Matiyu 7
7
Mɔɔn mánngan kɛ ɲɔ́ɔn ngítitɛɛ
Luka 6.37-38,41-42
1«A kɛ́nan kíti tɛ́ɛ lɔ ka, kó óo kó é kɛ ke Ala kɛ́nan kíti tɛ́ɛ a ka. 2Kɛ mansɔɔ a kɛ́ mɔɔn tɔ́ ólu ta kíti o tɛ́ɛ tɛ́nmɛnne, Ala káa álee ta kíti o tɛ́ɛ céne. Aa dɔ ólu tá ó swáan swáannikɛfe mín nɔ, Ala káa a tá ó swáan o lé lɔ́. 3Tíkoo mín ŋé í bhádhye ŋó ɲán o mán, mínnɛɛn lé kósɔn ii ó mánfɛɛla, lɔ́ɔguun mín ŋé í tá ó mán, i tɛ́ ó yéla a? 4I lo ŋé sé kɛ́ fɔ i bhádhye ŋó yɛ́ díi kó: ‹Í lɔ́ tíkoo é í ɲán mán, i lɔ́ ké ní a bhɔ́›, kɛ́ɛ ké lɔɔguun ŋé íle tá ɲán o mán? 5Fyáangafo ó, lɔɔguun mín ŋé í tá ɲán ó mán, o bhɔ́ ótun. O lɔ, i yáa yéli kɛ́ cɛ́ɛne, kɛ́ tíkoo ó bhɔ́ i bhádhye ŋó ɲán o mán.
6A kɛ́nan fé nzɛ́nnɛnyanin ŋó bhyáa wúu ólu kɔɔ, ní o tɛ i yáa í ɲán yɛ́ɛman a mán kɛ a lɔ́falanvala. A kɛ́nan a yɛ́ kɔ́ɔnngoo ólu bhyáa gbóyoonin nú kɔɔ, ní o tɛ i yáa táaman kɛ́ a ka.»
Dɛ́liliko o
Luka 11.9-13
7«Á kɛ́ fé ŋóo fé ndɛ́li Ala fɛ́, á yáa o sɔ́ɔ, a kɛ́ fé ŋóo fé ɲíin a fɛ́, a yáa o yé, a kɛ́ í ka nányɛɛ Ala man kó óo kó la, Ala yáa o kó ó dhyáa ló a lɔ́. 8Áa céne, mɔɔn óo mɔɔn kɛ́ dɛ́lili kɛ, o yáa sɔɔ, mɔɔn mín ngɛ ɲíinnin kɛ, o yáa yéli kɛ, mɔɔn mín ngɛ lá ó mangbasi, i yáa lá ó láka o tíi ó yɛ. 9Álee mínnɛɛn le dhyénjɛ wɛ́ɛ búlu kófɔ a yɛ́ tó áa káwa di a man, 10Wáman kɛ san di a man kɛ́ɛke dhyé ŋóo yɔ́ɔ lé kófɔ? 11Áa yóo né wé kpán, wáa áa sháa fémɛɛ lú díla a dhyé ŋolu mán! Tó a Fá mín ŋé sá ŋó lɔ, o yáa sé í bánan kɛ́ fémɛɛ lú díla a mán, ni a kɛ́ a dɛ́li a?
12Álee fɛ́ ké mɔɔn tɔ ólu a kó mínnu kɛ́ a yɛ́, ále a o kɛ́ ilee lu yɛ: Musa ní céla tɔ́ ólu kó mínnu sɛ́wɛ kitabu o lɔ, olu lɔ́kan ŋó lée wé.»
Ɛliyanan o sɔ́ɔ a gbɛ́ɛ
Luka 13.24
13«Lá mín ŋan lɔ́ɔ, áa lo ŋo lé fɛ́, kɛ mansɔɔ lá mín ŋé mɔɔn lásela yaananman lɔ, o lá ó a bwó, a sháa o ló ndáaman fwáayanin ɲe. Tó mɔɔn mín núu o sháa o tála, o léelu a sháa. 14Wáa ɲáanmanɲan óo sɔɔla ywáa mínnɔn, o lá ó lé a lɔ́ɔ, o sháa o lé táamankɛ a gbɛ́ɛ. Tó mɔɔn mín núu o sɔ́ɔla, olu mán nzháa.»
Céla kóo ŋolu
Luka 6.43-44
15«Áa í yɛ́ɛ myaan céla kóo ŋolu man. Ii nánla a saala lé óyoo Saadhye nú, waa ké kóngowuu lée lúu wé. 16Á yáa lɔ i dhyé ŋó lée lúman. Mɔɔn é sháa lɛ́zɛnnye mɔ́la ŋwɛ́ɛnnzu ó lá díi, wáman kɛ tólodhye mɔ́ lɛ́ɛninɲii ó lá? 17Yíibhɛɛ óo dhyé mɛ́ɛbhɛɛ lé kɛ́la, tó yíi yóo ŋóo dhyé ɲóo née lú kɛ́la. 18Yíibhɛɛ o súu óo súu tɛ́ sé dhyéɲoo ngɛ́la, yíiyoo nzúu óo súu tɛ́ sé dhyémɛɛ kɛ́la. 19Yíi súu óo súu man kɛ́ dhyé mɛ́ɛ kɛ́la, fɔ́ kɛ o tɛ́ɛ lé kɛ a lafii tá lɔ. 20O ɲán o mán, á yáa lɔ i dhyé ŋólu mán.»
Kaamɔɔndhye mín ŋé Ala dhyáaɲɛnngo ó kɛ́la óni mín ndɛ́ kɛla
Luka 13.25-27
21«Mɔɔn mín mbɛ́ɛ fɔ́la mán kó: Mantii ó, Mantii ó, o bɛ́ táa Ala yɛ́ Mansaya ó hɛ́lɛ o sɔ́ɔ dhyaalagbeyala la lɛ! Nvá mín ŋé sá ŋó lɔ, mɔɔn mín núu o dhyáaɲɛnngo ó kɛ́la, o léelu káa Ala yɛ́ Mansaya ó hɛ́lɛ o sɔ́ɔ.» 22Ala yɛ kítitɛɛlo ŋo kɛ́ sé, mɔɔn shɛ́ɛman ɲáan fɔ ɲɛ́n kó: Mantii ó, Mantii ó, án ni célayakoman lu láse íle lé tɔ́ɔla, án ni lámansa yóo nú gbɛ́ íle lé tɔ́ɔla, án ni káwananngo shɛ́ɛman ngɛ́ íle lé tɔ́ɔla, bháa díi? 23Ɲáan a láse o mɔɔn ólu mán ngó: «Mán a lɔ́ tún; Áa í cɛ́bhɔ nán, ále kóyoongɛbhaa olu.»
Bhó nvyaa olu
Luka 6.47-49
24«Oo lɔ mínngɛ, ŋwɛ́ɛn kóman mínnu fɔ́ nín, mɔɔn ó mɔɔn kɛ́ ó kóman ó lɔ́myɛn kɛ́ a bháto, o tíi ó yáa kɛ́ óyoo mɔɔn hákiiman mín ŋwɛ́ɛn a yɛ bhó ŋo lɔ́ fáa ó ka. 25Sá ŋóo bé, kwɔ ólu fá fɔ́ kɛ waawaa, fwɛ́ɛnba é bhyáa o bhó ŋó ka. Wáa a man bé, kɛ mansɔɔ bhónzu ó gbáannin ndɛ́ɛ fáa o le ka. 26Wáa ní wɛɛla dhyaa mínnu fɔ́la nín, ni mɔɔn mínnu kɛ́ olu myɛ́n kɛ í bá i lataaman ó mán, o tíi ó káa kɛ́ lé wé ŋóo mɔɔn Hákiinda mín wɛɛ bhó nɔ́ cɛnfuywaa lɔ. 27Sá ŋóo bé, kwɔ ólu waawaa, fwɛ́ɛnba é bhyáa o bhó ŋó ka tó óo bé kɛ wéyaa féfe.»
Ɛnza ɲɛn sébhaaya ó
28 Ɛnza é wɛɛ a yɛ kóman olu la wáati mín nɔn, a yɛ kaangbɛseɲan o tɛ wɛɛ yaman o kɔ́ɔnnɔn bha. 29Kɛ mansɔɔ a tɛ́ɛ lakawanin kɛla óo fáan é mɔɔn mín móo, wáa a tɛ tɛ́ a kɛ́la óyoo í yɛ́ sɛliya kaamɔɔn olu.
Currently Selected:
Matiyu 7: MXX
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© (Active), Wycliffe Bible Translators, Inc. All rights reserved.