Markə 13
13
Zezu in dan wa dan bru so po' fur sôwâ Zuwif
(Mat 24.1-2; Luk 21.5-6)
1Kəri məni Zezu pâ mbə rawti so po' fur sôwâ Zuwif, swə ɗaw du sum ta zə rum la' ne numu: «Bə ta' kwa, a kar ri'i! Gway' məni handay ɗam so kə ndi kuni ɓay, ɓay so rum toŋo!» 2Zezu ɗam vun rumu: «Ha we so mə toŋ məni kuni si su? So məni kuni daŋ' də bru, ɓay ko gway' ɗaw cu də suk wa gway' məsin mi.»
Cik cem cem məni də mbə cop ndo' nya
(Mat 24.3-14; Luk 21.7-19)
3Zezu suk wa igway' məni gu olivə wə han juku. Mum cin i kə so po' fur sôwâ Zuwif, Piyer, kə Zakə, ɓay Zaŋ kə Andre gay' kuni kə rum ɗaw nday ɓay handay ci vun rumu: 4«A in ne mba ri'i. Kwa rum də gi kə ma su? Kwa mə ta' kwa mi wə də ta' ndo' kwa rum daŋ' nə su?»
5Zezu faŋ təŋ kə nday in ne: «I ji tu ri kədan swə ɗaw nə vi' ni mi. 6Sôwâ juk wə də mbə kə semɗe rin, ɓay handay də ini: "Na nə Kris na", ɓay handay də vi' sôwâ juku. 7Kəri məni hi də mun ci' zi mə həre', ɓay hi də mun dan zi mə seŋ, i ne wəlok mi, zə kwa rum də mbə gi, ama ndo' nya cu məto'o. 8Sôwâ nya məsin də car zi wa sôwâ məsin, ɓay jwə məsin də car zi wa jwə məsini. Nya də nyen wə ri cem cem, ɓay mê' də nde. Kwa rum də ke ce' ndə təŋ zə boni məni ma wə tuk kə vra'a. 9Ama hi, i ji tu ri, zə sôwâ məsin də mi ra' də kor sum ɓok dan kə ndi. Handay də mi pe kə ləva wə rawti so Ifray sôwâ Zuwif. Hi də ca kor sum rôwâ nya kə kor sum jwə zə rin kədan hi in njeŋ dan wa rin kor ndaya. 10Say cop rum sôwâ də ka' Dan mə Kəɗam ne kə zə saŋ daŋ'ŋ. 11Ɓay kəri məni handay də mi ra' kədan handay də kor sum ɓok dan kə ri, i ɗik dan wa dan məni hi wə də in nə cop mi, ama i də in dan məni Simbeɗ mə Kəleŋ wə də mi ne kə ri rum, zə hi cu kə məni wə də in dan rum mi, ama Simbeɗ mə Kəleŋ na. 12Sôwâ də ar daw ya nday də ɓa sôwâ kədan sôwâ nday ci, ba daw də gi ndəna' kə daw nday ta', daw də faŋ car wa sôwâ nday kədan handay nday ci. 13Sôwâ daŋ' də mi sî zə rin, ama swə məni car ŋgəɗiŋ' hâ ndo' rum, bə rum də ke kə nyî mə də hâ#Mat 10.22.»
Kwa mə bro' məni wə ɗənok kwa
(Mat 24.15-28; Luk 21.20-24)
14«Hi də we "swə mə bro' məni wə ɗənok kwa" ke wə ri məni cu kəri ke han nə mi (say swə məni in dan rum, nə munu!) Kəri rum, sôwâ məni də ke wə nya Zude kuni ne ur də wa igway'i#Dan 9.27; 11.31; 12.11. 15Swə məni də ke wa so lari um, bə rum nə dam ze də rawti so um kədan nə ra' kwa han mi. 16Ɓay swə məni də ke wə sine, bə rum nə gewa mbə so um kədan nə ra' mbraw um mi#Luk 17.31. 17Də ke kəcik kə bəka rum wa rawkwa məni kə ur, ɓay wa rawkwa məni kə daw vun pa'a. 18I o Ifray kədan kwa rum nə mbə kə ri simbeɗ mi. 19Zə boni mə du bəka rum də ke ɓayrum pâ boni daŋ' məni sôwâ wə ce daka kəri məni Ifray təŋ gi kwa hâ tam, ɓay boni mə ndə ni na' cu də mbə kərem za' mi#Dan 12.1; Sin 7.14. 20Bârî la' cu par raw bəka rum ta rəka mi si, swə ɗaw cu gak də siɗ mi, ama mum par raw bəka rum ta rəka zə sôwâ məni mum da' nday kədan handay ke kə rumu.» 21Swə la' in ne ni: "I kar ri'i! Kris wə tira! Ko in ne ni: I kar ri'i! Mum wə kəna!" I ve dan rum mi. 22Zə kris mə hay dan kə sum ka' dan mə hay dan də mba. Handay də gi kwa mə ta' kwa kə yew kədan handay vi' sôwâ məni Ifray da' nday, handay la' gak gi si. 23Zə rum, i kaw wa ri, zə na ta' kwa rum daŋ' ne ni copo.
Mbə Vay sumra'a
(Mat 24.29-31; Luk 21.25-28)
24«Ama du bəka rum, kəki boni rum, fəta də faŋ ura', ɓay cer cu də ɗeri mi. 25Ciciw də njay mbə nya ɓay gbəgboŋ mə wafray də nyene#Esa 13.10; Eze 32.7; Jowel 2.10; 4.15; Sin 6.12. 26Kəri rum, sôwâ də we Vay sumra' mbə du dləmbur kə gbəgboŋ juk ɓay kə mbra' ta'a. 27Ndəna', mum də sin sum sin Ifray mə wafray wə jijeŋ nya fəɗi' daŋ' kədan handay ɓawa sôwâ məni Ifray da' nday vun ndo' nya hâ vun ndo' nya ga' sini.»
Zezu ta' kwa kə gu tərumu
(Mat 24.32-35; Luk 21.29-33)
28«I wum dan kwata' məni na ta' ne ni kə gu tərumu. Kəri məni ɓa gu rum təŋ kə kap ɓay tlap rum təŋ kə lo', hi wə we i vun ndor mbə həre' si. 29Ndəna' ta', kəri məni hi də we kwa məni kuni də mbə gi, i we i mbə rum wə həre', mum car wə vun vari. 30Na in mi ne kəzin', sôwâ məni kə i tam, cu də mar daŋ' dan kwa rum daŋ' mbə gi mi. 31Wafray kə nya də ndo', ama dan man cu də ndo' kpe mi.»
Ifray ɗaw sar we bəka ndo' vun kwa
(Mat 24.36-44; Luk 12.36-38)
32«Ama swə ɗaw cu we bəka mbə rum ko ri mbə rum mi. Ko sum sin Ifray mə wafray, ko Vay Ifray cu we mi, say Bəba ɗaw sar we. 33I kaw wa ri, i nde sen mi, zə hi cu we ri məni mum də mbə ndi nə də ke kə ma su mi. 34Kwa rum də ke ce' ndə swə məni 'ya rəkwaya: Mum 'ya ar so um, mum ar sin so um wə ɓa sum sin um, swə ɗaw ɗaw daŋ' kə vun sin um, ɓay mum in ne kə bə ji vun so kədan nə ji kə ɓayrumu#Luk 12.36-38! 35Hi ta', i ji kə ɓayrum, zə hi cu we ri məni bə so də gewa mbə nə mi. Ke məsin mum də mbə kə ɓel, ko kə du dukri, ko kə vun bəka, ko kə bəka su na. 36Mum la' gewa mbə ɓok si, ka nə mbə za' ni wa sen mi. 37Dan məni na wə in mi ne, na wə in ne kə sôwâ daŋ'ŋ: I ji kə ɓayrumu!»
Currently Selected:
Markə 13: KMN
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Le Nouveau Testament et Psaumes en Peve © Alliance Biblique du Tchad, 2014.