યોહાન 16
16
1યે ગોઠી તુમાલા યે સાટી સાંગીહી કા જદવ લોકા તુમાલા સળ કરતીલ તાહા તુમી વીસવાસ કરુલા સોડસે નોકો. 2તે તુમાલા પ્રાર્થના ઘરા માસુન બાહેર કાહડી દેતીલ, અન ઈસા સમય યેહે, કા જો કોની તુમના ખૂન કરી ટાકીલ તરી તો ઈસા સમજહ કા મા દેવની સેવા કરાહા. 3અન તે યે સાટી કરતીલ કાહાકા તે બાહાસલા નીહી વળખલા કા નીહી માલા વળખલા.
પવિત્ર આત્માના કામ
4પન યે ગોઠી મા તુમાલા ઈસે સાટી સાંગનાહાવ, કા જદવ તેના પુરા હુયુના સમય યીલ ત તુમાલા આઠવ યી જાયીલ, કા મા તુમાલા પુડજ સાંગી દીનેલ, “જદવ પુડજ તુમી માના ચેલા બનલા તાહા તુમાલા યે ગોઠી યે સાટી નીહી સાંગેલ કાહાકા મા તુમને હારી હતાવ. 5આતા મા માલા દવાડનાર પાસી જાહા અન તુમને માસુન કોની પન માલા નીહી સોદ કા, ‘તુ કઠ જાહાસ?’ 6પન મા તુમાલા જી યે ગોઠી સાંગેહેત, તે સાટી તુમી ખુબ ઉદાસ હુયી ગેહેસ. 7તરી પન મા તુમાલા ખરા જ સાંગાહા, કા મા જાયીન તી તુમને સાટી બેસ આહા, કાહાકા જો મા નીહી જા, ત તો સહાય કરનાર તુમા પાસી નીહી યેનાર, પન જો મા જાયીન ત તેલા તુમા પાસી દવાડી દીન. 8અન તો યીની દુનેને લોકા સાહલા પાપ, ધારમીકતા અન નેયને બારામા દોસી સાબિત કરીલ. 9પાપને બારામા યે સાટી સાબિત કરીલ કાહાકા તે માનેવર વીસવાસ કરુલા નકાર કરતાહા. 10નેયીપનાને બારામા યે સાટી સાબિત કરીલ કા મા બાહાસ પાસી જાહા, અન તુમી માલા ફીરી નીહી હેરી સકા. 11અન તો ઈસા ભરોસા દેવાડીલ કા દેવની પુડ પાસુન જ યે દુનેના અધિકારી, મતલબ મોઠા ભૂતલા દોસવાળા ગનનાહા.”
12“મા તુમાલા આજુ ખુબ ઈસે ગોઠી સાંગુલા માગાહા, પન આતા તુમી તે ગોઠી સાહલા સહન નીહી કરી સકા. 13પન જદવ તો સત્યના આત્મા યીલ, તદવ તુમાલા દેવને બારામા જી બી સત્ય આહા તી તુમાલા સાંગીલ, કાહાકા તો તેને અધિકારકન નીહી બોલનાર, પન દેવ સહુન તો આયકીલ તી જ બોલીલ અન જે ગોઠી યેવલા આહાત તી તુમાલા સાંગીલ. 14તો માના મહિમા કરીલ, કાહાકા તેલા માને સહુન જી મીળનાહા, તી તુમાલા સાંગીલ. 15જી કાહી માને બાહાસના આહા, તી અખા માના આહા, તે સાટી મા સાંગાહા, તેલા માને સહુન જી મીળનાહા, તી તુમાલા સાંગીલ.”
દુઃખ આનંદમા બદલી જાયીલ
16ઈસુની તેહાલા સાંગા, “થોડાક સમય માગુન તુમી માલા નીહી હેરસાલ, અન થોડાક સમય માગુન માલા હેરસાલ.” 17તાહા તેના ચેલા માસલા થોડાક જનાસી એક દુસરેલા સાંગા. “યી કાય આહા, જી તો આપાલા સાંગહ, ‘થોડાક સમયને સાટી મા તુલા નીહી દીસનાર અન થોડાક સમય માગુન મા તુમને હારી આહાવ?’ અન યી ‘યે સાટી કા મા બાહાસ પાસી જાહા?’” 18તાહા તેહી સાંગા, “યી ‘થોડાક સમય’ જી તો સાંગહ, તી કાય ગોઠ આહા? આમાલા માહીત નીહી, કા કાય સાંગહ.” 19ઈસુલા ઈસા માહીત પડના, કા યે ચેલા માલા યે ગોઠીસા અરથ સોદુલા ઈચારતાહા, તાહા તેની તેહાલા સાંગા, “કાય તુમી એક દુસરેલા માને યે ગોઠીસા અરથ સોદતાહાસ કા, ‘થોડીક વારમા તુમી માલા નીહી હેરા, અન થોડીકવાર માગુન માલા હેરસાલ?’ 20મા તુલા ખરા જ સાંગાહા, કા તુમી માને મરન માગુન પકા રડસેલ અન દુઃખમા રહસેલ, પન દુનેના લોકા આનંદ કરતીલ, તુમાલા દુઃખ હુયીલ, પન જદવ મા જીતા હુયી ફીરી યીન તાહા તુમના દુઃખ આનંદમા બદલાયજી જાયીલ. 21જદવ બાયકોલા બાળાતીન હુયુના સમય યેહે, તાહા તી પકા દુઃખમા યી જાહા, કાહાકા તીને દુઃખના સમય યી ગેહે, પન જદવ તીલા પોસા હુયહ તાહા તીને દુઃખલા ભુલી જાહા કાહાકા તીલા ખુશી હુયહ કા દુનેમા એક માનુસના જલમ હુયનાહા. 22યે રીતે જ તુમાલા બી આતા દુઃખ હુયહ, પન મા તુમાલા ફીરી મીળીન તાહા તુમી આનંદમા યી જાસેલ અન કોની તુમા પાસુન તુમના આનંદ હીસકી નીહી લેનાર. 23તે દિસી તુમી માલા કાહી નીહી સોદસેલ, મા તુલા ખરા જ સાંગાહા, જો માને નાવકન બાહાસ પાસી કાહી માંગસે, ત તો તુમાલા દીલ. 24આતા પાવત તુમી માને બાહાસ પાસુન કાહી નીહી માંગલા, માંગસાલ ત મીળીલ તાહા તુમના આનંદ ભરપુર હુયી જાયીલ.”
દુનેવર વિજય
25“મા તુમાલા યી અખે ગોઠી દાખલા દીની જ સાંગનાહાવ, પન સમય યેહે, કા મા તુમાલા દાખલા દીની ફીરી કદી નીહી સાંગનાર પન ખુલે રીતે તુમાલા માને બાહાસને બારામા સાંગીન. 26તે દિસી તુમી માને નાવમા માંગસે, અન માલા તુમને સાટી માને બાહાસલા વિનંતી કરુની જરુર નીહી પડનાર. 27કાહાકા દેવ બાહાસ તો પદર જ તુમાવર માયા રાખહ, યે સાટી કા તુમી માનેવર માયા રાખનાહાસ, અન ઈસા બી વીસવાસ કરનાહાસ, કા મા બાહાસ સહુન આનાહાવ. 28મા માને બાહાસ સહુન યે દુનેમા આનાહાવ, અન આજુ દુનેલા સોડીની બાહાસ પાસી પરત જાહા.”
29તેના ચેલાસી તેલા સાંગા, “હેર, આતા ત તુ ખુલે રીતે સાંગહસ, અન કાહી દાખલા દીની નીહી સાંગસ. 30આતા આમાલા માહીત પડી ગે, કા તુ અખા જ જાનહસ, અન કોનાલા જરુર જ નીહી આહા કા તુલા સવાલ સોદીલ, યે કન આમી વીસવાસ કરજહન, કા તુ દેવ સહુન આનાહાસ.” 31યી આયકીની ઈસુની તેહાલા સાંગા, “આતા તુમાલા વીસવાસ હુયી રહનાહા! 32હેરા, ઈસા સમય યેહે પન યી જ ગેહે કા તુમી અખા ઈકડ-તીકડ પીરાયજી જાયીની પદર પદરના મારોગમા નીંગી જાસે, અન માલા એખલાલા જ સોડી દેસે, તરી પન મા એખલા જ નીહી રહનાર કાહાકા બાહાસ માને હારી કાયીમ જ રહહ. 33મા તુમાલા યી ગોઠ યે સાટી સાંગનાવ, કાહાકા તુમી માના ચેલા આહાસ તેને કારને તુમાલા શાંતિ મીળ, દુનેમા રહતાહાસ તાહા તુમાલા દુઃખ મીળહ, પન હિંમત રાખા, કાહાકા મોઠા ભૂત જો યે દુનેના અધિકારી આહા તેલા મા હરવી દીનાહાવ.”
Currently Selected:
યોહાન 16: DHNNT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Dhanki Bible (ડાંગી) by The Love Fellowship is licensed under Creative Commons Attribution-ShareAlike 4.0 License.