યોહાન 18
18
વાડીમા ઈસુલા ધરતાહા
(માથ. 26:47-56; માર્ક 14:43-50; લુક. 22:47-53)
1જદવ ઈસુની પ્રાર્થના કરુલા પુરા કરા તદવ તેને ચેલાસે હારી કીદ્રોન વહળલા વળાંડીની તેહુનલે મેરાલા ગેત. તે જાગાવર એક વાડી હતી અન તે તેમા ગેત. 2અન તેલા ધરી દેનાર યહૂદા ઈશ્કારિયોતલા બી તી જાગા માહીત હતી, કાહાકા ઈસુ તેને ચેલાસે હારી તે જાગામા ઘડઘડે જા હતા. 3તાહા યહૂદા ઈશ્કારિયોત સિપાયસે હારી અન મોઠલા યાજકસી અન ફરોસી લોકાસે સહુન મંદિરલા રાખનાર સાહલા લીની કંદીલ અન બોળ અન હતેર લીની તઠ આના. 4તાહા ઈસુ તે અખે ગોઠી સાહલા જી તેને હારી હુયુલા હતી, તી તેલા માહીત હતા તાહા તો પુડ નીંગના, અન તેહાલા સોદના, “તુમી કોનાલા ગવસી રહનાહાસ?” 5તેહી તેલા જવાબ દીદા, “નાસરેથ ગાવને ઈસુલા.” ઈસુની તેહાલા સાંગા, “તો મા આહાવ.” અન તેલા ધરી દેનાર યહૂદા ઈશ્કારિયોત પન તેહને હારી ઊબા હતા. 6ઈસુની યી સાંગતા જ કા, “તો મા આહાવ.” તે માગાજ સરકી ગેત અન ભુયવર જાયી પડનાત. 7તાહા તેની ફીરીવાર તેહાલા સોદા, “તુમી કોનાલા ગવસતાહાસ.” તે સાંગનાત, “નાસરેથ ગાવને ઈસુલા.” 8ઈસુની તેહાલા જવાબ દીદા, “મા ત તુમાલા સાંગી ચુકનાહાવ કા તો મા આહાવ, જો તુમી માલા ગવસતાહાસ ત યે ચેલા સાહલા જાંવદે.” 9ઈસા યે સાટી હુયના જેથી ઈસુની જી પુડ સાંગા હતા તી ખરા હુયી જા, “જેહાલા તુ માલા દીનેલ તે માસલા એક જનલા પન મા નીહી ભુલનેલ.” 10સિમોન પિતર પાસી જી તલવાર હતી તી તો કાડીની અખેસે કરતા મોઠા યાજકને ચાકરવર ટાકના, તેના જેવા કાન કાપી ટાકના. તે ચાકરના નાવ મલખુસ હતા. 11તાહા ઈસુની પિતરલા સાંગા, “તુની તલવારલા તેને જાગાવર ઠેવ, જો દુઃખના પેલા માને બાહાસની માલા દીદાહા કાય તેલા મા નોકો પેવ?”
અન્નાસને પુડ ઈસુલા લી ગેત
12તાહા સિપાયસી અન તેહના અમલદાર#18:12 અમલદાર સેંબર સિપાયસા અમલદારસી અન યહૂદી લોકસા જે મંદિરના રાખવાવાળાસી ઈસુલા ધરીની બાંદી લીદા, 13અન પુડ તેલા અન્નાસ પાસી લી ગેત કાહાકા તો તે વરીસના અખેસે કરતા મોઠા યાજક કાયાફાસના સાસરાસ હતા. 14યો તોજ કાયાફાસ હતા, જેની યહૂદી આગેવાન સાહલા સલાહ દીદેલ કા આપલે લોકાસે સાટી એક માનુસ મરીલ તી બેસ આહા.
પિતર ઈસુના નકાર કરહ
(માથ. 26:69-70; માર્ક 14:66-68; લુક. 22:55-57)
15સિમોન પિતર અન એક દુસરા ચેલા બી ઈસુને માગ-માગ ચાલુલા લાગનાત. યો ચેલા અખેસે કરતા મોઠા યાજકના વળખતીના હતા અન ઈસુ હારી મોઠા યાજકને આંગનમા ગેત. 16તાહા તો દુસરા ચેલા જો અખેસે કરતા મોઠા યાજકના વળખતીના હતા, તો બાહેર નીંગના, અન દારસી જી દાસીલા રાખેલ તીલા સાંગીની, પિતરલા મદી લી આના. 17જી દાસી દાર પાસી ઊબી હતી, તીની પિતરલા સાંગા, “કાય તુ બી યે માનુસને ચેલા માસલા આહાસ કાય?” તેની તીલા સાંગા, “મા તે માસલા નીહી આહાવ.” 18નોકર સાહલા અન મંદિરના રાખનારા સાહલા હીવાયજ તાહા કોળસા પેટવીની ઈસતોસી ચંબુત તાપ હતાત અન પિતર બી તેહને હારી ઈસતો પાસી ઊબા તાપ હતા.
મોઠા યાજકને પુડ ઈસુલા લી ગેત
(માથ. 26:59-66; માર્ક 14:55-64; લુક. 22:66-71)
19તાહા અખેસે કરતા મોઠા યાજકની ઈસુલા તેના ચેલાસે અન સીકસનને બારામા સોદા. 20ઈસુની તેલા જવાબ દીદા, “મા અખેસે હારી ઉગડે રીતે ગોઠી કરનાહાવ, મા પ્રાર્થના ઘરાસાહમા અન મંદિરમા જઠ અખા યહૂદી લોકા ગોળા હુયેલ રહતાહા તઠ કાયીમ પરચાર કરનાહાવ અન ખાનગીમા કાહી પન નીહી સાંગનેલ. 21તુ માલા યો સવાલ કજ સોદહસ? જે આયકનાહાત તેહાલા સોદ, કા મા તેહાલા કાય સાંગનાવ? હેર, તેહાલા માહીત આહા, કા મા કાય-કાય સાંગનાહાવ.” 22જદવ ઈસુ ઈસા સાંગના, તાહા તઠ જે મંદિરના રાખનાર હતાત તે માસલા એક જો તેને આગડ ઊબા હતા, તેની ઈસુલા કાનપટમા દીની સાંગના, “કાય અખેસે કરતા મોઠા યાજકલા યે રીતે જવાબ દેહેસ કાય?” 23ઈસુની તેલા જવાબ દીદા, “જો મા ખોટા સાંગનાહવાવ, ત તે ખોટાને બારામા સાક્ષી દે, પન જો મા ખરા સાંગનાહવાવ, ત માલા કજ ઝોડહસ?” 24ઈસુ આતા પાવત બાંદેલ જ હતા, અન અન્નાસની તેલા અખેસે કરતા મોઠા યાજક કાયાફાસ પાસી દવાડા.
પિતર ફીરીવાર ઈસુના નકાર કરહ
(માથ. 26:71-75; માર્ક 14:69-72; લુક. 22:58-62)
25સિમોન પિતર આજુ તઠ જ ઊબા હતા અન ઈસતો પાસી તાપ હતા, તાહા તેહી તેલા સાંગા, “કાય તુ બી તેને ચેલા માસલા આહાસ?” તેની નકાર કરતા સાંગા, “મા નીહી આહાવ.” 26અખેસે કરતા મોઠા યાજકને ચાકર માસલા એક જન જો તેહને કુટુંબ માસલા હતા, જેના કાન પિતરની કાપી ટાકેલ હતા, તો સાંગના, “કાય મા તુલા તેને હારી વાડીમા નીહી હેરનેલ?” 27પિતર આજુ નકાર કરી દીના અન લેગજ કોંબડા આરવના.
ઈસુલા પિલાતને પુડ લી યેતાહા
(માથ. 27:1-2,11-31; માર્ક 15:1-20; લુક. 23:1-25)
28અન તે ઈસુલા કાયાફાસ પાસુન રાજ્યપાલ પિલાતને માહાલમા લી ગેત અન તો સકાળીસને પાહાટના સમય હતા, પન તેહા માસલા કોની પન પિલાતને માહાલમા નીહી જાવલા માગ હતા કા જેથી તે અશુદ#18:28 અશુદ: યહૂદી યી માન હતાત કા દુસરે બિન યહૂદીસે ઘરમા જાવલા તાહા તેહની પવિત્રતા નાશ હુયી જાહા નીહી હુયત પન પાસખાના સન ખાયી સકત. 29તાહા રાજ્યપાલ પિલાત તેહાપાસી બાહેર આના અન સોદના, “તુમી યે માનુસવર કને રીતના ગુના ઠેવતાહાસ?” 30તેહી તેલા સાંગા, “જો યો ગુના કરનાર નીહી રહતા ત આમી તેલા તુ પાસી નીહી લયતાવ.” 31તાહા રાજ્યપાલ પિલાત તેહાલા સાંગા, “તુમી જ તેલા લી જાયીની તુમને જ ધર્મને નેમ સાસતર પરમાને કાયદા કરા.” યહૂદીસી તેલા સાંગા, “કોનાલા મરનની સજા દેવલા યી સતા આમાલા નીહી આહા.” 32યી યે સાટી હુયના કા તી ગોઠ પુરી હુય, જી ઈસુની દાખવતા સાંગેલ હતા કા તેના મરન કીસાક હુયીલ.
33તાહા રાજ્યપાલ પિલાત ફીરી આજુ માહાલમા મજાર ગે અન ઈસુલા બોલવીની તેલા સોદના, “કાય તુ યહૂદી લોકસા રાજા આહાસ?” 34ઈસુની જવાબ દીદા, “કાય તુ યી ગોઠ તુને સહુન કરહસ કા દુસરેસી માને બારામા તુલા સાંગીહી?” 35તાહા રાજ્યપાલ પિલાતની જવાબ દીદા, “તુલા માહીત આહા કા મા યહૂદી નીહી આહાવ. તુને જ જાતિના લોકા અન મોઠલા યાજકસી તુલા માને હાતમા સોપી દીદાહા, ત તુ માલા યી સાંગ, કા તુ કાય કરનાહાસ?” 36ઈસુની તેલા જવાબ દીદા, “માના રાજ યે દુનેના નીહી આહા, જો માના રાજ યે દુનેના રહતા, ત જદવ મા યહૂદી આગેવાનસે હાતકન ધરાયનાવ ત માના ચેલા યેને સાટી લડાય કરતાત, પન આતા માના રાજ અઠલા નીહી આહા.” 37તાહા રાજ્યપાલ પિલાતની તેલા સાંગા, “ત કાય તુ રાજા આહાસ?” ઈસુની તેલા જવાબ દીદા, “તુ જ સાંગનાસ કા મા રાજા આહાવ, મા તે સાટી જ જલમ લીનાહાવ અન દુનેમા આનાહાવ કા સત્યને બારામા સીકવી સકા, જો કોની સત્યલા પાળહ, તો માની ગોઠ માનહ.” 38તાહા રાજ્યપાલ પિલાતની તેલા સાંગા, “સત્ય કાય આહા?” અન ઈસા સાંગીની ફીરી યહૂદી સાહપાસી નીંગી ગે અન તેહાલા સાંગના, “માલા ત તેમા કાહી ગુના નીહી મીળ.”
ઈસુ કા ત બારાબાસ
39“પન નાવ વરીસની તુમની યી રીત આહા કા પાસખાને સનલા મા તુમને સાટી એક માનુસલા સોડી દે, ત તુમની કાય મરજી આહા, કા મા તુમને સાટી યે યહૂદી લોકસે રાજાલા સોડી દેવ?” 40તાહા તેહી ફીરી આરડીની સાંગા, “યેલા નીહી પન આમને સાટી બારાબાસલા સોડી દે.” અન બારાબાસ ત ડાકુ હતા.
Ekhethiweyo ngoku:
યોહાન 18: DHNNT
Qaqambisa
Yabelana
Kopa
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Dhanki Bible (ડાંગી) by The Love Fellowship is licensed under Creative Commons Attribution-ShareAlike 4.0 License.