Joni 6
6
Jesu mbwaakasanina bantu bali zyuulu zyosanwe
(Mateyo 14.13-21; Maako 6.30-44; Luka 9.10-17)
1Lino Jesu wakainka kutala limwi lyalwizi lwa Galilii, ndolwizi lwa Tibeliyasi. 2Bantu banji bakamuccilila nkaambo bakabwene zitondezyo zyanguzu nzyaakacita mukusilika balwazi. 3Eelyo Jesu wakatanta acilundu mpaakaakukkala abasikwiiya bakwe. 4Ciindi eeco Pobwe lya Bajuda lya Kwiindilila lyakali aafwiifwi. 5Lino Jesu naakalanga wakabona nkamu mpati yabantu kaiboola kulinguwe. Wakabuzya Filipo kuti, “Ino tulaula kuli zinkwa zyakuti bantu aaba balye?” 6Pele nabuzya boobo wakali kusola Filipo kuti amvwe mbwataambe, walo mwini wakalizi kale mumoyo wakwe mbwaticite. 7Filipo wakaingula kuti, “Nikuba kuti twaula zinkwa zyamali aali myaanda yobilo tazikonzyi kuzulila bantu aaba kuti omwe-omwe alabile kabeela kaniini buyo.” 8Nkabela umwi sikwiiya uutegwa Andulu, munyina Pita, wakati kuli Jesu, 9“Nkaaka kalombe kajisi zinkwa zyosanwe zyamaila alimwi atuswi tobilo. Pele ninzi kubantu banji boobu aaba?”
10Jesu wakati, “Amubaambile bantu bakkale.” Abusena aawo kwakali bwizu bunji. Lino bakakkala ansi, mweelwe wabaalumi wakatisike kuzyuulu zyosanwe. 11Mpoonya Jesu wakabweza zinkwa eezyo, naakamana kulumba wakazyaabila baabo bakakkede. Atwalo tuswi mbubonya. Boonse bakalya akukkuta. 12Bamane kukkuta, Jesu wakalailila basikwiiya bakwe kuti babwezelele bufwefwelenga boonse bwakasyaala nibakalya bantu kutegwa kubule cilyo cinyonyooka. 13Eelyo bakabubwezelela bufwefwelenga bwakasyaala bwazinkwa zyosanwe akuzuzya zisuwo zili kkumi azibili.
14Bantu nibakabona cakacita Jesu bakati, “Ncobeni ngonguwe musinsimi ooyo uulangilwa kuboola munyika!” 15Jesu wakaziba kuti bantu bayanda kumunjizya bwami, wakainka kucilundu cimbi alikke.
Jesu mbwaakeenda amaanzi
(Mateyo 14.22-33; Maako 6.45-52)
16Kulubundu-bundu, basikwiiya ba Jesu bakaselela akuya kulwizi. 17Ooko bakanjila mubwato kuti bazubuke akuya mutala limwi lyalwizi, kuya ku Kapenaumu, Jesu taakanaboola kuti asangane ambabo. Mpawo kwakasiya. 18Mayuwe mulwizi akali kuvundauka anguzu nkaambo kaguwo pati lyakali kubbubbula. 19Basikwiiya nibakakwasula bwato kwamusinzo uuli mbuubede bakabona Jesu uzabweenda amaanzi kazabuswena aafwiifwi abwato bwabo. Bakayoowa kapati.
20Jesu wakati kulimbabo, “Ndime, mutayoowi.” 21Eelyo bakamunjizya mubwato, mpoonya bwato bwakaakusika mutala mubakali kuya.
Bantu mbubakayandaula Jesu
22Nibwakaca nkamu yabantu yakasyeede mutala limwi lyalwizi yakaziba kuti bwato bumwi bwakali kulwizi jilo mbubwakabelesya basikwiiya kuzubuka kuunka mutala limwi. Bakabona kuti Jesu lwakwe taakwe naakanjila abasikwiiya bakwe muli mbubo pe. Basikwiiya bakali balikke buyo. 23Lino amwi mato aakazwida ku Tibeliyasi akasika kucito cakali aafwiifwi aabusena bantu mpobakalida zinkwa Mwami Jesu naakamana kulumba Leza. 24Bantu aabo nibakabona kuti Jesu naa basikwiiya bakwe tiibakaliwo abusena oobo, bakanjila mumato akuya ku Kapenaumu buyandaula Jesu.
Jesu ngo cilyo cabuumi
25Nibakaakumujana mutala limwi, bakamubuzya kuti, “O Mwiiyi, ino wasika lili kuno?” 26Jesu wakabaingula kuti, “Ncobeni, tiimwanditobela nkaambo kakuziba muzeezo wazitondezyo nzecita pe, pele nkaambo kakuti mwakalya zinkwa akukkuta. 27Mutalikutandili zilyo zimana buyo, kamutandila zilyo zikkalilila kusikila kubuumi butamani. Eezi nzezilyo nzyayoomupa Mwanaa Muntu. Nkaambo ngonguwe Leza Taata ngwakazumizya.” 28Eelyo bakamubuzya kuti, “Ino tucite buti kuti tubeleke milimo ya Leza?” 29Jesu wakati, “Leza ncayanda nkuti musyome muli yooyo ngwaakatuma.” 30Lino bakati kulinguwe, “Ino kayi ulacita citondezyo nzi ncotutibone kuti tukusyome? Ulacita mulimo nzi? 31Basikale besu bakalya mana munkanda, mbuli mbokulembedwe kuti, ‘Wakabapa cilyo cizwa kujulu kuti balye!’” 32Jesu wakabaambila kuti, “Ncobeni tacili cilyo cakabapa Mozesi cizwa kujulu, pele Taata nguupa cilyo cini-cini cizwa kujulu. 33Cilyo cipa Leza nguyooyo uuzwa kujulu, walo uupa buumi kubantu bamunyika mboizulwa.” 34Bakati kulinguwe, “O Mwami, kotupa cilyo eeco lyoonse.” 35Jesu wakati, “Ndime cinkwa cipa buumi. Kufumbwa muntu uuza kulindime takooyoofwa limbi nzala, ayooyo uusyoma mulindime, takooyoofwa limbi nyota pe. 36Pele mbuli mbondamwaambila kale kuti, nikuba kuti mulindibwene, tamundisyomi pe. 37Pele boonse aabo mbandipa Taata balaza kulindime, nkabela kufumbwa uuza kulindime nsikoomutanda pe. 38Nkaambo mebo nsiindakaboola ano ansi kuzwa kujulu kuti nzoocite luyando lwangu ndemwini pe. Ndakaboolela kucita ziyanda yooyo wakandituma. 39Lino nzyayanda ooyo wakandituma nzyakuti nditasweekelwi naba omwe wa baabo mbaandipa, pele kuti ndikababusye mubuzuba bwamamanino. 40Nkaambo ziyanda Taata nzyakuti kufumbwa uubona mwana akumusyoma abe aabuumi butamani, eelyo mebo ndiyoomubusya mubuzuba bwamamanino.”
41Bamvwe boobo bapati ba Bajuda bakatalika kumutongooka akaambo kamakani ngaakaamba kuti, “Ndime cinkwa cakazwa kujulu.” 42Bakaamba nkaambo kamajwi aaya bakati, “Sena ooyu teensi Jesu mwanaa Josefa? Wisi abanyina tulibazi. Ino inga waamba buti ono kuti, ‘Ndakazwa kujulu?’” 43Jesu wakabaingula kuti, “Mutatongooki pe. 44Taakwe uukonzya kuza kulindime ccita kuti Taata wakandituma waba nguumukwelela kulindime. Eelyo ambebo ndiyoomubusya mubuzuba bwamamanino. 45Kulilembedwe mubasinsimi kuti, ‘Boonse bayooiisigwa a Leza.’ Uuli oonse uumvwa majwi aa Taata akwiiya kulinguwe nguuboola kulindime. 46Taakwe muntu naba omwe wakabona Taata pe, pele buyo mebo nindakazwa kuli Leza Taata, ndime ndakamubona.
47“Masimpe, ndamwaambila kuti kufumbwa muntu uundisyoma ulaabuumi butamani. 48Ndime cinkwa cipa buumi. 49Bamauso bakalya mana munkanda, pele bakafwa. 50Ono nceeci cinkwa cakazwa kujulu cakuti muntu wacilya atakafwidilili. 51Ndime cinkwa cipa buumi cakazwa kujulu. Inga muntu naa wacilya ulapona kukabe kutamani. Alimwi cinkwa eeco nceyoopa mmubili wangu kutegwa bantu munyika mboizulwa babe aabuumi.”
52Mpoonya bapati ba Bajuda bakatalika kukazyanya mulicabo kuti, “Ino muntu ooyu inga watupa buti mubili wakwe kuti tuulye?” 53Eelyo Jesu wakati kuli mbabo, “Masimpe kuti mwatalya mubili wa Mwanaa Muntu akunywa bulowa bwakwe, tamujisi buumi muli ndinywe pe. 54Muntu woonse uulya mubili wangu akunywa bulowa bwangu ulaabuumi butamani, alimwi ndiyoomubusya mubuzuba bwamamanino. 55Nkaambo mubili wangu nkokulya kwini-kwini abwalo bulowa bwangu nkokunywa kwini-kwini. 56Ooyo uulya mubili wangu akunywa bulowa bwangu nguukkalilide muli ndime, ambebo ndikkede muli nguwe. 57Mbubonya Taata muumi mbwaakandituma, nkabela ambebo ndili muumi akaambo ka Taata. Aboobo uundilya uyooba muumi akaambo kangu. 58Eeci ncecinkwa cakazwa kujulu, citali mbuli ceeco ncibakalya bamauso nikwakamana bakafwa. Kufumbwa muntu uulya cinkwa eeci unoopona lyoonse.” 59Jesu wakaamba makani aaya naakali kwiisya mucikombelo ca Bajuda ciindi naakali ku Kapenaumu.
Majwi aapa buumi butamani
60Banji-banji basikwiiya nibakamvwa makani aaya bakaamba kuti, “Makani aaya mmapati. Nguni uukonzya kwaamvwa?” 61Pele Jesu, mbwaakaziba kuti basikwiiya bakwe bakali kutongooka akaambo kamakani aaya, wakati kuli mbabo, “Sena makani aaya amutyompya? 62Ino inga kwaba buti kuti mwabona Mwanaa Muntu katanta kubweeda ooko nkwaakabede kusaanguna? 63Muuya Uusalala nguupa buumi butamani. Muntu takonzyi kuba abuumi oobu lwakwe mwini pe. Majwi aaya ngemwaambila ngaaleta Muuya wa Leza uupa buumi. 64Pele mpobali bamwi bantu batasyomi.” Nkaambo Jesu wakalizi kuzwida kumatalikilo aabo batali kumusyoma alimwi awalo ooyo uutikamwaabe. 65Alimwi wakati, “Aaka nkakaambo ncindamwaambila kuti taakwe uukonzya kuboola kulindime ccita kuti wapegwa nguzu a Taata zyakuza kulindime.”
66Musule akooku bunji bwabasikwiiya bakwe bakamusiya baleka kumutobela. 67Eelyo Jesu wakabuzya bali kkumi ababili kuti, “Sena anywebo muyanda kundisiya?”
68Saimoni Pita wakaingula kuti, “O Mwami, ino inga swebo twaya kulini? Yebo nduwe oojisi majwi aabuumi butamani. 69Swebo tulasyoma, akuziba kuti nduwe Uusalala uuzwa kuli Leza.”
70Jesu wakabaambila kuti, “Tee ndime ndakamusala nomuli kkumi ababili, pesi umwi wanu mmubi.” 71Wakali kwaamba Judasi mwanaa Saimoni Isikaliyoti, nkaambo ooyu nikuba kuti wakali wankamu yabali kkumi ababili ngonguwe wakali kuyoomwaaba.
Currently Selected:
Joni 6: Tonga96
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Tonga Bible © United Bible Societies, 1994.