रक्न ङिमानुङ् खिरिस्ट पाङ्हाङ्पिकुचि। हाङ् आक्क नाम्ऎन कानि काम्नुऎ लाम्फुबि लाम्ढुमिकि।”
80हाङ् युहान्ना पुबक्से खारा हाङ् निवाँबि चॆक्मावाऎ लिसे खारा टर इस्राएलिचिम् लुम्पि खानावाँ माइबक्लढारि खो आसास पेम्मिनिहा ठालबिॽन पेना।
Currently Selected:
लुका 1: LBR
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2023, Wycliffe Bible Translators, Inc. and Nepal Bible Society