Lukə 6
6
Ci vun wa fəta pemây sôwâ Zuwif
(Mat 12.1-8; Mak 2.23-28)
1Kə fəta pemây sôwâ Zuwif, Zezu pâ vari du sine. Sum ta zə rum kəy alkamari, kulum kə ɓa ɓay cwa#Ddd 23.26. 2Sôwâ məsin mə du kul sôwâ Zuwif mə ɗe kə Farisiyen ci vun ndaya: «Zə mi hi wə gi kwa məni dan dlay mba cu ne vari gi rum mi kə fəta pemây nə su?» 3Zezu ɗam vun ndaya: «Hi cu in dan kwa məni David gi kəri məni mum kə sum ta zə rum kə mê' nə mi su? 4Mum ze ta rawti so Ifray ɓay ra' duwa' məni njay kor Ifray, mum ti ɓay ne kə sôwâ um ti ta'a: Ama dan dlay mba cu ne vari ne kə sôwâ məsin kədan kuni ti duwa' rum mi, say sum po' fur tawa#1Sa 21.1-6.» 5Zezu faŋ la' ne nday kəreme: «Vay sumra' nə Bârî fəta pemâya.»
Swə mə mar ɓa mara
(Mat 12.9-14; Mak 3.1-6)
6Kə fəta pemây sôwâ Zuwif məsin, Zezu ze ta rawti so Ifray sôwâ Zuwif ɓay təŋ kə ta' kwa wə hana. Swə məsin kəta' wə han, ɓa fun rum mə mara. 7Sum pay zu dan dlay kə kul sôwâ Zuwif mə ɗe kə Farisiyen njay kuni i ta wa Zezu kədan handay kar ke məsin mum də car swə nə kə fəta pemây su na, zə handay wa' kədan handay tum sem rum wa kwa məni mum wə gi. 8Ama Zezu we dan ɗik nday, ɓay mum la' ne kə swə mə mar ɓa mar na: «A car ca kor sôwâ daŋ'ŋ.» Swə nə car kor ndaya. 9Kəki rum, Zezu ci vun ndaya: «Na wə ci vun ri, dan dlay mba ne vari ne mba kədan mə gi kwa mə ɓay kə fəta pemây su? Ko gi kwa mə bro' su? Kədan siɗ swə su? Ko ci bə rum su?» 10Zezu tle i kar sôwâ məni gay' reŋ wa rum kə ndi dəraŋ dəraŋ, mum faŋ la' ne kə swə na: «A tle ɓa ru.» Mum tle ɓa, ɓay ɓa rum faŋ ɓaya. 11Ama sôwâ məsin ra' bak juk, ɓay handay təŋ kə ge dan kə nji mbok nji wa kwa məni handay də gi kə Zezu.
Zezu da' sum sin um guɓ wa hoɓo
(Mat 5.1; 10.1-4; Mak 3.13-19)
12Kəri rum, Zezu ur ta wa igway' kədan mum in dan kə Ifray wə han, mum bar dukri ci' kə in dan kə Ifraya. 13Kəri məni bəka ra' si, mum ɗe sum ta zə rum, ɓay mum da' sôwâ guɓ wa hoɓ du nday məni mum ɗe nday kə sum sini. 14Semɗe nday ni na: Simoŋ, Zezu cin sem rum ɗe kə Piyer ta', kə njər rum Andre, Zakə, Zaŋ, Filip, Bartelemi, 15Matiye, Tomas, Zakə mə vay Alfe, Simoŋ mə ɗe kə Zelot#6.15 Zelot nə wə ta' swə məni nyen peɗ kə sây' zə nya umu., 16Yudas mə vay Zakə, kə Yudas Iskariyot, swə məni faŋ bə cukur Zezu.
Zezu ta' dan ne kə raw sôwâ ɓay car sum gaɓa
(Mat 4.23-25; Mak 3.7-11)
17Zezu dam mbə wa igway' kə nday, handay mbə gay' zə nya wə ri mə pəɗak pəɗak kə sum ta zə rum rawa. Raw sôwâ məsin kəta' wə han, handay car mbə nya Zude daŋ', kə so Jeruzalem, ɓay so Tir kə Sidoŋ məni wə hay' ya mbi. 18Handay mbə kədan handay mun kwata' um, ɓay kədan mum car gaɓ nday ta'a. Mum 'way gam wa sôwâ juk ta'a. 19Raw sôwâ daŋ' keɓ kədan handay um ɗak, zə gbəgboŋ wə pâ mbə tu rum car gaɓ nday daŋ'ŋ.
Kəɗam ɓay boni
(Mat 5.1-12)
20Zezu tle i kar sum ta zə rum kə ndi ɓay la' ne ndaya:
«Kəɗam zə ri, hi sum ca,
zə hi də ke kə Ifray
wə ri məni mum wə də suk jwə wa sôwâ umu!
21Kəɗam zə ri, hi sôwâ məni kə mê' mgbaŋ ni na,
zə hi də sa' rawti.
Kəɗam zə ri, hi sôwâ məni wə ci' mgbaŋ ni na,
zə hi də mâya.
22Kəɗam zə ri kəri məni sôwâ wə mi sî, wə mi vaɗ, wə mi i, ɓay wə mi jeɗ ce' ndə sôwâ mə bro' zə Vay sumra'a#1Pi 4.14! 23Kəɗam zə ri kəri məni kwa rum də gi wa ri, ɓay i dam də fray kə tuk kəɗam, zə bal cik mə mbri wə mi ji wafraya. Zə ba mbri randay gi ndəna' kə sum ka' dan ta'a#2Izd 36.16; Sin 7.52.
24Ama boni wa ri, hi sum ndak,
zə hi fe kəɗam mə hi si!
25Boni wa ri, hi sôwâ məni sa' rawti mgbaŋ ni na,
zə hi də ke kə mê'ê!
Boni wa ri, hi sôwâ məni wə mây mgbaŋ ni na,
zə hi də ke kə ɗik dan kə ci'i!
26Boni wa ri kəri məni sôwâ daŋ' wə ge
dan mə ɓay wa ri,
zə ba mbri randay ge dan ndəna'
wa sum ka' dan mə hay dan ta'a.»
I bə sum sî mi
(Mat 5.38-48; 7.12)
27«Ama na in mi ne, hi sôwâ məni wə mun dan ge mana: I bə sum sî mi, i gi kwa mə ɓay hay' sôwâ məni wə mi sî, 28i kuswa' sôwâ məni wə ge nê' ri, i in dan kə Ifray zə sôwâ məni wə mi riki. 29Swə la' ge zə hum ne nu ɗaw si, a faŋ ga' məsin cin ne num ta'a. Swə la' ra' mbraw jewre wû si, a ar num ra' mə nyêw rum ta'a. 30Swə la' o kwa ɓa ru si, a ne num, ɓay swə la' tle kwa wû si, a ci vun rum za' mi. 31I gi kwa daŋ' zə sôwâ məsin, ce' ndə hi wə wa' i handay gi zə ri.
32Hi la' wə bə sôwâ məni wə mi bə taw si, zə mi hi wə ji soko wa rum su? Zə sum gi kwa mə bro' wə bə sôwâ məni wə nday bə ta'a. 33Hi la' wə gi kwa mə ɓay wə hay' sôwâ məni wə gi kwa mə ɓay wə hay' ri taw si, zə mi hi wə ji soko wa rum su? Zə sum gi kwa bro' wə gi ndəna' ta'a. 34Ɓay hi la' wə ne bal kwa ne kə sôwâ məni hi wə ɗik i handay də po' bal rum taw si, zə mi hi wə ji soko wa rum su? Sum gi kwa mə bro' wə ne bal kwa ne kə sôwâ mə bro' məsin kədan handay də fe bal rum kəreme. 35Zawa, i bə sum sî mi, i gi kwa mə ɓay hay' nday, ɓay i ne bal kwa ne nday dan ɗik dan i handay də po' bal rumu. Hi də fe bal cik mə mbri, ɓay hi də faŋ daw Ifray mə wafray, zə mum wə gi ɓay hay' sôwâ məni cu gi soko mi kə sôwâ mə bro' ta'a. 36I we ca wa sôwâ ce' ndə Ba mi wə we ca wa sôwâ.»
I ɓok dan wa sôwâ məsin mi
(Mat 7.1-5)
37«I ɓok dan wa sôwâ məsin mi, ɓay Ifray cu də ɓok dan wa ri mi, i kaw sôwâ məsin kə dan mi, ɓay Ifray cu də mi kaw kə dan mi, i vrum kwa mə bro' məni sôwâ məsin wə gi hay' ri, ɓay Ifray də vrum kwa mə bro' məni hi wə gi nə ta'a. 38I ne kwa ne kə sôwâ məsin, ɓay Ifray də mi ne kwa ta' a. Mum də nyen kwa də kwa kənji' kwa ɓay də reɗ də han jəkul kul hâ njay də nya, ɓay mum də njay də jiba mi. Kwa kənji' kwa məni hi wə kənji' kwa ne kə sôwâ məsin kə ndi, Ifray də kənji' mi ne kə ndi ta'a.»
39Zezu faŋ in dan mə gəgan ne ndaya: «Dəŋâr gak kaw səja dəŋâr məsin ta kə ndi si su? Mum la' gi ndəna' si, handay hoɓ jak də njay də zra#Mat 15.14. 40Bə wum kwa cu pâ bə ta' kwa um kə mbra' mi, ama bə wum kwa daŋ' məni la' wum kwa ndo' si, mum də ke ce' ndə bə ta' kwa umu#Mat 10.24-25; Zaŋ 13.16; 15.20.
41Zə mi ha kar bubuɗ gu məni wə i vay ba wû, ama ha cu gak we gu mə i ru mi su? 42Ha, swə məni cu gak we gu məni wə i ru mi, ha gi ma kədan ha in ne kə vay ba wû: "Vay ba man, a ar nan tle bubuɗ gu məni wə i ru su?" Ha bə vur vur, a par gu məni wə i ru cop, ɓay ndəna' ha gak weri ɓay kədan ha tle bubuɗ gu məni wə i vay ba wû ɓo.»
Gu kə vra' umu
(Mat 7.16-20; 12.33-35)
43«Gu mə ɓay cu gak vra' vra' gu mə bro' mi, ɓay gu mə bro' cu gak vra' vra' gu mə ɓay məta'a. 44Swə gak we gu daŋ' kə vra' ndaya: Swə cu ɓe vra' tərum wa ŋây' mi, ɓay swə cu ɓe vra' viŋə wa ŋây' mə ɓu məta'a. 45Ndak mə ɓay wə pâ mbə vunduk swə mə ɓay, ɓay ndak mə bro' wə pâ mbə vunduk swə mə bro' ta'a. Zə vun swə wə ge dan məni nyen wə vunduk rumu#Mat 12.35.»
So hoɓo
(Mat 7.24-27)
46«Zə mi hi wə man ɗe kə Bârî, Bârî, ɓay hi cu gi kwa məni na in ne ni nə mi su? 47Sa su daŋ' məni mbə hay' rin, wə mun dan man, ɓay wə gi kwa məni na in ne num, na də mi ta' mum ra' nji kə sa su. 48Mum ra' nji kə swə məni təŋ ɗam so: Mum dla zra rum hâ day pra, ɓay mum tor zu rum wə hana. Kəri məni mbi mbə haɓ ta rəka ɓay pla' ndap zə so rum, mbi rum cu gak nyen zə so rum hel' mi, zə so rum ɗam ɓaya.» 49«Ama swə məni wə mun dan man, ɓay cu gi kwa məni na in ne num nə mi, bə rum ra' nji kə swə məni ɗam so um wa nya dan dla zu rumu. Kəri məni mbi mbə pla' ndap zə so rum, kəkor sar, so rum nde ta nya ɗənok cete.»
Currently Selected:
Lukə 6: KMN
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Le Nouveau Testament et Psaumes en Peve © Alliance Biblique du Tchad, 2014.