Génesis 12
12
Yawe “Noano wahajaro” ni payoha Abrãre
1Cʉ̃ nʉmʉ Yawe Abrãre õ sehe ni yahuha:
—Mʉ ya yahpare, mʉ pʉcʉre, mʉ pocore, ã jichʉ mʉ coyea poto jiina cʉ̃hʉre duhu dojoa wahaga. Cʉ̃ yahpa mʉhʉre yʉ ñohti yahpapʉ wahaga mʉhʉ. 2Mʉhʉre õ sehe yoa, noano wahachʉ yoaihtja. Mʉ panamana, mʉhʉre ji nʉnʉ tihtina cjihti payʉ wahachʉ yoaihtja. Ã yoa mʉhʉre masa ti wacũnohoriro yoa, tuhsʉ, noano wahachʉ yoaihtja. Tí yʉ noano wahachʉ yoaa mehne mʉhʉ sehe painapʉre, payʉ masare noano waha turiachʉ yoahtiro cjihto jira mʉhʉ. 3Mʉhʉre noano yoainare yʉhʉ cʉ̃hʉ noano yoaihtja. Mʉhʉre ñano yoainare yʉhʉ cʉ̃hʉ buhiri dahreihtja. Mʉhʉ mehne jipihtina masa curuaripere noano wahachʉ yoa turiaihtja —ni cũha.
4To ã nichʉ tʉhoro, Abrã Yawe dutiro seheta yoaha. To jiri maca, Harãi jiriro Canaã yahpapʉ waha turiaha. To jimari macare wijaa, Canaã yahpapʉ waharo, tiro setenta y cinco cʉhmari cjʉaha. 5Tiro waharo, to namono Saraire, to bahʉro macʉno Lotere, ti cjʉaa jipihtiare, ã jichʉ ti cahamaca cʉ̃hʉ, jipihtinare Harãi jia, ti bocarina cʉ̃hʉre naa pahñoha. Waha, Canaã yahpapʉ sʉha jʉna.
6Tói sʉro, Abrã waha namo, te Siquẽpʉ sʉha. Tí maca cahai cʉ̃dʉ yucʉcʉ encinacʉ ducuha. Tʉ docai tí yahpa macaina cananeo masa ti cohamanare ti ño payori cuhtu jiha. Ti ño payori cuhtu Moré wama tiri cuhtu jiha. Tí cuhtu cahai Abrã cʉ̃hʉ sehe ti wʉhʉserire tʉã dapo, jisiniha. 7Tói Yawe sehe Abrãre bajua, õ sehe niha:
—Mʉhʉre ji turia dijahtina cjihtire ahri yahpa, Canaã yahpare waihtja —niha.
To ã nichʉ tʉhoro, Abrã sehe tãa mehne dahre mʉori tuhu yoa, tirore ño payoha.
8Baharo tʉ̃ yucʉri payʉropʉ waha namoha tjoa. Wahaa, Betel wama tiri macare yʉhdʉa, sʉ̃ mʉja taro sehe waha, tópʉ ti wʉhʉserire tʉã dapo, jisiniha tjoa. Tói ti jichʉ, Betel sehe sʉ̃ sãano caha sehe tjuaha. Ã yoa pa maca Ai sehe sʉ̃ mʉja taro caha sehe tjuaha. Tó cʉ̃hʉre paro tãa mehne dahre mʉori tuhu yoa, Yawere ño payoha Abrã.
9Baharo wahaha tjoa. Soero ji wahcã, pʉ tí yahpa Canaã yahpai jiri yahpa Néguebe wama tiri yahpapʉ sʉha.
Abrã Egipto yahpapʉ mahari pja jiro wahamaha
10Tí pjapʉre Canaã yahpare tuaro jʉcaro wahaa tiha. Ã wahachʉ ñʉno, Abrã mahari pja Egipto yahpapʉ jiro wahaa tiha. 11Tí yahpapʉ to sʉhto panocã, Abrã to namono Saraire õ sehe niha:
—Tʉhoga yʉhʉre. Numino noaricoro jira mʉhʉ. 12Ã jia pa tehe yoaa, Egipto macaina mʉhʉre ñʉa, “To namono noaputiaricoro jira” niboca. Ã nia, yʉhʉre wajã duaboca, mʉhʉre maa taa. 13Ã jico ti sinitu ñʉchʉ, “Yʉhʉ Abrã bahoro jija” ni, yahuga tinare. Mʉ ã ni yahuchʉ, yʉhʉre wajãeraboca. Mʉhʉre yoa, yʉhʉre noano yoaboca —niha to namonore.
à ni tuhsʉ, tina tópʉ waha, sʉha Egipto yahpapʉ. 14Ti sʉchʉ, tó macaina sehe to namono noaricoro to jichʉ ñʉha. 15à yoa Egipto macariro faraõ to doca macaina pʉhtoa cʉ̃hʉ ticorore ñʉha. (“Faraõ” nino “jipihtina pʉhtoa bui pʉhtoro” nino nica egipto masa ya dʉsero mehne) Ticorore ñʉ tuhsʉata, faraõ cahapʉ waha, tirore õ sehe ni yahuha:
—Noaputiaricoro numino wihihre —ni yahuha.
Ti ã ni yahuchʉ tʉhoro, faraõ sehe to ya wʉhʉpʉ na ta duti, tópʉ ji dutiha ticorore.
16Ticorore cjʉaro, Abrãre noano yoaa tiha faraõ. Ã noano yoaro, tirore ovejaare, cabraare, wachʉare, burroare, ã jichʉ camelloare waha to nuhtina cjihti. Tinare wa tuhsʉ, to cahamaca cjihti mʉare, ã jichʉ numia cʉ̃hʉre waha. 17Wiho mejeta Saraire to machʉ ñʉno, Yawe sehe ji coaeraha. Ã ji coaeraro, faraõre, ã jichʉ to namonore, to pohna cʉ̃hʉre tuaro dohatichʉ yoaha Yawe. 18Ã waharo mehne, Abrãre pjiroca, õ sehe ni sinitu ñʉha faraõ:
—¿Dohse yoai yʉhʉre mahñori mʉhʉ? ¿Dohse yoai dóipʉta “Ahricoro yʉ namo jira” ni, poto yahuerari mʉhʉ? 19“Yʉ baho jira” mʉ nichʉ tʉhoi, ticorore namo timahi yʉhʉ. Ã jicʉ mʉ namore wiaja. ¡Pa sehepʉ naa wahaga ahricorore! —niha Abrãre.
20Ã ni tuhsʉ, faraõ to surarare õ sehe yoa dutiha:
—Abrãre to namono mehnepʉta, jipihtia ti cjʉaa mehne Egipto yahpai jiinare wionocaga —niha.
To ã nichʉ tʉhoa, to surara sehe to dutiro seheta yoaha.
Currently Selected:
Génesis 12: GVC
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Todo os direitos são reservados a:
©Missão Novas Tribos do Brasil
Rua Itália, Qd. 57 L. 5-7 – Santa Isabel
75083-310 Anápolis, GO