LIRAANGA 2
2
1Nindio likulu nende lilova viamalwa khulombwa nende vindu viosi muvio. 2Khulitukhu lia saba, Nyasaye yali umali muhinzilu kwekwe kwa yali nakholi; nahulukha khulitukhu lia saba, namali khukhola muhinzilu kwekwe kwosi. 3Nyasaye yakasitsa litukhu lia saba, khandi nalikhola khuva litakatifu, shichila nalio litukhu lia yahulukha namali khukhola muhinzilu kwekwe ku khuloonga. 4Nindio khandi likulu nende lilova vialoongwa.
Mulimi Kwa Edeni
Khulitukhu liu Mwami Nyasaye yalomba likulu nende lilova, 5viraakwa viali nivishili khuraanga khumeela khulilova, khali vulimu nuvushili khuseevukha, shichila Mwami Nyasaye yali nashili khukhuvitsa imbula, khandi shichila mundu avulakhuho wali walima; 6navutswa matsi karulanga hasi mulilova, kashinditsa lilova liosi.
7Mwami Nyasaye yalomba mundu musatsa khu malova khurula hasi. Yavuura mu mulu ku mundu miuya chihaananga vulamu; ma mundu mwenoyo nakwa shilombe shiu vulamu.
8Mwami Nyasaye yaraaka viraakwa mu Mulimi kwa Edeni, kwali khuluveka luli ivukwi. Yavikha mu mulimi kwenoko mundu wa yali nalombi. 9Mwami Nyasaye yaraaka shia musala kwosi kwalolekhanga khuva mulahi khandi kwali na matunda malahi kukhulia. Yali waraaka khandi hakari mu mulimi, kwenoko musala kuhaananga vulamu, nende musala kuhaananga vucheli vu khumanya malahi nende matamanu. 10Khwali nu muchela mu Mulimi kwa Edeni. Matsi ku muchela kwenoko kakholomokhanga, nikasaminya viraakwa vienevo. Kwahukhananga mu, michela chine nu kwakharula Edeni. 11Muchela ku khuraanga kwalaangwangwa Pishoni; kwa votokhanyinya shivala shiosi shia Havila, shivala shia itsahabu inyolekhamu. 12Itsahabu indahi muno irulanga mu shivala shienesho; khuliyo na marashi kalaangwangwa bedola nende machina kalaangwangwa shohamu. 13Muchela kwa khavili kulaangwangwa Gihoni; nakwo kwavotokhana shivala shiosi shia Etsopia.#2:13 Etsopia: Inoho Kushi. 14Muchela kwa khavaka kwalaangwangwa Tigirisi. Kwakholomokhanga khuluveka luli Ivukwi wi shivala shia Ashuria. Muchela kwa khane kwalaangwangwa Efurate.
15Mwami Nyasaye yavukula mundu, namuvikha mu Mulimi kwa Edeni khukulima khandi khukulinda vulahi. 16Mwami Nyasaye yavoolela mundu, “Unyala khulia khuli wenyi shia litunda liosi khurula khu musala kwosi mu mulimi yumu; 17navutswa uvuli khuliakhu litunda khurula khu musala kuhaananga vucheli vu khumanya malahi nende matamanu; shichila khulitukhu lia uliitsa khuliakhu litunda khu musala kwenoko, ni kilikali, nalwo lwa uliitsa khukhutsa.”
18Mwami Nyasaye yavoola, “Shiuvuli vulahi mundu musatsa khumenya wonyene tawe. Namulombela mundu unyala khumukhonya utushili khumenya naye.” 19Khulwa yako, Mwami Nyasaye yavukula malova khurula hasi, nalomba tsinyama tsiumbulimu tsiosi nende manyonyi koosi. Yalera via yali nalombi imbeli wu mundu alole khuli anyala khuvikulikha mira. Shia lira lia yakulikhanga shilombe, nalio lira lia shia shilombe shalaangwangwa. 20Mundu yakulikha mira manyonyi koosi nende miruku chiosi; navutswa avulakhu khu vilombe vienevo shiali shinyala khumukhonya.
21Mwami Nyasaye yachila mundu musatsa nakona tsindolo tsinyishi. Lwa yali nashikonanga, yavukula lulala khu tsimbalu tsietsie, nahanikha inyama havundu ha yali narulitse luvalu henaho. 22Mwami Nyasaye yalomba mukhali khurula khu luvalu, lwa yali narulitse khu mundu musatsa, namuhila khu mundu musatsa. 23Nalwo lwa mundu musatsa yavoola,
“Leelo, uyu neye usasananga ninzi mwene --
shikuumba shiu mmbili kwanje, inyama yu mmbili kwanje.
Aliitsa khulaangwa, ‘Mukhali’
shichila yarulitswa khu mundu musatsa.”
24Nashio shivune shichilanga musatsa, nalekha tata wewe nende mama wewe, ahaambana nu mukhali wewe, vakwa mmbili mulala.
25Musatsa nu mukhali wewe voosi vali shekenye, navutswa shivalolakhu tsisoni tsiosi tawe.
Currently Selected:
LIRAANGA 2: LLLPRO
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© The Bible Society of Kenya, 2013