Luka 20
20
Angu wʉ ʉpanʉ ngua wʉ Yeso ɔɔngwa gbanɨ
(Mat 21:23-27; Mak 11:27-33)
1Tiga ɓisi mʉngana, Yeso i꞉nye kʉpanɨa nʉ ɓɨakɨa ɓombi Ɨsaʉ yɛɛ Iɗo amati ʉ ɨkáa yɨ Asʉɓɨɨ. Ɓangama ɓʉ ɓakumu‑kumu, nʉ ɓagʉgʉ, nʉ ɓapananakɨa ɓʉ mapanʉ, ɓambʉɓwanɨa ɓʉ buu. 2Kija ɓa꞉ɓukuo Yeso ɓɔ: « Tɨɓɨa‑zʉ ɓɔ wakʉkyɨa moni ngikakɛ nʉ ʉpanʉ wʉ anɨ? Anɨ‑zʉ a꞉nanzo ʉpanʉ wɔngɔ? » 3Kija a꞉ɓutisio ɓɔ: « Ɛmɛ ma‑zʉ ninu kʉ kuɓukuo ɨngbaa yɨ moni mɨngana. Naɓɨeni‑zʉ ɓɔ: 4uɓatiso ngua Yʉanɨ i꞉nye ɓatiso wa꞉ʉngwa ɔɔ Asʉɓɨɨ? Gʉ ɓɔ wa꞉ʉngwa ɔɔ ɓombi? »
5Kija ɓa꞉faniso yakanaka ati ʉndaɓʉ ɓɔ: « Ndʉ kamutisio ɓɔ: ‹ Wa꞉ʉngwa ɔɔ Asʉɓɨɨ, › a꞊tiɓukuo ɓata isu kʉ ɓɔ: ‹ Akʉ moni kʉ ɨmanɨ tiga na꞉mʉbayakɔmʉ? › 6Yɛmɔ ɓɔ, kumutisieni ɓɔ: ‹ Wa꞉ʉngwa ɔɔ ɓombi, › ɓombi kʉ ɓuɓomu ɓa꞊tɨɓɛnda nʉ mukopi, jʉ ɛɓɔ kʉ ɓuɓomu ɓi꞉nye ɓʉmbɨeni mbɨanɨ ɓɔ Yʉanɨ i꞉nye ɨgbɛ yɨ Asʉɓɨɨ. » 7Kija ɓa꞉tisio Yeso ɓɔ: « Kambʉkʉmbɨa ɓɔ wa꞉ʉngwa gbanɨ. » 8Yeso ambuɓutisio ɓɔ: « Abana gʉ ɛmɛ mambʉkʉnɨɓɨa kʉ ɓwanɨ ɓɔ ʉpanʉ ngua makʉkyɨa nawɔ moni ngika wakʉʉngwa gbanɨ. »
Isisinio yɨ ipumo yɨ mujabibo
(Mat 21:33-46; Mak 12:1-12)
9Yeso ambufaniso ngakɨa ɓombi moni 'upi akʉ isisinio ɓɔ: « Mombi mʉngana a꞉hʉna watɨnɨ wʉ mijabibo ambʉʉsɨa akʉ lɨkɔndɔ lʉ ɓombi nga ɓɔmɔ ngiɓa ɓa꞉kɔnɔ naɓɔ ɓɔ ɓaɨpakana naɓɔ masɔɔ.#20:9 Ɓayuda ɓi꞉nye kyɨa ɓɔ, mombi ngia i꞉nye mbɨana nʉ 'ʉgbʉ wʉ kuu mungono ɓɔmʉ, ɓi꞉nye mʉsɨa kʉkyɨa kuu ngiinanɨ. Lipa ngiangɔ yi꞉nye kyɨa ɓɔ ɓʉmʉnahʉya kʉ dada ngia i꞉nye kwa akʉ kuu ngiinanɨ. Mbise ngiinanɨ ambʉsa kɨnda yɨ makwaa.
10Iya wati wɔɔ bʉɛ masɔɔ wa꞉ndana nayɔ, ambʉtʉma bayo angɔ mʉngana ɔɔ ɓombi ngiɓa a꞉ɓʉsɨa nʉ watɨnɨ, ɓɔ ɓumunzo masɔɔ nga kangɔ. Ɨkyɛmɨngana, ɓombi ngiɓa a꞉ɓʉsɨa nʉ watɨnɨ ɓa꞉ɓɛnda bayo ngiinanɨ tʉkʉ ɓʉ tubu, ɓambumutuiso lɨkɔndɔ kʉ uno. 11Kija mambɨnyɨ ʉ watɨnɨ a꞉tʉma ɓata bayo ɔmɔ. Ɓombi ngiɓa ɓi꞉nye kʉkanga watɨnɨ ɓambʉmʉɓɛnda ɓata tʉkʉ ɓwanɨ, ɓambumundapiso tʉkʉ ɓʉ tuu, ɓambumutuiso lɨkɔndɔ kʉ uno. 12Ambʉtʉma ɓata mombi ʉ kuu ʉ ɓeetu, tiga gwa ngiinanɨ ɓa꞉mʉkwakaka lɨpɨ, ɓambumugiso aɓei ʉ watɨnɨ wʉ mijabibo.
13Mambɨnyɨ ʉ watɨnɨ wʉ mijabibo ambuɓukuono ɓɔ: ‹ Ma꞊kyɨa‑zʉ tanɨ? Ma꞊tʉma tiga‑zʉ tii tʉkʉ mwana ngiasɛmɛ ʉ ɓʉkʉnda. Ya ndʉ ɓa꞊mukumo pɛpɛ ɛyɔ kumoo. › 14Ɨkyɛmɨngana, iya ɓombi ɓʉ kuu ɓa꞉mʉna nayɔ kʉka, ɓambufaniso yakanaka ati ʉndaɓʉ ɓɔ: ‹ Makʉʉ ʉ mʉa ngua, iiya akʉka oki. Ikeni, kʉmʉweni wanɨ, ambʉ tʉkʉ isu kʉdya mʉa ngua. › 15Kija ɓa꞉mugiso aɓei ʉ watɨnɨ wʉ mijabibo, ɓambʉmʉwa. » Yeso ambuɓuɓukuo tiga ɓɔ: « Makʉʉ ʉ watɨnɨ a꞊ɓʉkyɨa tiga tanɨ? 16Iya a꞊ka sina, a꞊maa ɓombi ɓʉ kuu ngiɓʉnanɨ tʉkʉ kʉ ɓuɓomu ɓʉ gba, kija a꞊nzo ɓombi nga ɓɔmɔ watɨnɨ nguʉnanɨ. » Iya ɓombi ɓa꞉kɔ moni ngikʉnanɨ, kija ɓa꞉tisio ɓɔ: « Moni ngikʉnanɨ kɔɔkyɨanɨakɔmʉ sinani ɔgɔ! »#20:16 Ɓa꞉ngaka moni ngikʉnanɨ jʉ Ɓayuda ɓambikinye kʉnda ɓɔ ɨkáa yɨ anza nga yɛmɔ yɨchɨka ɨtaka ngiindaɓʉ. Jʉ yɨkyɨanieni ɓwanɨ ɓaɗaa mʉgwɛ.
17Ɨkyɛmɨngana, Yeso a꞉ɓʉkanga ɓʉ gbɔɔ, ambuɓusigio ɓɔ: « Inyi yɨ moni ngika Mubio kʉ Asʉɓɨɨ ka꞉ngaka ya‑zʉ tanɨ? Kusigo ɓɔ:
‹ Ikopi ngia ɓombi ngiɓa ɓaatɨa lɨkáa ɓa꞉igiso anambamba,
ya꞉ka tiga ikopi ngia yɨ ɨjangɨa nadɨndɨ. ›#Popoko Mʉm 118:22
18Mombi kʉ 'uɓomu ngia a꞊kwɨa ikopi ngiinanɨ, a꞊ɓunzoo ɓunzoo. Nʉ mombi ngia ikopi ngiinanɨ ya꞊mʉkwɨa ekoo, ya꞊mutio tʉkʉ ɓʉ sɛkɛ sɛkɛ. »
Yeso ʉyaka moni ekoo ʉ lipa manzanza
(Mat 22:15-22; Mak 12:13-17)
19Ɓapananakɨa ɓʉ mapanʉ, nʉ ɓangama ɓʉ ɓakumu‑kumu ɓi꞉nye kʉhata kʉfa Yeso tʉkʉ ati ngiinanɨ. Jʉ ɓi꞉nye ɓʉmbɨeni mbɨanɨ ɓɔ Yeso ʉngaka isisinio ngiinanɨ tʉkʉ aka ekoo ʉndaɓʉ. Ɨkyɛmɨngana, ɓi꞉nye tiga kukumo ɓombi. 20Kija ɓa꞉faniso talio Yeso. Tiga nanɨ, ɓambʉmʉtʉmɨa ɓombi ngiɓa ɓi꞉nye kʉpɨtanaka ndʉ ɓa ɓombi ɓɔɔ ngbingbii. Ɓombi ngiɓʉnanɨ ɓi꞉nye kʉhata ɓɔ ɓafa Yeso 'upi akʉ ʉɗaɗa nguangɔ, ambʉ ɓʉnyɨa nʉ 'ʉkɔmbɔ ngua ɓamʉfa nawɔ, nayɔ kunzo akʉ lɨkɔndɔ lʉ ngama ʉ gɨpa. 21Ɓambumuɓukuo ɓɔ: « Mʉpananakɨa, kakʉmbɨa kʉtaa ɓɔ moni ngika wakusigo nʉ ika wakʉpanɨa engo ka ngbingbii, jʉ ɔwɛ wambakambomboko ɓombi. Ɨkyɛmɨngana, waapanɨa moni kingono ekoo ɨkyananakɨa ngia yaakataa Asʉɓɨɨ. 22Tɨɓɨa‑zʉ ɓɔ ajʉ kʉkwanana kulipa manzanza kʉ ngama ɔɔ ʉja ngia wʉ Ɓalɔma, gʉ ɓɔ kɔɔlipakɔmʉ? »#20:22 Yɛmɔ ɓɔ: Kaisala.
23Ɨkyɛmɨngana, Yeso ambʉmbɨa ɓɔ ipindi ngiindaɓʉ iinanɨ ɓʉmʉpɨndɨa, kija a꞉ɓusigio ɓɔ: 24« Napaneni‑zʉ 'ukpekpe wʉ ʉfalanga. 'Umwendu wʉ mesu kʉ anɨ, nʉ ino yɨ anɨ iya ya ekoo ʉ 'ukpekpe wʉ ʉfalanga nguawɛ? » Ɓambumutisio ɓɔ: « Umwendu wʉ ngama ɔɔ ʉja ʉ Ɓalɔma. » 25Kija Yeso a꞉ɓusigio ɓɔ: « Ndʉ yaɓio tɔ ɓwanɨ, nzeni Kaisala kʉ ɨkyɛmɛ ngia yɨ Kaisala, nʉ nzeni Asʉɓɨɨ kʉ ɨkyɛmɛ ngia yɨ Asʉɓɨɨ. » 26Tiga nanɨ, chʉkɔmʉ ɓambʉmʉfa nʉ 'ʉkɔmbɔ ekoo ʉ moni ngika i꞉nye kʉyaka engo apɛɛ ʉ ɓombi. Ɨkyɛmɨngana, moni ngikangɔ i꞉nye kutisio engo, ka꞉mbangɨa ɓombi nadɨndɨ, ɓambʉkata tʉkʉ ɓʉ nyɛ.
Ɓukuo ekoo ʉ jʉkana akʉ ingyo
(Mat 22:23-33; Mak 12:18-27)
27Kija Ɓasadukayɔ ngana ngana ɓa꞉sɨnganɨa Yeso. (Ɓasadukayɔ ɓambikinye baya ɓɔ jʉkana akʉ ingyo ya sinani kuɓioo.) Ɓambuɓukuo Yeso ɓɔ: 28« Mʉpananakɨa, Mʉsa a꞉tɨtɨndakɨa ʉpanʉ kusigo ɓɔ: ‹ Ndʉ mombi aɓio ɓɔ manye uweni ambʉsɨa moi chʉkɔmʉ nʉ mwana, manye ngia ɔɔ gue a꞊nazana woko ngiinanɨ, ambʉnʉtɨa manye ngiinanɨ a꞉wo mwana. › 29Ʉna tɔ, yi꞉nye nʉ ɓana ɓɔɔ gue ʉmalɨanɨka ɓaaɓʉa mʉngana. Pʉta ambʉchɨka moi, ambuwo ɓʉnʉtenikɔmʉ nayɔ mwana. 30Gwa ngia a꞉mijo ambʉmʉnazana. 31Gwa ngia wʉ ɓeetu ɓata kʉ ɓwanɨ, kʉɓʉya tʉkʉ akʉ gwa ngia wʉ ʉmalɨanɨka nayɔ kʉnazana, ambuwo ɓʉnʉtenikɔmʉ nayɔ mwana kʉ ɓwanɨ. 32Akʉ 'upipio, ɛyɔ woko ngiinanɨ ambuwo tiga kʉ woni. 33Tiga akʉ ɓisi ɓʉ jʉkana akʉ ingyo moi ngiinanɨ aɓio tiga moi anɨ, jʉ i꞉nye moi ʉndaɓʉ ʉmalɨanɨka kʉ ɓuɓomu? »
34Kija Yeso a꞉ɓutisio ɓɔ: « Ɓugue nʉ ɓoi ɓʉ ɨjɨjɨ ngia ɓakʉchɨkana. 35Ɨkyɛmɨngana, ɓugue nʉ ɓoi ngiɓa ɓaɓio ɓʉkwananakɛ kʉjʉkana akʉ ingyo akʉ ʉɓɨɨ ngua wakʉka ɓugue nʉ ɓoi ɓambukuɓio tii ɓata kʉchɨkana. 36Nʉ ɓambʉkʉkwanana sinani tii ɓata kuwo, jʉ ɓaɓio tiga ndʉ ɓamalaika. Ɓa tiga ɓana ɓʉ Asʉɓɨɨ, jʉ ɓa꞉jʉkana akʉ ingyo jʉkananɨ. 37Mʉsa a꞉pana akʉ ɓʉmba ɓɔ ɓombi ngiɓa ɓa꞉dʉka ɓa꞊jʉkana sina akʉ ingyo jʉkananɨ. A꞉pana amati ʉ mubio ngika ka꞉ngaka moni kʉ ɓʉtɨ ngiɓa ɓi꞉nye kʉɗɨtɨa ati ngia a꞉soko‑ɔɔ Makʉʉɓɨɨ ɓɔ: ‹ Asʉɓɨɨ ʉ Abalama, Asʉɓɨɨ ʉ Ɨsaka, Asʉɓɨɨ ʉ Yakɔbɔ, › iya ɛɓɔ ɓanayɔ kubibiso.#Popoko Kʉɓ 3:6 38Asʉɓɨɨ ambʉkɔmʉ Asʉɓɨɨ ʉ mɨnda, ɨkyɛmɨngana a Asʉɓɨɨ ʉ ɓombi ngiɓa ɓa‑zʉ kʉkʉʉ, jʉ akʉ ɛyɔ ɓombi kʉ ɓuɓomu ɓa tʉkʉ kʉkʉʉ. »
39Ɓapananakɨa ɓʉ mapanʉ ngana ngana ɓambumusigio ɓɔ: « Mʉpananakɨa, wʉngaka moni ngikʉnanɨ muɗo. » 40Ɓa꞉kanyokɔmʉ tii ɓata nayɔ kuɓukuo ɨngbaa yɨ moni yɛmɔ.
Klisito a mwana ʉ mwanʉ Daudi
(Mat 22:41-46; Mak 12:35-37)
41Kija Yeso a꞉ɓusigio tiga ɓɔ: « Ɨkyɨkyɨɓʉmʉ tanɨ iya ɓakwanana‑ɔɔ sigo ɓɔ Klisito#20:41 Yɛmɔ ɓɔ: Masɨa. a mwana ʉ mwanʉ Daudi? 42Jʉ Daudi a꞉tɨndakɨa amati ʉ ɨtaɓʉ yɨ Mʉmbɔ ɓɔ:
‹ Makʉʉɓɨɨ Asʉɓɨɨ a꞉sigio Makʉasɛmɛ ɓɔ:
Kuwulo akʉ ɨkɔndɔ ngiisɛmɛ yɨ gue ɔngɔ.
43Kʉɓʉya akʉ manapɨa‑ɔɔ ɓakwa ngiɓʉsɔɔ
izi yɛɛ napɨɛ mɨtɨndɨ ngiisɔɔ. ›#Popoko Mʉm 110:1
44Ndʉ yaɓio ɓɔ Daudi aasoko Masɨa ɓɔ: ‹ Makʉasɛmɛ › aɓio‑zʉ tiga mwana ʉ mwana ʉ Daudi ɨkyɨkyɨɓʉmʉ tanɨ? »
Pɨmɨeni ɓapananakɨa ɓʉ mapanʉ
(Mat 23:1-36; Mak 12:38-40)
45Kija Yeso a꞉sigio ɓakpataka apɛɛ ʉ ɓombi kʉ ɓuɓomu ngiɓa ɓi꞉nye nayɔ kʉkɔ ɓɔ: 46« Pɨmɨeni ɓapananakɨa ɓʉ mapanʉ pɨmɨaa. Ɛɓɔ ɓaakʉnda kɨndaka nʉ ɓakanzʉ ɓʉ ɨbɨba, nʉ ɓaakʉnda ɓɔ ɓombi ɓuɓio naɓɔ kuɓukuo nʉ ɨbɨba akʉ lizi lʉ junikio. Nʉ ɓaakʉnda kuwulo tʉkʉ akʉ muweikie ngika kaakyɨa apɛɛ, amati ʉ lɨkáa lʉ nɨta, ɓaahata tʉkʉ muweikie kʉ ɨbɨba akʉ ɓatiniso‑ɔɔ mʉmbɔ kɔɔ mʉkpɔkpɔ. 47Ɓaahɨnɨa ɓawoko kumbo kʉ 'uɓomu ngia ɓaakyɨa nayɔ, nʉ ɓaata nɨta yɛɛ ɨta ɨta kʉpanana. 'Ʉkɔmbɔ nguʉndaɓʉ waɓio sina ɓʉkaɨ nadɨndɨ. »
Currently Selected:
Luka 20: BudKoya
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2021, Wycliffe Bible Translators, Inc.