Lukə 8
8
Rawkwa məni wə ta zə Zezu
1Kəki rum, Zezu ta gaŋ so mə rôwâ kə so mə ɗəre' daŋ'ŋ. Wə ri gaŋ um, mum ka' Dan mə Kəɗam məni wə in dan wa dan vari məni Ifray wə də suk jwə wa sôwâ umu. Sum ta zə rum mə guɓ wa hoɓ ta kə rum, 2ɓay rawkwa məni mum 'way gam wa nday kə car gaɓ nday ta kuni kə rum ta'a. Semɗe nday ni na: Mari mə so Magdala, məti Zezu 'way gam seɗa' wa sə, 3Zanə, ma Suza, i sin Herodə, Suzana kə rawkwa məsin juk məni wə ne kwa mə ɓa nday kədan handay kawɓa Zezu kə sum ta zə rum kə ndi#Mat 27.55-56; Mak 15.40-41; Luk 23.49.
Dan mə gəgan wa bə ge zep kwa
(Mat 13.1-9; Mak 4.1-9)
4Sôwâ juk car mbə so cem cem ɓa mbə hay' Zezu. Kəri rum, mum in dan mə gəgan məni nə ne ndaya:
5«Bə ge zep kwa pâ kədan mum də ge zep kwa. Kəri məni mum wə də ge zep kwa wə sine um, zep məsin rum njay ta vari. Sôwâ ta wa rum kə sem, ɓay rugwa da' nday ti. 6Zep məsin rum njay ta ri mə kə pra. Kəri məni zep rum ci, handay co' zə handay cu za' ri mə səso' mi. 7Zep məsin rum njay ta du ŋây'i. Ŋây' rum ci vun nji kə zep rum, ɓay handay tak kwa rum dan jeŋe. 8Ama zep məsin rum njay ta nya mə ɓaya. Zep rum ci ɓay zewa, wa rum ɗaw ɗaw daŋ' ke i kis kisi.» Zezu faŋ ini: «Swə məni kə hum mun dan kəta', say bə rum nə munu!»
Zə mi Zezu ta' kwa kə dan mə gəgan su?
(Mat 13.10-13; Mak 4.10-12)
9Sum ta zə Zezu ci vun rum wa dan mə gəgan rumu. 10Mum ɗam vun ndaya: «Ifray ne vari ne ni kədan i we kwa məni ke pe' ɓa' si wa dan jwə Ifray, ama wə hay' sôwâ məsin kwa rum wə ta' nday ne kə dan mə gəgan, zə kədan:
Handay gak kar ri, ama handay cu we mi,
handay gak pe hum, ama handay cu mun zu dan rum mi#Esa 6.9-10.»
Zezu pay zu dan mə gəgan wa bə ge zep kwa
(Mat 13.18-23; Mak 4.13-20)
11«Zu dan mə gəgan rum ni na: Zep kwa wə ta' dan Ifraya. 12Vari wə ta' sôwâ məsin məni mun dan Ifray, handay mun dan rum, ama kəki rum, Satan mbə par dan Ifray məni wə vunduk nday ɓay tak nday dan ve dan rum ɓay dan ke kə nyî mə də hâ mi. 13Ri mə pra wə ta' sôwâ məsin məni mun dan Ifray, handay ve dan rum kə tuk kəɗam, ama handay cu ar dan rum pe tlor wə vunduk nday mi: Handay ta kə dan rum kî, ama kəri məni cik la' mbə wa nday si, handay ar dan məni handay ve na. 14Zep məni njay də du ŋây' wə ta' sôwâ məsin məni mun dan Ifray, ama ɗik dan ndak, kə tuk kəɗam mə wa nya tak dan rum, ɓay dan rum cu par i mi. 15Nya mə ɓay wə ta' sôwâ məsin məni mun dan Ifray, handay kaw dan rum wə vunduk mə ɓay ɓay njeŋ, ɓay handay car ŋgəɗiŋ' hâ dlər də kofo.»
Dan mə gəgan wa baŋgaya
(Mak 4.21-25)
16«Swə ɗaw cu də ge ku wə baŋgay kədan mum um cin də ɗəŋâl ko zə aŋgaw mi. Zawa, mum um cin wa kwa cin baŋgay kədan sôwâ məni cok rawti so um we ri mə ɓu rumu#Mat 5.15; Luk 11.33. 17Kwa daŋ' məni pe' wə də pâ rəka takram, ɓay dan daŋ' məni 'yeŋ wə ri mə ura' wə də pâ wə ri mə ɓu.
18I kaw wa ri du dan məni hi wə munu. Zə swə məni kə kwa, mum də fe məsin də han, ama swə məni cu kə kwa mi, sôwâ də ve mə kî məni wə ɓa rum nə si#Mat 25.29; Luk 19.26.»
Ya Zezu kə daw ya umu
(Mat 12.46-50; Mak 3.31-35)
19Ya Zezu kə daw ya um mbə kuni kədan handay um kar, ama handay cu gak mbə hay' rum mi, zə raw sôwâ məni wə hana. 20Handay la' ne numu: «Ya wû kə daw ya wû gay' kuni rəka, ɓay handay wa' wû kara.» 21Ama Zezu ɗam vun ndaya: «Sôwâ məni wə mun dan Ifray kə ta zə rum, handay nə ya man kə daw ya mana.»
Zezu tak simbeɗe
(Mat 8.23-27; Mak 4.35-41)
22Fəta məsin, Zezu ur ta rawti da kə sum ta zə rum ɓay mum la' ne ndaya: «Mə də dapa ya mbi ga' sini.» Ɓay handay 'ya dle. 23Kəri məni handay wə ta də kə da, Zezu wə nde sene. Kəkor sar simbeɗ təŋ kə sa' kə gbəgboŋ wa ya mbi. Mbi səta də rawti da, ɓay handay həre' kə tuɓ mbi. 24Zə rum, sum ta zə Zezu ta hay' rum ɓay dla' num kə um in ne: «Bârî, Bârî, namba də mara!» Zezu car fray ɓay dlay simbeɗ kə mbi kə gbəgboŋo: Ɓay handay gay' 'yeŋe. 25Zezu faŋ ci vun sum ta zə rumu: «Ô mi nə ka su?»
Ama wəlok gi nday juk, ɓay kwa rum jin' wa ne nday ɓay handay in dan kə nji mbok nji: «Swə məni nə sa kədan mum dlay simbeɗ kə mbi kə gbəgboŋ, ɓay handay mun vun rum su?»
Zezu 'way gam wa swə ɗawa
(Mat 8.28-34; Mak 5.1-20)
26Handay ta day wə nya sôwâ Geraseniyen məni suk cin i kə so Galile, dapa ya mbi ga' sini. 27Kəri məni Zezu dam rawti da ta nya, swə so rum mbə ndewa kə rumu. Swə nə kə gam wa rumu. Kim juk si mum cu ge mbraw mi. Mum cu suk wə so mi, ama mum bar wə nyir gway' məni sôwâ wə mo' mar hana. 28Kəri məni mum we Zezu, mum ka' dana. Mum nde ta nya kor Zezu ɓay ka' dan kə gbəgboŋo: «Zezu, Vay Ifray mə Wafray, ha wa' mi hay' rin su? Na o nu, a ta' ca rin mi!» 29Mum in ndəna' zə Zezu dlay num kə gbəgboŋ kədan nə pâ mbə wa swə na. Wə ri cem cem juk gam nə um tle. Sôwâ wə gay' sem rum kə lay ɓay baŋ ɓa rum kə cururu kədan handay um ji, ama mum kəy lay ɓay hay cururu, ɓay gam nə um pla' də gopo. 30Zezu ci vun rumu: «Wû ɗe ma su?» Mum ɗam vun rumu: «Man ɗe kə Kul Rawa.» Mum in ndəna', zə gam məni cok wə wa rum kuni rawa. 31Ɓay gam kuni o Zezu kədan nə 'way nday cok də zra mə ciriŋriŋ mi.
32Kul ziŋ mə mbri wə ti kwa həre' kə sem igway' rumu. Gam kuni o Zezu kədan nə ne vari ne nday ɓay handay də cok wa ziŋ kuna. Zezu ne vari ne ndaya. 33Zə rum, gam kuni wur mbə wa swə nə ɓay cok ta wa ziŋ kuna. Kul ziŋ daŋ' pik ne mbə wa igway' njay ta ya mbi ɓay tuɓ wə hana.
34Kəri məni daw ji ziŋ we kwa məni gi ndəna', handay pik ne ta pla' dan rum wə mbok so kə pəɗak rum daŋ'ŋ. 35Sôwâ wur kədan handay kar kwa məni gi na. Kəri məni handay mbə hay' Zezu, handay we swə məni ke kə kul gam wa rum nə suk hay' sem Zezu, mum ge mbraw, ɓay wa rum mbə si. Kwa rum gi wəlok ne nday juku. 36Sôwâ məni we kwa rum in vari dan məni Zezu 'way kul gam wa swə nə ne kə sôwâ məsini. 37Zə rum, sôwâ daŋ' məni gay' wə nya sôwâ Geraseniyen o Zezu kədan nə 'ya ar nya nday, zə wəlok gi nday juku. Zezu faŋ ur ta rawti da kədan mum 'ya. 38Swə məni ke kə kul gam wa rum nə o Zezu kədan nə ar vari ne num kədan nə 'ya kə rumu. Ama Zezu 'way num kə ini: 39«A faŋ də so wû, ɓay a də in dan kwa daŋ' məni Ifray gi zə ru ne kə sôwâ.» Swə nə 'ya dle ɓay pla' dan kwa məni Zezu gi zə rum nə daŋ' ne kə sôwâ so rumu.
Zezu car vay Jayrus mə ma, ɓay ma məti ɗak mbraw umu
(Mat 9.18-26; Mak 5.21-43)
40Kəri məni Zezu faŋ ta dapa ya mbi ga' sin kərem, raw sôwâ ve num, zə handay wə um ji. 41Kəri rum, swə ɗaw mə ɗe kə Jayrus mbə daya. Mum nə toŋ ji so Ifray sôwâ Zuwif. Mum kuduk nya kor Zezu ɓay o num kədan nə mbə so um, 42zə mum kə vay mə ma ɗaw məti kə kim guɓ wa hoɓ, ɓay ta həre' kə mara. Kəri məni Zezu wə də han, raw sôwâ reɗ nji wa rum hâ um pla'a. 43Wə du nday ma məsin kəta' kə gaɓ saŋa. Ta gi kim guɓ wa hoɓ kə gaɓ rumu. Ta ɗənok doknay mə ɓa sə ndo' cet ne kə sum waza, ama swə ɗaw du nday cu gak car gaɓ sə mi. 44Ta ta mbə kəki Zezu ɓay ɗak zu mbraw um, kəkor sar gaɓ saŋ sə ndo'o. 45Zezu ci vunu: «Sa nə ɗak nan su?» Sôwâ daŋ' riway, ɓay Piyer la' ne numu: «Bârî, raw sôwâ reŋ wa ru ɓay reɗ nji hâ wû pla'a.» 46Ama Zezu la'a: «Swə ɗak nan si, zə na tuk i gbəgboŋ pâ mbə tu rini!» 47Ma rə we i dan sə cu gak pe' za' mi, zə rum ta mbə hay' Zezu kə nyen ndeɓ ndeɓe. Ta kuduk nya kor rum, ɓay ta in kor sôwâ məni wə han daŋ' vari dan məni ta ɗak num kə vari məni gaɓ sə nə car kəri rum sar nə daŋ'ŋ. 48Zezu la' ne sa: «Vay man, zə həŋ ve nan, zə ô maŋ, həŋ car si. Əŋ də heɓ ye.»
49Kəri məni Zezu wə in dan də in ɓo, vay sin car mbə so Jayrus ɓay in ne numu: «Vay wû rə mar si. A cik Bə ta' kwa za' mi.» 50Ama kəri məni Zezu mun dan rum, mum la' ne kə Jayrus: «A ne wəlok mi, a ve Ifray sar, ɓay ta də cara.» 51Kəri məni handay ta day so Jayrus, Zezu cu ne vari ne kə swə ɗaw kədan bə rum ze də rawti so kə rum mi, say Piyer, Zaŋ, Zakə kə ba vay kə ya vay ra. 52Sôwâ daŋ' wə ci' kə way' ɓa zə vay məti mar ra. Ama Zezu la'a: «I ci' mi, zə vay rə cu mar mi, ta wə nde sene.» 53Handay təŋ kə um mây, zə handay we i ta mar si. 54Ama Zezu kaw ɓa sə ɓay ɗe sə kə gbəgboŋo: «Vay, əŋ car ye.» 55Nyî sə faŋ mbə, ɓay kəkor sar, ta car fraya. Zezu faŋ ne vari ne nday kədan kuni ne kwati ne sə ti. 56Kwa rum jin' wa ne kə ba vay kə ya vay, ama Zezu dlay nday kə gbəgboŋ kədan kuni in dan kwa rum ne kə swə ɗaw mi.
Currently Selected:
Lukə 8: KMN
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Le Nouveau Testament et Psaumes en Peve © Alliance Biblique du Tchad, 2014.