MATAYO 2
2
1Kugbo Yesu laga ayuŋe i kezi naga Betelehema i ka na Yudayana kata yu‚ i baŋe na mata laga Herodelona, ŋutu ti totore lo ŋiyu i lupundro na kolona yu kilo ayeŋundra Yerusalemani, druga piza adi‚ 2“Ŋutu lo yuŋe a mata lo Yahudi kilo ilo yeda ya? ’Bo yi amedra kasirita lo lepelo i lupundro na kolona yu‚ nyena pondrini yi i teminizo na lepe.” 3Kugbo Mata Herode laga ayinga kine kulia de‚ teili lo lepelo druga ’du’duki, ku ŋutu ti Yerusalema kilo giri. 4Kugbo lepe laga atunundra ka’i’ila drumala kilo giri‚ ku katogolo ti kukuzuna kilo‚ lepe druga piza ko piri na yuŋeni Kristona. 5Ko druga teyitokindro lepe adi‚ “I Betelehema i ka na Yudayana kata yu igbonaga kakeyonilo awudyo de: 6‘Do Betelehema i ka na Yudana kata yu ani gbo’da a na’di tro i dridriŋi na mataki ti Yuda kilo‚ igbonaga ka’depani ilulupundro konuni‚ lo i’deba zuru lio lo Isiraeli ilo‚’ ina.” 7Herode druga tunundra ŋutu ti totore kilo kanyeni tali‚ i piza na baŋe na lupundri kasirita ŋanilo. 8Lepe druga sonyodru ko Betelehema yu‚ ti atakindra ko adi‚ “Utita‚ galeta ŋiro ŋanilo ku teriŋi‚ kugbo ta laga ario lepe‚ poota ku takita na‚ ma na utu i teminizo na lepe itro.” 9Kugbo ko laga ayinga kulia ti mata ŋanilo kine‚ ko druga ’depadru kiko laselo‚ ’bo kasirita ŋani laga ma ko medri i lupundro na kolona yulo‚ ti ilo itu kasiko i koŋoni druga lira i piri na gbo’dini ŋiro lotri nu. 10Kugbo ko laga ameri kasirita ŋanilo ko druga nyonyola koru. 11Kugbo ko laga alubo kadi yu‚ ko druga medra ŋiro ŋanilo seku ŋote na lepe naga Maria‚ ko druga memereke ka i teminizo na lepe. Ku ko laga aŋazu kapazi kase kilo‚ ko druga tikindra lepe ’doketa, drumo‚ libani‚ ku wele na ŋmwa sisisi ina. 12Igbonaga Ŋun atogo’yu ko i rudesi kata adi ka’bi ko ku yiyito bo ku Herode yu ina ko druga yitozi bo kase ka yu ku kiko le’de. 13Kugbo ko laga autu‚ malaikata lo Matalo druga puku ku Yosefani i rudesi kata‚ druga kulia adi‚ “Ŋine, ’dumara ŋiro ŋanilo seku ŋote na lepena‚ wokinita Ezipeto yu‚ ’bo sakanita yu de inga ti na aku takindra do‚ igbonaga Herode ilo ga’yu ŋirolo i rembu na lepe ina.” 14Kuwade lepe druga ŋiyoro kuwazena‚ druga ’dumadru ŋirolo ku ŋote na lepena‚ druga utu Ezipeto yu‚ 15druga saka yu de yeŋadru tozo i luŋa lo tuwani Herode lu‚ i torumokindro na kulia ti Matalo na pupute ku kakeyonilo kine adi‚ “Na alungu ŋiro liolo ŋiyu Ezipeto yu.” 16Kugbo Herode laga adeni adi ŋutu ti totore kilo akondra toŋulupa kanyeni, lepe druga ŋoŋoma koru‚ lepe druga sonyodru ŋutulu i reremozu na ŋazi lalalia laga Betelehema yu kilo giri ku laga i mara kilo giri itro‚ laga ku kiŋazi mure ku laga aku romo kiŋazi mure mure kilo be na driŋi naga ma lepe pizi ŋutulu ti totore kilona. 17I luŋa ŋanilo kulia naga ma kakeyoni Yeremia tazini kine atorumokindro ’beri: adi‚ 18“Roro ayiŋa Rama yu‚ gbiye ku luluesi koru‚ Rakeli ina gbi ŋazi kanye kilo‚ ani nyadru suka nanyena tro‚ igbonaga ko gbo’di ’bayi ina.” 19’Bo kugbo Herode laga atuwa‚ malaikata lo Matalo druga puku ku Yosefani i rudesi kata Ezipeto yu‚ druga kulia adi‚ 20“Ŋine, ’dumara ŋirolo seku ŋote na lepena‚ utini i ka na Isiraelina kata yu, igbonaga ŋutulu lo ga’yu ŋirolo i tatuwi kilo gbo’di atatuwa ina.” 21Kuwade lepe druga ŋi‚ druga ’dumadru ŋiro ŋanilo seku ŋote na lepena‚ yeŋadri i ka na Isiraelina kata yu. 22’Bo kugbo lepe laga ayinga adi Arikelayo lo gbi’diki a mata lo Yudaya ku monye lo lepe laga Herode i pirini‚ lepe akuze i utu yu de. Igbonaga Ŋun atrukokindro lepe i rudesi kata ina, lepe druga ’dotodru mugu i go lo Galili yu. 23’Bo lepe autu‚ ku saka i kezi naga na luŋu a Nazareta ina kata yu i torumokindro na kulia na ta kakeyo kilo adi‚ “Lepe iluluŋu a ŋutu lo Nazareta.”
Currently Selected:
MATAYO 2: KNT77
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Kakwa New Testament © Bible Society of Uganda, 1974, 1977.