Maatiusiup Aglangit 6
6
Ajuqsaqtunik Ikajurniq
1“Kamatsiarissi ukpirnirmik pinasuarnisi asitsinnut, inungnut takuksaunasutuinnarlusi piqunasi; inungnut takuksaunasutuinnarussi, akiliqtauniksaqannginnassi Ataatasinnit qilangmiittumit.
2“Taimaimmat tunirrusirussi, tunisinisi qaujijaunasuarlusi tittulautimik nilliqtitsijariaqanngilasi, takkurmuuqtutitut#6:2 Takunnaqtaullutik pitsiannguaqtut taakkua Juutit ukpirnirmut katimavinginni aqqutinilu, taimailiuqpangmata inungnut niqtuqtaujumallutik. Sulijumik uqautivassi, akiliqtaujariiqput. 3Tunirrusiruvilli, saumiit qaujititaksarinngilat taliqpikpit tunirrutinginnik. 4Tunirrusirniit qaujijaunianngimmat; Ataatavillu tamainnik takunnaqtuup akilirumaaqpaatit.”
Qanuq Tuksiaqtuksaungmangaatta
Luukasi 11:2-4
5“Tuksialiraangassi takkurmuuqtutitut taimaittuksaunngilasi; taikkua inungnut takunnaqtaujumatuinnaqtlutik tuksiasuungungmata nangirlutik, Juutit ukpirnirmut katimavinginni aqqutinilu. Sulijumik uqautivassi, taakkua akiliqtaujariiqput. 6Tuksialiraangassili, inutuuvigijunnaqtassinnut itirissi, ukkuanga ukkuarlugu, Ataatasi takuksaunngittuq tuksiarvigiliqsiuk, Ataatasi tamainnik takunnaqtuup akilirumaaqpaasi.
7“Tuksiaraangassi, uqausirnik taakkuningatsainnaq takilitillugit atuqtuksaunngilasi, ukpinngittutitut; taikkua amisunik kisiani uqausiqarlutik tusaqtaujunnarasugingmata. 8Taikkuatitut taimaittuksaunngilasi, Ataatasi qaujimajariirmasi sunamik pijariaqarmangaassi, tuksialauqtinnasiluunniit. 9Taimaimmat imaak tavva tuksiaqtuksauvusi:
‘Ataatavut qilangmiittutit: atiit ijjurnaittuq isumagijautsiarli;
10Ataniuniit qailaurli; pijumajait maliktauli nunami,
Suurlu qilangmi maliktaungmat.
11Ullumi niqiksattinnik tunisivigitigut.
12Piunngittulinivut isumagijunnaikkit,
Taimaaktauq inuuqatitta piunngittuliningit isumagijunnairattigu.
13Piunngittumik pijumisaaqtautittailitigut, saputitigulli Saataanasimit.
[Ataniuniq ajugaqannginnirlu inuuqannirjuarnirlu pigigavigit isuqanngittumut, aamin.]#6:13 Ijjujutuqait ilanginni pitaqanngilluni ilanginni ilijausimalluni’
14“Inuuqatissi piunngittuliningit isumagijunnairniarussiuk, Ataatasittauq qilangmiittuup piunngittulinisi isumagijunnairniarivait. 15Inuuqatissili piunngittuliningit isumagijunnairniangikkussigik, Ataatasittauq piunngittulinisi isumagijunnairniannginnivait.”
Nirittaililuta Qanuq Pijuksaungmangaata
16“Nirittailijaraangassi, takkurmuuqtutitut taimaittuksaunngilasi kiinarmingnik takuminarunniiqtitsijutitut, tauttumigut takuksaunasuaqpangmata nirittailinirmingnik qaujijaujumallutik. Sulijumik uqautivassi, akiliqtaujariiqput. 17Ilissili nirittailijaraangassi, kiinasi salummaqsatsiarlugu illairlusilu pijuksauvusi, 18asitsinnit qaujijaunianginnassi nirittailinissinnik Ataatasi kisimi, takuksaunngittuup qaujimaniaqpaasi; Ataatasi inutuutillusi piniarnissinnik takunnaqtuup, akilirumaaqpaasi.”
Qilangmi Ajuqsanngijjutiksat
Luukasi 12:33-34
19“Nangminiq ajuqsanngijjutiksassinnik katiqsuiniarasi tamaani nunami, qupirrunut qallunaaqtanik nirisuunut, manngiqturimullu sukkutaujunnaqtunik, tigliktinullu isaaqtaulutik tigliktaujunnaqtunik. 20Nangminirli ajuqsanngijjutiksassinnik katiqsuingaalirissi qilangmi, qupirrunut qallunaaqtanik nirisuunut, manngiqturimullu sukkutaujunnanngittunik, tigliktinullu isaaqtaujunnanngittumik tigliktaujunnanngittumiglu. 21Piqutinnarijavit iningani uummatiittauq taikaniinniarivuq.”
Timiup Qaummaqqutinganik
Luukasi 11:34-36
22“Ijiik naniruanguvuuk timimut. Ijiikkik taututsiaqpatik timilimaat qaumaniaqpuq; 23ijiikkigli takpiittuukpatik, timilimaat taaqtumiinniaqpuq. Qaumajuq ilingniittuq taaqsikpat, taaqtummarialuuniaqpuq!”
Piqutillu Guutilu
Luukasi 16:13; 12:22-31
24“Angajuqqaangnut marruungnut atautsikkut pijitsiqtuqarunnanngilaq; aippaa uumigigajaqpaa aippangalu nagligilugu; aippaa kamagitsiarajaqpaa aippangalu narrugilugu. Taimaaktauq atautsikkut pijitsirunnanngilasi Guutimik kiinaujaniglu.
25“Taimaimmat uqautivassi: inuusissinnik isumajaarutiqarniarasi niqinik, imiksatsinnigluunniit, annuraaksatsinnigluunniit. Inuusisi annirnarniqsaunngilaq niqinit, timisilu aturniqsaunngilaq annuraanit? 26Tingmiat takusigik qangataqattaqtut: piruqsiaksanik kanngaqsuivanngilat, katiqsuivagatiglu niqikkuvingmingnut; taimaikkaluaqtillugit Ataatasi qilangmiittuup niritiqattaqpait! Pillariuniqsaunngilasi tingmianit? 27Nallisi inuusirminik uigusijunnaqpaa#6:27 Timiminik pirukkanniqtitsijunnaqpaa? Guriikititut taimaak tukiqarunnarmijuruuq isumajaarutigiluniuk?
28“Sungmat annuraat isumajaarutigijariaqaqpisiuk? Takulauqsigik makua takuminaqtut nunarait, qanuq pirurmangaata; sananngimmata immingniglu annuraaliuratik. 29Uqautivassi Suulumuuni Angajuqqaarjuaq ajuqsanngittuugaluarluni annuraaqsimavalaunngilaq nunaraqtitut takuminaqtigijunik. 30Piruqtut makua Guutiup taimaak takuminaqtimmagit, ullumi tamaaniittut qaukpat pitaqarunniirniarmijut, ikitaulutik qijugijauniarmata, Guutiup annuraaksassinnik tunisivigijunnarniqsarinngilasi ukpirnikittusi!
31“Taimaimmat isumajaarutiqarniarasi isumalusi imaak; nakilli nirijaksaqarnialiqpita? Uvvaluunniit nakilli imiksaqarnialiqpita? Sunamiglu annuraaksaqarnialiqpita? 32Tamakkua taimailiurnit Guutimut ukpinngittunit isumagijaunginnaqpangmata. Ataatasili qilangmiittuup qaujimavaasi tamakkuninga tamainnik pijariaqarnissinnik. 33Guutiup Ataniuvinga pinasuaqqaaqsiuk, piniaqtauqujanga sivulliutilugu, tavva tamakkuninga tamainnik pijariaqaqtassinnik tunisiviginiaqpaasi. 34Taimaimmat isumajaarutiqarniarasi qaukpauniaqtumik; ulluuniaqtuq nangminiq isumajaarutiqalaarmingmat. Ulluup atausiup quviananngittuqtaqarningit ilakkanniriaqanngimmata.”
Currently Selected:
Maatiusiup Aglangit 6: EAIBR
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Eastern Arctic Inuktitut Bible (Romanized) © Canadian Bible Society, 2022-2023.