Lukə 3
3
Dan ka' Zaŋ-Baptistə
(Mat 3.1-12; Mak 1.1-8; Zaŋ 1.19-28)
1Kəri məni jwə mə mbri mə nya Romə mə ɗe kə Tiber suk jwə day kim guɓ wa vatl, kəri rum, Poŋsə Pilatə suk toŋ wa nya Zude, Herodə suk jwə wa nya Galile, njər rum Filip suk jwə wa nya Iture kə nya Trakonitə, ɓay Lizaniyas suk jwə wa nya Abilen. 2Ɓay Hana kə Kayif, handay sum rôwâ mə du sum po' furu. Kəri rum, dan Ifray mbə wə vunduk Zaŋ, vay Zakariya, wə du gopo. 3Zaŋ təŋ kə gaŋ nya daŋ' məni wə hay' ze Zurdeŋ, mum ka' dan ne kə sôwâ: «I faŋ vunduk ri, ɓay i ve baptem kədan Ifray də vrum kwa mə bro' mi.» 4Ce' ndə məni bə ka' dan mə ɗe kə Esaya wây' wə du ɗerwa umu:
Wor swə wə ka' dan du igopo:
I gila' vari zə Bârî.
I gi vari rum səreŋ ne numu!
5Ze daŋ' də njiki.
Igway' kə ɗol daŋ' də tum faŋ vun nji.
Vari mə gəgan də car səreŋe.
Vari mə gəlik gəlik də faŋ fetete.
6Ɓay sumra' daŋ' də we siɗ Ifraya.
7Raw sôwâ mbə hay' Zaŋ kədan mum gi baptem nday ne. Mum la' ne ndaya: «Hi zə zep kay', sa ta' ne ni i hi gak siɗ wə kor bak Ifray məni wə də mbə nə su#Mat 12.34; 23.33? 8I gi kwa məni wə ta' i hi faŋ vunduk ri si ɓay i təŋ kə ɗik wə vunduk ri i Abraham nə ba mbri ramba mi. Zə na in mi ne, Ifray gak ra' gway' məni kuni, ɓay nday gi faŋ daw Abraham#Mat 7.19! 9Ceɗ cin həre' kədan tum gu wə zu tlor rumu. Gu daŋ' məni cu vra' vra' mə ɓay mi, sôwâ də tum njay də ku.»
10Raw sôwâ faŋ ci vun Zaŋ: «La' ndəna' si, namba də gi ma su?» 11Mum ɗam vun ndaya: «Swə məni kə mbraw hoɓ, say nə par ɗaw ne kə swə məni cu kə ndi mi, ɓay swə məni kə kwati, say nə gi ndəna' ta'a.» 12Sum ɓawa kwa mbə hay' Zaŋ kədan mum gi baptem nday ne ɓay handay ci vun rumu: «Bə ta' kwa, namba də gi ma su#Luk 7.29?» 13Mum ɗam vun ndaya: «I ɓawa səlay ɓa sôwâ pâ məni dan dlay ne vari rum nə mi.» 14Soje kuni ci vun rum ta'a: «Ɓay mə namba, namba də gi ma su?» Mum ɗam vun ndaya: «I ɓar səlay ɓa swə ɗaw kə gbəgboŋ ko kə hay dan mi, ama i tuk kəɗam kə səlay məni hi wə fe zə bal cik mi nə sara.»
15Sôwâ wə ji kə mê' wə vunduk nday, ɓay handay daŋ' wə ɗik wə vunduk nday i ke məsin Zaŋ nə Kris su na. 16Zə rum, Zaŋ la' ne ndaya: «Na wə gi baptem mi ne kə mbi, ama swə məsin məni pâ nan kə mbra' si, wə də mba. Na cu nde i goɓ kədan na ulay' zew tərak um mi. Mum də gi baptem mi ne kə Simbeɗ mə Kəleŋ ɓay ku. 17Mum kə kwa sa' u wə ɓa rum kədan mum sa' rəfê də rəka ar u ɓay mum də ra' u njay də zəna, ama mum də ye' rəfê rum kə ku məni cu mar i kpe mi.»
18Kəri məni Zaŋ ka' Dan mə Kəɗam, mum ta' kwa məsin cem cem juk ne kə sôwâ. 19Ama mum dan jwə Herodə zə mum tle Herodiya, mok njər rum, cin, ɓay zə mum gi kwa mə bro' məsin cem cem juk ta'a. 20Zə dan rum, Herodə faŋ gi kwa mə bro' məsini: Mum kaw Zaŋ ge ta so daŋgay'i.
Zaŋ gi baptem ne kə Zezu
(Mat 3.13-17; Mak 1.9-11)
21Kəki məni sôwâ daŋ' fe baptem si, Zezu fe baptem ta'a. Kəri məni mum wə in dan kə Ifray, wafray ar vun, 22ɓay Simbeɗ mə Kəleŋ dam mbə wa rum kə tu ce' ndə kuruk, ɓay wor car mbə wafray ini: «Ha Vay man məni na ba. Na tuk kəɗam kə ru.»
Zu tlor Zezu
(Mat 1.1-17)
23Kəri məni Zezu təŋ gi sin um, mum kə kim gu hinji'i. Sôwâ daŋ' kar i mum vay Zozef, məni vay Heli#Tzk 22.2; Nye 2.7; Esa 42.1; Mat 3.17; Mak 1.11; Luk 9.35, 24məni vay Matat, məni vay Levi, məni vay Melki, məni vay Zanay, məni vay Zozef, 25məni vay Matatiyas, məni vay Amos, məni vay Nahum, məni vay Esli, məni vay Nagay, 26məni vay Maat, məni vay Matatiyas, məni vay Semeyin, məni vay Zozek, məni vay Zoda, 27məni vay Zohanan, məni vay Resa, məni vay Zorobabel, məni vay Salatiyel, məni vay Neri, 28məni vay Melki, məni vay Addi, məni vay Kozam, məni vay Elmadam, məni vay Er, 29məni vay Zezu, məni vay Eliyezer, məni vay Zorim, məni vay Matat, məni vay Levi, 30məni vay Simeyoŋ, məni vay Yuda, məni vay Zozef, məni vay Zonam, məni vay Eliyakim, 31məni vay Meleya, məni vay Mena, məni vay Matata, məni vay Natan, məni vay David, 32məni vay Jese, məni vay Obed, məni vay Bowaz, məni vay Sala, məni vay Nason, 33məni vay Aminadab, məni vay Admin, məni vay Arni, məni vay Esrom, məni vay Fares, məni vay Yuda, 34məni vay Yakub, məni vay Isak, məni vay Abraham, məni vay Tara, məni vay Nakor, 35məni vay Seruk, məni vay Rago, məni vay Falek, məni vay Eber, məni vay Sala, 36məni vay Kaynam, məni vay Arfasad, məni vay Sem, məni vay Nowe, məni vay Lamek, 37məni vay Matusala, məni vay Enok, məni vay Zared, məni vay Malelel, məni vay Kaynam, 38məni vay Enos, məni vay Set, məni vay Adam, məni vay Ifraya.
Currently Selected:
Lukə 3: KMN
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Le Nouveau Testament et Psaumes en Peve © Alliance Biblique du Tchad, 2014.